Read Lashi 1 KHOKHAM 10 Bible Online

1 KHOKHAM 10 - Lashi bible

1 KHOKHAM 10

¹Sheba mo khokham myhi' gi Sholumon myeing gyi: nyid ga: ziri shau" gyo: wigi yau: da" dang: myid: yo' nyang: ri jham" ca: yu" wa shid re" Yerusalem khyoo: nyang: gyung: so" yhe: lo" da:.

²Nyang: gi nyang: shu" ci: da" byu phung: moo" yo' dage" nam pyo: ja: joem lug aja: ja: yo' sheing: myoo: sho' ri tho' da" gola-ug phung: ri shu" ci: da:. Nyang: yo' Sholumon shoug" goo" lang" nyang: shau" myid gu: dangain" Sholumon ri myid: bye:.

³Sholumon gi hau: joem dangain" ri doem phuid: sho' kyoo" bye:. Hau: joem gi nyang: phuid: kyoo" wa shid re" gye" ayoug: nghoid da:.

⁴Sheba khokham myhi' gi Sholumon da" phajhi" ri shau" gyo: ziyo' Sholumon koid da" khokham kho" ri we' shau" myang bye:.

⁵Nyang: gi Sholumon da" zoobui" moo jung to" da" zoo: shug ri we' nya: moo" voin bang: da" yhoem: joem ri we' nya: khokham kho" mo moo" voin bang: yo' nyangnu" void ci: da" byimi joem ri we' nya: zoo: shug pui" moo nya: shid re" dei byid: nyid da" dei zoo: yiri we' wigi Noku Yhoem: Moo" khoug: moo nyang: ngei" byid: da" xoin" joem ri we' myang bye:. Hau: joem gi nyang: ri so' byug loo" sho' mau" hang" nhang: bye:

⁶Nyang: gi khokham Sholumon ri «Nang yo' re" phajhi" khyoo: ri nga" mungdain: mo ngoo shau" gyo: zigi deing nhung!

⁷Nghoid loug we' he: joem dangain" ri ngoonyang: are" yu" cang cang gi ngoo hau: ziri ayo" loem" wa nghoid. Nghoid loug we' ngoo he: gu: mo eig boem mo daboem koo: date: shoug" gyo. Re" phajhi" yo' re" yoo" zoo: yoo" shug zigi ngoo ri tid kyo" tho' je" myo: nyid da:.

⁸Re" yhoem: seing: myhi' yigi gye" gam ge nyid da:. Re" nam moo khanham we' nyid da" re" dei zoo: yi yo' re" phajhi" dang: ri shoug" gyoo: wa da" akhang" yoo" bang gi gye" gam ge nyid da:.

⁹Re" ASEING Mangsoo ri coung" shang o". Nyang: gi nang ri Israela khokham koid nhang: ziyo' nyang: nang yo' dage" nyid zi khayhi' yu" nheugdeug nyid ziri nyang: ci: shug bye:. Ciwim gari nyang: gi Israela byumyu" yiri apyaid atoo: jheddab nyid yoomo tarha" yo' tarha" deing byeung" khyoo: ri yo" zoem: wa shid re" nyang: nang ri nyangnu" da" khokham koid nhang: bye: zi nghoid» ga: tid.

¹⁰Nyang: gi khokham Sholumon ri nyang: ci: lo da" jhungshug ri byid: bye:. Hau: joem gi sheing: wim tain: koo: yo' nam pyo: ja: yo' lug aja: ja: gye" myoo: sho' nghoid da:. Nyang: Sholumon ri byid: da" nam pyo: ja: gi gootu: khanham we' yo" yu tho' je" myo: nyid da:.

¹¹(Ophira mung" mo sheing: tho' lo da" Hiram sangphoo phung: gi hau: mung" mo Junipa: seig joem yo' lug aja: ja: gye" myoo sho' yu lo da:.

¹²Sholumon gi hau: seig joem ri Noku Yhoem: Moo" yo' khokham khoo" mo lo, sham' joem koid uri ci: wigi music phung: shid re" teing joem teing shi: joem ri we' koid da:. Junipa: seig gi Israela mung" khyoo: ci: vang lo da" ziyoo mo ge thang ja: nghoid. Houg yo' du zi gootu: adoem myang yu" loo: nghoid da:.)

