Read Lashi 1 KHOKHAM 12 Bible Online

1 KHOKHAM 12 - Lashi bible

1 KHOKHAM 12

¹Rehoboam gi mougzhung: shoid mo Israela byu yi dangain" zoeb foem: nyid wigi nyang: ri khokham koid nhang: da" Shekhem voogung khyoo: yhe: lo" da:.

²Khokham Sholumon jang" mo zi Egutu khyoo: phang: loid lo" byug bye: da" Nebad da" nya: zoo: Yeroboam hau lu dang: ri shoug" gyoo: lang" nyang: gi Egutu mo doem tau" loo bye:.

³Mougzhung: shoid byumyu" akung: yi mo byumyu" yigi Rehoboam ri khe: yu wigi nyangnu" dangain" nyang: jhang zoeb foem: lho: nyang: ri

⁴«Re" phoo Sholumon gi ngoonu" ri anoug akhyoid koid wigi gye" lid: da" yoovoin ri ngoonu" ri foin: to" da:. Nang ngoonu" ri soem" da" yoovoin byid: wigi yug yoo tung" nyid nhang: nghoid rigi ngoonu" gi re" da" dang: zung" tam" gyo: da" mung" byu yi bui" wa nghoid» ga: tid.

⁵Nyang: gi «Soem" nyid" ein: nyid" ri doem ri" ge' ngoo hau: nyid" ri tid kyoo" byid: wa» ga: tid. Houg: yoomo nyangnu" byo loo" khari" bye:.

⁶Khokham Rehoboam gi nya: phoo Sholumon da" phajhi" byid: bang: nghoid da" apyaid gyi: mo, yo' sham: go" yu" da:. Nyang: myid: zigi «He: byu yiri khasu" yhe: tid wa ein: ziri nanu" ngoo ri khate" phajhi" yo" byid: wa lha"» ga: myid:.

⁷Nyangnu" gi «Nang hau: byumyu" yiri goolhoo: dei byid: nau nghoid rigi nyangnu" mho' yoid khyoo: ri khab yu byid: we'- houg: lang" nyangnu" nang ri khanham we' dang: zung" lho: dei byid: wa nghoid» ga: tid.

⁸Nghoid loug we' nyang: gi apyaid' gyi: bang: tid da" phajhi" byid: dang: ri cishu: anhang: lho: akhid" nya: phajhi" byid: bang: nghoid da" nyang: yo' dage" gyi: lo da" zooyam yi jang" khyoo: doem yhe: da:.

⁹Nyang: gi «Byumyu" yigi nyangnu" da" yoovoin ri soem" sho' koid byid: wa shid re" tid nyid boem ziri ngoo khasu" tid wa. Hau: ziri yhe: tid wa shid re" nanu" ngoo ri phajhi" khasu" byid: wa lha"» ga: myid:.

¹⁰Nyangnu" gi «Nang nyangnu" ri hidsu" ein: tid we' nga" lo, zoo: gam" thang: gi nga" pho da" phyid" doem: tho' je thu: da:.

¹¹Nyangnu" ri tid we' nga" phoo gi nanu" atho' moo: lid: da" yoovoin ri foin: too" bye: ngoo hau: joem ri je" lid: sho' koid wa. Nyang: nanu" ri voosi" yo' baid da:. Ngoo gi nanu" ri joto' zu: tab to" da" voosi" yo' baid wa zi nghoid ein: tid we'» ga: tid.

¹²Soem" nyid" ju" thang: ri khokham Rehoboam nyangnu" ri tid kaid ziyo' dayhang: ti" Yeroboam yo' byumyu" yi dangain" nya: jang" khyoo: re" ago".

¹³Khokham phoo gi apyaid gyi: bang: da" phajhi" dang: ri cishu: anhang: lho: zooyam yi da" phajhi" dang: yo' dayhang: ti" byumyu" yiri anoug ashoo" dang: tid bye:.

¹⁴Nyang: gi «Nga" phoo gi nanu" atho' moo: lid: da" yoovoin ri foin: too" bye:. Ngoo hau: joem ri je" lid: sho' koid wa. Nyang: nanu" ri voosi" yo' baid da:. Ngoo gi nanu" ri joto' zu: tab to" da" voosi" yo' baid wa zi nghoid» ga: tid.

¹⁵He: zigi Shilo voogung mo Lapi: Ahiya khyo" wigi Nebad nya: zoo: Yeroboam ri ASEING tid too" bye: da" dang: ri bue" loo nhang: wa shid re" ASEING da" myid vho: khyoo: nghoid da:. Hougsu" yoomo khokham phoo gi byumyu" yi da" dang: ri atam" gyoo: byid: nghoid da:.

¹⁶Byumyu" yigi nyangnu" dang: ri khokham phoo atam" gyo: ziri myang lang" nyangnu" nyho: lho: «David yo' nya: ikoin deungkhu: gyoeb gyoo" baja". Nyangnu" gi ngoonu" shid re" ciyo" koid byid: loo wa la". Israela byumyu" yi we" yhoem: khyoo: lo" boem loo shang. Rehoboam gi nyang: nya: gung nyang: nyang: zung" yu" nyid baja"» ga: tid. Houg: yoomo Israela byumyu" yi gyi koid bye:.

