Read Lashi 1 KHOKHAM 4 Bible Online

1 KHOKHAM 4 - Lashi bible

1 KHOKHAM 4

¹Sholumon gi Israela mung" goin" mo khokham nghoid nyid.

²Hid bang: gi nya: da" moo" zeing voin bang: nghoid. Khainjung Zadog da" nya: zoo: Azria

³Khokham vang" mo moo" seing: yi Shisha da" nya: zoo: tang: Elihoreb yo' Ahiya. Lhid" xoem" moo" moo yoovoin yu su: Ahiluda da" nya: zoo: Yehoshaphad.

⁴Gyi zoug:- Yehoiada da" nya: zoo: Benaia. Khainjung yi Zadog yo' Abiatha.

⁵mungzoug: Nathan da" nya: zoo: Azaria. Khokham ri phajhi" byid: su: Nathan da" nya: zoo: khainjung Zabuda.

⁶Khokham vang" mo dei zoo: yiri vhoebkhang" su: Ahisha. Moo" zoo" ri vhoebkhang" su: Abda da" nya: zoo: Adoniram.

⁷Sholumon gi mung" zoug: daxe: eig yug ri we' khyen: to" da:. Nyangnu" gi dazain goin" moo lhammoo" dakhyab dayug yoovoin yu khyo" wigi khokham phoo yo' nya: yhoem: byu yi shid re" nyangnu" mung" mo zoo: shug pang" thoug byid: ago".

⁸Vhoo: mo zigi moo" voin daxe: eig yug bang: da" myeing yo' nyangnu" vhoebkhang" da" mung" joem nghoid. Benhura- Ephrim boem moug:

⁹Bendeke- Makaza- Shalabim- Bed Sheme- Elon yo' Bed Hanan voomoo" joem.

¹⁰Benhese- Arubod yo' Sokho voomoo" joem we' Hephera mougmyid dangain".

¹¹Sholumon da" nya: myiyi: zoo: Taphad ri lo, xo' yu da" Benabinadab- Dora mougmyid dangain".

¹²Ahiluda da" nya: zoo: Bana- Tanag- Megido voomoo" joem Bed Shan aqei: ayam mo voomoo" joem. Zarethan aqei: ayam mo voomoo" joem Yezrela voogung mougpyi: moug: joem Abela Mehola yo' Yokmeam voogung ju" sho'.

¹³Bengebara- Gilead mung" mo Ramod voogung- Manashe akung: ako'' mo Yaira yhoem: bang: seing: to" da" Gilead mung" mo voogung joem yo' Bashan mung" mo Argoba mougmyid moo: vang khyam: kyam' wigi vang khyam: khoem" moo gyid: mid" khoem" kyang yo' koid to" da" voomoo" zeing khyug xi:.

¹⁴Ido da" nya: zoo: Ahinadab- Mahanaim moug:.

¹⁵Sholumon da" gootu: nya: myiyi: zoo: Basemad ri lo, xo' yu da" Ahimaza- Naphtali moug:

¹⁶Hushai da" nya: zoo: Bana:- Ashe moug: yo' Bealod voomoo".

¹⁷Parua da" nya: zoo: Yehoshaphad- Isakha moug:.

¹⁸Ela da" nya: zoo: Shimi- Benyamin moug:.

¹⁹Uri da" nya: zoo: Gebera- Amori khokham Sihon yo' Bashan khokham Oga tang: vhoebkhang" lid loo bye: da" Gilead moug:. He: daxe: eig moug: mo lid- mung" goin" ri yu" nyid da" zoug: dayug nyid nyid shi" da:.

²⁰Yuda yo' Israela byumyu" yigi panglai: gyid yam mo midcoo: yhang: ti" myo: nyid boem wigi nyangnu" ngei ngei pyoo: pyoo: zoo: shug nyid boem ago".

