Read Lashi 2 SAMUELA 19 Bible Online

2 SAMUELA 19 - Lashi bible

2 SAMUELA 19

¹Khokham David gi Absalom shid re" ngougbyid ngougnhab yo' nheig koug nheig nge nyid ga: ziri Yoab ri tid kyo" boem.

²Khokham gi nya: zo: shid re" nheig koug nheig nge ziri shau" gyo: yoomo hau: nyid" David gyiphung: shid re" oung: yoomo pyoo: wa gungthid nheig koug jang: bue" byug ago".

³Nyangnu" gi meing: zain: jang mo phang: loo" yoomo sho' phu" da" gyizoo: yi yhang: ti" voomoo" khyoo: zheig zoo: doem tau" lo boem bye:.

⁴Khokham gi nya: myonhoo: nghoeb ci: wigi «Nga" zoo: we"- nga" zoo: Absalom we"- Absalom we"- nga" zoo: we"» ga: yoid ngau nyid.

⁵Yoab gi khokham yhoem: khyoo: yhe: wigi nyang: ri «Akhid" nyid" re" kangso' ri we' re" zoo: yi da" kangso' ri we' re" yhoem: seing: myhi' joem yo' dangcang: yi da" kangso' ri we' khyoid yu da" re" byu yiri nang myonhoo: shoem: nhang: abye:» ga: tid.

⁶Nang ri jheddab mo, ri nang ngheing" wigi nang ri ngheing" mo, ri nang thug pang" nyid nhung:. Re" moo" voin bang: yo' re" byu yigi re" shid re" ci" dang: kang: abo loo: nhung: zi nang nyang: bang bang koid shug nyid bye:. Akhid" nyid" Absalom ri kangso' dei nhang: wigi ngoonu" dangain" shid: nghoid rigi nang daje pyoo: wa myang ziri ngoo yo" si' bye:.

⁷Akhid" re" byu yiri nheig teing dang: yhe: tid we'. Nang akoid nghoid rigi nab kyoo' nab soin" ri re" byu yi nang yo' dayug we' anyid loo: wa ein: ziri ASEING myeing khyang" moo ngoo jham' tang: too" bye: zi nghoid. Hau: zigi re" pyaid moo thung" shau" da" kyi" khyeug jang mo je" gyi: thang da" yau: khi" kyi" kyeug khyoo: nghoid wa» ga: tid.

⁸Hau: thang: khokham phoo gi to' lho: voomoo" vang khyam: khoem" nam moo yhe: zhung: bye:. Nyang: hougmoo: nyid ziri nya: byu yi shoug" gyoo: lang" nyangnu" dangain" nya: ayam aqei: cang zeing: foem: nyid boem ago". Hau: ayo, ri Israela byu yi dangain" bang: gi nyang: yug nya: yhoem: khyoo: zheing: lo" boem bye:.

⁹Mungdain: goin" moo nyangnu" nya: agyoo: moo myeing" myoo: go" nyid boem bye:. Nyangnu" nyang: cang" nyang: tid go" nyid zigi khokham David gi ngoonu" ri gyivoo yi lo, mo khyoid yu bye:. Philisti byumyu" yi lo, mo we' ngoonu" ri khyoid yu bye:. Nghoid loug we' akhid" koem' gi Absalom shid re" kham zoo: yoomo mungdain: mo thu lo" byug bye:.

¹⁰Ngoonu" Absalom ri nyha" khokham koid wa khyo" nammain" foid gyoin: byid: bye: nghoid loug we' nyang: ri meing: zain: jang: moo said pyam zi shoug" bye:. Hougsu" yoomo khokham David doem tau" loo wa khyo" ciwim yoomo dayug we' ashu" koid loo go" lha"» ga: tid go" nyid boem.

¹¹Israela byumyu" yi citid go" nyid ga: da" lu dang: khokham David jang moo ju" loo" bye:. Houg: yoomo nyang: gi khainjung Zadog yo' Abiatha tang: ri nhang: kaid wigi «Yuda vhujhung: yiri ciwim yoomo khokham phoo ri nya: khokham vang" khyoo: doem shu" yu wa ziri thang: ze" khyo' go" lha".

¹²Nanu" gi nga" bidnoem seing" cang"- nga" suid" nga" shoo" nghoid ri nanu" ciwim yoomo ngoo ri doem re" shu" wa shid re" lo" thang moo nyid boem go" lha"» ga: myid: nhang: bye:.

¹³David gi Amasa ri we' yhe: tid kyoo" wa shid re" nya: tang: ri tid kaid zigi «Nang gi nga" bidnoem seing" cang" nghoid. Akhid" mo wigi ngoo nang ri Yoab da" joyoo moo gyi: phung: ri vhoeb khang" wa shid re" aya: byid: too" bye:. Ngoo hougsu" akoid nghoid rigi Mangsoo ngoo ri shid: sho' said wa zi nghoid.»

