Read Lashi 2 SAMUELA 17 Bible Online

2 SAMUELA 17 - Lashi bible

2 SAMUELA 17

¹Hau: thang: khamyhang amyang" ri Ahithophela gi Absalom ri «Byu damoin eig khyeing" khyen: lho: akhamyen nyang: David thang: cang khaid wa akhang" byid: we'.

²Nyang: myung: wigi yoem: neing: nyid uri ngoo nyang: ri khaid zain: wa. Nyang: gi dain ziyo' nya: byu yi dangain" we' phang: sain" loo" wa zi nghoid. Ngoo gi khokham ri kyeing" said wigi.

³Myhiseig gi phoo seig thang: moo cang lo' yhang: ti" re" jhang khyoo: nya: byu dangain" bang: ri shu" loo wa zi nghoid. Nang said pyam nau da" yug ri kyeing" danghoid wigi deing da" byumyu" yigi yug yoo nyid wa zi nghoid.

⁴He: zigi Absalom yo' Israela byumyu" vhujhung: yi dangain" bang: shid re" gyo: ngei tung" da" phajhi" dang: yhang: ti" bue" nyid da:.

⁵Absalom gi «Akhid" Hushai ri khe: kaid yu ge'. Nyang: tid dang: ri nyhang" gyo: yu" shang» ga: tid.

⁶Hushai ju" lang" Absalom gi nyang: ri «He: zigi ngoonu" ri Ahithophela gi byid: da" phajhi" dang: nghoid. He: ziri ngoonu" cang wa la"- acang nghoid rigi ngoonu" cikoid wa ein: ziri tid kyoo" we'» ga: tid.

⁷Hushai gi «Akhid" lheing: nanu" ri Ahithophela phajhi" byid: dang: gi agi nghoid da:.

⁸Re" phoo David yo' nya: byu yi gi meing: zain: gye" bui" mo, nghoid wigi nyangnu" gi voem myhi' dadu: nya: zoo: yi ri khoem lho: gyi koid nyid yhang: ti" voem" nyid ziri nang se' wa zi nghoid. Re" phoo gi thung" shoug" yu" zi myoo: bye: da" gyizoo: nghoid yoomo myen" ri nya: byu yi yo' dage" anyid.

⁹Akhid" nyang: nyang: gi lug-ug anghoid lang" dakhyi' khyi' moo gau" jo, wa bye:. David gi re" byu yiri khaid zain: ziyo' dalheing: dam- hau: ziri shoug" gyoo: su: hang" nghoid loug we' re" byu yi soem" byug bye: ga: tid boem wa zi nghoid.

¹⁰Hau: thang: re" phoo gi gye" bue" da" gyizoo: nghoid ziyo' nya: byu yi we' gyi yo" zain: bang: nghoid ziri Israela byumyu" dangain" mo, si' wa yoomo khang: khyi yhang: ti" agyug bang: lang" gyoug boem wa zi nghoid.

¹¹Ngoo phajhi" byid: nau zigi panglai: gyid yam mo midcoo: myhoo' myo: da" damung" dain: goin" mo Israela byumyu" dangain" ziri khe: jheing" to" wigi meing: zain: jang: khyoo: nang nyang: shu" yhi: we'.

¹²Nyhang" gi David khamoo: nyid ga: ziri sho: myang wigi ciwim ziri nyang: asi' shi" uri yhe: khaid zain: wa zi nghoid. Nyang: we' nya: byu yi dangain" we' loid byoin wa zi anghoid.

¹³Nyang: voogung daloem: khyoo: vang lo" nghoid rigi nyhang" hau: voomoo" ri tei" yo' lang: khoug: khyoo: lang: phyid khyo' pyam wa zi nghoid. Hau: bouggung moo lugzeing daloem: we' yo" deing jo, wa zi anghoid» ga: tid.

¹⁴Absalom yo' Israela byumyu" yi dangain gi «Ahithophela da" phajhi" byid: dang: tho' Hushai byid: da" phajhi" dang: gi je" ge da» ga: tid. Absalom adang moo yau: khi" kyi" khyeug shoug" nhang: wa shid re" Ahithophela da" ge phajhi" byid: dang: khyoo: acang wa shid re" ASEING myid phyed to" khyoo: nghoid.

¹⁵Hau: thang: Hushai gi khainjung Zadog yo' Abiatha tang: ri nyang: gi Asalom yo' Israela vhujhung: yiri khayhang: ti" phajhi" dang: byid: khyoo: yo' Ahithophela gi khayhangti" phajhi" dang: ri byid: bye: khyoo: ri tid kyoo" bye:.

