Read Lashi 2 SAMUELA 16 Bible Online

2 SAMUELA 16 - Lashi bible

2 SAMUELA 16

¹David gi boem gung mo dajhi' loid yhe: lo" ri Mephiboshed da" dei zoo: Ziba gi loo zei: eig du: moo zooyho' eig shoo:- zabyid shi" dashoo: jhung:- shi" joem: dasho: jhung:- zabyid yhid: byeung" sho' bo da" shooyid thung: dathung: tho' re" lo ziri nyeigdain tung" shoug" goo" bye:.

²Khokham David gi nyang: ri «He: zi dangain" ziyo' nang cenoem yhe: koid wa lha"» ga: myid. Ziba gi «Loo zei: eig du: gi aseing: khokham da" ikoin deungkhu: byu yi zhung: wa shid re" nghoid- zooyho' yo' shi" gi byu yi zoo: wa shid re" nghoid wigi zabyid yhid: gi nyangnu" dain: pyoid moo myung: dau uri shug wa shid re" nghoid» ga: tid.

³Khokham gi nyang: ri «Re" aseing: Sholu da" myid: zoo: Mephiboshed khamoo: nyid» ga: myid. Ziba gi «Nyang: gi Yerusalem moo nyid nyid da- ciwim ziri nya: phoug" Sholu da" mungdain: nyang: ri Israela byumyu" yi akhid" doem byid: wa zi nghoid ga: myid jho: nyid yoomo nghoid» ga: tid.

⁴Khokham gi Ziba ri «Mephiboshed seing: da" dangain" re" zi nghoid da» ga: tid. Ziba gi «Ngoo gi re" dei zoo: nghoid- khanham we' aseing: khokham ri nheig dab nyid wa zi nghoid» ga: phug tid.

⁵Khokham David Bahurim voogung moo ju" uri Sholu akung: dakung: nghoid da" Gera nya: zoo: Shimi gi nheing" zoo" re nyang: ri shoug" wa ga: thu re" loo bye:.

⁶David ri nya: byu yi yo' kangso' zung" bang: wigi vang: lheung too" bye: ri Shimi gi David yo' nya: gyizoug: bang: ri lug boem yo' du" nyid da:.

⁷Shimi gi nyang: ri nheing" ziyo' tid zigi «Byu said su: we"- youg: koid su: we" thu loo" we' phang: thu loo" we'.

⁸Nang gi Sholu da" mungdain: ri yu pyam su: nghoid ziyo' nang gi Sholu ikoin deungkhu: byu yiri gye" said pyam bye: yoomo akhid" ASEING dam byid: zi nghoid. Nyang: gi byu said ziyo' byo, yhoin su: nghoid yoomo aseing: gi mungdain: ri re" zoo: Absalom jhang byid: bye:» ga: tid.

⁹Nya: yhid Zeruia da" nya: zoo: Abishai gi khokham ri «Aseing: khokham we"- ciwim yoomo he: lakhuid" ri nheing" nhang: nyid lha"- ngoo thei: khyoo: yhe: lho: nya: vhuloem ri yhe: phyed nhang: la» ga: tid.

¹⁰Khokham gi Abishai yo' nya: mang: Yoab ri «He: zigi re" tang: moo" anghoid- ASEING tid nhang: yoomo nyang: nheing" nyid zi nghoid rigi nyang: hougsu" koid nyid ziri hang" yhe: myid: wa akhang" yo" nyid la"» ga: myid:.

¹¹David gi Abishai yo' nya: gyizoug: yi dangain" ri «Nga" zoo: nyang: ngoo ri said wa ga: yoem: kaid yen" zi nghoid yoomo he: Benyamin byu yiri ciwim wigi moug" cang boo wa lha"- ASEING nyang: ri nheing" nhang: zi nghoid yoomo nyang: ri kyeing" to" to" wigi nau khyo" nheing" nyid baja".

¹²ASEING gi nga" akhyeing" ziri yu" xoem" wigi nyang: ngoo ri nheing" yoomo main dajhi' khyalang" kaid byid: abe» ga: tid.

¹³Houg: yoomo David yo' nya: byu yi khyoo: doem xo' so" yhe: loo" bye:. Shimi we' nyangnu" ri cang myi: re" wigi bouggung yam khyo" so" re" lho: nheing" ziyo' nyangnu" ri lug boem yo' du"- myidzhoo" she: sain"- koid bye:.

¹⁴Khokham phoo yo' nya: byu yi Yodan gyid lang moo ju" ri zheing: myoung: boem yoomo nyangnu" hougmoo: dougno: nyid boem ago".

¹⁵Absalom yo' nya: jhang cang yen" da" Israela byumyu" yi dangain" gi Yerusalem voogung khyoo: vang lo boem wigi nyangnu" yo' dage" Ahithophela we' bo nyid da:.

¹⁶David byencang" Hushai gi Absalom yo' shoug" goo" lang" «Khokham kangso' sheing: nyid baja" o"- khokham kangso' sheing: nyid baja" o"» ga: nyho: tid nyid.

¹⁷Absalom gi nyang: ri «Re" dang: zung" byencang" David ciwim nyid la"- nang nyang: yo' ciwim acang la"» ga: myid.

¹⁸Hushai gi «Ngoo citid wa lha"- ngoo gi ASEING we' mung" byu yi we' Israela byumyu" dangain" bang: we' khyen: yu bye: da" su: jhang khyoo: dab wa zi nghoid. Ngoo nang yo' dage" nyid wa zi nghoid.

¹⁹Houg: tho' gootu: nga" aseing: nya: zoo: anghoid rigi ngoo hang" ri dei byid: wa lha"- ngoo re" phoo ri dei byid: yhang: ti" akhid" nang ri dei byid: wa zi nghoid» ga: tid.

²⁰Hau: thang: Absalom Ahithophela shoid khyoo: shu: wigi «Akhid" nyhang" hid: moo ju" nyid bye:- nyhang" cikoid wa ein: ziri nang khasu" phajhi" byid: wa lha"» ga: myid:.

²¹Ahithophela gi «Khokham vang" zung" wa shid re" nyhid: too" kho' da" re" phoo da" dangcang: yi yo' gung shoo" yhe: zoem" khoug: we'. Houg: lang" re" phoo nang ri nya: gyi khyo" soin: yu ziyo' re" thang: cang bang: dangain" yoem: yoo" wa ziri Israela byumyu" yugkhang" moo" si' wa zi nghoid» ga: tid bye:.

²²Houg: yoomo nyangnu" gi Absalom shid re" khokham yhoemkhung: tho' moo zoem" daloem: koid byid: wigi Absalom gi yugkhang" moo" shidkhoin" khyo: lid vang lo" lho: nya: phoo da" dangcang: yi yo' gung shoo" zoem" khoug: bye:.

²³Hau: ayo, Ahithophela byid: da" phajhi" dang: khoin" khang" moo" gi Mangso mungdang: nghoid ga: myid jho: ziyo' khab yu nyid boem yoomo David yo' Absalom eig phatang: goin" hau: ziri cang nyid boem ago".