¹⁴David da" mungdang: gi Yuda byumyu" dangain" mo, da" dang: zung" khyoo: ri yo" yu bye: yoomo nyangnu" gi khokham phoo yo' nya: moo" voin bang: dangain" mo, doem tau" loo wa shid re" khokham phoo jhang khyoo: lu dang: foin: kaid bye:.

¹⁵Khokham phoo doem tau" lo da" khyoo: moo nyang: ri gyid lang gu: uri cang zung" wa shid re" Gilgala khyoo: re" nyid da" Yuda byu joem yo' Yodan gyi lang moo shoug" goo" bye:.

¹⁶Hau: ayo, ri Bahurim voo mo Benyamin akung:- Gera da" nya: zoo: Shimi gi khokham David ri tau yu wa ga: Yodan gyid lang khyoo: hain: hain: re" lo nyid da:.

¹⁷Benyamin akung: mo byu dakhyeing" yug we' nyang: yo' dage" nyid nyid da:. Sholu ikoin deungkhu: mo deizoo: Ziba we' nya: zoo: daxi: wim: yug- dei zoo: eigxi: yug yo' dage" re" wigi nyangnu" gi Yodan gyid lang moo khokham phoo shidkhoin" moo ju" ri" bye:.

¹⁸Khokham thang: cang bang: ri ku" tab yu wa ziyo' khokham ce: noem vho: ziri koid byid: wa shid re" nyangnu" gyid lang ri gu: dab bye:. Khokham phoo gi bain gu: dab wa jen" jen" nghoid nyid uri Shimi gi nya: shidkhoin" moo goeb pid wigi

¹⁹«Aseing: khokham we"- nang Yerusalem mo thu yhe: lo" bidnyid moo ngoo shoid lid loo" bye: da" khyoo: ri jeju" mo axoem" too" byid: o". Hau: khyoo: yoomo ngoo ri gyi akoid- hau: khyoo: ri khanham we' amyid loo: ja".

²⁰Aseing" we"- ngoo yooboo yo" ziri ngoo se' nyid wigi akhid" nyid" aseing: khokham ri tau yu wa shid re" mougzhung: shoid mo byumyu" yi akhoug: mo xang: shi" ju" re" da" zi nghoid» ga: tid.

²¹Zeruia da" nya: zoo: Abishai gi «Shimi gi aseing: khyen: to" da" khokham ri nheing" yoomo shid: shoug" wa zi nghoid» ga: tid.

²²Nghoid loug we' David gi Abishai yo' nya: mang: Yoab ri «Re" tang: ri phajhi" byid: wa shid re" hang" lhoung: lha". Re" tang: ngoo ri yau: khi" byid: wa ein: koid go" rhe"- akhid" ngoo gi Israela byumyu" yi da" khokham dayug nghoid ziyo' akhid" nyid" Israela byumyu" yi dayug we' shid: shoug" wa zi anghoid» ga: tid.

²³Houg: lho: nyang: gi Shimi ri «Nang gi shid: shoug" wa zi anghoid ein: nang ri ngoo dang: byid: bye:» ga: tid.

²⁴Hau: thang: Sholu da" myid: zoo: Mephiboshed gi khokham yo' shoug" goo" wa shid re" gyoo" loo bye:. Nyang: gi khokham phoo Yerusalem mo thu lo" da" ayo, mo zi ung: pui" yo' doem tau" lo da" ayo, ju" sho' khyid: we' acid"- nhoid mei: we' ayham"- byimi we' acid" nyid nyid da:.

²⁵Mephiboshed gi khokham ri shoug" goo" wa shid re" Yerusalem mo ju" re" uri khokham gi nyang: ri «Mephiboshed we"- nang gi ngoo yo' dage" acang zigi cenoem wim yoomo nghoid lha"» ga: myid:.

²⁶Nyang: phug tid zigi «Aseing: khokham we"- nang se' ziyo' dayhang: ti" ngoo gi khyid: gyoug: su: nghoid. Nang yo' dage" myang: jui: wigi yo" cang wa shid re" nga" dei zoo: ri myang: too: soin' nhang: nghoid loug we' ngoo ri damhau, nyid da:.

²⁷Nyang: gi nga" khyoo: ri aseing: khokham shidkhoin" moo mhau' bye:. Nghoid loug we' nang gi Mangso lagyoo: yo' du yoomo nang myid vho: khyo" koid wa.

²⁸Nga" phoo da" ikoin deungkhu: byu dangain" mo, gi aseing: khokham da" lo, moo shid: wa zi moin: yi" nyid bang: nghoid loug we' re" zoobui" mo zoo: wa shug wa akhang" nang ngoo ri byid: bye: zi nghoid. Aseing: khokham jang mo ngoo gootu: myonhoo: shoo: wa da" akhang" ajo, loo» ga: tid.

