Read Lashi 1 KHOKHAM 2 Bible Online

1 KHOKHAM 2 - Lashi bible

1 KHOKHAM 2

¹David shid: lo" nyid uri nya: zoo: Sholumon ri khe: yu lho: thang: thang da" pyeing: dang: byid: too" kho' da:.

²«Ngoo shid: wa da" bidnyid gi ju" lo nyid bye:. Loem jeing" ziyo' nheigloem: myid phyed we'.

³Nang koid wa shid re" re" ASEING Mangsoo amyeing" byid: to" da" moo" zoo" ri koid nyid we'. Nang so" yen" da" joyoo khyi' khang" moo" nang koid da" moo" zoo" dangain" shoug" zoo: shoug" shug baja". Moshe da" tarha" moo lhid" to" da" ziyo' dayhang: ti" nya: tarha" joem yo' amyeing" dang: joem dangain" ri tam" gyo: wigi cang yhe: nyid we'.

⁴Nya: dang: ri nang tam" gyo: nghoid rigi nga" amyed ashen yi nya: da" amyeing" dang: ri loem jeing" wigi nyangnu" da" oung: khoug: nheigloem: dangain"- Venyi dangain" ziyo' loem jeing" nyid nyid gi Israela mungdain: ri shoug" vhoebkhang" nyid wa zi nghoid ga: nyang: ngoo ri tid too" bye: da" dang: theing gi ASEING pyeing byid: wa zi nghoid.

⁵Gootu: we' bo shi" zi nghoid. Israela gyizoo: yiri vhoebkhang" da" gyizoug: eig yug nghoid da" Nera nya: zoo: Abna yo' Yethera nya: zoo: Amasa tang: ri said pyam khyo" wigi Yoab ngoo ri khasu" koid ziri nang boin: nyid we'. Meing: zain: go" da" ayo, ri nyangnu" koid thu kaid da" shid: shoug" noo shoug" moo" zoo" shid re" yug yo da" ayo, ri latoo: phug khyo" nya: tang: ri Yoab khasu" said pyam ziri we' boin: nyid we'. Nyang: gi yooboo abo da" byu ri said pyam ziyo' nyang: koid da" moo" zoo" shid re" nga" jang" moo: yoovoin bo nyid yoomo hau: yooboo da" kyi" khyeug ziri ngoo shoug" kham zo: nyid zi nghoid.

⁶Ci koid wa ziri nang se' nyid zi nghoid. Nyang: ri nyang: kyeing" nyang: yo" shid: loo" nhang: wa zi anghoid.

⁷«Nghoid loug we' Gilead mung" mo Barazili nya: yuggi zoo: yiri jheddab myid ci: shug wigi coung: yu ca" wa zi nghoid. Ciwim ga: ri ngoo re" mang: Absalom jang" mo phang: yen" uri nyangnu" ngoo ri nheig khyeug shoomyen: yoomo nghoid.

⁸Xo' wigi Benyamin mung" Bahurim voogung mo Gera nya: zoo: Shimi we' nyid shi". Mahanaim voogung khyoo: ngoo yhe: lo" uri nyang: ngoo ri kyid: kyid: khoo" sho' nheing" bye: zi nghoid. Nghoid loug we' nyang: ngoo ri Yodan gyid lang yam moo re" shoug" uri nyang: ri ngoo asaid wa ein: ASEING da" myeing" moo nyang: ri ngoo dangsoo" khoin" byid: too" bye: zi nghoid.

⁹Nghoid loug we' nang gi nyang: ri dam abyid: looza: ato" too". Nang cikoid wa ein: ziri si' bye: yoomo nyang: ri said pyam wa zi nghoid» ga: tid.

¹⁰David shid: bye: yoomo David da" voogung moo: myhoeb too" bye:.

¹¹Nyang: gi myid: xi: zain Israela khokham bue" bye:. Hebron voogung moo: nyhed zain- Yerusalem moo: soem" xe: soem" zain vhoebkhang" bye: zi nghoid.

¹²Sholumon gi nya: phoo David da" khokham zhungtang moo: khokham bue" nyid bye: ziyo' nya: yoem: so' gi geing: geing: teing teing nghoid nyid bye: da:.

¹³Hau: thang: Hagid nya: zoo: Adoniya gi Sholumon nya: myhi' Bathsheba jhang yhi: bye:. Bathsheba gi «Bid noem khyo" agoin: re" lam" rhe"» ga: myid:. Nyang: gi «Nghoid» ga: tid wigi

¹⁴xo' lho: «Ngoo nang ri daja: myid: nau» ga: tid. Bathsheba we' «Ci myid: wa» ga: tid bye:.

¹⁵Nyang: gi «Ngoo gi khokham bui" eung: nyid ziyo' Israela byumyu" yugkhang" moo" we' hau: ziri nheig byu nyid ziri nang si' bye: zi nghoid. Nghoid loug we' hau: moo" zoo" gi shai" lo" byug bye:. ASEING da" myid vho: khyo" nghoid yoomo nga" nhung" khokham bue" loo bye: zi nghoid.

