Read Lashi 1 KHOKHAM 20 Bible Online

1 KHOKHAM 20 - Lashi bible

1 KHOKHAM 20

¹Suri khokham Benhadad gi nya: gyiphung: dangain" ri khe: foem: to" ziyo' gootu: vhoebkhang" zoug: soem" xe: eig yug we' nyangnu" myang: joem yo' gyi myang: rheing" joem yo' bo pang" wigi nyang: to' yhe: lo" lho: Samari voogung ri vang: lheing: to" ziyo' hau: voogung ri nheig coid nuyug thougtheung zain: boem bye:.

²Nyang: gi voomoo" khau mo Israela khokham Ahab jang" khyoo: lagyoo: yiri nhang: kaid lho: «Khokham Benhadad gi

³re" ngei yo' sheing:- re" myiyi: yi yo' yoem: bo thang da" re" zoo: yiri nyang: ri byid: wa shid re" mho' kaid da» ga: tid nhang:.

⁴Ahab gi «Ngoo ri we' ngoo seing: to" da" jonu" ja: khang" moo" ri we' nyang: yo" yu ein: ziri ngoo myid veing" khyoo: ri nga" yhoem: seing: khokham Benhadad ri tid kyoo" ge'» ga: phoug tid.

⁵Lagyoo: yi Ahab jang" mo tau" lo thang: ri Benhadad mo gootu: mho' yoid khyoo: daloem: gi «Nang gi nga" lo, khoug: khyoo: re" ngei: yo' sheing: re" myiyi: yi yo' zoo: yiri kaid byid: ca".

⁶Akhid" khasu" nghoid loug we' re" khokham kho" yo' re" moo" voin bang: da" yhoem: joem khyoo: nga" moo" voin bang: re" shoo: wa zi nghoid wigi nyangnu" phoug" dab ga: myid jho: gu: ja: khang" moo" ri yu baja". Nyangnu" nab kyoo' he: yo, ri houg moo nyid wa zi nghoid ein: da" khyoo: ri ngoo re" jang" khyoo: pyeung: kaid» ga: tid.

⁷Khokham Ahab gi mungdain: mo vhujhung: dangain" ri khe: yu wigi «He: yug gi nyhang" ri phyo' sain" pyam nau nyid ziri nanu" si bye:. Nyang: gi ngoo ri nga" yhoem: seing: myhi' yi yo' zoo: yi nga" ngei yo' sheing: joem ri mho' nyid ziri ngoo myid veing" too" bye:» ga: tid.

⁸Vhujhung: yi yo' byumyu" yigi «nya: dang: ri atam' gyoo: nyang: ri abyid: goo"» ga: phug tid bye:.

⁹Houg: yoomo Ahab gi Benhadad da" lagyoo: yiri «Xang: shi" mho' yoid ziri ngoo myid veing" bye:. Nghoid loug we' eig lheing: da" mho' yoid ziri myid aveing" ein: nga" yhoem: seing: khokham ri lo" tid kyoo" ge'» ga: lo" tid nhang:. Lagyoo yi thu lo" byug thang: ri Benhadad mo gootu: pyeing: dang: daja: doem tau" ci: lo zigi

¹⁰«Ngoo gi he: re" da" voomoo" ri phyo' sain" pyam wigi zhoothung" phei" joem ri nyangnu" lo, mo yo" dang thu ri" sho' byu tham: sho' shu" ri" wa nghoid. Ngoo hougsu" akoid nghoid rigi yu phara" joem ngoo ri said pyam wa nghoid» ga: tid.

¹¹Khokham Ahab gi «Gyizoo gyeing" nghoid rigi meing: bain zain: thang: ri langi: koid boem- meing: azain: shi" ri ayo" koid wa ein: ziri khokham Benhadad ri tid kyoo" ge'» ga: phoug tid.

