Read Lashi 2 SAMUELA 2 Bible Online

2 SAMUELA 2 - Lashi bible

2 SAMUELA 2

¹Hau: thang: ri David gi ASEING ri «Ngoo yhe: wigi Yuda voogung joem mo davoo moo yhe: vhoebkhang" wa lha"» ga: myid: da:. ASEING gi «Ge» ga: phug tid. David gi «Kha: voomoo"» ga: doem myid: ASEING gi «Hebron voomoo"» ga: tid.

²Hougsu" nghoid yoomo David gi nya: yhoem: seing: myhi' nghoid da" Yezrela voogung mo Ahinoam yo' Kharmela voomoo" mo Nabala da" cougmoo" myhi' Abigela tang: ri shu" wigi Hebron voomoo" khyoo: yhe: lo" boem go".

³Nyang: gi nya: byu yi yo' nyangnu" da" yhoem: byu yiri shu" yhe: wigi Hebron aqei: ayam mo voomoo" cang yhe: nyid boem ago".

⁴Hau: thang: Yuda byumyu" yi Hebron khyoo: re" wigi David ri nammain" xu: joid byid: lho: Yuda khokham aya: too' byid: ago". Gilead mung" mo Yabesha byu yi Sholu ri myhoeb pyam bye: ga: ziri David shoug" gyoo: lang"

⁵Nyang: gi hau: jhang khyoo: lu dang: yo' dage" byu dayham" ri nhang: kaid. «Nyang: ri du: myhoeb pyam khyo" wigi nanu" khokham ri nanu" dang: zung" ziri yo" myang yoomo ASEING nanu" ri mainkaid byid: nyid baja" o".

⁶Akhid" ASEING gi nanu" ri nheig khyeug shoomyen: ziyo' mainkaid byid: nyid baja" o". Nanu" koid bye: ziyo' dakhyoo" ti" ngoo we' nanu" ri goolhoo' doem koid byid: wa zi nghoid.

⁷Yoem: kaid wigi seing" yang" nyid boem ge'. Nanu" khokham Sholu shid: bye: yoomo Yuda byumyu" yigi ngoo ri xu: joid byid: wigi nyangnu" khokham koid nhang: bye: zi nghoid» ga: pyeung: kaid.

⁸Sholu da" gyizoo: yi mo - Nera da" nya: zoo: gyizoug: Abna gi Sholu da" nya: zoo: Ishboshed yo' dage" Yodan gyid lang ri gu: wigi Mahanaim voomoo" khyoo: phang: yhe: lo" ago".

⁹Hougmoo Abna gi Ishboshed ri Gilead mung"- Ashera mung"- Yezrela mung"- Ephrim da" mung"- Benyamin da" mung" yo' Israela mung" dangain" da" khokham koid nhang: bye:.

¹⁰Nyang: Israela khokham bue" uri zain nyid myid: xi: zain ju" bye: ziyo' nyang: gi eig zain vhoebkhang" lid loo bye: zi nghoid. Nghoid loug we' Yuda kung: mo byu yigi David ri dang: zung" nyid boem wigi

¹¹Nyang: gi Hebron voogung moo khokham kho" zhung: wigi Yuda mung" ri nyhed zain dakhyam" vhoebkhang" bye: zi nghoid.

¹²Abna yo' Ishboshed da" gyizoug: yi gi Mahanaim mo zi Gibeon voomoo" khyoo: yhe: boem bye: ago".

¹³Zeruia da" nya: zoo: yoab yo' gootu: David da" moo" voin bang: gyid thoem" moo shoug" go" wigi nyangnu" dangain" mo, gi daphung: bang: gyid thoem" dashoid khyoo: wigi gootu: daphung: bang: gi gootu: shoid khyoo: zhung: jo, boem ago".

¹⁴Abna gi Yoab ri «Gyi jo, nu' yo' zain: shi' goo" wa shid re" eig shoid goin" mo yuggi zoo: yi dayham" ri too' nhang: shang» ga: tid. Yoab we' «Ge» ga: tid bye:.

¹⁵Hougsu" nghoid yoomo Ishboshed yo' Benyamin kung: mo byu daxe: eig yug gi David da" byu daxe: eig yug yo' zain: go" boem bye:.

¹⁶Yugkhang" moo" gi nya: gyi da" vhuloem moo zei: ci: wigi nyang: yug nyang: shamcoin" yo' nam cam" gyoo: moo thoug" byid: yoomo eig xe: myid: yug goin" zi dage" leung shid: boem abye: go". Hougsu" nghoid yoomo hau: thang: ri Gibeon joyoo ri «Shamcoin" joem da" jangpa:» ga: myeing to" boem ago".

