Read Lashi 2 SAMUELA 5 Bible Online

2 SAMUELA 5 - Lashi bible

2 SAMUELA 5

¹Hau: thang: Israela byumyu" akung: yi dangain" bang: Hebron mo David jhang khyoo: re" wigi nyang: ri «Ngoonu" gi nang seing: da" re" gung shoo" yo' suid" nghoid nyid da:.

²Lid loo" bye: da" ayo, Sholu ngoonu" da" khokham bue" nyid uri nghoid loug we' meing: zain: jang: moo Israela byumyu" yiri nang shu" vhu" shi: bye: zi nghoid ziyo' nang we' ASEING byumyu" yiri vhu" she: wigi nyangnu" ri vhoebkhang" wa shid re" ASEING nang ri dang: soo" byid: bye: zi nghoid» ga: tid ago".

³Hougsu" nghoid yoomo Israela vhujhung: yi dangain" zi Hebron voomoo" khyoo: khokham David jhang yhe: boem ago". Nyang: gi nyangnu" yo' deungbyeung" da" dang: theing to" wigi nyangnu" we' nyang: ri xu: joid byid: lho: nyang: we' Israela byumyu" yi da" khokham bue" loo bye: zi nghoid.

⁴David gi zain nyid soem" xi: zain byeung" uri khokham bue" wigi nyang: gi myidxi: zain vhoebkhang" bye: zi nghoid.

⁵Hebron voomoo" moo nyid wigi Yuda mung" ri nyhed zain dakhyam" nyang: vhoebkhang" lho: Yerusalem voomoo" moo nyid wigi Israela yo' Yuda mung" dangain" ziri soem" xe: soem" zain vhoebkhang" bye:.

⁶Ayo, akhyeing: ju" lang" khokham David yo' nya: byu yigi Yerusalem voomoo" ri yhe: zain: wa ga: thu yhe: lo" ago". Hougmoo: nyid da" Yebusi byu yi koem' gi voomoo" hau: ziri David ayo" zain: oung: wa ga: myid boem ziyo' nyangnu" gi nyang: ri «Myo, amyang mo, yo' khyid: gyoug: mo, rilang" nang ayo" khaid thu nghoid rigi he: akhoug: khyoo: khanham we' nang yo" vang loo wa zi anghoid» ga: tid ago".

⁷(Nghoid loug we' David gi nyangnu" da" Ziun gyidab ri zain: oung: pyam wigi hau: ziri David da" voomoo" ga: myheing too" bye:.

⁸Hau: nyid" ri David gi nya: byu yiri «Ngoo Yebusi byumyu" yiri ngheing" yhi' gootu: byu yi nyid shi" ago" lha". Nyangnu" ri said pyam wa zi moin: yi" nyid anghoid goo" lha". Hougsu" nghoid yoomo gyid khyoo" khyo" wigi do, lo" lho: hau: sho" jhen: da" myo, jid, khyid: gyoug: bang: ri yhe: khaid zain: ge'» ga: tid da:. (Hougsu" nghoid yoomo hau: ziri myo, jid bang: yo' khyid: gyoug: bang: ASEING da" yhoem: khyoo: ayo" vang» ga: tid boem ago".

⁹Hau: gyidab ri bain phyo' oung: pyam thang: ri David hougmoo: nyid wigi hau: ziri «David voomoo"» ga: myheing ago". Nyang: gi hau: voomoo" lheing khab' yo' bouggung da" bidthu shoid damung" goin" moo voomoo" de: shid" lo" nyid bye: zi nghoid.

¹⁰Myhang: thang da" ASEING Mangsoo gi nyang: yo' dage" nghoid nyid yoomo nyang: gi ayo, loem: khang" moo" moo je" gyi: sheung: lo nyid.

¹¹Turu khokham Hiram gi phaga: phung: daphung: ri David jhang khyoo: nhang: kaid da:. Nyang: gi khokham kho" zhug wa shid re" shamu seig thi" yo' dage" lo, moo" zi: bang: yi yo' lugxi' bang: ri pang" thoug kaid da:.

¹²Hougsu" nghoid yoomo ASEING gi nyang: ri Israela khokham aya: byid: ziri we' nya: byumyu" yi shid re" we' nya: mung" ri yoo" zoo: yoo" shug nhang: nyid ziri we' David boin: lo nyid da:.

¹³Hebron mo Yerusalem khyoo: thoid lo" thang: ri dangcang: myhi' yi yo' yhoem: seing: myhi' yi myoo: sho' doem yu lung: wigi nya: zoo: yuggi nu" myiyi: nu" gye" doem yo" da:.

¹⁴Yerusalem moo nya: shid re" doem khu: byid: da zooshang: yigi Shamua- Shoba- Nathan- Sholumon

¹⁵Ibha- Elishua- Nepheg- Yaphia

¹⁶Elishama- Eliada- Elipheled bang: nghoid ago".

¹⁷David gi Israela byumyu" yi da" khokham bui" bye: ga: ziri Philisti byumyu" yi shoug" gyoo: lang" nyang: ri yhe: myheig wa ga: nyangnu" da" gyizoo: yi to' yhe: lo" da:. David hau: ziri shoug" gyoo: lang" nyang: gi gyidab moo yhe: nyid nyid da:.

¹⁸Philisti byumyu" yi Rephim lang: khoug: moo ju" wigi hau: ziri seing: pyam ago".

¹⁹David gi ASEING ri «Ngoo Philisti byumyu" yiri meing: yhe: yo" zain: wa la". Nang ngoo ri oung: doid nhang: wa la"» ga: myid. ASEING gi «Nghoid bye: yhe: zain: we' ngoo nang ri oung: doid nhang: wa» ga: tid.

²⁰Houg: yoomo David gi Bala Perazim khyoo: do, lo" wigi hau: joyoo moo Philisti byumyu" joem ri nyang: meing: zain: oung: pyam bye:. Nyang: gi «ASEING gi nga" gyivoo joem ri gyid khyoid khyoid yhang: ti" said tang" pyam bye:» ga: tid. Houg: yoomo hau: joyoo ri Bala Perazim ga: tid boem ago".

²¹Philisti byumyu" yi phang: byug lang" nyangnu" gi nyangnu" da" yu soolhoo: joem ri she: pyam khoo' yoomo David yo' nya: byu yigi hau: soolhoo: joem ri koid: tho' lo" boem ago".

²²Hau: thang: Philisti byumyu" yi Rephim langkhung" khyoo: doem tau" re" wigi hau: ziri dalheing: doem re" zain: oung: yu boem ago".

²³David gi ASEING ri dalheing: doem myid: yu" ri «Nyangnu" ri he: joyoo khyo" ayhe: zain: nghoid loug we' yhe: vang: lheing wigi gooshoid nghoid da" seig xu: yoo khyo" nyangnu" ri meing: zain: wa shid re" jen" jen" soin' too" we'.

²⁴Seig phyoo" joem cang khyo" so" da" thui: ri shoug" gyoo: lang" meing: zain: re,. Ciwim gari: Philisti gyi ri said wa shid re" re" shid moo ngoo yhe: loo" wa zi nghoid» ga: phoug tid bye:.

²⁵David gi ASEING da" amyeing" dang: ri cang koid wigi Geba mo zi Gezera ju" sho' Philisti byumyu" yiri yo" khaid tau" kaid bye:.