¹³Khokham Sholumon gi Sheba khokham myhi* ri nyang: mho' gu: dangain" yo' thung" ri: khyo" byid: ca" da" jhungshug dangain" ri byid: kaid da:. Hau: thang: nyang: yo' nyang: shu" ci: da" byu yigi Sheba mung" khyoo: doem tau" loo" khari" bye:.

¹⁴Zain khang" zain khokham Sholumon shoug" yu da" sheing: gi 25 tain: jain" nghoid da:.

¹⁵Hau: tho' moo: gootu: phaga: ga: bang: byid: da" kheing"- phaga: ga: jang" mo atu" amyaid joem yo' Arabia khokham yi we' Israela mungdu zoug: yi jang" mo khang" dug joem we' nghoid da:.

¹⁶Sholumon gi goo gyi: zi eig shoo: loem: koid wigi sheing: myid: joid: jain" ri loem: khang" moo" moo: joid tab to" da:.

¹⁷Nyang: gi goo nge zi soem" shoo: loem: we' koid wigi sheing: dajoid: jain" ri loem: khang" moo" moo: joid dab' to" da:. Nyang: gi hau: goo dangain" ziri Lebanon siyoo beingdo, yabmoo" moo kaid to" da:.

¹⁸Nyang: gi khokham zhungtang zeing daloem: riwe' koid bye:. Hau: zhungtang dadu rigi xang: zei yo' koid to" wigi deing gu: moo gi sheing: gi yo' thoeb to" da:.

¹⁹Khokham zhungtang moo: zoem" lhang: khyug ki bo lho: ki khang" moo" athang: eig shoid goin" moo khangkhyi lhoo: dadu: du: koid to" wigi khangkhyi dangain" daxe: eig du: nghoid da:. Khokham zhungtang nungthang shoid moo: zuid zuid leung" da" soolhoo: yo' ayam eig shoid lo, ke" jang" moo khangkhyi soolhoo: koid tab to" da:. Hid yhang: ti" khokham zhungtang ri kha: mungdain: moo: we' akoid too" nghoid da:.

²¹Sholumon da" gyid shug goem dangain" gi sheing: yo' koid lho: Lebanon siyoo beingdo, yabmoo" mo ougkhu langbain dangain" ri sheing: gyeung" yo' koid to" da:. Ngei ri aci: nghoid da:. Sholumon da" pyaid ri ngei ri phoug" dab ajhoo: nghoid da:.

²²Nyang: gi Hiram gyid sangphoo phung: yo' dage" panglai: moo so" da" gyid sangphoo phung: yo" da:. Nya: sangphoo phung: yi soem" zain dalheing: doem tau" lo wigi sheing:- ngei- xang: zei- myugdung: yo' lamyug joem ri tho' lo ago".

²³Khokham Sholumon gi gootu: khokham yi tho' je yoo" zoo: su:- je phajhi" si su: nghoid.

²⁴Mangsoo nyang: ri byid: to" da" phajhi" dang: ri mougmyid gyab goin" bang: re" tam" gyoo: nau ago" da:.

²⁵Nya: jhang re" da" yugkhang" moo" gi nya: shid re" ngei zi sheing: zi byisheing:- gyizi gyikhoo:- nam pyo: ja:- myang: yo' loo kung" joem ri jhungshug khyo" ci: ri" byid: boem ago". Hau: joem ri zain khang" zain xo' byid: ago".

²⁶Sholumon gi gyi myang: rheing" 1,400 yo' gyi myang: 12,000 bo da" gyidab daloem: ri koid to" da:. Hau: joem mo dayham" ri Yerusalem moo to" to" wigi deing da" gu: ri gootu: voomoo" joem cang nyhid: to" da:.

²⁷Nyang: vhoebkhang" da" ayo, ri ngei gi Yerusalem mo lug boem yhang: ti"- shamu gam gi Yuda mung" boem khyid: cang yug da" phofoem gam myoo" sho' yug yhang: ti" nghoid nyid da:.

²⁸Khokham da" moo" voin bang: gi Musri yo' Kiliki mung" mo thu da" myang: joem

²⁹Egutu mung" mo thu da" gyi myang: rheing" joem da" aphoug" gi nyangnu" zei: zeing boem ago". Nyangnu" gi Hiti yo' Suri khokham yiri myang: joem gyi myang: rheing" joem oung" byid: boem. Gyi myang: rheing" daloem: ri ngei 600 yo' myang: dadu: ri ngei 150 khyo" oung" byid: ago".