Read Lashi 1 KHOKHAM 7 Bible Online

1 KHOKHAM 7 - Lashi bible

1 KHOKHAM 7

¹Sholumon gi nya: shid re" khokham kho" daloem: ri we' koid da:. Hau: ziri daxe: soem" zain myang" sho' koid da:.

²Lebanon siyoo beingdo, yhoem: moo" gi sheing: khyoo: 150 pe:- pyi: khyoo: 75 pe: yo' myang: khyoo: 45 pe: nghoid da:. Hau: jang" moo shamu zeing bung soem" jen bo wigi da jen moo 15 zeing bo da:. Shamu khung: pyi: joem gi zeing joem adang moo ke" to" da:. Mhanggoo ri shamu thi" yo' koid to" lho: hau: zigi jonu" too" yab ju" sho' nghoid nyid wigi hau: joem ri zeing bung: joem yo' thug too" byid: da:.

⁴Pyiyam eig shoid goin" jang" moo bangzoo: khoem" soem" jen kaid to" da:.

⁵Khoem" zeing yo' bang: khoem" joem moo myid: khyoug: bo da" khoem" bung bo da:. Bangzoo: khoem" soem" jen bo da" pyiyam eig shoid goin" gi dashoid yo' dashoid myonhoo: shu: go" to" da:.

⁶Zeingboung: beingdo, yhoem: moo" gi sheing: khyoo: 75 pe:- pyi khyoo: 45 pe: bo da:. Houg moo: yhoem: pain' gyam" tho' daloem: bo wigi zeingboung: joem yo' thug to" da:.

⁷Sholumon moo" zoo" dang: phyed wa yab nghoid da" zhungtang to" yab- tarha" dang: phyed beingdo, ga: we' myheing da" yab ri phyang" gung mo zi khung doem: joem ju" sho' shamu thi" ri yam to" da:.

⁸Sholumon nyang: nyid wa yhoem: ri we' gootu: yhoem: joem yhang: ti" tarha" dang: phyed beingdo, nungthang moo: yhoem: gootu: daloem: koid bye:. Nyang: gi nya: myi: nghoid da" Egutu khokham nya: myiyi: zoo: nyid wa shid re" we' du go" da" yhoem: daloem: ri koid bye:.

⁹Khokham kho" yo' yhoem: dangain" gi ayang: mo zi mhang" moug: thang: ju" sho' lug gi joem yo' koid to" ago". Hau: lug joem ri lug baid jang: moo baid wigi hau: joem da" akhoug: shoid yo' nghe: shoid moo ke' lho: seig sheig yo' sheig phyed da:.

¹⁰Ayang: zhug da" lug yho' gi lug baid jang: moo: gye" rua sho' baid yu ziyo' koid to" ago". Houg mo dayham" gi 12 pe: sheing: lho: dayham" gi 15 pe: sheing: da:.

¹¹Aphyoo" tho' moo: we' ke' baid to" da" lug yho' gootu: yo' shamu thi" khungloem: joem nghoid da:.

¹²Khokham kho" moo we' Noku Yhoem: Moo" vang" akhoug shoid moo we' Noku Yhoem: Moo" khoem" duang: yab moo we' lug baid baid to" da" lug soem" pyam: moo: shamu thi" dapyam: kaid to" da" vang khyam pyiyam jo, da:.

¹³Khokham Sholumon gi Turu voomoo" moo nyid da" lo, moo" si' su: Huram ga: da" byu dayug ri khe: yu da:. Nyang: gi gyid: mid" jonu" koid jang" moo lo, moo" jhang: su: nghoid.

¹⁴Anyid loo: nghoid da" nya: phoo gi Turu voomoo" mo nghoid wigi nyang: we' gyid: mid" lo, moo" moo jhang: su: nghoid. Nya: myhi' gi Naphtali akung: mo nghoid da:. Huram gi vhu" nug ge ziyo' gung shoug" myo: da" lo, moo" si su: dayug nghoid. Gyid: mid" jonu" koid moo" zoo" dangain" jang" moo shu" gung" wa shid re" khokham Sholumon khe: ziri khab yu bye:.

¹⁵Huram gi sheing: khyoo: 27 pe:- loem: lheing khab 18 pe: bo da" gyid: mid" zeing bung: eig loem: koid byid: wigi hau: ziri Noku Yhoem: Moo" khoem" duang: moo zhug to" da:.