²¹Sholumon da" mung" gi Uphrad gyid lang mo zi Philisti moug: yo' Egutu mung" moug: kyoo: moo ju" sho' da" mougmyid joem bo nyid da:. Nyangnu" gi Sholumon da" apyaid thang sho' vhoebkhang" da" akhoug: moo nyang: ri khang" doug kaid byid: nyid boem.

²²Sholumon ri nyid" khang" moo" byid: ca" da" zoo: shug joem gi Cen: moin" gi 90 tang- cen: 180 tang.

²³Zho" xu: to" da" nu: 10 du:- coung" yoo moo: zung" zho" to" da" nu: 20 du:- yang 100 du yo' gootu: shoo cid:- xaid- layoo:- yhoem: myhu: ngo' aja: ja: nghoid nyid da:.

²⁴Sholumon gi Uphrad bidvang shoid mo mougmyid dangain"- Uphrad gyid lang yam, moo jo, da" Tibsa voogung mo zi bidvang shoid moo jo, da" Gaza voomoo" ju" sho' ri vhoebkhang" nyid da:. Uphrad gyid lang bidvang shoid mo khokham dangain" bang: gi nyang: vhoebkhang" da" lo, khoug: moo: nyid boem wigi yhoem: kyoo" cang" mungdain: bang: yo' yug yoo tung" nyid nyid ago".

²⁵Nyang: nyid nyid da" ayo, dangain" moo Yuda yo' Israela byumyu" yi goug: nyu: tung" shoug" nyid boem wigi yhoemkhung: khang" moo" nyang: yug nya: zabyid nei joem yo' lafoem gam joem ri seing: nyid boem bye:.

²⁶Sholumon gi nya: rheing" shi: myang: joem shid re" khoem: myid: moin yo' ju: myang: damoin eig khyeing" yo" nyid da:.

²⁷Nya: zoug: daxe: eig yug gi lhammoo" dakhyab ri dayug nya: shid re" tu' too" bye: ziyo' dayhang: ti" khokham Sholumon nya: shid re" we' khokham vang" moo zo: nyid bang: dangain" shid re" zooshug soin' byid: nyid boem. Ca" zi dangain" ri we' khanham we' pang" byid: nyid da:.

²⁸Zoug: joem yugkhang" moo" gi rheing" she: da" myang: shid re" we' moo" zei: da" gougnyhoug shid re" we' yoono, yo' khoofoo: joem ri we' ca" nhoo' pang" byid: nyid da:.

²⁹Mangsoo gi Sholumon ri ayo" tho' ki' sho' gyi: da" phajhi"- dangain" ziri yo' myang kyang da" lasi lajhang: yo' phajhi" juyhi: ri byid: bye:.

³⁰Sholumon gi bidthu shoid mo phajhi" si' bang: yo' Egutu mo phajhi" si' bang: tho' je" phajhi" se' nyid da:.

³¹Nyang: gi byu dangain" moo phajhi" je" bo thang su: nghoid. Ezrahi byu Ethan- Mahola nya: zoo: yi nghoid da" Heman- Khalakola yo' Darda bang: tho' phajhi" si' su: nghoid ziyo' yhoem: kyoo" cang" mungdain: joem moo nya: myeing khyang" gyi: nyid khyoo: byo sain" lo" da:.

³²Nyang: gi dang: zhoem' soem: khyeing" yo' jikhoin" dakhyeing" jain" ri lhid" to" da:.

³³Nyang: gi Lebanon boem mo shamu gam joem mo zi vang khyam: moo yug da" Pagyoem gam joem ju" sho' ri tid to" da:. Nyang: gi gougnyhoug joem ngho' joem byam yen da" tungdi: joem yo' wimdo, joem khyoo: ri tid to" da:.

³⁴Mougmyid dang mo khokham dangain" bang: gi nyang: phajhi" bo ga: ziri shoug" gyoo: lang" nya: phajhi" dang: ri tam" gyoo: wa shid re" byu yiri nhang: kaid boem ago".