Read Lashi 2 SAMUELA 3 Bible Online

2 SAMUELA 3 - Lashi bible

2 SAMUELA 3

¹Sholu ikoin deungkhu: thang: dab mo, yo' David thang: dab mo, da" agyoo: moo gye" myang" sho' zain: go" nyid boem. David gi yoem: gyi: tho' gyi: loo lho: Sholu gi yoem: neing: tho' neing: lo" bye:.

²Hebron voomoo" moo khu: da" David nya: zoo: khyug yug gi nyangnu" khu: joyoo moo cang wigi Yezrela voogung mo nya: myhi' Ahinoam da" zoo: Amnon

³Kharmela voogung mo Nabala da" cougmoo" myhi' Abigela da" nya: zoo: Khilab- Geshura khokham Talamai da" nya: zoo: myiyi: nu" Makha da" nya: zoo: Absalom.

⁴Hagid da" nya: zoo: Adoniya- Abitala da" nya: zoo: Shephatia-

⁵Egla nya: zoo: Itream bang: nghoid ago". He: zoo: yi dangain" gi Hebron moo khu: zi nghoid.

⁶David gyiphung: yo' Sholu yhoem: byu yi da" dangsoo" deing da" gyiphung yi xo' wigi zain: go" nyid yoomo Abna gi Sholu da" gyiphung: akhoug: moo yoem: so' je je gyi: lo nyid.

⁷Danyid" nyid" gi Sholu nya: zoo: Ishboshed wigi Abna ri nya: zoo: nghoid da" Sholu da" dangcang: myhi' Rizpa yo' dage" yhoeb ga: yooboo foin: nyid da:.

⁸Hougsu" nghoid yoomo Abna nheigloem: yoin ziyo' nyang: ri «Sholu ri ngoo said pyam ein: nang myid nyid lha". Ngoo Yuda ri koid zhoo" koid jhug nyid ein: nang gyeing" myid nyid lha". Ngoo gi shidphyang" mo re" phoo Sholu yo' nya: mang: nhung" yi nya: byencang" yi atho' moo dang: zung" nyid su: nghoid ziyo' David da" lo, khoug: moo asoem" byug sho' nang ri khyoid yu too" nghoid loug we' akhid nyid" he: myiyi: zoo: dayug yoomo za: nang ngoo ri yooboo foin: lha".

⁹ASEING gi Sholu yo' nya: akung: ako' yi jang" mo mungdain: ri yu wigi David ri Israela mung" yo' Yuda mung" dashoid athang: mo gootu: dashoid athang: ju" sho' da" eig mung" goin" shid re" khokham koid nhang: wa zi nghoid ga: dangsoo" khoin" byid: to" da:. Akhid" ngoo he: ziri bui" sho' ayo" koid nghoid rigi Mangsoo ngoo ri shid: sho' baid said wa zi nghoid» ga: phuid: kyo" shug da:.

¹¹Ishboshed gi Abna ri gye" gyoug nyid yoomo dang: dakhoin" nyang" ayo" tid loo nghoid da:.

¹²Abna gi hau: uri Hebron moo nyid da" David jhang khyoo: lu dang: kyoo" bang: ri nhang: kaid wigi «He: mung" ri hang" vhoebkhang" wa lha". Ngoo yo' myid veing" khyoo: koid wigi Israela byumyu" yi dangain" re" shoid khyoo: dab wa shid re" ngoo nang ri bo pang" wa» ga: pyeung: kaid bye:.

¹³David gi «Ge da:. Khyoo: dakhaid moo za: ngoo nang yo' myid veing" khyoo: koid too" wa zi nghoid. Nang nga" jhang re" uri nga" jhang khyoo: Sholu nya: zoo: myiyi: nu" Mikhala ri nang shu" ri" wa zi nghoid».

