Read Lashi 1 KHOKHAM 6 Bible Online

1 KHOKHAM 6 - Lashi bible

1 KHOKHAM 6

¹Israela byumyu" yi Egutu mung" mo thu lo thang: ri myid: sho: shid xi: zain zain- Israela mung" moo Sholumon Kho" zhung: zi myid: zain lhammoo" eig khyab ein: da" Ziva khyab moo Sholumon gi Noku Yhoem: Moo" koid shid" loo" bye:.

²Hau: akhoug: shoid moo sheing: khyoo: 90 pe:- pyi: khyoo: 30 pe:- myhang: khyoo: 45 pe: nghoid da:.

³Khoem" moo" duang: yab gi nyhoem: khyoo: 15 pe: yo' pyi: khyoo: gi Noku Yhoem: Moo" yo' dayhang: ti" 30 pe: lam, da:.

⁴Noku Yhoem: Moo" da" pyiyam moo: akhoug: shoid tho' tunggung shoid moo je nge da" bangzoo: khoem" joem bo da:.

⁵Noku Yhoem: Moo" loem: lheing khab' yo' nungthang shoid moo tunggung pyiyam yo' tain" wigi soem" zhang bo lho: 7 pe: dakhyam" myhang: da" yab pyam: joem ri we' koid to" da:.

⁶Nyhoem: thang pyam: yab mo gi 7 pe: dakhyam" lam, da:. Alaid pyam: mo yab joem gi 9 pe: lam, da:. Myhang: thang pyam: mo yab joem gi 10 pe: dakhyam" lam, da:. Noku Yhoem: Moo" da" pyiyam zhang khang" moo" gi vhoo: mo zhang tho' je poo" yoomo yab gi yam khyang abo loo: za pyiyam tho' moo: yo" geing: jo, da:.

⁷Noku Yhoem: Moo" ri koid wa da" lug joem gi lug baid jang: moo: baid young" pyam bye: yoomo hougmoo: du- voozung: anghoid lang" gootu: joto' jonu" thui: Noku Yhoem: Moo" koid uri ashau" gyoo: nghoid da:.

⁸Ayam mo yab nyhoem: thang pyam: mo khoem" duang: gi Noku Yhoem: Moo" da" mougpyi: shoid moo: phang to" wigi eig zhang yo' soem" zhang shid re" zoem" lhang: we' koid to" da:.

⁹Khokham Sholumon gi Noku Yhoem: Moo" ri bain koid abye:. Nyang: gi shamu thi" wigi yam khyang yo' mhanggoo we' tab too" bye:.

¹⁰Noku Yhoem: Moo" tunggung shoid pyiyam yo' tain" wigi yab khang" moo" 7 pe: dakhyam" myhang: da" soem" zhang bo ayam yab joem we' koid to" da:. Hau: ziri shamu yam khyang joem yo' xo' to" da:.

¹¹ASEING gi Sholumon ri

¹²«Nga" tarha" yo' amyeing" dang: joem dangain" ri nang cang nghoid rigi re" phoo David ri ngoo dangsoo" byid: too" bye: ziyo' dayhang: ti" re" shid re" ngoo koid wa zi nghoid.

¹³Nang koid to" da" he: Noku Yhoem: Moo" moo nga" Israela byumyu" akhoug: moo ngoo nyid nyid wa. Nyangnu" ri ngoo khanham we' she: pyam wa zi anghoid» ga: tid.

¹⁴Houg: yoomo Sholumon gi Noku Yhoem: Moo" ri bain koid too" bye:.

¹⁵Phyang" gung mo mhanggoo ju" sho' akhoug: shoid pyiyam moo shithang: thi" tab to" da:. Phyang" gung moo gi shamu yo' myhu" to" da:.

¹⁶Gyeung" shang: thang da" yab ga: myheing da" yab akhoug: shoid mo yab ri Noku Yhoem: Moo" da" gain: thung: shoid moo koid to" da:. Hau: zigi 30 pe: sheing: wigi phyang" gung mo zi mhanggoo ju" sho' shamu thi" yo' kyo' yam to" da:.

¹⁷Gyeung" shang: thang yab da" shid mo yab gi 60 pe: sheing: da:.

