Read Lashi 1 KHOKHAM 22 Bible Online

1 KHOKHAM 22 - Lashi bible

1 KHOKHAM 22

¹Israela yo' Suri da" agyoo: moo: eig zain gi meing: dam nyid loug we'

²Soem" zain ein: zain rigi Yuda khokham Yehoshaphad gi Israela khokham Ahab jang" khyoo: re" koem" yu" bye:.

³Ahab gi nya: gyizoug: yiri myid: zigi «Gilead mo Ramod voogung ri Suri khokham lo, mo nyhang" doem yo" yu wa khyo" akoid zigi ciwim yoomo lha". Hau: zigi nyhang" seing: nyid zi nghoid» ga: myid: bye:.

⁴Ahab gi Yehoshaphad ri «Nang gi ngoo yo' dage" Ramod voogung ri yhe: zain: jang" moo ayo" boo wa la"» ga: myid: bye:. Yehoshaphad gi «Nang jen" lang" ngoo we' jen" nyid bye:. He: zigi nga" gyizoo: yi yo' nga" myang: dab bang: nghoid.

⁵Nghoid loug we' ASEING ri shi" myid: gyo: yu" shang» ga: tid.

⁶Houg: yoomo Ahab Lapi: yi jang" mo myid: shoo: koo: ri khe: yu wigi «Ngoo gi Ramod ri yhe: zain: ri gi wa la" agi wa la"» ga: myid: bye:. Nyangnu" gi «Hau: ziri yhe: zain: we' ASEING gi nang ri oung: doid nhang: wa nghoid» ga: tid.

⁷Nghoid loug we' Yehoshaphad gi «Ngoonu" ASEING ri yo" myid: gyo: yu" wa da" gootu: Lapi: yi anyid loo: rhe"» ga: myid: bye:.

⁸Ahab gi «Hid: moo: Imla nya: yuggi zoo: Mikhaia ga: da" Lapi: dayug nyid shi". Nghoid loug we' ngoo nyang: ri avhoo:. Ciwim gari nyang: nga" shid re" khanham we' ge khyo" Lapi: api: byid: nghoid da:. Khanham we' daja: ja: moo: age zi dabo nyid da» ga: tid. Yehoshaphad ri «Nang hougsu" atid» ga: phug tid.

⁹Hau: thang: Ahab gi kho" mo gyizoug: dayug ri khe: yu wigi Mikhaia ri dalheing: dam yhe: khe: loo wa shid re" nhang: kaid bye:.

¹⁰Khokham eig tang: gi khokham byisheing: ri void lho: Samari vang khyam: khoem" moo" duang: nghe: shoid gug nang: jang: mo nyangnu" zhungtang moo zhoung: nyid ago". Lapi: yi dangain" we' nya: tang: shidkhoin" moo Lapi: pe: nyid boem bye:.

¹¹Nyangnu" mo Khenana da" nya: yuggi zoo: Zedekia gi joto' khyoug: joem koid wigi Ahab ri «He: zigi ASEING tid zi nghoid. ‹He: joto' khyoug: joem yo' Suri byumyu" yiri zain: ge'. Houg: lang" nyangnu" ri gyeing" oung: wa zi nghoid›» ga: tid.

¹²Gootu: Lapi: dangain" we' houg: yo' dayhang: ti" tid boem ago". Nyangnu" gi «Ramod voogung ri yhe: thougtheung zain: ge' re" tang: oung: wa. ASEING gi re" tang: ri oung: doid nhang: wa» ga: tid.

¹³Hau: ayo, aju" shi" agyoo: moo Mikhaia ri yhe: shu" yu bye: da" gyizoug: ri «Gootu: Lapi: yi dangain" gi khokham phoo shid re" oung: doid khyoo: ri pi: byid: bye:. Nang we' hougsu" pe: ri je" gi wa» ga: tid.

¹⁴Nghoid loug we' Mikhaia gi «Nyang: ngoo ri tid kyo" khyo" tid wa shid re" kangso' ASEING moo ngoo dangsoo" to" too" bye:» ga: tid.

¹⁵Khokham Ahab shidkhoin" moo nyang: thu ri" lang" khokham gi nyang: ri «Mikhaia we"- khokham Yehoshaphad yo' ngoo gi Ramod voogung ri yhe: zain: wa la"- ayhe: zain: wa la"» ga: myid: bye:. Mikhaia gi «Yhe: zain: ge'. re" tang: gyeing" nyang: oung: wa. ASEING gi re" tang: ri oung: doid khyoo: byid: wa» ga: tid.

¹⁶Nghoid loug we' Ahab gi «ASEING da" myeing" khyang" yo' nang ngoo ri dang: tid uri jo zi tid we'. He: khyoo: ri ngoo nang ri khamyhoo' lheing: tid ca" wa lha"» ga: doem phug tid.

¹⁷Mikhaia gi «Yang zung" su: abo da" yang phung: yhang: ti" Israela gyizoo: yigi bau gung cang abyoo: asain" bue" nyid ziri ngoo yo" myang bye:. ASEING tid zigi ‹He: byu yi moo: vhujhung: aboo nghoid da:. Yhoem: khyoo: yug yoo tung" loo" nhang: ge'›» ga: tid.