¹²Benhadad gi nya: da" gyi seing" tain" bidnoem yi gootu: vhoebkhang" zoug: yi yo' nyangnu" zoem" khoug: moo yhid: shug nyid uri Ahab da" pyeing: dang: shoug" yu da:. Nyang: gi voomoo" ri zain: wa khyo" jen" jen" koid nyid wa shid re" nya: byu yiri amyeing" byid: kaid bye:. Houg: yoomo nyangnu" we' joyoo yu boem bye:.

¹³Hau: ayo, gyoo: moo lapi: dayug gi khokham Ahab jang" khyoo: re" wigi «ASEING tid- he: gyiphung: moo" ri agyug noo". Ngoo gi akhid" nyid" houg bang: adang moo nang ri oung: nhang: wa. Houg: lang" ngoo ASEING nghoid ziri nang yo" si' baja" o"» ga: tid.

¹⁴Ahad gi «Hang" shu" vhu" zain: wa la"» ga: myid:. Lapi: phoo gi «Mung" du gyiphung: yi vhoebkhang" akhoug: moo: nyid da" gyizoo: nu" yi hau: ziri zain: wa nghoid ga: ASEING tid» ga: tid. Khokham gi «Gyi jhung: shoem: ri hang" vhu' she: wa la"» ga: myid: bye:. Lapi: phoo gi «Nang vhu" she: wa» ga: tid.

¹⁵Houg: yoomo khokham phoo gi mung" du vhoebkhang" zoug: yi mo gyizoo: nu" yiri khyen: thu yu" ri dangain" 232 yug nghoid da:. Hau: thang: nyang: gi Israela gyizoo: yiri doem khe: thu yu" ri dangain" nyhed khyeing" yug nghoid da:.

¹⁶Meing zain: zigi nyid" dang: gung ri bui" bye: ziyo' Benhadad yo' nya: seing" tain" bidnoem soem" xe: eig phung: zigi nyangnu" da" zoem" moo yhid: shug yed nyid boem shi" ago".

¹⁷Gyizoo: nu" yi shid khyoo: zain: do, lo" boem bye:. Benhadad nhang: kaid to" da" gyi shid shi: bang: gi Samari mo gyizoo: daphung: thu lo khyoo: ri nyang: ri tid kyoo" bye:.

¹⁸Nyang: gi «Nyangnu" meing: zain: wa shid re" nghoid loug we' myenjham" khyoo: ri sang: wa shid re" nghoid loug we' nyangnu" ri adei myheig too" ge'» ga: tid.

¹⁹Meing: zain: ziri gyizoo: nu" yi vhu" she: wigi Israela gyiphung: yigi cang lo nyid boem lho:

²⁰Yugkhang" moo" gi nya: gyivoo ri said boem bye:. Suri byumyu" yi phang: boem wigi Israela byumyu" yi cang khaid boem bye:. Nghoid loug we' Benhadad gi myang: dab mo byencang" dayham" bang: yo' myang: jui: wigi phang: loid bye:.

²¹Khokham Ahab gi jang: pa: khyoo: thu re" ziyo' myang: joem yo' gyi myang: rheing" oung: yu wigi Suri byumyu" yi atho' moo: nheugshid: nheugdeug oung: yu bye:.

²²Hau: thang: lapi: phoo gi khokham Ahab jang" yhe: wigi «Doem tau" lo" wigi re" gyi yoem: ri lo" khe: lung: we' akhyoo" ri nyheing" za: lo" koid we'. Ciwim ga: ri Suri khokham gi sang: nheig zain vang khoem" ri doem zain: wa» ga: tid.

²³Khokham Benhadad da" moo" voin bang: gi nyang: ri «Israela byumyu" yi da" yu phara" joem gi boem yu phara" nghoid yoomo Israela byumyu" yi nyhang" ri oung: zi nghoid. Nghoid loug we' nyhang" jang: pa: moo: nyangnu" ri zain: nghoid rigi nyhang" gyeing" nyang: nyangnu" ri oung: wa zi nghoid.

²⁴Akhid" nyangnu" ri vhoebkhang" da" byu soem" xe: eig yug ri thid pyam wigi nyangnu" joyoo moo gyizoug: yiri thid kaid too" shang.

