Read Lashi 1 KHOKHAM 11 Bible Online

1 KHOKHAM 11 - Lashi bible

1 KHOKHAM 11

¹Sholumon gi tungbau myiyi: myoo" sho' ri jheddab nyid bye:. Egutu khokham da" nya: myiyi zoo: moo lid gootu: Hiti myiyi: yi yo' Moba- Amon- Edom- Sidon mung" mo myiyi: yiri nyang: lo, xo' yu bye:.

²Tungbau byu yigi Israela byumyu" yiri nyangnu" yu phara" joem moo dang: zung" noku loo nhang: yoomo ASEING gi Israela byumyu" yiri byumyu" du da" bang: yo' lo, xo' wa shid re" amyeing" byid: too" nghoid loug Sholumon gi nyangnu" yo' lo, xo' yu bye:.

³Sholumon gi khokham zoomyi: nyhed shoo: yug ri lo, xo' yu bye: ziyo' dangcang: myhi: soem" shoo: we' yoo" shi" da:. Houg bang: gi nyang: ri Mangso jang mo ve: loo" nhang: bye:.

⁴Nyang: mang: lo" da" ayo, moo: nyangnu" gi nyang: ri tungbau yu phara" no' khyoo: ri shu" koid boem bye:. Nyang: gi nya: phoo David koid yhang: ti" nya: ASEING Mangsoo ri dang: zung" nyid zi anghoid.

⁵Nyang: gi Sidon yu phara" myhi' Astarte yo' aco' ajhoid da" Amon yu phara" Moleg ri no' bye:.

⁶Nyang: gi ASEING ri thougtheung yooboo koid ziyo' nya: phoo David koid yhang: ti" nyang: moo deingmain" nyid zi anghoid.

⁷Yerusalem bidthu shoid boem moo aco' ajhoid da" Moba yu phara" Khemosha yo' aco' ajhoid da" Amon yu phara" Moleg ri no' wa da" joyoo ri nyang: koid too" bye:.

⁸Nyang: gi nya: tungbau yhoem: seing: myhi' yi nam pyo: ja: nghe' ngei" wa joyoo yo' nyangnu" da" yu phara" joem ri xoin" ngei" byid: wa joyoo ein: da" no' joyoo ri we' koid byid: bye:.

⁹Israela ASEING Mangsoo gi Sholumon jang" moo eig lheing: thu shug wigi tungbau: yu phara" ri ano' wa shid re" nyang: ri amyeing" byid: bye: rilang" Sholumon gi ASEING da" dang: atam" gyoo: tho' agoo" nya: jang" mo nungphug ve: lo" byug bye:. Houg: yoomo ASEING gi Sholumon ri nheig yo: lho:

¹⁰

¹¹nyang: ri «Ngoo yo' koid to" da" dang: theing ri nang pa: yhi: koid lho: phyo' pyam bye: ziyo' nga" amyeing" dang: ri atam" gyoo: yoomo re" lo, mo mungdain: ri yu lho: re" moo" voin bang: dayug yug ri ngoo ab byid: wa ein: ngoo dangsoo" byid bye:.

¹²Nghoid loug we' re" phoo David yoomo ngoo re" pyaid moo he" moo" koid wa zi anghoid. Houg loug re" yuggi zoo: kho" zhung: da" ayo, ri koid wa.

¹³Ngoo gi nya: lo, mo mungdain: dangain" ri yu pyam zi anghoid. Hau gungthid nga" dei zoo: David yoomo we' nga" shid re" ein: koid to" da" Yerusalem yoomo we' nyang: ri byumyu" dakung: khyo" to" too" wa nghoid» ga: tid.

¹⁴Houg: yoomo Sholumon ri thougtheung wa shid re" ASEING gi Edom khokham deungkhu: mo Hadada ri bui" nhang: bye:.

¹⁵He khyoo: abui" shi" ayo, David gi Edom mung" ri zain: oung: yu uri nya: gyizoo: yiri vhoebkhang" da" zoug: Yoab gi hau: mung" khyoo: shid: mang joem ri du: myhoeb pyam wa ga: yhe: loo" bye:. Nyang: yo' nya: byu yi Edom moo: lhammoo" khyug khyab nyid nyid ayo, khoug: moo: nyangnu" gi Edom mung" mo yuggi yi dangain" ri said pyam ago".

