Read Lashi 2 SAMUELA 18 Bible Online

2 SAMUELA 18 - Lashi bible

2 SAMUELA 18

¹Khokham David gi nya: byu dangain" ri khe: zheing" to" lho: nyangnu" ri dakhyeing" yug dashoo: yug dab khyo" wigi kho' to" lho: houg: bang: ri vhoebkhang" wa shid re" vhoebkhang" zoug: yiri we' soin' too" bye:.

²Hau: thang: phung: soem" phung: kho' lho: daphung: ri Yoab- thang: daphung: ri Yoab da" nya: nhung" Abishai- soem" phung: ein: phung: ri Gad voomoo" mo Itai bang: ri vhoebkhang" nhang: wigi thu loo" nhang: bye:. Xo' lho: khokham gi nya: byu yiri «Ngoo we' nanu" yo' dage" cang wa nghoid» ga: tid.

³Nyangnu" gi «Nang gi ngoonu" yo' dage" ri" wa zi anghoid. Ngoonu" mo byu dayham" tau" phang: loo" nghoid nghoid- ngoonu" byu dago" yi" shid: pyam zi shoug" nghoid nghoid gyivoo shid re" gootu: ngoonu" da" byu damoin yo' du nyid da:. Nang he: voomoo" moo nyid wigi ngoonu" ri pang" nyid ri je" gi wa zi nghoid» ga: tid bye:.

⁴Khokham phoo we' «Nanu" ge thang ga: myid to" zi cinghoid loug we' ngoo cang koid wa zi nghoid» ga: tid. Hau: thang: nya: byu yi dakhyeing" dab- dashoo: dab khyo" wigi jen thu lo" nyid uri nyang: gi vang" khyam: khoem" yam moo yab jo, da:.

⁵Nyang: gi Yoab- Abishai yo' Itai bang: ri amyeing" byid: kaid zigi «Nga" myonhoo: ri tu: wigi zooyam zoo: Absalom ri lo, aju" nhang: goo"» ga: bye:. Houg: lang" gyiphung: dangain" bang: gi David nya: moo" voin gyizoug: yiri tid ziri dangain" shoug" gyoo: bye: ago".

⁶David da" gyiphung: gi kyoem: khoug: khyoo: yhe: lo" wigi Israela byumyu" yi yo' Ephrim siyoo moo zain: goo" bye:.

⁷David da" byu yigi Israela byumyu" yiri oung: bye: zi nghoid. Hau: zigi gyoug pho" gyi soem" moo" zoo" nghoid ziyo' hau: nyid" ri byu eig moin ri said pyam bye:.

⁸Hougsu" zain: go" nyid zigi kyoem: khoug: dangain" moo byo: loo" khare" wigi meing: zain: jang moo said pyam tho' siyoo moo shid: zigi je myo: nyid da:.

⁹Absalom gi David da" byu dayham" yo' nyeigdain tung" shoug" goo" bye:. Absalom gi loo zei: ri zhung: wigi shookhi" gam gyoo: cang tang" yen" ri nya: vhuloem seig koo' moo ye" jo, da:. Loo zei: tang" phang: loo" yoomo Absalom gi moug: laid moo ye" lhang" too" bye:.

¹⁰David da" byu dayug gi myang wigi Yoab ri «Aseing we"- Absalom gi shookhi" koo' moo ye" lhang" to" ziri ngoo myang khoo' bye:» ga: tid kyo".

¹¹Yoab gi «Nang- nyang: ri myang bye: rigi ciwim yoomo hau: joyoo mo nyang: ri asaid pyam lha"- ngoo nang ri ngei daxi: yo' phyid" cu" byid: wa zi nghoid the'» ga: tid.

¹²Nghoid loug we' hau: yug gi «Nang- ngoo ri ngei dakhyeing" byid: nghoid loug we' ngoo gi khokham nya: zoo: ri lo, nyhoug" yo' we' zang" wa zi anghoid. Nang ri we' Abishai yo' Itai tang: ri we' khokham phoo gi nga" myonhoo: ri tu: wigi zooyam zoo: Absalom ri azang" byid: goo" ga: da" amyeing" dang: ri nyhang" dangain" shoug" gyoo: bye: zi nghoid.

¹³Hougsu" anghoid lang" ngoo gi khokham phoo da" amyeing" ri atam" gyoo: looza: Absalom ri said pyam nghoid rigi hau: khyoo: khokham phoo shoug" gyoo: lang" nyang: dangain" ziri si' lang" nang ngoo ri yo" khoem yu wa zi anghoid» ga: tid.

¹⁴Yoab gi «Ngoo- nang yo' gootu: akhyeing: anau ze" pain' loo» ga: tid. Nyang: gi lham: soem" khaid yu ci: wigi shookhi" gam moo ye" lhang" to" da" dei: nyid shi" su: Absalom da" yanggang moo thau" kyang kaid bye:.

¹⁵Hau: thang: Yoab da" gyizoo: daxi: yug Absalom jhang khyoo: zeing: re" boem wigi nyang: ri pain' said pyam bye:.

¹⁶Yoab gi zain: go" zi noo: wa shid re" laboo" moid kaid wigi nya: gyiphung: yi we' Israela byumyu" yiri khaid zain: jang" mo doem tau" lo boem bye:.

¹⁷Nyangnu" gi Absalom da" mang ri yu wigi hau: kyoem: khoug: mo duang: khuang" no, daloem: moo du" zei kaid wigi lugzeing joem yo' nghoeb too" bye:. Israela byumyu" yi dangain" we' nyang: yug nya: yhoem: khyoo: tau" lo" byug bye:.