¹⁶Xo' lho: Hushai gi «David yo' nya: byu yiri myheig wigi said" pyam zi ashoug" goo" baja" dain" pyoid mo gyid lang cang damyen goin" akhyeing: aze" pain' loo: za: dalheing: dam Yodan gyid lang ri gu: dab wa shid" re" lu dang: akhid" nyang: myab yhe: kyoo" ge'» ga: pug tid.

¹⁷Abiatha da" nya: zoo: Yonathan yo' Zadog da" nya: zo: Ahimaza tang: gi voomoo" khyoo: vang lo" ri zheing: myang wa ziri gyoug nyid yoomo Yerusalem voomoo" yam mo Enrogela gyid bug moo nyid nyid da:. Myiyi: nu" dei zoo: dayug gi atheing: re" wigi cibue" nyid ziri nya: tang: ri re" tid kyo" lho: nya: tang: we' khokham David ri yhe: tid kyoo" bye:.

¹⁸Nghoid loug we' danyid" gi nya: tang: ri zooshang: zoo: dayug re" myang wigi Absalom ri lo" tid kyoo" yoomo Bahurim voogung mo byu dayug yhoem: moo gau" wa shid re" myab myab phang: thu loo" bye:. Nya: yhoem: nam moo gyid thung" daloem: jo, wigi nya: tang: we' houg: moo yhe: vang nyid da:.

¹⁹Hau: yug da" yhoem: seing myhi' we' thain: dakhyab yu lho: gyid thung" nhoid moo nghoeb wigi gug lhab' too" yoomo hang" we' aboin: goo" nghoid da:.

²⁰Absalom da" moo" gyizoug: yi yhoem: khyoo: re" wigi myiyi: myhi' ri «Ahimaza yo' Yonathan khamoo nyid» ga: re" myid: bye:. Nyang: gi «Gyid lang thu: tab dab loo" khari" bye:» ga: tid. Byu yigi nya: tang: ri cang sho: nghoid loug we' amyang yoomo Yerusalem khyoo: doem tau" loo" bye:.

²¹Nyangnu" phang: lo" thang: ri Ahimaza yo' Yonathan gyid thung" mo thu lo wigi khokham David ri yhe: tid kyoo" bye:. Nya: tang: gi nyang: ri Ahithophela khasu" thougtheung wa shid re" soin' nyid khyoo: ri tid kyo" wigi gyid lang ri myab gu: dab wa shid re" tid bye:.

²²Houg: yoomo David yo' nya: byu yi Yodan gyid lang thu: tab khyoo: gu: dab boem wigi myo, myang loo yo' dage" nyangnu" bain gu: dab boem bye:.

²³Ahithophela gi nya: phajhi" byid: dang: ri azheing: cang ziri shau" myang lang" nya: loo zei: moo zhung: wigi nya: co' phyed moug: khyoo: tau" loo" khari" bye:. Nyang: soin' to" moo" zoo" ri bain koid thang: ri nya: gung nyang: tei" lhang" shid: bye:. Nyang: ri ikoin deungkhu: byu yi da" loeb yoo moo myhoeb too" bye:.

²⁴David Mahanaim voogung khyoo: ju" lo uri Absalom yo' Israela byumyu" yi we' Yodan gyid lang ri bain gu: boem bye:.

²⁵(Absalom gi Yoab da" joyoo moo Amasa ri gyizoo: yiri vhoebkhang" da" gyizoug: aya: byid: bye:. Amasa gi Yoab da" nya: myhi' Zeruia nya: nhung" Nahasha da" myiyi: zoo: Abigela yo' Ishamaela tang: da" nya: zoo: nghoid da:.)

²⁶Absalom yo' nya: byu yigi Gilead moo dab koid wigi nyid boem.

²⁷David Mahanaim voogung moo ju" uri Amon mung" Raba voomoo" mo Nahasha da" nya: zoo: Shobi yo' we' Lodiba voomoo" mo Amiela da" nya: zoo: Makhira yo' we' Gilead mung" Rogelim voo mo Barazilai yo' we' shoug" goo" bye:.

²⁸Nyangnu" gi David yo' nya: byu yi kyoem: khoug: moo zooyoid gyid shid ziyo' myung dau nyid ziri se' boem. Hougsu" yoomo nyangnu" gi jarung:- yam: yo' phyang" myhu" ri we' David yo' nya: byu yi zoo: wa shid re" sungsoo:- Yoono,- voem:- shi" kyug joem nug- shigyang:- byooyhid:- thobaid- nunoug" kyug yo' yang dayham" ri re" di" byid: boem bye:.