Read Lashi 2 SAMUELA 23 Bible Online

2 SAMUELA 23 - Lashi bible

2 SAMUELA 23

¹Yese da" nya: zoo: David gi Mangso wigi gyi: sheung: nhang: su: nghoid. Nyang: gi Yaku da" Mangsoo wigi khokham koid wa khyen: too" shoug" su: nghoid. Israela byumyu" yi shid re" pyo: da" jikhoin" joem ri lhid" su: nghoid da:. He: zigi David da" thang: thang mungdang: nghoid.

²ASEING Venyi gi nga" gung khyo" wigi dang: tid nyid. Nya: mungdang: nga" nhoid moo bo nyid da:.

³Israela Mangsoo dang: tid bye:. Israela ri lhoug zung" su: gi ngoo ri «Deingmain" ziyo' vhoeb khang" wigi Mangsoo ri gyoug phoug" wigi tarha" nyeung veung" khyo" vhoeb khang" da" khokham gi

⁴Jhoemmoug" adab da" nab soin: ri zho: da" bid yo' moug: phang" thang: ri myo, gam joem ri kyi: nhang: da" bid yo' du nyid da» ga: tid.

⁵Athid wa da" dangsoo" yo' abyo, wa da" myid veing" khyoo: gi nyang: yo' ngoo apyaid atoo: dang: theing too" bye: yoomo Mangsoo gi nga" akung: ako'' yiri mainkaid byid: wa zi nghoid. Hau: zi dangain" gi nga" myid vho: khyoo: nghoid. Hau: zigi nga" oung: doid khyoo: nghoid wa ziyo' Mangsoo gi gyeing" nyang: hau: ziri bui" nhang: wa zi nghoid.

⁶Nghoid loug we' Mangsoo ri anoku bang: gi vi: khyoo: she: lhei" pyam da" zu: gam yo' du nyid da:. Hau: joem ri dayug we' lo, cen: yo' zang" tain" wa zi anghoid.

⁷Hau: ziri tain" wa shid re" joto' jonu" anghoid lang" lham: dakhaid ci: ca"- Hau: zu: gam joem gi bain sho' nghe' pyam wa zi nghoid.

⁸He: zigi David da" myeing gyi: gyizoo: yi da" myeing joem nghoid. Takhamoni akung: mo Yosheb Beshebed gi vhujhung: «Soem" yug» [1] mo xang: shi" yug nghoid. Nyang: gi meing: zain: jang: daloem: moo za: nya: lham: yo' byu shid shoo: ri khaid zain: wigi nyangnu" dangain" ri said pyam bye: su: nghoid.

⁹Aho akung: mo Dodo da" nya: zoo: Eleaza gi myeing gyi: da" byu soem" yug mo eig yug ein: yug nghoid. Danyid" gi nyang: yo' meing: zain: wa shid re" zeing: foem: nyid da" Philisti byumyu" yiri pyi: yhe: shoo: bye:. Israela byumyu" yi nung zoid zoid phang: loo" nghoid loug we'

¹⁰Nyang: gi nya: joyoo moo yab jo, wigi nya: sham: ri ayo" zain: loo sho' lo, byeing byeing da" ayo, ju" sho' Philisti byumyu" yiri khaid zain: nyid da:. Hau: nyid" ri ASEING gi oung: pui" zeing byid: bye:. Hau: meing: bain zain: go" thang: ri Israela byumyu" yigi Eleaza nyid jang" khyoo: doem tau" yhe: wigi shid: mang mo gyimi gyibyi: joem ri khyoid yu boem bye:.

¹¹Harari akung: mo Agee da" nya: zoo: Shamma gi myeing gyi: bang: soem" yug mo soem" yug ein: yug nghoid da:. Nug yoo jo, da" Lehi joyoo moo Philisti byumyu" yi zeing: foem: nyid boem ago". Philisti bang: jang" mo Israela byumyu" yi phang: byug nghoid loug we

¹²Shamma gi hau: yoo moo yab jo, wigi lhoem: khaid zain: ziyo' Philisti byumyu" yiri said pyam bye:. Hau: nyid" ri ASEING gi oung: pui" zeing byid: bye:.

¹³Byu soem" xi: mo soem" yug gi byang gain ju" lo nyid da" ayo, ri [2]- David nyid da" Adulam lug-ug khyoo: gyoo" yhe: boem bye:. Hau: uri Philisti byu daphung: we' Rephim langkhoug: moo dab koid wigi nyid boem ago".