¹⁸Shamu thi" joem moo: vhoembung: soolhoo: joem we' bain: soolhoo: joem we' thuang" yung" to" ago". Akhoug: shoid dangain" jang" moo: shamu thi" yam too" yoomo lug pyiyam ri ayo" myang nghoid da:.

¹⁹Noku Yhoem: Moo" da" gainthung: shoid moo ASEING da" Dang: Theing Kuid: too" wa shid re" akhoug: yab dayab koid to" da:.

²⁰Hau: akhoug: mo yab gi sheing: khyoo: 30 pe:- pyi: khyoo: 30 pe:- myhang: khyoo 30 pe: koid to" wigi dangain" jang" moo sheing: gyeing" yo' thoeb to" da:. Phoin: rigi shamu thi" yo' koid to" da:.

²¹Noku Yhoem: Moo" akhoug: shoid moo: sheing: yo' thoeb tab pyam wigi sheing: yo' thoeb tab to" da" akhoug: shoid yab khyoo: vang lo" da" khoem" duang: moo: sheing: jangcoo" lang: khang" to" da:.

²²Noku Yhoem: Moo" akhoug: shoid dangain" yo' phoin: jo, da" gyeung" shang: thang yab ri we' sheing: yo' thoeb tab to" da:.

²³Dungdab dei noem eig du: gi zhainloin: seig thi" yo' koid to" wigi gyeung" shang: thang yab moo: to" to" da:. Eig du: goin" zi 15 pe: pe: myang: da:.

²⁴Eig du: goin" gi avoid asam" yo' gung khyang: du go" da:. Eig du: goin" gi 7 pe: dakhyam" sheing: da" dung eig dung dab yoomo dung thang: dathang: mo gootu: dathang: ju" sho' ri 15 pe: sheing: da:.

²⁷Hau: eig du: ri gyeung" shang: thang da" yab moo: dashoid dadu: du: to" too" yoomo hau: eig du: pyo: to" da" dung dathang: yo' dathang: gi gau yab agung moo tain" go" nyid wigi gootu: eig shoid mo dung thang: joem gi pyi yam moo: tain" to" ago".

²⁸Dung dab da" dei noem eig du: ri sheing: yo' thoeb tab to" da:.

²⁹Yab moo" yo' akhoug: mo yab da" pyiyam moo: dungdab dei noem soolhoo:- thab gam soolhoo: yo' bain: soolhoo: joem ri kyung" lhid" yhung to" da:.

³⁰Phyang" gung rilang" sheing: yo' myhu" to" da:.

³¹Gyeung" shang: thang da" yab mo khoem" duang: moo tab wa da" zhainloin: seig khoem" dazoem" ri koid tab to" da:. Khoem" phyoo" shoid moo gung" gung" koid to" da:.

³²Khoem" joem moo dung dab da" dei noem- thab gam- bain: soolhoo: joem ri kyung" lhid" yhung to" da:. Khoem" joem mo dungdab dei noem yo' thab gam joem moo sheing: tab to" da:.

³³Yab moo" da" khoem" duang: shid re" zhainloin: thi" yo' khoem" bung myid: khyau: zi koid to" da:.

³⁴Pug myhid" wa da" khoem" dazoem" ri shithang: seig yo' koid to" wigi

³⁵Hau: jang" moo dung dab da" dei noem joem thab gam joem yo' bain: joem da" soolhoo: ri thuang" lhid" yhung to" lho: sheing: we' tab to" da:.

³⁶Akhoug: shoid mo khyam: ri Noku Yhoem: Moo" shidkhoin" moo koid to" lho: vang khyam: ri lug soem" pyam:- shamu dapyam: khyo" xi' to" da:.

³⁷Noku Yhoem: Moo" ayang: ri Sholumon kho" zhung: thang: myid: zain lhammoo" eig khyab ein: da" Ziva khyab ri zhug bye: da:.

³⁸Khyoo: she: too" bye: ziyo' dayhang: ti" Noku Yhoem: Moo" ri Sholumon kho" zhung: thang: daxe: dazain shid khyab khyab ein: da Bula khyab moo: jhoid bain koid bye:. Hau: ziri Sholumon nyhed zain akhyeing: ayo, yu lho: koid too" bye:.