¹⁴Xo' wigi David we' Ishboshed jhang khyoo: lagyoo: joem ri doem nhang: kaid lho: «Nga" yhoem: seing: myhi' Mikhala ri ngoo ri doem tau" byid: we'. Nyang: ri ngoo lo, xo' yu wa shid re" Philisti byumyu" yi da" shooyid thang: dashoo: ri phoug" byid: too" bye:» ga: pyeung: kaid.

¹⁵Hougsu" nghoid yoomo Ishboshed gi Mikhala ri nya: yhoem: seing: phoo nghoid da" Laisha nya: zoo: Patiela jang" mo shu" yu bye:.

¹⁶Patiela gi Mikhala jhang khyoo: Bahurim voogung ju" sho' ngoug wigi cang yhe: nghoid loug we' Abna wigi «Yhoem: khyoo: doem tau" loo" we» ga: tid lang" nyang: doem tau" loo" khari" bye:.

¹⁷Abna gi Israela byumyu" vhujhung: yi jhang yhe: wigi nyangnu" ri «Nanu" gi shid phyang" mo David ri nanu" da" khokham koid nhang: nau ago" da:.

¹⁸Akhid" he: zigi nanu" da" shid re" akho: akhang" zeing nghoid da:. ASEING gi nga" byumyu" nghoid da" Israela byumyu" yiri Philisti byumyu" yi jang" mo we' gootu: nyangnu" da" gyivoo yi jang" mo we' khyoid yu wa shid re" nga" join David ri ngoo ci: wa ga: ziri boin: so" nyid ge'» ga: tid da:.

¹⁹Abna gi Benyamin akung: ako' mo byu yiri we' tid kyo" wigi Benyamin yo' Israela byumyu" yi khasu" myid veing" sham: phyed to" ga: ziri David ri yhe: tid kyoo" wa shid re" Hebron khyoo: yhe: lo" boem ago".

²⁰Abna yo' byu eigxi: yug gi Hebron mo David jhang ju" uri David gi nyangnu" shid re" zoo: shug pui" koid byid: bye: zi nghoid.

²¹Abna gi David ri «Ngoo akhid" yhe: wigi Israela byumyu" dangain" ziri aseing: khokham shidkhoin" khyoo: shu" vang loo wa zi nghoid. Nyangnu" gi nang ri khokham yhang: ti" khab yu wigi hau: thang: ri nang vho: ziri yo" yu lho: hau: mungdain: dangain" ziri yo' vhoebkhang" wa zi nghoid» ga: tid. David gi Abna ri goug: wa shid re" kookham: byid: kaid wigi yhi: nhang: kaid bye:.

²²Hau: thang: Yoab yo' David da" gyizoug: goo" phung: gi meing: yhe: khaid wigi jonu" myoo" sho' ci: lho: doem tau" lo boem ago". Abna gi David wigi goem loem wa shid re" kookham: byid: wigi nhang: kaid bye: yoomo Hebron moo David yo' anyid loo: nghoid da:.

²³Yoab yo' nya: byu yi ju" lo uri nyangnu" ri Abna gi «Khokham David jhang re" wigi goem loem wa shid re" kookham: yo' doem nhang: kaid bye:» ga: tid kyo" ago".

²⁴Hougsu" nghoid yoomo Yoab gi khokham jhang yhe: wigi nyang: ri «Abna re" jhang re" uri nang khasu" koid kaid bye: lha". Ciwim yoomo nyang: ri nang hougsu" nhang: kaid lha".

²⁵Nyang: hid: khyoo: re" zigi nang ri mhoug wa shid re" we' nang koid zi dangain" ri yu" yu" wa shid re" we' nang so" yen" joyoo dangain" ziri si' wa shid re" we' re" zi danghoid. Hau: ziri nang si' eung: zi nghoid» ga: tid.

²⁶David jang" mo thu lo" thang: ri Yoab gi Abna ri yhe: shu" wa shid re" lagyoo: joem ri nhang: kaid wigi nyangnu" gi nyang: ri Sira gyid thung" mo doem yhe: khe: tau" yu bye:. Nghoid loug we' David gi hau: ziri se' nyid zi anghoid.