²⁹Khokham phoo gi «Nang tid wa zi gootu: aca" loo:- nang yo' Ziba gi Sholu da" ziyoo suid gain ri kho' yu wa shid re" ngoo myid phyed too" bye:» ga: tid.

³⁰Mephiboshed gi «Hau: zi dangain" Ziba yu pyam baja"- aseing: khokham gau: nyu: ziyo' yhoem: khyoo: doem yo" ju" lo zigi nga" shid re" gi" bye:» ga: tid.

³¹Gilead mung" mo Barazilai gi khokham phoo Yodan gyid lang gu uri cang zung" wa shid re" Rogelim mo gyo" loo bye:.

³²Barazilai gi shid xi: zain nghoid bye: yoomo gye" mang: bye: da:. Nyang: gi gye" yoo" zoo: yoo" shug ziyo' khokham phoo Mahanaim voogung moo lo" nyid uri zooshug yo' pang" thoug byid: bye:.

³³Khokham phoo gi nyang: ri «Yerusalem khyoo: ngoo yo' dage" cang loo we'. Nang ri ngoo yu" coung: wa» ga: tid.

³⁴Nghoid loug we' Barazilai gi «Ngoo gi myang" sho' nyid loo wa zi anghoid- ciwim wigi aseing: khokham yo' dage" Yerusalem khyoo: se' loo wa lha".

³⁵Ngoo gi shid xi: zain byeung" bye:. Myid pyo: khyoo: gootu: yo" byid: loo wa zi anghoid. Cizoo: cishug nghoid loug ngham" thui: agyoo: loo:. Ngoo gi aseing: khokham shid re" yoovoin lid: nhang: zi danghoid wa.

³⁶Ngoo gi houg: yhang: ti" jhungshug moo" zeing yo' amoin: loo: nghoid da:. Houg: yoomo Yodan gyid lang thu: tab moo dadoin: zoo: nang ri re" de" kaid wa.

³⁷Hau: thang: ngoo yhoem: khyoo: doem tau" lo" wigi myhi' phoo loeb nam moo shid: nhang: we'. He: zigi nga" zoo: Khimham nghoid. Nang ri dei byid: baja"- aseing: khokham nang shu" lo" wigi nang nyang: myid vho: thang khyo" nyang: ri lo" shu" nyid we' » ga: tid.

³⁸Khokham phoo gi «Ngoo nyang: ri shu" lo" lho: nang vho: khyo" nyang: ri koid wa zi nghoid. Hau: lho: nang mho' yoid zi dangain" ri koid byid: wa» ga: tid.

³⁹Hau: thang: David yo' nya: byu dangain" mo, gi Yodan gyid lang ri gu: dab loo" bye:. Nyang: gi Barazilai ri babug bug wigi nyang: ri mainkaid byid: thang: ri Barazilai yhoem: khyoo: doem tau" loo" bye:.

⁴⁰Khokham phoo gi bain gu: dab lang" Yuda byu dangain" yo' Israela byu agung dayi" bang: gi cang zung" ziyo' nyang: gi Khimham yo' dage" Gilgala khyoo: yhe: loo" bye:.

⁴¹Hau: thang: Israela byumyu" yi dangain" gi khokham jang" moo yhe: wigi nyang: ri - «Aseing: khokham we"- ngoonu" da" mang: nhung" nghoid da" Yuda byu yigi nang yo' re" ikoin deungkhu: yi re" byu yiri cang zung" wigi Yodan gyid lang ri gu: dab wa akhang" nyangnu" ri ciwim yoomo byid: lha"» ga: tid.

⁴²Yuda byumyu" yi gi «Khokham phoo gi ngoonu" byu nghoid yoomo ngoonu" hougsu" koid bye: zi nghoid. Hid: su" koid ziri nanu" ciwim nheig yo: lha". Nyang: gi ngoonu" ri zooshug we' abyid: gootu: ci: we' abyid: nghoid da» ga: tid.

⁴³Israela byumyu" yi gi «Khokham phoo gi nanu" da" mang: nhung" nghoid ga: loug we' khokham David yo' sen: da" moo" zoo" moo ngoonu" tho' daxi: boem tho' agoo" je sen: nyid da:. Ciwim yoomo nanu" ngoonu" ri yu" nge nyid boem go" lha". Khokham phoo ri shu" tau" loo wa shid re" xang: shi" sham: go" tid go" zi ngoonu" nghoid ein: ziri ato" myhid goo"» ga: phoug tid. Nghoid loug we' Yuda byu yi nyangnu" tid doem go" zigi Israela byumyu" yi tho' mo je thain: nyid da:.