¹⁷Rehoboam ri Yuda moug: moo nyid deing nyid da" byumyu" yi atho' moo: za: khokham koid nhang: kho' da:.

¹⁸Hau: thang: Rehoboam gi moo" zei: bang: ri gung" da" Adoniram ri Israela byumyu" yi jang" khyoo: yhi: nhang: da:. Nghoid loug we' nyangnu" gi nyang: ri lugboem yo' du" said pyam da:. Houg: yoomo Rehoboam gi nya: gyi myang: rheing" khoug: khyoo: myab myab do, vang lo" wigi Yerusalem khyoo: phang: loo" bye:.

¹⁹Hau: ayo, mo Israela mung" mougzhung: shoid byumyu" yigi khokham David da" khokham kung: ri thougtheung gyi koid nyid boem bye:.

²⁰Israela byumyu" yigi Yeroboam Egutu mo doem tau" loo bye: ga: ziri shoug" gyoo: lang" nyangnu" nya: jang" khyoo: byumyu" yi zoebphung: koid wa shid re" khe: kaid boem wigi nyang: ri Israela khokham koid nhang: bye:. Yuda byumyu"' akung: dakung: kyeing" za: David amyed ashen yiri dang: zung" deing nyid shi" da:.

²¹Rehoboam Yerusalem moo ju" lang" Yuda yo' Benyamin akung: ako'' mo reung: thang gyizoo: 180,000 yug ri nyang: khe: zheing" too" bye:. Nyang: gi meing: yhe: zain: wigi Israela mung" mougzhung: shoid mo akung: ako'' yiri nya: lo, khoug: khyoo: doem shu" zheing" too" wa shid re" myid soin: nyid da:.

²²Nghoid loug we' Mangsoo gi Lapi: Shemia ri

²³Rehoboam yo' Yuda yo' Benyamin akung: ako'' yi mo byu dangain" ri he: mungdang: ri byid: wa shid re" tid bye:.

²⁴Israela byumyu" yi nghoid da" nang seing: da" re" mang: re" nhung" yiri yhe: yo" zain: wa zi anghoid. Nanu" dangain" yhoem: khyoo: loo" ge'. Bui" bye: gu: gi nga" myid vho: khyoo: nghoid bye:. Nyangnu" dangain" gi ASEING da" amyeing" dang: ri tam" gyo: wigi yhoem: khyoo: tau" lo" boem bye:.

²⁵Israela khokham Yeroboam gi Ephrim boem moug: Shekhem voogung ri vang khyam: kyam' lho: dayo, zoo: houg moo nyid nyid bye:. Hau: thang: nyang: thu lo" wigi Renuela voogung ri vang khyam: kyam' bye:.

²⁶Nyang: gi nya: gung nyang: ri «Akhid" gi hid: joem yoomo nga" byumyu" yi Yerusalem khyoo: yhe: wigi houg mo Noku Yhoem: Moo" khoug: moo: ASEING ri xoin" yhe: to' nghoid rigi nyangnu" gi Yuda khokham Rehoboam jhang khyoo: nyangnu" myid lheing: loo" wa nghoid wigi ngoo ri said goo" wa zi nghoid» ga: myid nyid.

²⁸Hau: ziri bain myid thang: ri nyang: gi sheing: nuloo: soolhoo: eig du: ri koid wigi nya: byumyu" yiri «Nanu" Yerusalem khyoo: lo" wigi noku wa shid re" gye" ve: nyid da:. Israela byumyu" yi we"- nanu" ri Egutu mung" mo shu" thu lo da" nanu" yu phara" gi he: joem nghoid da» ga: tid.

²⁹Nyang: gi sheing: nuloo: soolhoo: joem mo dadu: ri Bethela moo to" to" wigi Dan moo dadu: to" to" da:.

³⁰Houg: lang" byumyu" yigi Bethela yo' Dan voogung khyoo: yhe: noku yoomo nyangnu" yooboo koid boem bye:.

³¹Yeroboam gi bouggung cang noku joyoo joem ri we' koid to" boem lho: nyang: gi Levi akung: ako'' anghoid da" ikoin deungkhu: joem mo khainjung yiri khyen: too" bye:.

³²Yeroboam gi Yuda pui" yo' du da" noku thung" pui" da loem: ri we' lhammoo" shed khyab daxe: wim: nyid" nyid" ri koid wa khyo" soin' tu' to" da:. Nyang: koid to" da" sheing: nuloo: soolhoo: joem shid re" Bethela phoin: tho' moo nyang: gi xoin" to' byid: wigi nyang: koid to" da" noku joyoo moo: moo" zei: wa shid re" nyang: gi Bethela moo khainjung yi to" too" bye:.

³³Nyang: soin: phyid too" bye: da" lhammoo" shid khyab daxe: wim: nyid" nyid" ri nyang: gi Bethela khyoo: yhe: wigi Israela byumyu" yi shid re" nyang: soin' tu' too" bye: da" pui" mo phoin: tho' moo xoin" ri to' byid: bye:.