²⁵Hau: thang: re" jang" mo phang: thu lo" da" gyiphung: yo' dage" myang: joem yo' gyi myang: rheing" joem myhoo' myoo: sho' doem khe: zheing" shang. Nyhang" gi Israela byumyu" yiri jang: pa: moo: zain: goo" wa ziyo' he: lheing: gi nyangnu" ri nyhang" yo" zain: oung: wa zi nghoid» ga: tid. Khokham Benhadad gi nyangnu" phajhi" byid: ziri myid veing" khab yu bye: ziyo' cang koid bye:.

²⁶Zain vang khoem" doem ju" lo uri nyang: gi nya: byu yiri khe: yu lho: Israela byumyu" yiri zain: wa shid re" nyangnu" gi Aphed voomoo" khyoo: yhe: lo" boem bye:.

²⁷Israela byumyu" yi we' gyizi gyikhoo yo' dage" khe: yu zi shoug" bye:. Nyangnu" yhe: lo" wigi Suri byumyu" yiri zain: wa shid re" phung: eig phung: koid wigi dab koid nyid boem da:. Jang: pa: goin" moo byeung" sho' nyid boem da" Suri byumyu" yi yo' tu' go" yu" ri Israela byumyu" yigi dajhi' kyeing" da" coidbaid phung: zoo: eig phung: yo' du da:.

²⁸Lapi: phoo gi khokham Ahab jhang yhe: wigi «He: zigi ASEING tid zi nghoid. Suri byumyu" yi tid zigi ngoo gi jang: pa: mo anghoid looza: boem joem mo yu phara" nghoid yoomo ngoo gi ASEING nghoid khyoo: ri nang yo' re" byumyu" yi si goo" baja" ngoo gi hau: byu phung: zeing atho' moo: nang ri oung: nhang: wa zi nghoid» ga: tid.

²⁹Suri yo' Israela gyiphung: eig phung: gi daphung: yo' daphung: myonhoo: shu: wigi nyang: tu: nya: dab moo nyhed nyid" ju" sho' nyid nyid bye:. Nyhed nyid" ein: nyid rigi nyangnu" meing: zain: goo" bye: ziyo' Israela byumyu" yigi Suri byumyu" dasen ri said pyam bye:.

³⁰Deing shi" da" bang: we' Aphed voomoo" khyoo: phang: vang wigi nyangnu" mo eig moin nyhed khyeing" ri voomoo" vang khyam: byo, gyo" lho: nhe' pyam bye:. Benhadad we' voomoo" khoug: khyoo: phang: vang lo" lho: yhoem: daloem: mo nungthang yab khyoo: yhe: phang gau" nyid da:.

³¹Nya: gyizoug: yigi nya: jang" moo re" wigi «Israela khokham yigi nheig se' khyeug boem ga: ziri ngoonu" shau" gyo: yu". Jid: moo" mi ri ngoonu" phyid" doem: moo baid yoeb ziyo' ngoonu" leingzeing: moo tei" baid yoeb ci: wigi Israela khokham jang" khyoo: yhi: wa shid re" ngoonu" ri akhang" byid: we'. Nyang: gi re" kangso' ri to' loid byoin nhang: kaid abe» ga: tid.

³²Houg: yoomo nyangnu" gi nyangnu" phyid" doem: moo jid: moo" mi ri baid yoeb ziyo' nyangnu" leingzeing: moo tei" baid yoeb ci: lho: Ahab jang" khyoo: yhe: wigi «Re" dei zoo: Benhadad gi nya: kangso' loid byoin wa shid re" nang ri mho' yoid nyid» ga: tid. Ahab gi «Nyang: dei nyid shi" nhung: lha"- gi bye:. Nyang: gi nga" mang: nhung" yhang: ti" nghoid nyid da» ga: tid.

