Read Lashi 1 KHOKHAM 5 Bible Online

1 KHOKHAM 5 - Lashi bible

1 KHOKHAM 5

¹Turu moug: mo khokham Hiram gi khanham we' David da" byencang" nghoid nyid ziyo' Sholumon gi nya: phoo David da" khokham zhungtang ri thid zhung: bye: ga: ziri shoug" gyoo lang" Hiram gi nya: lagyoo: yiri Sholumon jang khyoo: nhang: kaid bye:.

²Sholumon gi he: mungdang: yo' dage" Hiram jang khyoo: doem nhang: kaid bye:.

³Nga" phoo David gi nyang: ri lheing khab' to" da" gyivoo mungdain: joem ri atheing: meing: zain: nyid yoomo nya: gyivoo yiri zain: oung: da" oung: doid khyoo: ri ASEING nyang: ri byid: da" bidnyid ju" sho' nya: ASEING Mangso da" Noku Yhoem: Moo" ri ayo" koid wa ziri nang si gu nghoid bye:.

⁴Nghoid loug we' akhid" gi nga" mungdain: mougkyoo" dangain" cang myenjham" yug yo khyoo: ri nga" ASEING Mangsoo ngoo ri byid: bye:. Nga" jang" moo: gyivoo anyid loo: wigi gyoug pho" meing: zain: khyoo: we' ajo, loo.

⁵ASEING gi nga" phoo David ri dangsoo" byid: to" zigi «Re" thang: moo ngoo khokham aya: byid: to" da" re" zoo: gi nga" shid re" Noku Yhoem: Moo" koid wa zi nghoid ga: yoomo akhid" ngoo nga" ASEING Mangsoo ri noku wa shid re" Noku Yhoem: Moo" koid wa khyo" myid phyed too" bye:.

⁶Houg: yoomo nga" shid" re" shamu gam joem thug byid: wa khyo" Lebanon khyoo: re" byu yiri nhang: byid: we'. Nga" byu yigi nyangnu" yo' dage" moo" zei: wa zi nghoid wigi ngoo gi re" byu yiri nang myid phyed byid: myhoo' vhu" kung: phoug" ri shang" wa zi nghoid. Nang se' ziyo' dayhang: ti" nga" byu yigi re" byu yi yhang: ti" seiggam se' thug zi anghoid» ga: pyeung: kaid.

⁷Hiram gi Sholumon da" pyeing: dang: ri shoug" yu lang" atho' tid loo sho' nheugshid: nheugdeug ziyo' nyang: «Gyi: sheing: mungdain: da" khokham khyo" wigi David khokham zhungtang ri thid wa shid re" phajhi" bo da" yuggi zoo: David ri byid: da" ASEING ri akhid" nyid" coung" nghei o"» ga: tid.

⁸Hau: thang: Hiram gi Sholumon jhang khyoo: vhoo: moo: tid to" da" mungdang: ri foin: kaid bye:. «Ngoo gi re" mungdang: ri shoug" yu bye: ziyo' nang tid lo moo" zoo" cinghoid loug we' koid wa shid re" ri ri nghoid bye:. Shamu yo' Shithang: gam joem ri ngoo byid: wa.

⁹Nga" byu yigi Lebanon boem mo zi panglai: ju" sho' seig doem: joem ri she: khyoo' byid: wigi hau: joem ri poug zeug lho: nang khyen: to" da" joyoo gyid yam moo ju" sho' shi: byid: wa. Houg moo: nga" byu yi poug ri phyo' lho: re" byu yi hau: ziri yoovoin yu wa zi nghoid. Re" shoid khyo" gi nga" byu yi shid re" zoo: noem pang" byid: wa ziri ngoo myid vho: nyid.

¹⁰Houg: yoomo Hiram gi Sholumon vho: da" shamu gam yo' shithang: gam dangain" ziri pang" byid: bye:.

¹¹Sholumon we' Hiram ri sungsoo: cen: 62500 tang zhainloin: xu: galain: 110,000 ri zain khang" zain Hiram da" byu yi shid re" pang" thoug byid:.

¹²ASEING gi nya: dangsoo" ri pyeing bye: ziyo' Sholumon ri phajhi" byid: bye:. Hiram yo' Sholumon gi nyang: cang" nyang: dang: theing koid to" wigi nya: tang: agyoo: moo: ngei pyo: yug yo nyid da:.

¹³Khokham Sholumon gi moo" zei: byu khyo" wigi byu 30,000 ri Israela mung" dangain" goin" mo vhu" kung: lhung: yu bye: da:.

¹⁴Houg bang: ri yoovoin yu vhu" shi: wa shid re" Adoniram ri kaid to" da:. Nyang: gi houg bang: ri damoin moin soem" phung: koid lho: phung: khang" moo" gi Lebanon moo: lhammoo" dakhyab nyid wigi yhoem: moo: lhammoo" eig khyab yhe: nyid boem.

¹⁵Sholumon gi boem moug: moo lug baid da" byu 80,000 yo' lug di" bang: 70,000 we' yo" da:.

¹⁶Houg: lho: nyangnu" moo" zoo" moo vhoebkhang" khyoo: shid wa da" byu 3,300 yug ri we' khyen: nyhid: to" da:.

¹⁷Khokham Sholumon amyeing" byid: to" ziyo' dakhyoo" ti" Noku Yhoem: Moo" ayang: zhug wa shid re" young" da" lug moo" zeing joem ri nyangnu" baid boem bye:.

¹⁸Sholumon yo' Hiram da" moo" zei: byu yi yo' Biblo voomoo" mo byu yigi Noku Yhoem: Moo" zhug wa shid re" lug yo' seig thi" joem ri soin' byid: bye:.