Read Lashi 1 KHOKHAM 15 Bible Online

1 KHOKHAM 15 - Lashi bible

1 KHOKHAM 15

¹Israela khokham Yeroboam vhoebkhang" zi daxe: shed zain byeung" uri Abiya gi Yuda khokham bue" loo bye:.

²Hau: thang: Yerusalem moo soem" zain vhoebkhang" bye:. Nya: myhi' gi Absalom da" nya: zoo: Makha nghoid da:.

³Nyang: gi nya: phoo yo' dayhang: ti" za: yooboo koid ziyo' nya: phoug" ki" David yhang: ti" nya: ASEING Mangsoo ri bain sho' dang: zung" nyid zi anghoid.

⁴Nghoid loug we' David yoomo nya: da" ASEING Mangsoo gi Abiya da" khoo: ri Yerusalem ri vhoebkhang" wa shid re" we' Yerusalem ri goem loem wa shid re" we' nyang: ri yuggi nu" dayug byid: bye:.

⁵ASEING gi he: moo" zoo" ri koid bye:- ciwim gari David gi Hiti byumyu" Uria khyoo: mo lid gootu: ASEING vho: ngei khyoo: ri koid ziyo' nya: amyeing" dang: ri khanham we' atam" gyoo: akoid nghoid da:.

⁶Rehoboam yo' Yeroboam bui" shid" da" gyi khaid pui" gi Abiya da" pyaid jang: sho' xo' bui" da:.

⁷Abiya koid lid lo khyoo: ja: khang" moo" ri Yuda khokham yi mhoomyid: shen" dam pug moo lhid" xoem" too" bye:.

⁸Abiya shid: bye: ziyo' David voomoo" moo: myhoeb too" bye:. Nya: zoo: Asa gi khokham doem koid nyid bye:.

⁹Israela khokham Yeroboam kho" zhung: zi eig xi: zain byeung" uri Asa gi Yuda khokham bue" lo bye:.

¹⁰Nyang: gi Yerusalem mo myid: xe: da zain vhoebkhang" bye:. Nya: phyid" gi Absalom da" nya: zoo: Makha nghoid da:.

¹¹Asa gi nya: phoug" ki" David koid bye: yhang: ti" ASEING vho: ngei da" moo" zoo" ri koid bye:.

¹²Nyang: gi tungbau noku thung" joyoo moo: shava myhi' shava phoo koid nyid da" bang: dangain" mo, ri mungdain: mo khaid sain" pyam wigi nya: shid mo bang: koid to" da" yu phara" soolhoo: dangain" ri we' yu pyam bye:.

¹³Nyang: gi nya: phyid" Makha ri khokham myhi' da" nya: myhi' aya: mo theing: nhang: bye:. Ciwim gari nyang: gi je be: myo: lug lo ga: da" aco' ajhoid yu phara" myhi' Ashera yu soolhoo: ri koid yoomo nghoid. Asa gi hau: yu soolhoo: ri baid khyau" pyam lho: Kidron lang: khung" moo nghe' pyam bye:.

¹⁴Asa gi tungbau noku thung" noku joyoo joem dangain" ri abain phyo' pyam shi" rilang" nyang: gi ASEING ri nya: pyaid dangain" moo dang: zung" nyid" ashi" da:.

¹⁵Nyang: gi nya: phoo wigi Mangso jang" moo shug byid: to" da" jonu" joem we' wigi nyang: nyang: shug byid: to" da" sheing: yo' ngei jonu" joem ri Noku Yhoem: Moo" khoug: moo to" to" da:.

¹⁶Yuda khokham Asa yo' Israela khokham Basha tang: gi nya: tang: khokham khoo" zhung: ayo, dangain" moo dayug yo' dayug meing: atheing: lho: zain: go".

¹⁷Basha gi Yuda mung" ri vang zain: wigi Yuda mung" mo vang vang thu thu khyoo: dangain" ri phyed pyam wa shid re" Rama voogung moo vang khyam: ri kyam' nyid bye:.

¹⁸Houg: yoomo khokham Asa gi Noku Yhoem: Moo" yo' khokham khoo" moo deing jo, da ngei yo' sheing: joem dangain" ri yu wigi Damasku moo khokham khoo" zhung: nyid su: Suri khokham Benhadad nghoid da" Tabrimon da" nya: zoo:- Hezion da" nya: myid: jhang khyoo: hau: ziyoo yo' he: mungdang: ri nya: moo" voin bang: dayham" yo' foin: kaid bye:.

¹⁹Nyangnu" da" phoug" phyid" koid yhang: ti" ngoonu" we' seing" tain" bidnoem yi koid shang o". He: ngei yo' sheing: gi re" shid re" jhungshug nghoid. Akhid" Israela khokham Basha yo' nang seing" tain" bidnoem koid to" ziri phyo' pyam we'. Hougsu" nghoid rigi nyang: gi nga" mougmyid mo nya: gyiphung: ri shu" yu pyam wa zi nghoid.