¹⁶Nyang: gi gyid: zeing atho' moo: ki" wa shid re" 7 pe: dakhyam" sheing: da" gyid: mid" soolhoo: eig loem: ri we' koid byid: da:.

¹⁷Zeing phyoo" moo goin yhang: ti" yo, to" da" jangcoo" avoid yo' gyid:-

¹⁸Gyid: mid" lamei shi" cab pyung: eig jen yo' yung" sho' koid to" ago".

¹⁹Soolhoo: gi 6 pe: myhang: lho: myioeb bain: yo' du da:.

²⁰Hau: ziri jangcoo" avoid lhoo: lheing khab to" da" atho' moo: to" to" da:. Hau: soolhoo: eig loem: goin" moo: lamei shi" shicab yhang: te" gyid: shicab 200 bo da" ajen eig jen jen koid to" da:.

²¹Huram gi hau: gyid: mid" zeing bung: eig loem: ri Noku Yhoem: Moo" shidkhoin" moo: zhug too" bye:. Mougpyi: shoid khyo" zeing ri Yakhin ga: myheing wigi mougzhung: shoid khyo" zeing rigi Boaza ga myheing too" bye:.

²²Gyid: mid" myioeb bain: soolhoo: gi zeing phyoo" moo ke" to" da:. Hougsu" wigi zeing koid moo" zoo" bain byug bye:.

²³Huram gi leung" leung" wim wigi myang: khyoo: 7 pe: dakhyam"- pyi: khyoo: 15 pe: yo' loem: lheing 45 pe: bo da" gyid: mid" thung" lhang" zeing daloem: koid bye:.

²⁴Thung" lhang" anhoid nghe: shoid moo gyid: mid" oembung: shi" ri eig jen koid wigi dangain" jang" moo tab to" da:. Hau: ziyo' thung" lhang" mo deing da" gu: yo' dangain" daloem: kyeing" nghoid nyid da:.

²⁵Thung" lhang" gi dashoid khyoo: soem" du: du: tunggung khyoo: myonhoo: shu: wigi myid: shoid goin" moo yab jo, da" gyid: mid" nuloo: daxe: eig du: da" gung tho' moo: ke" to" da:.

²⁶Thung" lhang" da" pyiyam gi lo, 3 shi" thu: da:. Hau: anhoid gi khu nhoid yo' du lho: myioeb bain: boo" yhang: ti" anhoid phain' da:. Hau: thung" lhang" moo gyid 10,000 galain vang da:.

²⁷Huram gi gyid: mid" rheing" daxi: loem: ri we' koid da:. Rheing" loem: khang" moo" gi sheing: khyoo: 6 pe: pyi: khyoo: 6 pe:- myang: khyoo: 4 pe: dakhyam" bo da:.

²⁸Hau: joem ri loem: lheing khab' du go" da" seig thi" ri khoem to" zi nghoid lho:

²⁹houg moo khangkhyi- nuloo: yo' dung dab dei noem joem da" soolhoo: lhid" to" da:. Akhoem' da" atho' shoid avhoo: shoid cang khangkhyi yo' nuloo: soolhoo: lhid" to" da:. Houg moo: ne yhen' da" bain: teikhuang soolhoo: afeig feig we' lhid" to" da:.

³⁰Rheing" loem: khang" moo" moo gyid: mid" rheing" cab' myid: loem: yo' gyid: mid" rheing" keing: bo nyid da:. Ajhoin: myid: shoid goin" moo jarung: ri thug to" da" gyid: mid" akhyid: joem bo da:. Hau: akhyid: joem ri ne yhen' da" bain: teikhuang soolhoo: afeig feig lhid" wigi koid byid: to" da:.

³¹Hau: jarung: ki" wa shid re" zeing thug phyoo" moo zoid zoid leung" koid to" da:. Hau: akhyoug: gi rheing" atho' moo lo, 18 shi" thu ze lho: vhoo: khyoo: lo, 7 shi" thu ze jo, da:. Hau lheing khoem moo kyung" yhung shoung: to" da:.

³²Rheing" cab' joem gi lo, 25 shi" myang: da:. Hau: joem gi rheing" gyid" moo tab to" wigi rheing" keing: joem gi rheing" khyid: joem moo: tab to" da:.

³³Rheing" cab' joem gi gyi myang: rheing" mo rheing" cab' yo' du da:. Houg mo da" rheing" keing: joem rheing" nhoid joem rheing" cab' sain" yau: joem yo' sain" khyid: joem dangain" gi gyid: mid" nghoid da:.