¹⁶

¹⁷Egutu khyoo: phang: yhi: mo, nghoid da" Hadada yo' nya: phoo dei zoo: yi Edom byu dayham" za: dadeing da:. (Hau: ayo, ri Hadada gi zooshang: zoo: danghoid shi").

¹⁸Nyangnu" gi Midian mung" mo thu lo" wigi Paran khyoo: yhe: lho: hougmoo gootu: byu yi nyangnu" jang" moo re" xo' boem. Hau: thang: nyangnu" gi Egutu khyoo: yhe: wigi khokham yo' yhe: shoug" bye:. Khokham gi Hadada ri mougmyid dajhi'- yhoem: daloem: ri byid: lho: zooshug yo' we' pang" thoug bye:.

¹⁹Hadada gi khokham yo' byencang" bue" byug wigi khokham gi nya: dumoo" nghoid da" khokham myhi' Taphene da" nya: nhung" ri Hadada yo' lo, xo' byid: bye:.

²⁰Nyang: gi Hadada shid re" Genubad ga: da" yuggi zoo: dayug khu: byid: wigi Ganubad gi khokham kho" moo khokham myhi' yo' nyid gyi: lo ziyo' houg moo nyang: gi khokham zoo: yi yo' dage" nyid nyid da:.

²¹David shid: bye: khyoo: yo' gyizoug: Yoab shid: shoug" bye: khyoo: ri Egutu mo Hadada jang" khyoo: lu dang: ju" lang" Hadada gi khokham ri «Ngoo ri nga" moug: khyoo: doem tau" loo" nhang: we' o"» ga: tid.

²²Khokham myid: zigi «Ciwim yoomo lha"- ngoo nang ri daja ja: byid: wa deing jo, yoomo rhe". Nang ciwim yhoem: khyoo: tau" loo" nau lha"» ga: myid:. Hadada gi khokham phoo ri «Loo" za: loo" nhang: we' o"» ga: tid. Houg: lho: nyang: gi nya: moug: khyoo: tau" loo" khari" bye:. Edom khokham nghoid da" Hadada gi akhyeing" su: nghoid ziyo' Israela da" ngheing" thang gyi voo bue" nyid bye:.

²³Mangsoo gi Eliada da" yuggi zoo: Rezon ri we' Sholumon ri thougtheung da" gyivoo bui" nhang: bye:. Rezon gi nya: yhoem: seing: Zoba khokham Hadadeza jang" mo phang: thu lo wigi

²⁴tarha" acang da" phung: daphung: da" vhujhung: bue" lo da:. (He: zigi David wigi Hadadeza ri zain: oung: wigi nya: bidnoem gyiphung: nghoid da" Suri byumyu" yiri zain: khyo' pyam thang: ri bue" khyoo: nghoid.) Rezon yo' nya: byu yi Damasku moo yhe: nyid wigi houg moo nya: byu yigi nyang: ri Suri khokham koid nhang: bye:.

²⁵Nyang: gi Sholumon pyaid ri Israela da" gyivoo dayug nghoid da:.

²⁶Khokham Sholumon ri thougtheung da" gootu: byu dayug gi nya: moo" voin nghoid da" Ephrim mung" Zereda mo Nebad nya: zoo: Yeroboam nghoid da:. Nya: myhi' gi Zerua ga: da" cougmoo" myhi' nghoid.

²⁷He: zigi gyivoo thu lo da" mhoomyid: shen" dam nghoid. Sholumon gi Yerusalem bidthu shoid moo myidzhoo" du: pyeing nyid ziyo' voomoo" vangkhyam joem ri so' koid nyid da:.

²⁸Yeroboam gi zooyam zoo: nghoid wigi nyang: moo" khayhi' yo" zei: ziri Sholumon yu" xoem" to" lho: Manashe yo' Ephrim akung: yi da" mougmyid moo moo" zei: nyid da" moo" zei: bang: dangain" ziri gung" wa shid re" nyang: ri yoovoin byid: to" da:.