³³Benhadad da" moo" voin bang: gi void voo: gi ri lang" yu" nyid uri Ahab gi ‹Nga" mang: nhung"› ga: tid da" dang: ri dalheing: dam koid: yu wigi «Nang Benhadad ri re" mang: nhung" ein: khyo" tid lha"» ga: myid:. Ahab gi «Nyang: ri nga" jang khyoo: shu" ri" ge'» ga: tid. Benhadad ju" lang" Ahab gi nyang: yo' dage" gyi myang: rheing" zhung: wa shid re" khi: bye:.

³⁴Benhadad gi nyang: ri «Re" pho lo, mo nga" phoo yu to" da" voogung joem ri ngoo doem byid: wa. Nga" phoo gi Samari moo: kid" oung" joyoo koid to" yhang: ti" nanya: shid re" Damasku moo joyoo doem koid too" bye: da» ga: tid. Ahab gi «He: dang: khoin" joem yoomo ngoo nang ri nhang: kaid bye:» ga: tid. Nyang: gi Benhadad yo' dang: theing mougsoug" lhid" go" wigi nyang: ri nhang: kaid bye:.

³⁵ASEING amyeing" dang: yo' dayhang: ti" Lapi: phung: daphung: mo Lapi: dayug gi gootu: Lapi: dayug ri nyang: ri baid wa shid re" amyeing" byid: bye:. Nghoid loug we' nyang: he: pyam yoomo

³⁶Nyang: hau: yug ri «Nang gi ASEING da" amyeing" dang: ri atam" gyoo: yoomo nang nga" jang" mo thu loo" yo' dage" khangkhyi dadu: wigi ngaid said pyam wa nghoid» ga: tid. Houg: lang" nyang: thu loo" yo' dage" khangkhyi dadu: re" lo wigi nyang: ri ngaid said pyam bye:.

³⁷Hau: thang: hau: Lapi: phoo gi gootu: dayug jang" khyoo: lo" wigi «Ngoo ri baid we'» ga: tid. Hau: yug we' baid bye:. Hau: yug we' nyang: ri yoem: kaid baid wigi dam tab bye:.

³⁸Lapi: phoo gi nya: gung phyug wa shid re" nya: myonhoo: moo: vhuthoeb yo' nghoeb ci: lho: khyoo: yam moo Israela khokham lid: loo wa ziri yhe: lang" yab jo, da:.

³⁹Khokham lid: lo nyid uri Lapi: phoo gi nyang: ri khe: yu wigi «Nang aseing: khokham we" ngoo gi meing: zain: jang moo meing: zain: nyid ri gyizoo: dayug gi nga" jang khyoo: gyivoo dayug myheig shu" lo lho: tid zigi ‹He: yug ri zung" we' he: yug ri ci: lheig kaid nghoid rigi nang gi hau: shid re" re" kangso' yo' xab ca" anghoid lang" ngei pyi" soem: khyeing" yo' xab ca" wa› ga: tid.

⁴⁰Nghoid loug we' ngoo gi gootu: moo" myo: nyid wigi hau: yug gi phang: loid loo" khari" da» ga: tid. Khokham gi «Nang gi nanya: khyoo: ri tid fu" nyid bye: wigi nang gi shoid bye: da" dam ri xab ca" wa zi nghoid» ga: tid.

⁴¹Lapi: phoo gi nya: myonhoo: mo vhuthoeb lang: ceig pyam wigi khokham gi dalheing: dam hau: yug gi Lapi: dayug nghoid ziri si' bye:.

⁴²Hau: thang: Lapi: phoo gi khokham ri «He: zigi ASEING da" mungdang: nghoid. Said pyam wa shid re" ngoo amyeing" too" bye: da" byu dayug ri loid byoin wa shid re" nang akhang" byid: yoomo nang gi hau: yug shid re" re" kangso' yo' xab ca" wa ziyo' nya: gyizoo: yiri loid byoin nhang: yoomo re" gyizoo: yiri we' said toem" pyam zi shoug" wa» ga: tid.

⁴³Khokham gi Samari mo nya: yhoem: khyoo: gyoug ci' yoem: shoin: nheigloem: thang ziyo' doem tau" loo" bye:.