¹⁸Ahab gi Yehoshaphad ri «He: yug gi nga" shid re" ge da" Lapi: khanham we' api: byid: ein: nang ri tid zi anghoid shi" la" Khanham we' daja: ja: moo age zi dabo nyid da» ga: tid.

¹⁹Mikhaia gi «ASEING tid zigi Akhid" tam" gyoo: ge' mougkhung: mungdain: moo: ASEING gi nya: zhungtang moo zhoung: jo, ziri ngoo myang. Nyang: lagyoo: yi dangain" gi nya: ayam moo yab jo, da:.

²⁰ASEING gi «Ramod voogung khyoo: yhe: wigi said pyam shoug" sho' Ahab ri hang" yo" mhoid" jhoem" wa la"» ga: tid. Moug: lagyoo: yi dayham" gi dakhyo" tid- gootu: dayham" gi gookhyo" tid boem ago".

²¹Venyi: dagung gi ASEING jang" khyoo: ju" lo" lang" ‹Ngoo nyang: ri yo" mhoid" jhoem"› ga: tid bye:.

²²ASEING gi ‹Khasu" mhoid" jhoem" wa› ga: myid: bye:. Venyi: gi ‹Ngoo yhe: wigi Ahab da" lapi: yi dangain" ri yhe: mhoug wa› ga: tid. ASEING gi ‹Nyang: ri yhe: mhoid" jhoem" we'. Nang oung: doid wa›» ga: tid.

²³Houg: lang" Mikhaia gi «He: zigi bue" lid: loo bye: zi nghoid. ASEING gi nang ri mhoug wa shid re" he: Lapi: yiri koid bye:. Nghoid loug we' nang yau: khi" shoug" wa khyo" nyang: nyang: soin: phyid too" bye:» ga: tid.

²⁴Hau: thang: Lapi: Zedekia gi Mikhaia jang" khyoo: do, lo" wigi nya: myonhoo: ri thoin: byid: lho: «ASEING da" Venyi: gi nga" jang" mo thu lo" wigi nang khyo" khanham dang: re" tid yu lha"» ga: myid: bye:.

²⁵Mikhaia gi «Nang gau" wa shid re" nungthang yab khyoo: yhe: lo" uri myang wa zi nghoid» ga: tid.

²⁶Hau: thang: khokham Ahab gi nya: gyizoug: dayug ri amyeing" byid: zigi «Mikhaia ri myheig wigi voomoo" mo gyizoug: Amon yo' khokham nya: zoo: Yoasha tang: da" lo, moo ab byid: ge'.

²⁷Ngoo gau: nyu: tung" doem lo da" ayo, ju" sho' nyang: ri thung: moo lhoung to" wigi zooyho' yo' gyid: ri byid: zhoo" byid: jhug ge' ein: nya: tang: ri tid ge'» ga: tid.

²⁸Mikhaia gi «Nang gau: nyu: ziyo' doem tau" lo nghoid rigi ASEING gi ngoo khyo" wigi dang: atid wa» ga: nyho: tid bye:. Xo' lho: nyang: gi «Ngoo citid ziri yugkhang" moo" tam" gyoo: ge'» ga: tid.

²⁹Hau: thang: Israela khokham Ahab yo' Yuda khokham Yehoshaphad tang: gi Gilead mo Ramod voomoo" ri meing: zain: wa shid re" yhe: loo" bye:.

³⁰Ahab gi Yehoshaphad ri «Nyha" tang: meing: zain: joyoo khyoo: yhe: uri ngoo gi ngoonya: gung ri gau" shoung: ci: wa. Nghoid loug we' nang gi nanya: khokham khin ri void wa zi nghoid» ga: tid. Houg: yoomo Israela khokham gi gung ri gau" shoung: ci lho: meing: zain: jang: khyoo: yhe: loo" bye:.

³¹Suri khokham gi Israela khokham mo lid gootu: dayug ri we' akhaid zain: wa shid re" nya: gyi myang: rheing" koin" da" gyizoug: soem" xe: eig yug ri amyeing" byid: too" bye:.

³²Houg: yoomo nyangnu" khokham Yehoshaphad ri myang lang" nyangnu" dangain" bang: gi Israela khokham nghoid bye: ga: soin: yu ziyo' nyang: ri khaid zain: lo" boem bye:. Nghoid loug we' nyang: nyho: kaid uri

³³Nyangnu" gi Israela khokham anghoid ein: ziri se' byug yoomo nyang: ri nyangnu" gyi koid nyid jang" mo noo: bye: da:.

³⁴Nghoid loug Suri gyizoo: dayug gi beig goo yoo" yo' beig kaid da" myoo: dakhaid gi khokham Ahab da" gyibyi: zuang xo' to" agyoo: moo zang" beig zhug kaid byid: bye:. Nyang: gi nya: gyi myang: rheing" koin" su: ri «Ngoo dam dab bye: Meing: zain: jang: tunggung shoid khyoo: koin" tau" thu loo" we'» ga: tid.