¹⁷Hau: thang: ri gye" thain: da" meing: doem zain: zigi Abna yo' Israela byumyu" yigi David byu yiri soem" byug boem ago".

¹⁸Hougmoo Zeruia da" nya: zoo: yi soem" yug nghoid da" Yoab- Abishai yo' Asahela bang: bo da:. Asahela gi shoocid: yhang: ti" yo" tang" su: nghoid ziyo'

¹⁹Akhid" Abna ri dain: cang khaid nyid da:.

²⁰Abna thang: khyoo: lheing: yu" wigi «Nang Asahela anghoid lha"» ga: myid: bye:. Nyang: gi «Nghoid» ga: phug tid bye:.

²¹Abna gi «Ngoo ri acang khaid loo lhid"- gyizoo: dayug yug thang: moo cang khaid wigi nyang: yo" ziri yu we'» ga: tid. Nghoid loug we' Asahela gi nyang: ri xo' wigi cang khaid bye:.

²²Abna gi nyang: ri «Ngoo ri acang khaid nyid. Nang ri said pyam wa shid re" ngoo ri ciwim nhain' nyid lha" re" mang: Yoab ri ngoo myonhoo: khasu" ci: shug wa lha"» ga: dalheing: doem phug tid bye:.

²³Nghoid loug we' Asahela gi asoem" byid: yoomo Abna gi nya: lham: ri nungthang khyoo: yoem: yu sho' wigi nya: voem dau: moo goin kaid yoomo nya: lham: gi nung" khung: khyoo: goin kyang kaid bye:. Asahela myidgung moo leung shid: wigi yugkhang" moo" hau: joyoo moo ju" lang" nyang: leung jo, jang" moo no: lho: yab jo, boem ago".

²⁴Nghoid loug we' Yoab yo' Abishai gi Abna thang: khyoo: cang khaid wigi Gibeon seig moo" yoo khyoo: yhe: da" khyoo: moo jo, da" Gila voogung da" bidthu shoid mo Ama bouggung moo ju" ri bidvang loo" bye:.

²⁵Benyamin kung: mo byu yigi Abna jhang doem zeung: foem: wigi nyangnu" gi bouggung tho' moo yab jo, boem ago".

²⁶Abna gi Yoab ri khe: thu yu wigi nyhang" apyaid atoo: meing: dazain: go" nyid wa lha". Lo" thang moo gi vhooloo kho" tho' mo gootu: ciwe' bui" wa zi anghoid wa ziri ashau" myid rhe". Ngoonu" gi re" bidnoem yi danghoid. Re" byu yi ngoonu" ri acang khaid wa shid re" nang nyangnu" ri khamyhang myang" ri amyeing" byid: wa lha"» ga: tid.

²⁷Yoab gi «Nang ato' tid nghoid rigi nga" byu yi nang ri nab yo nyid" nab soin: ju" sho' cang khaid wa shid re" dei nyid da" Mangsoo ri ngoo dang: theing too" bye: zi nghoid» ga: doem phug tid.

²⁸Hau: thang: Yoab gi nya: byu yi Israela byumyu" yiri acang khaid said loo: wa shid re" laboo" moid wigi toem' kaid lang" meing: zain: go" da" khyoo: joem theing: byug bye: zi nghoid.

²⁹Abna yo' nya: byu yigi hau: myen damyen goin" nyang: Yodan gyid lang lang: khoug: khyo" wigi lid yhe: lo". Hau: lho: Yodan gyid lang ri gu: dab lo" wigi thang: nab khyoo' Mahanaim khyoo: nyangnu" doem tau" ju" lo" boem ago".

³⁰Akhid" Yoab gi gyivoo yiri acang khaid loo: za: nyang: gi nya: byu dangain" ziri zheing" kaid yu" ri Asahela tho' gootu: daxe: goug: yug byug nyid zi yo" myang da:.

³¹David da" byu yigi Benyamin akung: mo Abna da" byu 360 yug ri said pyam bye: ago" zi nghoid.

³²Yoab yo' nya: byu yigi Asahela da" mang ri yu wigi Bedlehem mo ikoin deungkhu: byu yi loeb moo yhe: myhoeb too" bye: zi nghoid. Hau: thang: nyangnu" gi damyen goin" so" yhe: lo" wigi thang: nab kyoo' myo, myang zoo" ri Hebron khyoo: ju" bye: zi nghoid.