Read Lashi 2 SAMUELA 20 Bible Online

2 SAMUELA 20 - Lashi bible

2 SAMUELA 20

¹He: khyoo: gi Gilgala voomoo" moo nyid da" Benyamin akung: mo Bikri nya: zoo: Sheba ga: da" nheigloem: agi su: da" khyoo: nghoid. Nyang: gi laboo" moid lho: nyho: tid zigi «David soem" loo" ba ja"- nya: thang: khyoo: ngoonu" ayo" cang loo:- Israela byumyu" yi we" yhoem: khyoo: jha" lo" boem loo shang» ga: tid.

²Houg: yoomo Israela byumyu" yigi David ri she: pyam kho' wigi Sheba thang: khyoo: cang yhe: loo" khari" bye:. Nghoid loug we' Yuda byumyu" yigi dang: zung" nyid shi" ziyo' David thang: khyoo: Yodan gyid lang mo zi Yerusalem khyoo: cang loo" bye:.

³David gi Yerusalem mo nya: khokham vang" khyoo: ju" lo" uri khokham vang" ri zung" nhang: kho' da" dangcang: myhi' daxi: yug ri shu" yu wigi nyangnu" ri lhoug zung" nyid da" akhoug: moo nyhid: to" lho: coung: nyid da:. Nyang: gi nyangnu" ca" ziri pang" thoug nghoid loug we' nyangnu" yo' gung shoo" azoem" khoug: nghoid da:. Nyangnu" gi deing nyid shi" da" kangso' gyung: khyoo: moo cougmoo" myhi' yi yhang: ti" nyhid: to" zi shau" boem bye:.

⁴Khokham phoo gi Amasa ri «Yuda byumyu" yiri khe: zheing" yu wigi sang: phe: nyid" nyangnu" yo' dage" hid: khyoo: re" loo ge'» ga: tid.

⁵Amasa nyangnu" ri yhe: cang khe: nghoid loug we' khokham phoo nyang: ri tid to" da" ayo, moo ayo" khe: zheing" byid: nghoid da:.

⁶Houg: yoomo khokham gi Abishai ri «Sheba gi Absalom tho' je wigi ngoonu" ri kyi" khyeug byid: wa myang. Nga" byu yiri shu" ci: lho: nya: thang: khyoo: cang ge'. Hougsu" anghoid rigi vang khyam: geung: da" voomoo" ri nyang: seung: yu wigi nyha" lo, mo loid byoin loo" khari" wa» ga: tid.

⁷Houg: yoomo Yoab da" byu yi dang: zung" da" kangso' zung" mo, yo' Yerusalem mo gootu: gyizoo: yi dangain" gi Abishai yo' dage" Sheba jhang khyoo: cang khaid lo" boem bye:.

⁸Nyangnu" Gibeon voo mo lug moo" boem zeing moo ju" yhe: uri Amasa gi nyangnu" ri re" shoug" bye:. Yoab gi meing: zain: wa shid re" soin' void ci: wigi shambyang moo sham: kaid lho: phyid" cu" moo tei" tab ci: da:. Nyang: shid khyoo: yhe: lo" uri sham: tau" gyo" khari" bye:.

⁹Yoab gi Amasa ri «Byencang" pho yang" nyid rhe"» ga: myid: lho: babug bug wa shid re" lo, yo lo, yo' nya: nhoid mei: moo zei: zeing da:.

¹⁰Amasa gi Yoab da" gootu: lo, moo ci: to" da" sham: yo' cikoid wa ajhoo: ri Yoab gi nya: voem: dau: ri thau" phug kaid bye: ziyo' khau: seing" khau: loem joem myidgung moo thu boem too" bye:. Nyang: gi daleing: dam shid: loo" bye: yoomo Yoab gootu: adoem thau" loo: nghoid da:. Hau: thang: Yoab yo' nya: nhung" Abishai gi Sheba thang: khyoo: yhe: loo" bye:.

¹¹Yoab da" byu dayug gi Amasa mang nam moo yab jo, wigi «Yoab yo' David thang: dab bang: yugkhang" moo" gi Yoab thang: cang ge'» ga: yoid tid bye:.

¹²Amasa da" manggung gi suid" gi phyi ga: khyoogung moo leung jo, da:. Yugkhang" moo" theing: nyid boem ziri Yoab da" byu dayug myang yoomo nyang: gi hau: mang ri khyoogung mo pa: khyoo: lang: she: yhe: wigi hau: ziri mi yo' nghoeb too" bye:.

