Read Lashi 1 KHOKHAM 3 Bible Online

1 KHOKHAM 3 - Lashi bible

1 KHOKHAM 3

¹Sholumon gi Egutu khokham phoo da" nya: zoo: ri lo, xo' yu wigi bidnoem koid too" bye:. Khokham gi nyang: ri David da" voogung moo: nya: khokham vang" ri we' Noku Yhoem: Moo" ri we' Yerusalem ri kyam lheung to" da" vang khyam: ri we' bain kyam' da" ayo, ju" sho' nyang: ri nyid nhang: da:.

²ASEING shid re" Noku Yhoem: Moo" abain koid shi" yoomo byumyu" yigi phoin: aja: ja: koid to" joyoo moo: xoin" ngei" nyid boem ago".

³Sholumon gi ASEING ri jheddab ziyo' nya: phoo David da" pyeing: dang: ri cang yhe: nyid nghoid loug we' nyang: gi gougnyhoug myoo: sho' ri said lho: xoin" to' jang: aja: ja: moo hau: ziri xoin" ngei" bye:.

⁴Nyang: gi dalheing: ri Gibeon voogung khyoo: yhe: wigi xoin" yhe: ngei" da:. Ciwim gari hau: voogung moo: myeing gyi: da" phoin: daloem: jo, da:. Nyang: gi lid loo" bye: da" ayo, moo: hau: joyoo moo: xoin" dakhyeing" ngei" byid: yu" bye: zi nghoid.

⁵Hau: myen ri ASEING gi nya: yhoebmo, moo thu re" lho: «Ngoo nang ri ce: noem byid: wa ziri nang vho: lha"» ga: myid: bye:.

⁶Sholumon tid zigi «Re" dei zoo: nga" phoo David gi nheig bo- dang: zung" ziyo' loem: lug khyo" nang yo' xo' go" nyid yoomo nang nyang: ri khanham we' jheddab nheigloem: ci: shug bye: zi nghoid. Nya: khokham vang" moo vhoebkhang" wa shid re" yuggi zoo: dayug ri we' akhid" nyid" nyang: ri byid: wigi re" gyi: sheung: geing: teing jheddab myid ri xo' wigi ci: shug nyid da:.

⁷O" ASEING Mangsoo we"- ngoo gye" ngi shi" ziyo' khasu" vhoebkhang" yhe: loo" wa zi asi' nghoid loug we' nga" phoo da" khokham aya: moo ngoo ri nang doem thid zhung: nhang: bye:.

⁸Re" byumyu" khyo" nang khyen: yu da" he: ayo" tho' nghab loo: sho' myo: da" byumyu" yi moo: ngoo bo nyid da:.

⁹Houg: yoomo ge ziyo' age ziri se' kho' lho: re" byumyu" yiri deing: byeung" khyo" se' vhoebkhang" wa shid re" ngoo ca" nyid da" phajhi" ngoo ri byid: we' o". Hougsu" anghoid rigi he: gyi: sheung: da" re" byumyu" yiri ngoo khasu" apyaid atoo: yo" vhoebkhang" wa la"» ga: tid bye:.

¹⁰Sholumon hau: khyoo: ri mho' yoomo ASEING vhoo: ngei nyid.

¹¹ASEING gi nyang: ri «Re" gung nanyang: kangso' sheing: wa shid re" yoo" zoo: yoo" shug wa shid re" re" gyivoo yiri yo" said pyam wa shid re" nang amho' loo: za: deing byeung" ziyo' yo" vhoebkhang" wa shid re" phajhi" ri kyeing" nang mho' nyid yoomo

¹²nang mho' ziyo' dayhang: ti" ngoo byid: wa zi nghoid. Shid phyang" we' anyid shi"- thang: phyang" we' anyid loo: wa byu gootu: tho' je se' da" phajhi" juyhi: yo' lasi lajhang: ngoo nang ri byid: wa.

¹³Nang amho' da" re" kangso' dei khyoo: yo' nang kham yu wa da" jonu" yo' phung" yoeb ri we' ngoo byid: wa. Hau: zigi gootu: khokham yi yo" yu tho' mo je gyi: wa zi nghoid.

¹⁴Re" phoo David koid yhang: ti"- nga" dang: ri tam" gyo:- nga" tarha" yo' amyeing" dang: ri cang pyeing nghoid rigi re" kangso' sheing: nhang: wa zi nghoid» ga: tid.

