Read Lashi 1 KHOKHAM 1 Bible Online

1 KHOKHAM 1 - Lashi bible

1 KHOKHAM 1

¹Akhid" David gye" mang: bye: yoomo nya: dei zoo: yi mi foid nghoid loug we' nya: gung ayo" loem loo: nghoid da:.

²Houg: yoomo nya: moo" voin bang: gi nyang: ri «Aseing: khokham we" nang yo' dage" nyid wigi nang ri coung: wa da" myiyi: zoo: dayug shoo: shang. Nyang: gi nang yo' tain" tain" jhang" wigi nang ri loem nhang: wa zi nghoid» ga: tid.

³Israela mungdain: goin" moo yung" da" myiyi: zoo: cang sho: yu" ri Shunem mo Abishaga ga: da" myiyi: zoo: ri myang lang" khokham jang" khyoo: shu" lo da:.

⁴Nyang: gi gye" young" ziyo' khokham ri coung: nyid da:. Nghoid loug we' khokham gi nyang: yo' gung shoo" azoem" khoug: nghoid da:.

⁵Akhid" Absalom shid: thang: ri David yo' Hagid tang: da" zoo: Adoniya gi dei nyid shi" bang: mo gyi: thang su: nghoid. Nyang: gi gye young" su: nghoid da:. Nyang: gi khokham bue" loo wa ga: myid to" ziyo' cikoid nghoid loug we' David anheig yoo: nghoid da:. Nyang: gi nya: shid re" gyi myang: rheing" joem myang: joem shid moo soo" wa shid re" byu wim: xi: yug ri we' soin' to" nyid da:.

⁶

⁷Nyang: gi Yoab (nya: yhid gi Zeruia nghoid) yo' khainjung Abiatha tang: yo' sham: go" wigi nyang: koid wa da" moo" zoo" moo bo pang" wa shid re" myid veing" to" boem.

⁸Nghoid loug we' Khainjung Zadog- Yehoiada da" nya: zoo: Benaia- lapi: Nathan- Shimi- Rei yo' David da" kangso' zung" bang: gi Adoniya da" shoid khyoo: aboo nghoid da:.

⁹Danyid" ri Adoniya gi yang joem nuloo: yo' xu: da" nuloo: nu" joem ri Enrogela gyid lang yam lhangmyu lugmoo" boem moo: xoin" ngei" nyid da:. Nyang: gi hau: zoo: shug pui" moo re" wa shid re" khokham David da" nya: zoo: gootu: yi yo' Yuda mung" mo ju" re" da" Khokham moo" voin bang: ri khe: bye:.

¹⁰Nghoid loug we' nya: nhung" Sholumon- Lapi: Nathan- Benaia yo' khokham da" kangso' zung" bang: rigi akhi: nghoid da:.

¹¹Hau: thang: Nathan gi Sholumon da" nya: yhid Bathsheba jhang khyoo: yhe: wigi Hagid da" nya: zoo: Adoniya gi nya: gung nyang: khokham ga: koid nyid ziri nang ashoug" gyoo: lha". Khokham David gi hau: khyoo: ri asi' nghoid da:.

¹²Re" kangso' yo' re" zoo: Sholumon kangso' ri nang khyoid yu nau nghoid rigi ngoo nang ri phajhi" byid: ba:

¹³Khokham David jhang myab yhe: wigi nyang: ri «Aseing: khokham we"- nga" zoo: Sholumon gi re" gungthid khokham bue" loo wa shid re" geing: teing da" dangsoo" khoin" ayo" byid: rhe". Houg ri Adoniya gi khasu" wigi khokham bue" nyid lha" ein: yhe: tid we'» ga: tid.

¹⁴Xo' wigi Nathan gi «Khokham David yo' nang dang: tid go" nyid shi" uri ngoo cang vang lo lho: re" dang: ri jang deing bo byid: wa» ga: tid.

¹⁵Houg: yoomo Bathsheba gi khokham da" yhoeb yab khyoo: vang loo" bye:. Nyang: gi gye" mang: bye: ziyo' Shunem myiyi: zoo: Abishaga gi nyang: ri coung: nyid da:.

¹⁶Bathsheba gi khokham da" shidkhoin" moo: goeb pid lang" khokham gi «Nang civho: lha"» ga: myid:.

¹⁷Nyang: gi «Aseing: khokham we" re" thang: moo: khokham koid wa shid re" nga" zoo: Sholumon ri re" ASEING Mangso myeing moo nang ngoo ri geing: teing da" dangsoo" khoin" byid: too" bye: zi nghoid.

¹⁸Nghoid loug we' Adoniya gi khokham koid nyid bye: he: ziri nang asi' nghoid nyid da:.

