Read Lashi 1 KHOKHAM 17 Bible Online

1 KHOKHAM 17 - Lashi bible

1 KHOKHAM 17

¹Gilead mung" Tishbe voogung mo Elia ga: da" lapi: dayug gi khokham Ahab ri «Ngoo dei byid: nyid da" Kangso' ASEING Israela Mangso da" myeing khyo" wigi ngoo nang ri tid wa. Ngoo hid: su: doem tid da" ayo, thang: eig soem" zain ju" sho' nghain: jhu" agyoo" moug: avoo wa zi nghoid» ga: tid.

²Hau: thang: ASEING gi Elia ri

³«He: joyoo mo thu lo" wigi bidthu shoid khyoo: yhe: loo" we'. Houg: lang" Yodan gyid lang bidthu shoid mo Kherid gyid lang nam moo: yhe: gau" nyid we'.

⁴Hau: gyid lang gi nang shug wa shid re" gyid byid: wa zi nghoid. Re" shid re" zoo: noem ci: ri" wa shid re" Kano, ri ngoo amyeing" byid: too" bye:» ga: tid.

⁵Elia gi ASEING da" amyeing" dang: ri tam" gyo: ziyo' Kherid gyid lang nam moo: yhe: nyid nyid bye:.

⁶Nyang: gi gyid lang mo gyid shug lho: Kuano, joem we' nya: shid re" nab soin" yo' myen" thang: khang" moo" zooyho' yo' shoo" joem ri di" byid: bye:.

⁷Moug: avoo yoomo khamyhang amyang" ri gyid lang gi kyug kain" loo" khare" da:.

⁸Hau: thang: ASEING gi Elia ri

⁹«Akhid" Sidon nam moo jo, da" Zareptha voogung khyoo: yhe: wigi houg moo yhe: nyid we'. Houg moo: nyid da" cougmoo" myhi' gi nang ri zoo: noem soin' byid: wa shid re" ngoo amyeing" byid: too" bye:» ga: tid.

¹⁰Houg: yoomo Elia gi Zareptha khyoo: yhe: loo" bye:. Nyang: gi voogung vang khyam: khoem" moo" duang: moo vang yhe: lo" uri thang" sho: nyid da" cougmoo" myhi' ri myang bye:. Nyang: gi cougmoo" myhi' ri «Jeju" mo ngoo ri shug gyid byid: la» ga: tid.

¹¹Cougmoo" myhi' hau: ziri lo" yu nyid uri nyang: gi «Jeju" mo nga" shid re" zooyho' we' ci: ri" byid: we'» ga: yoid tid bye:.

¹²Cougmoo" myhi' doem phug tid zigi «Ngoo zooyho' ayoo" ein: ziri kangso' ASEING re" Mangsoo jang" moo ngoo jham' yo" tang: zi nghoid. Jarung: khoug: mo cen: moin" lo, da zhoeb yo' jhuang: moo bo da" zhainloin: xu: dazo, zoo: gi ngoo yo" gu: nghoid bye:. Ngoo hid: moo: thang" dajhi' re" sho: koid: wigi yhoem: khyoo: lo" lho: nga" zoo: yo' ngoonya: shid re" he: dajhi' kyeing" ziri lo" yhung wa zi nghoid. Hau: zigi nga" mitang: shid re" thang" thang da" zoo: noem nghoid wa. Hau: thang: nga" mitang: gi zooyoid wigi shid: wa zi nghoid» ga: tid.

¹³Elia gi nyang: ri «Aci' goo"- lo" wigi re" zoo: noem ri lo" soin' yhung we'. Nghoid loug we' nang yo" da" jang" mo zooyho' dajhi' ri koid wigi nga" jang" moo shid" ci: ri" byid: we' hau: thang: deing gu: ri nang yo' re" zoo: shid re" koid we'.

¹⁴He: zi yoomo Israela ASEING Mangsoo gi ‹ngoo ASEING moug: ri voo nhang: bidnyid" ju" sho' jarung: mo cen: moin" thang wa zi anghoid. Jhuang: mo xu: we' thang wa zi anghoid›» ga: tid.

¹⁵Cougmoo" myhi' gi lo" wigi Elia nyang: ri tid bye: ziyo' dayhang: ti" koid bye:. Nyangnu" dangain" bang: shid re" bidnyid gye" myang" sho' zoo: noem tham: nyid da:.

¹⁶ASEING gi Elia khyo" wigi dangsoo" byid: too" bye: ziyo' dayhang: ti" jarung: mo cen: moin" we' athang- jhuang: mo xu: we' abain byug nghoid da:.

¹⁷Ayo, dajhi' myang" thang: ri cougmoo" myhi' da" nya: yuggi zoo: no lo da:. Nyang: gi je je no lo wigi lo" thang moo nyang: shid: byug bye:.

¹⁸Cougmoo" myhi' gi Elia ri «Mangso da" byu we"- ciwim yoomo nang ngoo ri hid: su" koid la". Nang hid: khyoo: re" zigi nga" yooboo ri Mangsoo ri boin: nhang: wigi nga" zoo: ri shid: nhang: wa shid re" anghoid rhe"» ga: myid:.

¹⁹Elia gi «Hau: yuggi zoo: ri byid: we'» ga: tid. Nyang: gi yuggi zoo: ri nya: myhi' lo, mo yu wigi nyang: nyid da" atho' zhang yab khyoo: vu, do, lo" lho: yhoeb yoo moo lo" lheing: to" da:.

²⁰Hau: thang: nyang: akyu" nyho: mho' zigi «O" nga" ASEING Mangsoo we"- He: cougmoo" myhi' shid re" hid: yhang: te" gyoug pho" moo" zoo" ri nang ciwim koid la". Nyang: gi ngoo ri gi" sho' nheig khyeug coung: yu bye:. Akhid" nya: yuggi zoo: ri nang said pyam nhung: la"» ga: mho' bye:.

²¹Hau: thang: Elia gi yuggi zo: atho' moo: soem" lheing: goeb nghoeb wigi «O" nga" ASEING Mangsoo we"- he: zooshang: ri kangso' doem kaid byid: we' o"» ga: mho' bye:.

²²ASEING Elia mho' thui: ri tam" gyoo: byid: wigi zooshang: so' doem she: lo ziyo' dei loo bye:.

²³Elia gi yuggi zoo: ri vho: zhang mo nya: myhi' jang" khyoo: doem shu" gyoo" lo" wigi nyang: ri «Yu" we' re" zoo: doem dei bye:» ga: tid.

²⁴Cougmoo" myhi' gi «Nang gi Mangso byu nghoid ziri we' ASEING gi nang khyo" wigi gyeing" nyang: dang: tid nyid ziri we' akhid" ngoo si" bye:» ga: phoug tid.