Read Lashi 1 KHOKHAM 18 Bible Online

1 KHOKHAM 18 - Lashi bible

1 KHOKHAM 18

¹Moug: kyug myid kyug zi soem" zain ein: zain ri ASEING gi Elia ri «Nang nyang: khokham Ahab' jang" moo yhe: thu shug we'. Ngoo moug: voo nhang: wa» ga: tid.

²Hougsu" yoomo Elia gi thu yhe: loo" bye:. Samari mo phang" khoug gi gye" gyi: lo da:.

³Houg: yoomo Ahab gi khokham kho" ri gung" da" Obadia ri khe: yu bye:. (Obadia gi ASEING ri loem khau: noku su: nghoid.

⁴Yezebela gi ASEING da" lapi: yiri said lo uri Obadia gi nyangnu" mo dashoo: yug ri wim xi: xi: khyo" eig phung: khyo" wigi lug khyung: joem cang gau" shoung: to" lho: nyangnu" ri zoo: noem yo' gyid ri pang" thoug byid: bye:.)

⁵Ahab gi Obadia ri «Sa- he: mung" mo gyid bug khang" moo" yo' gyid lang khang" moo" ri cang yu" shang. Myang: yo' loo kung" joem kangso' dei koo: yo" zung" zho" da" coung" yoo ri myang nghoid rigi nyha" gougnyhoug ri ze" said wa zi anghoid» ga: tid.

⁶Nya: tang: gi mungdain: mo khayug khashoid khyoo: yhe shoo: wa ziri tid sham: feung go" wigi dayug dashoid khyoo: to' lo" ago".

⁷Obadia gi nyang: khyoo: so" yhe: lo" nyid ri nyeigdain tung" Elia yo' shoug" goo" bye:. Nyang: gi Elia ri yu" xoem" shi" wigi Elia shidkhoin" moo goeb pid ziyo' «Yhoem: seing: nang gi Elia gyeing" nghoid la"» ga: myid: bye:.

⁸Nyang: gi «Nghoid ngoo Elia nghoid» ga: doem phug tid. «Re" Aseing khokham ri ngoo hid: moo: nyid ein: tid we'» ga: tid.

⁹Obadia gi «Khokham Ahab lo, khoug: moo said pyam shoug" wa da" gyoug pho" khyoo: moo nang ngoo ri to" too" nau sho' ngoo cikoid bye: la".

¹⁰Mougmyid gyab goin" mo mungdain: khang" moo" moo khokham phoo gi nang ri cang sho: nyid ein: ziri re" kangso' ASEING Mangsoo mo ngoo jham' yo" tang: zi nghoid. Nang gi nya: mungdain: moo anyid loo: ein: mungdain: ri vhoebkhang" su: tid kyo" uri lang" nang ri amyang shoo: ein: khyo" vhoebkhang" su: jham' tang: wa shid re" she Ahab' mho' nyid da:.

¹¹Houg ri akhid" nang hid: moo: nyid khyoo: ri ngoo lo" tid kyoo" wa shid re" nang vho: nyid la".

¹²Ngoo thu loo" yo' dage" ASEING da" Venyi: gi nang ri ase' da" joyoo gootu: khyoo: shu" lo" nghoid rigi khasu" koid wa la". Hau: thang: nang hid: moo: nyid khyoo: ri ngoo Ahab ri tid kyo" wigi nyang: nang ri amyang lang" nyang: ngoo ri said pyam wa zi nghoid. Ngoo gi zooyam pyaid mo ASEING ri loem khau: noku su: nghoid ziri boin: we'.

¹³Yezebela gi ASEING da" lapi: yiri said nyid uri ngoo gi nyangnu" mo dashoo: yug ri wim: xi: xi: khyo" eig phung: kho' wigi nyangnu" ri lug khyung: moo shoung: to" lho: zoo: noem yo' gyid ri pang" byid: nyid ziri nang ashau" gyoo: rhe".

¹⁴Houg: yoomo nang hid: moo nyid khyoo: ri khokham phoo ri yhe: tid kyoo" wa shid re" ngoo ri khasu" wim amyeing" byid: nyid la". Nyang: gi ngoo ri said pyam wa zi nghoid» ga: tid.

¹⁵Elia gi «Akhid" nyid" nyang: khokham jang" moo nga" gung nyang: thu shug wa zi nghoid ein: ngoo dei byid: nyid da" myhang: thang" kangso' ASEING moo dangsoo" to" too" bye:» ga: phug tid.

¹⁶Houg: yoomo Obadia gi khokham Ahab ri yhe: tid khyo" wigi Ahab gi Elia yo' shoug" goo" wa shid re" thu yhe: loo" bye:.

¹⁷Ahab gi nyang: ri myang lang" «Israela mungdain: moo gye" yau: khi" koid nyid zigi nang nghoid nhung: la"» ga: tid.