²⁰Khokham Benhadad we' Asa mho' yoid lo da" dang: ri myid veing" byid: ziyo' Israela voomoo" joem ri zain: wa shid re" nya: gyizoug: yi yo' gyizoo: yiri nhang: kaid bye:. Nyangnu" gi Iyon- Dan- Abela Bed Makha- Galile nung" aqei: ayam yo' Naphtali mougmyid dangain" ri zain: oung: pyam boem bye:.

²¹Bue" loo bye: da" khyoo: ri khokham Basha shoug" gyoo: lang" Rama moo: vang khyam: kyam' ziri to" pyam lho: Tirza khyoo: loo" khari" bye:.

²²Hau: thang: Khokham Asa gi Basha wigi vang khyam: koid jang" moo ci: da" Rama mo lugboem yo' seig thi" joem ri bo pang" vu, phang: wa shid re" Yuda mung" dangain" jang khyoo: dayug ri we' adeing loo sho' amyeing" byid: kaid bye:. Asa gi hau: jonu" joem yo' Benyamin mougmyid mo voomoo" nghoid da" Mizpa yo' Geba mo vang khyam: ri kyam' too" byid: bye:.

²³Khokham Asa koid lid loo bye: da" moo" zoo" dangain" nya: seing" yang" moo" zoo" yo' voogung joem ri vang khyam: kyam' khyoo: joem dangain" ri Yuda khokham yi mhoomyid: shen" dam pug moo: lhid" xoem" to" da:. Nghoid loug we' nyang: apyaid gyi: lo da" ayo, ri khyid: no lho: gyau: byug da:.

²⁴Asa shid: bye: ziyo' David voomoo" mo khokham loeb boug moo: myhoeb too" bye:. Nya: yuggi zoo: Yehoshaphad gi nya: joyoo moo: khokham doem koid nyid bye:.

²⁵Yuda khokham Asa kho" zhung: zi eig zain nghoid uri khokham Yeroboam da" nya: zoo: Nadab Israela khokham bue" lo lho: eig zain vhoebkhang" bye:.

²⁶Nya: shid vhu" mo nya: phoo yhang: ti" nyang: gi ASEING ri thougtheung yooboo koid ziyo' Israela byumyu" yiri yooboo thoem" khyoo: shu" yhe: lo" da:.

²⁷Ishakha akung: mo Ahiya nya: zoo: Basha gi Nadab ri thougtheung wa soin' nyid zi nghoid wigi Nadab yo' nya: gyizoo: yigi Philisti mung" mo Gibethon voomoo" ri vang: to" uri Nadab ri said pyam bye:.

²⁸He: khyoo: bue" zigi Yuda khokham Asa vhoebkhang" da" soem" zain ein: zain ri nghoid da:. Hougsu" yoomo Basha gi Nadab joyoo moo Israela khokham khyo" khoo" doem zhung: nyid bye:.

²⁹Nyang: gi khokham bue" ziyo' dalheing: dam Yeroboam deungkhu: byu yi dangain" ri said pyam da:. ASEING da" deizoo: nghoid da" Shilo voogung mo lapi: Ahiya nhoid khyo" wigi ASEING tid to" bye: ziyo' dayhang: ti" Yeroboam ikoin deungkhu: byu yi dangain" gi said pyam zi shoug" bye:. Dayug we' adeing loo: nghoid da:.

³⁰Yeroboam gi nyang: shoid lid lo" da" yooboo yo' nyang: Israela byumyu" yiri yooboo shu" koid da" yooboo gi Israela ASEING Mangsoo ri nheigloem: yoin nhang: nyid yoomo he: moo" zoo" bue" zi nghoid.

³¹Nadab koid lid loo bye: da" moo" zoo" ja: khang" moo" ri Israela khokham yi da" mhoomyid: shen" dam pug moo: lhid" xoem" too" bye:.

³²Yuda khokham Asa yo Israela khokham Basha gi nyang: tang: yoem: so' yo" da" ayo, dangain" moo: nyang: cang" nyang: atheing: meing: zain go" nyid boem bye:.

³³Yuda khokham Asa vhoebkhang" zi soem" zain ein: zain ri Ahiya nya: yuggi zoo: Basha gi Israela mung" goin" da" khokham bue" loo bye: ziyo' nyang: gi Tirza voogung moo khoo" zhung: wigi eig xe: myid: zain vhoebkhang" bye:.

³⁴Nya: shid vhu" mo khokham Yeroboam yhang: ti" nyang: gi ASEING ri thougtheung yooboo koid lho: Israela byumyu" yiri we' yooboo thoem" khyoo: shu" vhu" yhi: bye:.