³⁴Rheing" loem: khang" moo" moo: vhoo: mo azoin" moo rheing" khyid: myid: loem: dab da:. Hau: zigi rheing" yo' daloem: za: bui" sho' koid to" da:.

³⁵Rheing" koin" moo" da" adang moo: lo, 9 shi" thu: da" akhuang tab to" da:. Hau: rheing" khyid: yo' seig thi" gi rheing" yo' daloem: kyeing" nghoid nyid da:.

³⁶Rheing" khyid: yo' seig thi" joem moo: dung dab da" dei noem joem khangkhyi joem yo' thab gam joem soolhoo: yo' houg moo yo" lhid" nhoo' lhid" lho: koid to" da:. Hau jang" moo: ne yhen' da" bain: teikhuang soolhoo: afeig feig we' dab da:.

³⁷He: zigi rheing" ri khasu" koid ein: zi nghoid. Hau: joem dangain" gi gyi: ziyo' avoid joem du go" da:.

³⁸Huram gi rheing" loem: khang" moo" shid re" jarung: 10 loem: ri we' koid da:. Jarung: loem: khang" moo" gi pyi: khyoo: 6 pe: sheing: lho: 200 galain vang da:.

³⁹Nyang: gi rheing" wim: loem: ri Noku Yhoem: Moo" da" mougpyi: shoid moo to" lho: gootu: wim: loem: ri mougzhung: shoid moo to" da:. Gyid thung" lhang" rigi bid thu mougpyi: shoid ajhoin: moo to" to" da:.

⁴⁰Huram gi oug" joem zung: bang" joem yo' khu joem we' koid da:. Nyang: gi ASEING da" Noku Yhoem: Moo" shid re" khokham Sholumon ri koid byid: da" moo" zoo" dangain" ri bain koid abye:. He: zigi nyang: koid da" jonu" joem nghoid Zeing eig loem: Hau: zeing joem aphyoo" mo khu yhang: ti" soolhoo: eig loem: Soolhoo: eig loem: goin" jang" mo goin yhang: ti" jangcoo" soolhoo: joem Soolhoo: eig loem: goin" moo dajen moo 100 cab bo zi eig jen jen da" gyid: mid" lamei shi" shicab' 400 cab. Rheing" 10 loem: Jarung: 10 loem: Gyid: thung" lhang" da loem: Gyid: thung" lhang" ri voin ci: da" nuloo: soolhoo: 12 du: Oug" joem zungbang" joem jarung: joem nghoid da:. Noku Yhoem: Moo" shid re" Huram wigi khokham Sholumon ri koid byid: da" jonu" dangain" gi gyid: mid" yo' koid yung" to" da:.

⁴¹

⁴²

⁴³

⁴⁴

⁴⁵

⁴⁶Khokham phoo gi hau: joem dangain" ri Yodan janggyoin: mo Sukhod yo' Zarethan agyoo: moo: koid da:.

⁴⁷Sholumon gi he: gyid: mid" jonu" joem sung myoo: yoomo aleug loo: to" to" da:. Houg: yoomo hau: joem khanhoo' bo ziri ayo" tid goo" nghoid da:.

⁴⁸Sholumon gi Noku Yhoem: Moo" shid re" sheing: jonu" joem ri we' koid da:. Hau: joem gi phoin:- Mangsoo ri ngei" byid: wa da" zooyho' too" wa shid re" zoobui"

⁴⁹Gyeung" shang: thang yab shidkhoin" moo mougpyi: shoid wim: loem: mougzhung: shoid wim: loem: zhung: too" wa da" myibung: zeing daxi:- bain: joem myikug joem yo' nyab joem

⁵⁰Khu soo" joem myikug lo, zei: joem khu joem nam pyo: ja: kaid wa shid re" bain joem myi: dab da" myigyu: kaid dang ci: ri" wa shid re" oug" phain' joem gyeung" shang: thang yab mo khoem" shid re" we' Noku Yhoem: Moo" mo yhoem: pain' khoem" moo" zeing shid re" we' paidta: joem nghoid da:. He jonu" dangain" ziri sheing: yo' koid to" da:.

⁵¹Khokham Sholumon gi Noku Yhoem: Moo" mo moo" zoo" ri bain koid thang: ri nya: phoo David ASEING ri shugbyid: to" da" ngei- sheing: yo' gootu: jonu" joem ri Noku Yhoem: Moo" mo jonu" too" yab moo nyang: dangain" ri to" too" bye:.