¹⁵Mangsoo gi nyang: ri yhoebmo, moo dang: ji nyid ein: ziri Sholumon yhoeb so" re" ri boin: lo da:. Hau: thang: nyang: Yerusalem khyoo: yhe: wigi ASEING da" Dang: Theing Kuid: shidkhoin" moo yab lho: ASEING ri myi: nghe' xoin" joem yo' zoem" khau: xoin" joem ri ngei" byid: bye:. Hau: thang: nya: moo" voin bang: dangain" shid re" zoo: shug pui" daloem: koid byid: bye:.

¹⁶Danyid" gi shava myhi' eig yug khokham Sholumon shidkhoin" khyoo: re" nyid boem ago".

¹⁷Nya: tang: mo dayug gi «Aseing: khokham we"- he: myiyi: myhi' yo' ngoo gi yhoem: daloem: moo: shoin" nyid zi nghoid. Nyang: hau: yhoem: moo: nyid uri ngoo yuggi nu" dayug khu: bye:.

¹⁸Nga" zoo: khu: thang: eig nyid" ri nyang: we' yuggi nu" dayug khu: bye:. Hau: yhoem: moo: nga" eig yug kyeing" danyid- gootu: hang" we' abo nyid nghoid da:.

¹⁹Hau: thang: damyen rigi nyang: gung lheig wigi nya: zoo: ri zang" nhe' said pyam bye: da:.

²⁰Myen" ri ngoo yhoeb jo, uri nyang: gi to' lho: nga" zoo: ri nga" nam mo lo vu, lho: nya: yhoeb yoo khyoo: vu, lo" da:. Hau: thang: shid: bye: da" nya: zoo: ri nga" yhoeb yoo khoug: moo lo to" to" da:.

²¹Thang: nab kyoo' to' wigi nga" zoonu" ri noug" jhug wa ein: soin' ri zoonu" shid: jo, ziri shau" myang bye:. Hau: zoonu" ri jid" jid" doem yu" ri nga" zoonu" anghoid ein: ziri shau" myang bye:» ga: tid.

²²Nghoid loug we' gootu: myiyi: myhi' gi «Anghoid- dei da" zoonu" gi nga" zoonu" nghoid lho: shid: da" zoonu" gi re" zoonu" nghoid» ga: tid. Xang: shi" myiyi: myhi' doem phug tid zigi «Anghoid- shid: da" zoonu" gi re" zoonu" danghoid wigi dei da" zoonu" gi nga" zoonu" nghoid» ga: tid. Hougsu" nya: tang: gi khokham shidkhoin" moo: phyen: go" nyid da:.

²³Hau: thang: khokham Sholumon gi «Re" eig yug gi dei da" zoonu" nya: yug nya: re" ga: wigi shid: da" zoonu" rigi gootu: dayug re" ga: tid nyid» ga: tid.

²⁴Nyang: gi sham: yu nhang: wigi hau: zi ci: loo lang"

²⁵nyang: gi «Dei da" zoonu" ri eig khyam" kho' wigi myiyi: myhi' eig yug goin" ziri dayug dakhyam" byid: we'» ga: tid.

²⁶Nya: myhi' gyeing" nghoid su: gi nya: zoonu" ri gye" jheddab ziyo' khokham ri «Aseing khokham we" jeju" mo zoonu" ri asaid o". Zoonu" nyang: ri byid: we' o"» ga: tid. Nghoid loug we' gootu: myiyi: myhi' tid zigi «Hau: zoonu" ri nga" eig yug mo hang" ri we' abyid: ja". Hau: ziri eig khyam" kho' pyam we'» ga: tid.

²⁷Hau: thang: Sholumon gi «Zoonu" ri asaid loo:- zoonu" ri xang: shi" da" myiyi: myhi' ri byid: we'. Nyang: gi zoonu" da" nya: myhi' aseing: nghoid» ga: tid.

²⁸Sholumon tarha" dang: phyed khyoo: ri Israela byumyu" yi shoug" gyoo: lang" nyangnu" nyang: ri je" phau" myang: lo boem bye:. Ciwim ga: ri Mangsoo nyang: ri byid: da" phajhi" yo' moo" ri jang jang tarha" jang deing byid: nyid ziri nyangnu" si' yoomo nghoid.