Read Lashi 1 KHOKHAM 16 Bible Online

1 KHOKHAM 16 - Lashi bible

1 KHOKHAM 16

¹ASEING gi Hanani da" nya: yuggi zoo: lapi: Yehu ri dang: tid ziyo' Basha shid re" he: mungdang: nyang: ri byid: bye:.

²«Nang ci: abui" nghoid loug we' ngoo nang ri nga" Israela byumyu" yi da" vhujhung: bui" nhang: bye: zi nghoid. Akhid" nang gi Yeroboam yhang: ti" yooboo koid wigi nga" byumyu" yiri yooboo thoem" khyoo: shu' yhi: bye:. Nyangnu" da" yooboo gi nga" nheigloem: ri zhu: nhang: bye:.

³Houg: yoomo Yeroboam ri ngoo koid bye: ziyo' dayhang: ti" nang yo' re" ikoin deungkhu: ri we' phyo' pyam nhang: wa.

⁴Voomoo" khoug: moo shid: jo, da" re" ikoin deungkhu: byu yi hang" ri nghoid loug we' lakhuid" joem wigi zo: pyam wa zi nghoid. Jang: pa: cang shid: da" hang" ri nghoid loug we' join yu joem wigi zo: pyam wa zi nghoid» ga: tid.

⁵Basha koid lid loo bye: da" moo" zoo" ja: khang" moo" yo' nya: seing" yang" moo" zoo" dangain" ziri Israela khokham yi da" mhoomyid: shen" dam pug moo lhid" xoem" too" bye:.

⁶Basha shid: bye: ziyo' Tirza voomoo" moo: myhoeb too" bye:. Nya: yuggi zoo: Ela gi nya: khokham khoo" moo: khoo" doem zhung: bye:.

⁷ASEING ri thougtheung yooboo koid da" Basha yooboo yoomo Basha yo' nya: ikoin deungkhu: byu yiri thougtheung wa shid re" ASEING tid da" mungdang: gi Lapi: Yehu khyo" wigi byid: nyid da:. Nyang: gi ASEING da" nheigloem: ri zhu: nhang: nyid zigi nya: shid vhu" mo khokham Yeroboam koid lid lo ziyo' dakhyoo" ti" age da" yooboo moo" zoo" ri koid yoomo kyeing" anghoid. Nyang: gi Yeroboam ikoin deungkhu: byu yi dangain" ri we' said pyam yoomo nghoid.

⁸Yuda khokham Asa vhoebkhang" zi eig xe: khyug zain ein: zain ri Basha nya: yuggi zoo: Ela gi Israela khokham bue" loo bye: ziyo' nyang: gi Tirza voomoo" moo eig zain vhoebkhang" bye:.

⁹Khokham gyi myang: rheing" joem mo dago" yi" ri gung" da" nya: gyizoug: Zimri gi nyang: ri thougtheung wa khyo" soin' bye:. Danyid" gi Tirza voomoo" mo khokham khoo" ri gung" su: Arza da" yhoem: moo: Ela yhid: yed nyid da:.

¹⁰Zimri gi yhoem: khoug: khyoo: vang lo wigi Ela ri said pyam lho: nyang: khokham khoo" doem zhung: bye:. He: khyoo: gi Yuda khokham Asa vhoebkhang" zi eig xe: nyhed zain ein: zain ri bue" zi nghoid.

¹¹Zimri khokham bui" yo' dage" nyang: gi Basha ikoin deungkhu: byu dangain" ri said pyam bye:. Bid noem yo' byencang" mo yuggi yi dangain" ri we' said pyam bye:.

¹²Houg: yoomo Basha ri thougtheung khyoo: lapi: Yehu khyo" wigi ASEING tid ziyo' dayhang: ti" Zimri gi Basha ikoin deungkhu: byu dangain" ri said pyam bye:.

¹³Nyangnu" da" yu soolhoo: ri no' da" thung" yoomo we' nyangnu" gi Israela byumyu" yiri yooboo thoem" khyoo: shu" vhu" she: yhi: yoomo we' Basha yo' nya: yuggi zoo: Ela gi Israela ASEING Mangso da" nheigloem: ri zhu: nhang: bye:.

¹⁴Ela koid lid loo bye: da" moo" zoo" ja khang" moo" ri Israela khokham yi da" mhoomyid: shen" dam pug moo lhid" xoem" too" bye:.

¹⁵Yuda khokham Asa vhoebkhang" zi eig xe: nyhed zain ein: zain ri Zimri gi Israela damung" goin" ri nyhed nyid" vhoebkhang" khoo' bye:. Israela gyiphung: yigi Philisti mung" mo Gibethon voomoo" ri vang: too" bye: ziyo'

¹⁶Zimri gi khokham ri thougtheung wigi khokham ri said pyam bye: ga: ziri nyangnu" shoug" gyoo: lang" nyangnu" dangain" gi nyangnu" da" gyizoug: Omri ri Israela khokham koid nhang: boem bye:.