²⁹Danyid" gi Yeroboam Yerusalem mo zi gyung: so" thu lo" uri Shilo voogung mo Lapi: Ahiya yo' pa: moo nyang: yo' kyeing" shoug" go" da:.

³⁰Ahiya gi nyang: void ci: da" byisheing: aseig ri khyoid yu lho: hau: ziri daxe: eig du lang: ceig wigi

³¹Yeroboam ri «Re" shid re" daxi: du ri yu we' ciwim gari Israela ASEING Mangsoo nang ri «Ngoo ri Sholumon jang" mo mungdain: yu pyam lho: nang ri akung: daxi: byid: wa.

³²Nga" dei zoo: David yoomo we' Israela damung" goin" moo nga" shid re" ein: ngoo khyen: to" da" Yerusalem yoomo we' Sholumon gi byumyu" dakung: yu baja".

³³Ngoo gi hid: su" koid wa zi nghoid. Ciwim gari Sholumon gi ngoo ri he: pyam lho: tungbau yu phara" joem nghoid da" Sidon yu phara" myhi' Astarte- Moba yu phara" Khemosha yo' Amon yu phara" Moleg bang: ri no' loo" yoomo nghoid. Sholumon gi ngoo ri atam" gyoo: loo: nya: phoo David yhang: ti" tarha" yo' amyeing" dang: joem ri acang loo: za: shoid da" moo" zei: nyid da:.

³⁴Nghoid loug we' mungdain: dangain" ri Sholumon lo, mo ayu pyam lho: za: nyang: ashid: shi" gyoo: ri ngoo nyang: ri akho: akhang" byid: too" shi" wa nghoid. Nga" tarha" yo' amyeing" dang: ri tam" gyoo: su: nyang: ri ngoo khyen: to" da" nga" dei zoo: David yoomo ngoo hidsu" koid wa zi nghoid.

³⁵Ngoo gi mungdain: ri Sholumon nya: zo: lo, mo yu wigi nang ri akung: daxi: byid: wa nghoid.

³⁶Nghoid loug we' ngoo ri noku wa shid re" joyoo khyo" ngoo khyen: to" da" Yerusalem voomoo" moo nga" deizoo: David da" byumyu" akung: dakung: gi khanham we' yo" vhoebkhang" nyid sho' Sholumon nya: zoo: ri akung: dakung: byid: wa zi nghoid.

³⁷Yeroboam we" ngoo gi nang ri Israela khokham bui" nhang: wa wigi nang gi mougmyid dangain" ziri nang vho: khyo" vhoebkhang" wa zi nghoid.

³⁸Nang ngoo ri jhug zug tam" gyo:- nga" tarha" yo' nyid lho: nga" deizoo: David koid yhang: ti" ngoo jang deung to" da" nga" amyeing" dang: joem ri jang jang cang koid yhe: lo" nghoid rigi ngoo nang yo' khanham we' dage" nyid wa nghoid. Ngoo nang ri Israela khokham koid nhang: wa ziyo' ngoo David ri koid bye: ziyo' dakhyo" re" thang: ri we' re" amyed ashen yiri gyeing" nyang: vhoeb khang nhang: wa zi nghoid.

³⁹Sholumon da" yooboo yoomo David da" amyed ashen yiri ngoo dam byid: wa. Nghoid loug we' ayo, dangain" moo anghoid wa» ga: tid.

⁴⁰Houg: yoomo Sholumon gi Yeroboam ri said wa shid re" yoem: kaid yen" da:. Nghoid loug we' nyang: gi Egutu khokham Shishag jang" khyoo: phang: yhe: wigi houg moo Sholumon shid: da" ayo, ju" sho' yhe: nyid nyid da:.

⁴¹Sholumon koid bye: khyoo:- nya: moo" zoo" yo' nya: phajhi" khyoo: dangain" ziri Sholumon da" mhoomyid: shen" dam pug moo: lhid" xoem" to" da:.

⁴²Sholumon gi Yerusalem moo: nyid wigi Israela mung" dangain" ri 40 zain khokham koid bye:.

⁴³Nyang: shid: bye: ziyo' David voomoo" moo: myhoeb too" bye:. Nya: zoo: Rehoboam khokham doem koid bye:.