¹⁸Elia gi «Yau: khi" kyi" khyeug koid zi ngoo anghoid nang yo' re" phoo danghoid. Nanu" gi ASEING da" amyeing" dang: ri atam" gyoo: nyid looza: Bala yu phara" soolhoo: joem ri no' nyid boem ago".

¹⁹Kharmela boem moo ngoo yo' shoug" wa shid re" Israela byumyu" dangain" ri akhid" nyang: amyeing" byid: kaid we'. Bala lapi: 450 yug yo' dage" khokham myhi' Yezebela pang" thoug to" da" Ashera yu phara" myhi' da" lapi: 400 yug ri we' shu" ri" we'» ga: tid bye:.

²⁰Houg: yoomo Ahab gi Israela byumyu" yi dangain" yo' Bala lapi: yiri Kharmela boem moo shoug" goo" wa shid re" tid fu" kaid bye:.

²¹Elia gi byumyu" yi nyid jang" khyoo: do, lo" wigi «Khamyhang ju" sho' nanu" nheigloem: moo amyid phyed lho: nyid wa la". ASEING gi Mangsoo nghoid rigi nyang: ri noku ge'. Anghoid lang" Bala gi Mangsoo nghoid rigi nyang: ri noku ge'» ga: tid. Nghoid loug we' byumyu" yigi dang: dakhoin" we' atid goo" nghoid da:.

²²Hau: thang: Elia gi «ASEING da" lapi: gi ngoo dayug kyeing" dadeing lo:- nghoid loug we' Bala lapi: yigi 450 yug nghoid shi" da:.

²³Nuloo: eig du: she: loo ge'. Bala lapi: yi dadu: yu ge'. Hau: ziri said wigi adu du jab lho: thang" boem moo ke" too" ge'. Nghoid loug we' myi: atab shi" goo". Gootu: nuloo: dadu: ri ngoo we' hougsu" koid wa nghoid.

²⁴Hau: thang: Bala Lapi: yigi nyangnu" da" yu phara" ri akyu" mho' baja". Ngoo gi ASEING ri akyu" mho' wa. Myi: nhang: khyo' kaid byid: da" su: gi Mangsoo nghoid wa» ga: tid. Byumyu" yi we' nyangnu" vho: ngei ziyo' nyho: boem bye:.

²⁵Hau: thang: Elia gi Bala lapi: yiri «Nanu" gye" myoo: sho' nghoid yoomo nanu" nu: ri she: yu wigi xang: shi" soin' ge'. Nanu" yu phara" ri akyu" mho' ge'. Nghoid loug we' thang" moo myi: age tab wa» ga: tid.

²⁶Nyangnu" shid re" she: lo da" nuloo: ri nyangnu" yu wigi soin' bye: ziyo' nyid" gung tei: sho' Bala ri akyu" mho' bye:. Nyangnu" gi «Bala we" ngoonu" ri tam" gyoo: byid: la» ga: nyho: mho' ziyo' nyangnu" koid to" da" phoin: lheing: khab' go" nyid: boem ago". Nghoid loug we' atam" gyoo: byid: nghoid da:.

²⁷Nyid" gung mo gi nyangnu" ri Elia juang" yi shid" loo bye:. «Yoem: kaid yoid mho' ge'. Nyang: gi yu phara" nghoid. Nyang: gi nyid" gung yhoebmo, mo, nyid la'- anghoid lang" nyang: nghi: yhe: la'- anghoid lang" gyung: thu so" loo" sam"- anghoid lang" nyang: gi yhoeb jo, wa nghoid. Nanu" nyang: ri nhoug" yu ca" wa nghoid» ga: tid.

²⁸Houg: yoomo Lapi: yigi yoem: kaid lho: mho' bye: ziyo' nyangnu" thung" yo' dayhang: ti" sham: thoo" shamcoin" joem yo' nyangnu" nya: gung moo: suid" thoem" bui" sho' yham" boem ago".

²⁹Myen" thang: zoo" ju" sho' nyangnu" gi koo" nyhoo: nyho: ziyo' gye" myang" sho' nyho: mho' nyid boem ago". Nghoid loug we' atam" gyoo: byid:- ce: thui: we' ashau" gyoo: nghoid da:.

³⁰Hau: thang: Elia gi Israela byu yiri «Nga" jhang khyoo: zeing: loo ge'» ga: tid. ziyo' nyangnu" dangain" we' nya: loem: lheing khab' moo zeing: foem: to" boem. Phyo' shoin' pyam shoug" bye: ASEING da" phoin: ri we' nyang: doem soin' koid too" bye:.

³¹ASEING wigi Israela ga: myeing myheing too" bye: da" Yaku nya: yuggi zoo: yi myeing khyo" cang wigi akung: daxe: eig kung: shid re" lug boem daloem: loem: khyo" daxe: eig loem: ri yu bye:.