¹³Shid: mang ri khyoogung mo shu" pyam thang: ri yugkhang" moo" gi Sheba ri khaid zain: wa shid re" Yoab thang: khyoo: cang yhe.

¹⁴Sheba gi Israela akung: dangain" mo, da" mougmyid moo lid yhe: lo" lho: Abela Bed Makha voogung khyoo: vang yhi: bye: ziyo' Bikri akung: byumyu" yi dangain" zeing: foem: wigi voogung moo" akhoug: khyoo: nya: thang: khyoo: cang vang loo" bye:.

¹⁵Yoab da" byu yigi Sheba hougmoo: nyid ziri shoug" gyoo: yoomo nyangnu" gi hau: voomoo" ri yhe: vang: too" bye:. Nyangnu" gi vang" khyam: nghe: shoid moo gadug du: wigi vang" khyam: ri byo, gyoo" nhang: wa ga: vang" khyam: khyid: moo du: nyid boem.

¹⁶Hau: voogung moo" moo nyid da" phajhi" bo myhi' zeing dayug gi vang" khyam: mo yoid tid zigi «Gyoo: ge'. tam" gyoo: ge'. Yoab ri hid: khyoo: ri" we' ein: bo tid ge'. Ngoo nyang: yo' dang: doem goo" nau» ga: tid.

¹⁷Yoab yhe: ri nyang: gi «Nang Yoab anghoid la"» ga: myid: bye:. Yoab gi «Nghoid- ngoo nghoid» ga: tid. Myiyi: myhi' gi «Ludaid phoo we" nga" dang: tam" gyoo: we'» ga: tid. Nyang: gi «Ngoo tam" gyoo: nyid» ga: tid.

¹⁸Myiyi: myhi' gi «Nyangnu" shid phyang" lhung tid zigi nyangnu" cikoid loo bye: ga: ziri Abela voomoo" moo" moo yhe: sho: myid: lo yu we' ga: lhung tid.

¹⁹Ngoonu" da" voomoo" moo gi Israela mungdain: moo yug yo tung" ziyo' dang: zung" thang da" voomoo" daloem: nghoid da:. Ciwim yoomo hau: ziri phyo' shoin' pyam wa shid re" nang yoem: kaid nyid lha". ASEING seung: da" ziri nang ciwim phyo' shoin' nau nyid lha"» ga: tid.

²⁰Yoab gi «Khanham we' akoid loo:- ngoo gi nanu" voomoo" ri khanham we' aphyo' shoin' loo wa o".

²¹He: zi ngoonu" koid da" moo" zoo" anghoid. Ephrim boem moug: mo Bikri da" nya: zoo: Sheba ga: su: gi khokham David ri gyi koid nyid abye:. He: byu dayug ri ab byid: lang" ngoo he: voomoo" mo doem tau" phang: loo" wa» ga: tid. Myiyi: myhi' gi «Ngoonu" nya: vhuloem ri re" shid re" vang" khyam: atho' khyo" du" khyo' byid: wa» ga: tid.

²²Hau: thang: myiyi: myhi' gi nyang: soin: ci: moo" zoo" yo' voogung byu yi jang khyoo: lo" lho: Sheba vhuloem ri nyangnu" phyed yu wigi vang" khyam: atho' khyo" Yoab ri du" byid: bye:. Nyang: gi nya: byu yi voomoo" mo doem tau" loo" bye: ga: da" dang: kang: khyo" wigi laboo" ri moid lho: nyangnu" yhoem: khyoo: tau" loo" bye:. Yoab we' Yerusalem mo khokham jang khyoo: doem tau" loo" bye:.

²³Yoab gi Israela gyiphung: ri vhoeb khang" su: nghoid. Yehoiada da" nya: zoo: Benania gi David da" kangso' zung" moo" zoo" ri yoovoin yu yu" nyid su: nghoid.

²⁴Adoniram gi moo" zei: mo, da" phung: vhujhung: nghoid. Ahiluda da" nya: zoo: Yehoshaphad gi lhid" xoem" moo" zoo" ri yoovoin yu su: nghoid.

²⁵Sheva gi khokham vang" mo moo" seing: nghoid. Zadog yo' Abiatha gi khainjung tang: nghoid da:.

²⁶Yaira voomoo" mo Ira gi David da" khainjung dayug nghoid da:.