¹⁴Hau: uri David bouggung mo dab moo nyid wigi Philisti phung: bang: gi Bedlehem voogung ri yhe: zain: oung: yu pyam bye: ago".

¹⁵David gi nheig nge ziyo' «Byu dayug yug Bedlehem vang khyam: khoem" yam gyid thung" mo shug gyid ngoo ri lo kham: byid: wa ziri vho: ngei nyid» ga: tid.

¹⁶Myeing gyi: da" gyizoo: soem" yug gi Philisti dab khyoo: zain: vang yhe: wigi gyid thung" mo gyid dajhi' kham: ci: wigi David jang" khyoo: ci: loo" byid: bye:. Nghoid loug we' nyang: hau: ziri ashug loo: za: ASEING ri ngei" byid: wigi foid khyo' pyam lho:

¹⁷tid zigi «ASEING we" he: ziri ngoo khanham we' ashug loo wa. He: zigi nyangnu" kangso' ri ab byid: da" suid" ri shug ziyo' du» ga: tid. Houg: yoomo nyang: gi shug wa shid re" he: pyam bye:. Hau: zigi myeing gyi: da" gyizoo: soem" yug da" voem" koid da" moo" zoo" nghoid da:.

¹⁸Yoab da" nya: nhung" Abishai (Nya: tang: da" nya: yhid' gi Zeruia nghoid) gi «Myeing gyi: byu soem" xe:» da" vhujhung: nghoid. Nyang: gi byu soem" shoo: ri nya: lham: yo' khaid said wigi nyangnu" ri said pyam ziyo' hau: «Soem" xi:» [3] moo myeing gyi: su: bue" loo bye:.

¹⁹Nyang: gi hau: «Soem" xi:» [4] moo myeing gyi: thang su: nghoid wigi nyangnu" vhujhung: bue" loo nghoid loug we' myeing gyi: da" «Soem" yug» yhi' gi abui" shi" nghoid da:.

²⁰Kabzela voogung mo gootu: myeing gyi: da" gyizoo: dayug gi Yehoiada da" nya: zoo: Benania ga: su: nghoid. Nyang: koid lid lo da" seing" yang" moo" zoo" myoo" sho' nghoid jang" mo Moba gyizoo: lu: gi eig yug ri we' said pyam bye:. Dalheing: ri we' gyu: khyo' byeung" to" da" bidnyid moo duang: khuang" khyoo: vang yhe: lho: khangkhyi dadu: ri said pyam bye:.

²¹Nyang: gi lham: ci: da" Egutu byu yoem: moo" boo su: dayug ri we' said pyam bye:. Benania gi seig khyam" ci: lho: hau: Egutu byu da" lo, mo lham: ri lhoid yu wigi hau: lham: yo' nyang: ri said pyam bye:.

²²He: zigi seing" yang" da" soem" xi: yug mo Benania ga: da" seing" yang" su: da" avoid asam" nghoid.

²³Nyang: gi nyangnu" da" akhoug: moo je bui" nghoid loug we' seing" yang" soem" yug yhi' gi myeing agyi: nghoid da:. David gi nyang: ri nya: da" kangso' zung" moo" zoo" moo yoovoin yu nhang: bye:.

²⁴Soem" xi: yug mo dayham" gi Yoab da" nya: nhung" Asahela- Bedlehem mo Dodo da" nya: zoo: Elhana- Herod akung: mo Shamma yo' Elika- Peled akung: mo Heleza- Tekoa voomoo" mo Ikesha da" nya: zoo: Ira- Anathod voomoo" mo Abieza- Husha akung: mo Mebunai- Ahohi akung: mo Zalmon- Netopha akung: mo Maharai- Gibea voogung mo Benyamin akung: mo Ribai da" nya: zoo: Itai- Pirathon akung: mo Benaia- Gasha nam moo jo, da" lang: khoug: mo Hidai- Araba akung: mo Abialabon- Bahurim akung: mo Azamave- Shalabona akung: mo Eliaba- Yashen da" yug gi zoo: yi- Yonathan- Hara akung: mo Shamma- Hara akung: mo Shara nya: zoo: Ahiam- Makha akung: mo Ahabai nya: zoo: Elipheled- Hilo akung: mo Ahithophela da" nya: zoo: Eliam- Kharmela akung: mo Hezro- Arab akung: mo Parai- Zoba voomoo" mo Nathan nya: zoo: Igala- Gad akung: mo Bani- Amon akung: mo Zeleg- Yoab da" gyibyi: gyimi ci: byid: su:- Bero(...)