³⁵Meing: zain: zigi je" thain: nyid uri khokham Ahab gi Suri byumyu" yi jang" khyoo: myonhoo: shu: wigi nya: gyi myang: rheing" khoug: moo leung jo, da:. Nya: dam mo yau thu re" da" suid" gi gyi myang: rheing" thi" moo deing jo, da:. Myen" thang: zoo" ri nyang: shid: bye:.

³⁶Bidvang loo" yo, ri Israela vhujhung: yi khyo" amyeing" thu lo zigi «Yugkhang" moo" gi nyang: tu: nya: moug: khyoo: nya: voomoo" khyoo: loo" ge'» ga: zi nghoid.

³⁷Khokham Ahab shid: bye: yoomo nya: manggung ri Samari khyoo: yu lo" wigi myhoeb pyam bye:.

³⁸Nya: gyi myang: rheing" ri Samari gyid thung" moo cid" yung" cid" lho' pyam bye:. ASEING tid bye: ziyo' dayhang: ti" houg moo nya: suid" ri lakhuid" joem yo, zo: pyam bye: ziyo' shava myhi' yi we' nyang: yug nya: gung ri cid" zoo: bye:.

³⁹Khokham Ahab gi nya: khokham kho" ri xang: zei yo' koid pyam ziyo' nyang: de: da" voomoo" joem we' wigi nyang: koid lid: loo bye: da" moo" zoo" ja: khang" moo" ri Israela khokham yi da" mhoomyid: shen" dam pug moo lhid" xoem" too" bye:.

⁴⁰Nyang: shid: bye: yoomo nya: yuggi zoo: Ahazia gi nya: khokham zhungtang moo khokham thid koid nyid bye:.

⁴¹Israela khokham Ahab vhoebkhang" zi myid: zain byeung" uri apyaid soem" xe: wim: zain nghoid bye: da" Yehoshaphad ga: da" Asa nya: yuggi zoo: gi Yuda khokham bue" loo bye:.

⁴²Nyang: gi Yerusalem moo eig xe: wim: zain vhoebkhang" bye:. Nya: myhi' gi Shilahi da" nya: zoo: Azuba nghoid da:.

⁴³Nya: shid vhu" mo nya: phoo Asa yhang: ti" nyang: gi ASEING shidkhoin" moo jo da" moo" zoo" ri koid nyid da:. Nghoid loug we' tungbau noku thung" joyoo rigi aphyo' pyam wigi byumyu" yigi houg moo xoin" to' ziyo' nam pyo: ja: nghe' ngei" khyoo: ri xo' koid.

⁴⁴Yehoshaphad gi Israela khokham yo' meing: dam khyoo: ri koid too" bye:.

⁴⁵Yehoshaphad koid loo bye: da" moo" zoo" ja: khang" moo" yo' nya: seing" yang" ziyo' meing: zain: khyoo: ri Yuda khokham yi da" mhoomyid: shen" dam pug moo lhid" xoem" too" bye:.

⁴⁶Nyang: gi nya: phoo Asa pyaid mo deing nyid shi" da" tungbau noku thung" phoin: moo moo" zei: nyid da" shava myhi' shava: phoo dangain" bang: ri yu pyam bye:.

⁴⁷Edom mung" moo gi khokham anyid nghoid da:. Hau: ziri Yuda khokham moo" foin: to" da" lagyoo: dayug wigi vhoebkhang" nyid da:.

⁴⁸Khokham Yehoshaphad gi panglai: sangphoo joem zhug wigi Ophira mung" mo sheing: yhe: thoo' wa khyo" thu loo" bye:. Nghoid loug we' Eziongebera moo byo, gyoeb byug yoomo nyangnu" khanham we' ayo" yhi: nghoid ago".

⁴⁹Hau: thang: Israela khokham Ahazia gi nya: byu yi yo' Yehoshaphad da" byu yi dage" sangphoo yo' gyung: soo" nhang: wa khyo" mho' yoid nghoid loug we' Yehoshaphad gi hau: ziri he: pyam da:.

⁵⁰Yehoshaphad shid: bye: ziyo' David voomoo" mo khokham loeb yoo moo myhoeb too" bye:. Nya: zoo: Yehoram gi nya: joyoo moo khokham doem xo' koid nyid bye:.

⁵¹Yuda khokham Yehoshaphad vhoebkhang" zi daxe: nyhed zain byeung" uri Ahab nya: yuggi zoo: Ahazia gi Israela khokham bue" lo wigi nyang: gi Samari moo eig zain vhoebkhang" bye:.

⁵²Nyang: gi vhoo: mo Israela byumyu" yiri yooboo thoem" khyoo: shu" vhu" she: yhe: da" nya: phoo Ahab- nya: myhi' Yezebela yo' khokham Yeroboam bang: yhang: ti" ASEING ri thougtheung yooboo koid bye:.

⁵³Nyang: gi Bala ri noku ziyo' dei byid: bye:. Nyang: gi nya: shid vhu" mo nya: phoo yhang: ti" Israela da" ASEING Mangsoo ri nheigloem: zhu: nhang: bye:.