¹⁹Nyang: gi nuloo: zoo: joem yang joem xu: da" nuloo: nu" joem ri xoin" ngei" byid: wigi re" zoo: yiri we' khainjung Abiatha yo' re" gyizoug: Yoab bang: ri khi: nghoid loug we' re" zoo: Sholumon rigi akhi: nghoid da:.

²⁰Aseing khokham we" re" khokham zhungtang moo hang" ri xo' zhung: nhang: wa ga: khyoo: ri Israela byumyu" dangain" gi nyangnu" ri tid kyoo" wa shid re" nang ri zheing: yu" nyid da:.

²¹Hau: khyoo: ri nang atid loo: shid: loo" khari" nghoid rigi nga" zoo: Sholumon yo' ngoo rigi gyivoo yiri koid yhang: ti" koid pyam zi shoug" wa zi nghoid» ga: tid.

²²Nyang: dang: datid nyid shi" ri khokham vang" khyoo: Nathan ju" ri" bye:.

²³Lapi: phoo ju" nyid bye: khyoo: ri khokham phoo jhang yhe: tid kyo" ziyo' Nathan vang lo" wigi khokham shidkhoin" moo goeb pid bye:.

²⁴Hau: thang: nyang: gi «Aseing: khokham we" Adoniya ri re" khokham zhungtang moo xo' zhung: wa shid re" nang lu dang: fu" bye: rhe".

²⁵Nyang: gi akhid" nyid" nyang: thu lo" wigi nuloo: zoo: joem yang zoo: joem yo' xu: da" nuloo: nu" joem ri xoin" ngei" bye: zi nghoid. Nyang: gi re" zoo yi dangain" riwe'- re" gyizoug: Yoab riwe'- khainjung Abiatha riwe' khe: yu wigi akhid" nyang: nyangnu" dage" zo: shug lho: khokham Adoniya kangso' sheing: baja" o"» ga: nyho: nyid boem bye:.

²⁶Nghoid loug we' Aseing: we" nyang: gi ngoo ri we' khainjung Zadog ri we' Benaia yo' Sholumon riwe' akhi: nghoid da:.

²⁷Kha: yug khokham doem koid wa ga: ziri re" moo" voin bang: ri atid kyoo" loo: za: he: zi dangain" nang aseing: khokham nyang: myid veing" jang deing too" bye: la"» ga: myid: bye:.

²⁸Khokham David gi «Bathsheba ri doem khe: tau" loo ge'» ga: tid lang" nyang: we' vang lo wigi nya: shidkhoin" moo lo yab jo, da:.

²⁹Hau: thang: nyang: gi Bathsheba ri «Nga" yau: khi" dangain" jang" mo ngoo ri khyoid yu da" kangso' ASEING jang" moo ngoo nang ri dangsoo" byid: to" ziyo' dayhang: ti"

³⁰re" zoo: Sholumon gi nga" khokham aya: xo' kham: yu wa zi nghoid ziri Israela byumyu" yi da" ASEING Mangso da" myeing moo: ngoo nang ri dang: theing to" ziri akhid" nyid" nyang: hau: dangsoo" khoin" ri jang deing byid: bye: zi nghoid» ga: tid.

³¹Bathsheba gi goeb pid wigi «Nga" aseing: khokham kangso' sheing: nyid baja" o"» ga: tid.

³²Hau: thang: khokham David gi Zadog- Nathan yo' Benaia bang: ri khi: nhang: kaid bye:. Nyangnu" ju" loo lang"

³³Nyang: gi nyangnu" ri «Nanu" yo' dage" nga" khokham vang" mo moo" voin bang: dangain" ri khe: shu" wigi nga" zoo: Sholumon riwe' nga" loo zei: moo zhung: nhang: lho: nyang: ri zhung: nhang: ziyo' Gihon gyid lang khyoo: yhi: we'.

³⁴Houg moo: Zadog yo' Nathan gi nyang: ri Israela byumyu" yi da" khokham bue" loo wa shid re" mainkaid xu: foid gyoin: byid: wa zi nghoid. Hau: thang: laboo" moid kaid wigi «Khokham Sholumon kangso' sheing: baja" o"» ein: nyho: tid boem wa zi nghoid.

³⁵Nya: thang: mo hid: khyoo: doem cang lo wigi nyang: ri nga" khokham zhungtang moo: zhung: nhang: wa zi nghoid. Nyang: gi Israela yo' Yuda mung" ri vhoebkhang" wa shid re" ngoo khyen: too" bye: da" su: nghoid yoomo nga" khokham zhungtang moo xo' zhung: lho: khokham bui" wa zi nghoid» ga: tid.

³⁶Benaia gi «Hougsu" bue" loo baja" o"- re" ASEING Mangsoo gi he: moo" zoo" ri jang deing byid: baja" o".