¹⁸Absalom gi nya: kangso' dei da" ayo, moo nya: myeing xo' wa shid re" yuggi zoo: ayoo" yoomo nyang: nya: shid re" khokham lang: gyoin: moo laxoem" zeing koid too" bye:. Hougsu" yoomo hau: ziri nya: myeing myheing to" wigi akhid" nyid" ju" sho' Absalom laxoem" ga: se' nyid boem.

¹⁹Hau: thang: Zadog nya: zoo: Ahimaza gi Yoab ri «Aseing: gi nyang: ri nya: gyivoo lo, mo khyoid yu bye: ga: da" lu dang: gi ri khokham ri lo" tang" tid wa shid re" ngoo ri nhang: kaid we'» ga: tid.

²⁰Yoab gi «Anghoid- akhid" nyid" za: gi lu dang: gi ayo" tid kyoo" wa akhid" nyid" gi khokham' nya: zoo: shid: yoomo gootu: danyid" nyid" ri dayo" to' tid kyoo" wa» ga: tid.

²¹Hau: thang: nyang: gi Etiopi byumyu" nya: join dayug ri «nang myang bye: ziyo' dayhang: ti" khokham phoo ri lo" tid kyoo" we'» ga: tid. Join phoo we' goeb pid wigi tang" thu lo" byug bye:.

²²Ahimaza tid zigi «Ci: bui" loug bui" ngoo aci'. Jeju" mo ngoo ri hau: lu dang: yu ci: yhi: nhang: we'» ga: tid. Yoab gi «Nga" zoo: we"- ciwim yoomo hau: ziri nang koid nau nyid lha" hau: zi koid wigi nang ce: jhungshug we' yoo" wa zi anghoid» ga: tid.

²³Ahimaza: doem tid zigi «Cibui" loug bui" ngoo yhe: nau» ga: tid. Houg: yoomo Ahimaza gi Yodan lang: khung" khyoo: khyo" wigi tang" thu gyoo" loo" khare" wigi daso' rigi join pho ri nyang: lid too" khoo' bye:.

²⁴David gi voomoo" mo da" akhau khyam: khoem" yo' nghi: shoid mo khyam: khoem" agyoo: moo zhung: jo, da:. Vang" zung" su: gi vang" khyam: phyoo" khyoo: do, lo" wigi khyam: khoem" mhang" moug: tho' moo lo" yab jo, da:. Nyang yu" kaid ri byu dayug nyang: kyeing" tang" lo nyid ziri myang kaid da:.

²⁵Nyang: gi khokham phoo ri yoid tid kaid wigi khokham phoo gi «nyang: kyeing" nghoid rigi lu dang: gi ci: lo nyid zi nghoid» ga: tid. Tang" su: gi je jhang lo nyid bye:.

²⁶Hau: thang: vang" zung" su: gi gootu: dayug nyang: kyeing" tang" lo nyid ziri myang wigi khyam: khoem" zung" su: ri yu" we' byu dayug tang" lo nyid da» ga: nyho: tid bye:. Khokham phoo gi «Hau: yug we' lu dang: gi ci: lo nyid zi nghoid» ga: tid.

²⁷Vang" zung" su: gi «Xang: shi" tang" loo su: gi Ahimaza yhang: ti" du» ga: tid. Khokham gi «Nyang: gi byugi nghoid- lu dang: gi ci: loo wa nghoid» ga: tid.

²⁸Ahimaza gi khokham phoo ri dang: nyho: vhu" kaid lho: nya: shidkhoin" moo goeb pid wigi Aseing: khokham ri thougtheung da" byu yi ri yo" zain: oung: pyam nhang: da" re" ASEING Mangsoo ri coung" nghei o"» ga: tid.

²⁹Khokham gi «Zooshang: Absalom ci: aca" lha"» ga: myid. Ahimaza gi «Yhoem: seing: we" re" moo" voin su: Yoab ngoo ri nhang: kaid uri soo" soo" gi lu: fu: go" nyid kho' nghoid loug we' ciwim bye: ziri gi ngoo ayo" tid» ga: phug tid bye:.

³⁰Khokham phoo gi nyang: ri «Thu: moo: lo" yab jo, we'» ga: tid lang" nyang: we' houg: moo lo" yab jo, bye:.

³¹Hau: thang: Etiopi byumyu" join phoo ju" lo wigi khokham ri - Yhoem: seing: khokham shid re" lu dang: gi ci: lo zi nghoid. Nang ri thougtheung nyid da" byu yiri ASEING gi akhid" nyid" oung: pyam nhang: bye:» ga: tid.

³²Khokham gi «Zooshang: Absalom gi ci: aca" lha"» ga: myid. Join phoo gi «Nang ri thougtheung mo, nghoid da" re" gyivoo yi dangain" mo, moo bue" yhang: ti" nyang: moo we' bue" bye: zi nghoid» ga: tid.

³³Khokham phoo gi nheig koug nheig nge zi shoug" nyid bye:. Nyang: gi vang khyam: khoem" mhang" mhoug: tho' khyoo: do, lo" wigi ngau nyid da:. Nyang: do, lo" lho: nga" zoo: we"- nga" zoo: Absalom we"- Absalom we"- nga" zoo we" nang shid: wa gungthid ngoo da shid: wa zi nga" zoo: Absalom we" nga" zoo: we"» ga: ngau nyid da:.