³²He: lug boem joem yo' nyang: gi ASEING ri noku wa shid re" phoin: doem koid bye:. Nyang: gi houg moo gyid myid: galain yo" teing too" sho' da" toeb khyoo" ri loem: lheing khab' du: bye:.

³³Hau: thang: nyang: gi phoin: tho' moo thang" ke"- nulo: shoo" jab lho: thang" tho' moo ki" bye:. Nyang: tid zigi «Jhuang: myid: loem: moo gyid kham: kaid wigi xoin" yo' thang" atho' moo: foid gyoin: ge'» ga: tid. Nyangnu" hougsu" koid bye:.

³⁴Nyang: gi «Kaid shi" ge'» ga: tid. Nyangnu" we' kaid bye:. Nyang: gi «Dalheing: kaid shi" ge'» ga: doem tid. Nyangnu" doem kaid bye:.

³⁵Gyid gi phoin: lheing khab' mo toeb khyoo" moo byeung" sho' yau gyoo" loo" bye:.

³⁶Myen" thang: zoo" xoin" ngei" yo, ri lapi: Elia gi phoin: khyoo: yhe: wigi akyu" mho' zigi «O" Abraham, Isag yo' Yaku bang: da" ASEING Mangsoo we"- nang gi Israela da" Mangsoo nghoid nyid ziri we' ngoo gi re" deizoo: nghoid nyid ziri we' he: zi dangain" re" amyeing" dang: khyo" koid bye: ziri we' akhid" toin" shid loo we'.

³⁷Nang ASEING gi Mangsoo nyang: nghoid ziri we' nang gi nyangnu" ri re" shoid khyoo: doem lheing: yu nyid ziri we' he: byumyu" yi si' baja"- ngoo ri tam" gyoo: byid: we' ASEING we"- ngoo ri tam" gyoo: byid: we'» ga: akyu" mho' bye:.

³⁸ASEING gi myi: ri khyoo' byid: wigi hau: zigi xoin" ri we' thang" ri we' lug boem ri we' myidzhoo" ri we' nge" pyam bye: ziyo' toeb khyoo" mo gyid ri we' kain" kyug loo" nhang: bye:.

³⁹Byumyu" yi hau: ziri myang lang" nyangnu" gung nyangnu" myidgung khyoo: goeb pid wigi «ASEING gi Mangsoo nghoid- ASEING dayug khyeing" Mangsoo nghoid o"» ga: nyho: tid boem ago".

⁴⁰Elia gi «Bala lapi: yiri myheig yu ge'. Nyangnu" mo dayug ri we' anhang: kaid goo"» ga: amyeing" byid: bye:. Byumyu" yi we' nyangnu" ri myheig yu wigi Elia vhu" she: ziyo' Kishon gyid lang khyoo: shu" yhe: wigi nyangnu" ri said pyam bye:.

⁴¹Hau: thang: Elia gi khokham Ahab ri «Akhid" gi lo" wigi zoo: loo: ge'. Moug: voo wa zi jhang loo bye: thui: ri ngoo shau" gyo:» ga: tid.

⁴²Ahab zoo: noem lo" zo: nyid ayo, ri Elia gi Kharmela boem gung khyoo: do, lo" wigi houg moo nya: vhuloem ri poid lug gyoo: moo: kaid lho: myidjang khyoo: goeb pid bye:.

⁴³Nyang: gi nya: dei zoo: ri «Panglai: jo, shoid khyoo: yhe: yu" we'» ga: tid. Deizoo: gi yhe: wigi lho: «Ngoo ciwe' amyang» ga: tid. Elia gi nyang: ri nyhed lheing: ju" sho' yhe: yu" wa shid re" tid bye:

⁴⁴Nyhed lheing" ein: lheing: ri nyang: doem tau" lo wigi «Byu lo, yhi bo da" jhoemmoug" khaid zoo: panglai mo to' lo nyid ziri ngoo myang bye:» ga: tid. Elia gi nya: deizoo: ri «Khokham Ahab ri moug: voo ziyo' athung" shoug" shi" uri gyi myang: rheing" zhung: wigi yhoem: khyoo: loo" wa shid re" nyang: ri yhe: tid we'» ga: amyeing" byid: kaid bye:.

⁴⁵Daso' kyeing" ri mougkhung: moo: jhoemmoug" teing: teing: no, zi nghoeb lo ziyo' lid moid lo wigi moug: lhoung: vo loo bye:. Ahab gi nya: gyi myang: rheing" moo zhung: wigi Yezrela khyoo: tau" loo" bye:.

⁴⁶ASEING da" yoem: so' Elia atho' moo ju" lo wigi nya: byimi ri nya: phyid" cu" yo' teing cu" lho: Yezrela khyoo: lo" da" dakhyoo: goin" Ahab da" shidkhoin" moo tang" loo" bye: da:.