³⁷ASEING gi aseing: khokham yo' dage" nyid yhang: ti" Sholumon yo' we' dage" nyid wigi Sholumon vhoebkhang" zigi re" tho' je nyid pyo: gyi: sheung: sho' yo" koid baja" o"» ga: tid.

³⁸Houg: yoomo Zadog- Nathan- Benaia yo' khokham vang" zung" bang: Sholumon ri khokham David da" loo zei: moo zhung: nhang: wigi nyang: ri zung" lho: Gihon gyid bug khyoo: shu" yhe: lo" da:.

³⁹Zadog we' ASEING Zoem" mo yu ci: re" da" zhainloin: xu: khyoug: ri yu wigi Sholumon ri foid goin: bye:. Nyangnu" laboo" moid: wigi byumyu" yi dangain" gi «khokham Sholumon kangso' sheing: baja" o"» ga: nyho: tid boem bye:.

⁴⁰Hau: thang: nyangnu" dangain" nya: thang: moo: cang do, lo wigi khalhang moid lho: gau yi ziyo' yoem: kaid nyho: yoomo mougmyid noin" nyid da:.

⁴¹Adoniya yo' nya: being" voo yi dangain" zoo: shug bain zo: lo" nyid uri nyangnu" lu: fu: thui: ri shoug" gyoo: bye:. Yoab gi laboo" thui: ri shoug" gyoo: lang" nyang: gi «Voomoo" khyoo: lu: fu: nyid zigi cenoem dang: kang: nghoid lha"» ga: myid:.

⁴²Nyang: dang: abain tid shi" ri khainjung Abiatha da" nya: zoo: Yonathan ju" lo da:. Adoniya gi «Vang loo we' nang gi byu gi dayug nghoid da- lu dang: gi we' ci: re" zi nghoid» ga: tid.

⁴³Yonathan gi «Hougsu" anghoid- Aseing khokham David gi Sholumon ri khokham aya: byid: bye: zi nghoid.»

⁴⁴David gi Zadog- Nathan- Benaia yo' khokham vang" zung" bang: ri nhang: kaid bye:. Nyangnu" gi nyang: ri khokham phoo da" loo zei: moo: zhung: nhang: bye:.

⁴⁵Zadog yo' Nathan gi nyang: ri khokham aya: byid: khyo" wigi Gihon gyid bug moo mainkaid xu: foid gyoin: byid: bye:. Hau: thang: nyangnu" voogung khyoo: vang lo" wigi akhid" byumyu" yi gau yi ziyo' nyho: nyid boem zi nghoid. Hau: thui: ri akhid" nang shoug" gyoo: bye: zi nghoid.

⁴⁶Akhid" Sholumon gi khokham bui" bye:.

⁴⁷Hau: tho' mo agoo" khokham vang" mo moo" voin bang: gi Aseing: khokham David ri phau" myang: ziyo' lo" coung" wa shid re" vang lo" wigi «re" Mangsoo gi Sholumon ri re" tho' je" myeing gyi: nhang: baja" o". Sholumon vhoebkhang" rigi re" tho' je" nyid pyo: gyi: sheing baja" o"» ga: tid. Hau: thang: khokham David we' nya: yhoeb yoo moo: goeb pid noku wigi

⁴⁸«Akhid" nyid" nga" akung: mo byu dayug ri nga" khokham zhungtang moo: xo' zhung: nhang: lho: nga" myojid" yo' nyang: shau" myang yoomo Israela ASEING Mangsoo ri coung" nghei boem shang o"» ga: tid da:.

⁴⁹Houg: lang" Adoniya da" being" voo yigi gyoug yoomo dangain" thu' lho: nyang: yug nyang: khyoo: khyo" phang: byo lo" boem bye:.

⁵⁰Adoniya we' Sholumon ri gye" gyoug: nyid yoomo ASEING da" Zoem" khyoo: vang yhe: wigi phoin: da" khyoug: joem cang yhe: cang zei: yen" da:.

⁵¹Adoniya gi Sholumon ri gyoug nyid yoomo Phoin: da" khoug: joem cang zei: yen" lho: «Sholumon gi ngoo ri asaid pyam wa shid re" ngoo yo' dang: theing too" nau» ga: khokham Sholumon ri kyo" kaid da:.

⁵²Sholumon gi «Nya: dang: zung" nghoid rigi nya: vhuloem mo xam: dakhaid ri nyang" yo" zang" wa zi anghoid. Nghoid loug we' nya: dang: azung" nghoid rigi shid: shoug" wa zi nghoid» ga: tid.

⁵³Hau: thang: khokham Sholumon gi Adoniya ri khi: nhang: kaid wigi Phoin: mo nyang: ri shu" lo boem ago". Adoniya gi khokham jhang khyoo: yhe: lho: nya: shidkhoin" moo: yhe: goeb pid bye: ziyo' khokham gi nyang: ri «yhoem: khyoo: loo" we'» ga: tid.