²⁷Abna Hebron khyoo: ju" lo uri Yoab gi nyang: yo' kyeing" dang: tid goo" nau ga: wigi khyam: khoem" anam khyoo: shu" yhe: lho: houg: moo nyang: gi Abna voem: dau moo shamcoin" thoug" byid: bye: zi nghoid. Abna gi Yoab da" nya: nhung" Ashela ri said pyam yoomo nyang: ri we' said pyam zi shoug" bye: zi nghoid.

²⁸Hau: lu dang: ri David shoug" gyoo: lang" nyang: gi «Abna ri said pyam da" khyoo: gi ngoo yo' nga" mungdain: moo yooboo dajhi' we' abo ziri ASEING se' nyid zi nghoid.

²⁹Hau: shid re" dam byid: nghoid rigi Yoab yo' nya: yhoem: byu dangain" atho' moo zang" baja". Byuxeig byuboin: dangain" jhang nghoid loug we' nya: yhoem: byu dayham" bang: ri byeing no zi manggang no zi phyid" doem: gyoug: ziyo' meing: zain: jang" mo said pyam zi shoug" wa ziyo' phang" khoug gyo" zi shoug" wa zi nghoid» ga: tid.

³⁰Hougsu" nghoid yoomo Yoab yo' nya: nhung" Abishai gi Gibeon mo meing: zain: jang" moo nya: tang: da" nhung" Asahela ri said pyam yoomo Abna ri latoo: phug yu nyid boem zi nghoid.

³¹Hau: thang: David gi Yoab yo' nya: byu yiri nyangnu" da" byimi lang: ceig wigi jid: moo" byisheing: void lho: Abna shid re" nheig koug nheig ngi wa khyoo: ri koid wa shid re" amyeing" byid: to" da:. Hau: mang yhe: myhoeb uri khokham David nyang: we' gung: thang: moo cang so" re" da:.

³²Abna ri Hebron moo myhoeb ziyo' khokham gi loeb moo nyho: ngau nyid wigi byumyu" yi dangain" we' nyho: ngoug bye: zi nghoid.

³³David Abna shid re" ngougmyeing" shu: thui: thu nyid zigi «Byukoo" dayug yhang: ti" Abna ciwim yoomo shid: byug lha"

³⁴Nya: lo, ri we' atei" nhung: Nya: khyid: riwe' amyeug nhung: Yooboo koid bang: da" lo, yo' said pyam zi shoug" yhang: ti" shid: lo" byug bye: nhung: lha".» Hau: thang: ri byu yigi nya: shid re" daleing: doem ngoug nyid boem ago".

³⁵Byu joem gi David ri daja: ja: zoo: wa shid re" danyid" goin" soin' nghoid loug we' nyang: gi «Ngoo gi he: nyid" alid shi" ri daja: ja: zo: nghoid rigi Mangsoo ngoo ri baid said pyam baja" o"» ga: dangsoo" byid: to".

³⁶Nyangnu" he: ziri yu" xoem" yu wigi nheig yu" shid: nyid ago". Gyeing" nyang: khokham koid khyoo: dangain" ziri byumyu" yi nheig yu" shid: nyid boem ago".

³⁷David da" byu dangain" ziyo' Israela byumyu" dangain" bang: gi Abna said pyam shau" da" moo" zoo" moo khokham phoo dajhi' we' abo ziri se' boem abye: go" da:.

³⁸Khokham gi nya: gyizoug: yiri «Akhid" nyid" Israela byumyu" mo vhujhung: zeing dayug shid: bye: ziri nanu" boin: nyid go" lha".

³⁹Ngoo gi Mangso wigi khyen: to" da" khokham dayug nghoid loug we' akhid" nyid" ngoo yoem: so' neing: shi". He: Zeruia da" nya: zoo: yuggi nu" yi gi nga" shid re" gye" thain: nyid da:. He: yooboo shid re" nyangnu" yo' moin: yi" da" dam ri ASEING byid: nyid baja" o"» ga: tid.