¹⁷Omri yo' nya: gyiphung: yigi Gibethon voomoo" mo thu lo" wigi Tirza voomoo" ri yhe: vang: too" bye:.

¹⁸Zimri gi voomoo" gyivoo lo, khoug: khyoo: gyo" pyam bye: ziri myang lang" nyang: gi khokham khoo" akhoug: mo gyigoo zung khyoo: vang loo" bye:. Khokham khoo" myi: nge" wigi myiyham: khoug: moo: nge" shid: byug bye:.

¹⁹ASEING ri thougtheung da" nya: yooboo yoomo he: khyoo: bui" bye: zi nghoid. Nya: shid mo koid lid lo" da" Yeroboam yhang: ti" nyang: nya: yooboo we' Israela byumyu" yiri yooboo thoem" khyoo: shu" vhu" yhe: ziyo' we' nyang: gi ASEING ri myid apyoo: nhang: nghoid da:.

²⁰Zimri koid bye: da" moo" zoo" ja: khang" mo" ri Israela khokham yi da" mhoomyid: shid" dam pug moo lhid" xoem" too" bye:.

²¹Israela byumyu"' yi phung: kho' lo boem bye:. Dayham" gi Ginad da" nya: yuggi zoo: Tibni ri khokham koid nhang: nau boem wigi gootu: phung: gi Omri ri vho: nyid boem ago".

²²Lo" thang moo: Omri ri vho: nyid bang: oung: byug bye:. Tibni shid: bye: ziyo' Omri khokham bue" loo bye:.

²³Houg: yoomo Yuda khokham Asa vhoebkhang" zi soem" xe: da zain ein: zain ri Omri gi Israela khokham bue" loo bye: ziyo' nyang: gi daxe: eig zain vhoebkhang" bye:. Xang: shi" khyug zain gi Tirza voomoo" moo nyang: vhoebkhang" wigi

²⁴Hau: thang: nyang: gi Shemera ga: su: da" jang" mo Samari bau gung ri ngei khyug khyeing" yo' qei yu bye:. Omri gi hau: bouggung ri vang khyam: kyam' lho: voogung de: wigi Hau: bau gung ri xang: shi" seing: su: Shemera da" myeing ri yu lho: Samari ga: myheing too" bye:.

²⁵Omri gi shid moo koid lid loo bang: tho' je" wigi ASEING ri thougtheung yooboo koid bye:.

²⁶Nya: shid vhu" mo Yeroboam yhang: ti" nya: yooboo joem yo' byumyu" yiri yooboo thoem" khyoo: yo' yu soolhoo: no' jang" khyoo: shu" vhu" she: yhe: khyo" wigi nyang: gi Israela ASEING Mangsoo da" nheigloem: ri zhu: nhang: nyid da:.

²⁷Omri koid lid loo bye: da" moo" ja: khang" moo" yo' nyang: bain koid bye: da" moo" zoo" dangain" ri Israela khokham yi da" mhoomyid: shen" dam pug moo: lhid" xoem" too" bye:.

²⁸Omri shid: bye: ziyo' Samari moo myhoeb too" bye:. Nya: yuggi zoo: Ahab gi khokham khyo" wigi doem koid nyid bye:.

²⁹Yuda khokham Asa vhoebkhang" zi soem" xe: shed zain ein: zain ri Omri nya: yuggi zoo: Ahab gi Israela khokham bue" loo bye: ziyo' nyang: gi Samari moo: eig xe: eig zain vhoebkhang" bye:.

³⁰Nyang: gi nya: shid moo: koid lid loo bang: tho' je" wigi ASEING ri thougtheung yooboo koid bye:.

³¹Khokham Yeroboam yhang: ti" yooboo koid wa zigi nya: shid re" atham: boin: nghoid da:. Nyang: gi vi: khyoo: yhe: wigi Sidon khokham Etbala nya: myiyi: zoo: Yezebela ri lo, xo' yu lho: Bala ri no' bye:.

³²Nyang: gi Samari voogung moo Bala shid re" no' wa yhoem: daloem: koid wigi nya: shid re" phoin: daloem: koid lho: Noku Yhoem: Moo" hau: ziri koid to" da:.

³³Nyang: gi Ashera yu phara myhi' da" soolhoo: ri we' tu: shab to" da:. Nyang: gi nya: shid vhu" moo koid lid lo da" Israela khokham yi dangain" tho' je" wigi Israela ASEING Mangsoo da" nheigloem: ri zhu: nhang: bye:.

³⁴Nyang: vhoebkhang" da" ayo, ri Bethela mo Hiela gi Yerikho voogung ri doem de: too" bye:. ASEING gi Nun da" yuggi zoo: Yoshu khyo" wigi lapi: pe: ziyo' dayhang: ti" Hiela gi Yerikho voogung ri ayang: zhug uri nya: yuggi zoo: zooshid" Abiram shid: byug bye: ziyo' vang khyam: khoem" moo" duang: koid nyid uri nya: yuggi zoo: zoothang Seguba shid: byug bye:.