¹⁶Akhid" ngoo daja: mho' wa jeju" mo ngoo ri ahe: pyam lhid"» ga: tid. Barsheba gi «Ci mho' wa» ga: myid: bye:.

¹⁷Nyang: gi «Nga" yhoem: seing: myhi' koid wa shid re" Shunem myiyi: zoo: Abishaga ri ngoo ri byid: baja". Jeju" mo khokham Sholumon ri bo tid byid: we' nyang: nang tid da" dang: ri ahe: pyam wa ein: ziri ngoo se'» ga: tid.

¹⁸Bathsheba gi «Gi bye:- Re" shid re" ngoo khokham phoo ri tid byid: wa» ga: tid.

¹⁹Houg: yoomo Bathsheba gi Adoniya gungthid Sholumon ri yhe: tid byid: wa ga: vang loo" bye:. Khokham phoo gi to' yab wigi nya: myhi' ri lo, zei: zei: lho: goeb pid bye: zi nghoid. Hau: thang: nyang: gi nya: khokham zhungtang moo zhoung: wigi nya: myhi' shid re" zhungtang daloem: yu lho: nya: lo, yo shoid moo zhung: nhang: bye:.

²⁰Bathsheba gi «Ngoo nang ri mho' yoid wa zi daja: jo,- jeju" mo ahe: pyam lhid"» ga: tid. Nyang: gi «Ce: noem lha"- nga" yhed we"- ngoo nang ri ahe: pyam wa» ga: tid.

²¹Bathsheba gi «Abishaga ri re" mang: Adoniya da" yhoem: seing myhi' koid nhang: shang» ga: tid.

²²Khokham phoo gi «Abishaga ri byid: wa shid re" nang ciwim yoomo ngoo ri re" tid lha". Nang ngoo ri hougsu" tid zigi nyang: ri khokham zhungtang ab byid: ziyo' dayhang: ti" nghoid nyid. Hau: tho' ago" nyang: gi nga" mang: we' nghoid nyid. Khainjung Abiatha yo' Yoab tang we' nya: shoid khyoo: nghoid nyid da:» ga: tid.

²³Hau: thang: Sholumon gi ASEING myeing khyang" ri dang: theing theing to" wigi «Hid: yhang: ti" dang: myid: shid re" Adoniya da" kangso' ri ngoo axab pyam nghoid rigi Mangsoo ngoo ri shid: sho' baid said baja".

²⁴Hau: ASEING gi nga" phoo David da" khokham zhungtang moo ngoo ri geing: geing: teing teing to" too" bye:. Nya: dang: theing ri nya" phoo cang pyeing bye: ziyo' dayhang: ti" ngoo yo' nga" akung: ako' lo, moo mungdain: we' ab byid: bye:. Adoniya gi akhid" nyid" nyang: shid: baja" ein: kangso' ASEING moo: ngoo dang: theing theing too" bye: zi nghoid» ga: tid.

²⁵Houg: yoomo khokham Sholumon gi Benaia ri amyeing" byid kaid lho: Benaia gi thu lo" wigi Adoniya ri said pyam bye:.

²⁶Hau: thang: khokham Sholumon gi khainjung Abiatha ri «Anathod mo re" co' phyed moug: khyoo: loo" we'. Nang shid: wa shid re" moin: su: nghoid loug we' nga" phoo David yo' nang nyid da" ayo, ri ASEING da" Dang: Theing Kuid: ri yu" zung" ziyo' nya: yau: khi" ri nang bo pang" gam yu yoomo akhid" nang ri ngoo said pyam wa zi anghoid» ga: tid.

²⁷Houg: lang" ASEING gi Shilo voogung Eli yo' nya: amyed ashen yi khyoo: tid da" zi deing loo baja". Sholumon gi Abiatha ri ASEING shid re" khainjung moo" zei: jang" mo thu pyam nhang: bye: zi nghoid.

²⁸Ciwim ziri Yoab shoug" gyoo: bye:. (Nyang: gi Adoniya ri pang" thoug nghoid loug we' Absalom rigi apang" thoug nghoid da:.) Houg: yoomo nyang: gi ASEING da" Zoem" khyoo: phang: yhe: wigi phoin: da" khyoug: joem cang yhe: zei: yen" da:.

²⁹Yoab gi Zoem" khyoo: phang: yhe: wigi phoin: ayam moo: nyid nyid ga: ziri khokham Sholumon shoug" gyoo: lang" ciwim yoomo phoin: khyoo: phang: yhe: khyoo: nyang: ri myid: yu" wa ga: Sholumon gi lagyoo: dayug ri nhang: kaid da:. Yoab gi «Sholumon ri gyoug yoomo ASEING jhang khyoo: phang: yhe: zi nghoid» ga: tid. Houg: yoomo khokham Sholumon gi Yoab ri said pyam wa shid re" Benaia ri nhang: kaid da:.

³⁰Nyang: gi ASEING shidkhoin" Zoem" khyoo: yhe: wigi Yoab ri «Thu' ri" loo: we' ga: khokham amyeing" byid: kaid» ga: tid. Yoab gi «Anau cang- ngoo hid: moo: da shid: wa» ga: tid. Benaia we' khokham phoo jang" khyoo: tau" lo" wigi Yoab citid ga: ziri tid kyoo" bye:.

³¹Sholumon gi «Yoab tid ziyo' dayhang: ti" koid we' yooboo ayo" da" byu ri Yoab said pyam zigi ngoo yo' gootu: David da" amyed ashen yi da" yoovoin anghoid nyid loo: baja"- nyang: ri said wigi myhoeb pyam ge'.

³²Nga" phoo David asi' loo: za: Yoab gi byu said moo" zoo" ri koid too" bye: yoomo ASEING gi nyang: ri dam byid: wa zi nghoid. Yoab gi yooboo adab da" byu eig yug nghoid da" Israela gyizoo: joem ri vhoeb da" Abna yo' Yuda gyizoo: joem ri vhoeb da" Amasa tang: ri said pyam bye:.

³³Nyangnu" byu said da" moo" zoo" yoomo dam gi Yoab yo' nya: akung: ako'' yi adang moo: apyaid atoo: dajo, nyid baja". Nghoid loug we' ASEING gi David da" khokham zhungtang moo zhung: da" nya: akung: ako' yiri khanham we' oung: doid nhang: nyid baja"» ga: tid.

³⁴Houg: yoomo Benaia gi ASEING da" Zoem" khyoo: yhe: wigi Yoab ri said pyam lho: janggyoin: mo nya: yhoem: moo: myhoeb too" bye:.

³⁵Khokham gi Yoab joyoo moo: Benaia ri we' Abiatha da" joyoo moo khainjung Zadog ri we' moo" voin nhang: bye:.

³⁶Hau: thang: khokham phoo gi Shimi ri khe: yu wigi «Yerusalem moo nanya: shid re" yhoem: daloem: koid we'. Voogung mo athu loo" loo: za: hougmoo: nyid we'.

³⁷Nang Kidron gyid lang lid sho' thu so" lo" nghoid rigi gyeing" nyang: shid: wa zi nghoid. Nanya: gung nanyang: yooboo byid: zi shoug" wa zi nghoid» ga: tid.

³⁸Shimi gi «Aseing: khokham we"- gye" gi bye:- nang tid ziyo' dayhang: ti" cang koid wa o"» ga: tid. Houg: yoomo nyang: gi Yerusalem moo: ayo, myang" sho' nyid bye: zi nghoid.

³⁹Nghoid loug we' soem" zain myang" thang: ri Shimi da" join eig yug gi Gad khokham Makha nya: zoo: Akhisha jhang khyoo: phang: vang loo" khare" boem. Gad voogung moo: nya: tang: nyid ga: ziri Shimi shoug" gyoo: lang"

⁴⁰nya: join tang: ri yhe: shoo: wa ga: nya: loo zei: moo: zhung: wigi Gad voogung moo: khokham koid nyid da" Akhisha jhang khyoo: yhe: loo" bye:. Nya: tang: ri myang lang" yhoem: khyoo: doem shu" loo bye:.

⁴¹Shimi cikoid ga: ziri Sholumon shoug" gyoo: lang"

⁴²Nyang: ri khe: yu wigi «Yerusalem voogung mo athu so" yen" wa shid re" ASEING da" myeing khyang" moo ngoo nang ri dangsoo" to" too" bye: zi nghoid. Nang hougsu" thu lo" nghoid rigi gyeing" shid: wa ein: nang ri ngoo zid" nhang: bye:. Nga" dang: ri tam" gyoo: wa shid re" ngoo tid ziri nang aveing" rhe".

⁴³Ciwim yoomo nang re" dangsoo" khoin" ri phyo' pyam wigi nga" amyeing" dang: ri atam" gyo: lha".

⁴⁴Nga" phoo David ri nang koid shoid da" moo" zoo" dangain" ri nang goolhoo' se' nyid. Hau: moo" zoo" yoomo ASEING nang ri dam byid: wa zi nghoid.

⁴⁵Nghoid loug we' nyang: gi ngoo ri mainkaid byid: wigi David da" mungdain: ri apyaid atoo: ngei pyo: yug yoo nhang: wa zi nghoid» ga: tid.

⁴⁶Hau: thang: khokham phoo gi Benaia ri amyeing" byid: bye:. Benaia gi thu lo" lho: Shimi ri said pyam bye:. Akhid" Sholumon gi bain sho' ri yo" vhoebkhang" bye:.