Read Lashi 1 KHOKHAM 8 Bible Online

1 KHOKHAM 8 - Lashi bible

1 KHOKHAM 8

¹Hau: thang: khokham Sholumon gi David voomoo" Ziun mo ASEING da" Dang: Theing Kuid: ri Noku Yhoem: Moo" khyoo: dang vang loo" wa shid re" Israela byumyu" yi yo' akung: ako'' vhujhung: yi dangain" ri Yerusalem moo nya: jang" khyoo: ri" wa shid re" amyeing" byid: kaid da:.

²Nyangnu" dangain" bang: gi Ethanin ga: da" lhammoo" nyhed khyab akhoug: mo zoem" pui" ayo, moo re" zeing: foem: nyid boem bye:.

³Vhujhung: yi dangain" zeing: lang" Dang: Theing Kuid: ri khainjung yi vu, wigi

⁴Noku Yhoem: Moo" khyoo: dang vang lo" boem bye:. Levi byu yi yo' khainjung yi we' ASEING da" zoem" yo' houg mo jonu" dangain" ri Noku Yhoem: Moo" khyoo: thoid shu" yu boem bye:.

⁵Khokham Sholumon yo' Israela byumyu" yi dangain" bang: gi Dang: Theing Kuid: shidkhoin" moo zeing: foem: to" wigi atho' nghab loo: sho' myo: da" yang kyung nu: kyung joem ri xoin" ngei" byid: bye:.

⁶Hau: thang: khainjung yigi Dang: Theing Kuid: ri Noku Yhoem: Moo" khoug: khyoo: dang vang lo" wigi gyeung" shang: thang yab mo dung dab da" dei noem eig du: da" vhoo: moo: to" too" bye:.

⁷Dung dab dei noem eig du: pyo: ci: da" dung joem gi koid: yo' hau: ziri dang da" keing youg: joem ri nghoeb to" da:.

⁸Gyeung" shang: thang yab shidkhoin" moo yab jo, su: hang" nghoid loug keing: youg: thang: joem ri dain: za: shau" myang da:. Gootu: joyoo mo ayo" myang nghoid da:. (Hau: keing: youg: joem gi akhid" nyid" ju" sho' houg moo jo, ashi" da)

⁹Israela byumyu" yi Egutu mung" mo thu lo uri ASEING gi Sina boem moo nyangnu" yo' dang: theing to" wigi Moshe to" to" da" lug yho' eig loem: mo lid lho: hau: Dang: Theing Kuid: moo: ciwe' aboo nghoid da:.

¹⁰Khainjung yi Noku Yhoem: Moo" mo thu ri" lang" myo, kyoem: sho' bang da" ASEING phung" yoeb yo' bang da" jhoemmoug" gi hau: ziri nyeigdain tung" nghoeb pyam da:. Houg: lang" nyangnu" gi nyangnu" da" moo" ri ayo" lo" tau" koid loo: nghoid ago".

¹¹

¹²Hau: thang: Sholumon akyu" mho' zigi «ASEING- Nang gi mougkhung: moo bid ri to" to" da:. Nghoid loug we' nang gi jhoemmoug" yo' moug: coid khoug: moo: nyid wa shid re" khyen: yu bye:.

¹³Akhid" gi re" shid re" apyaid atoo: khau: nyid wa da" reung: thang yhoem: daloem: ri ngoo zhug too" bye:» ga" akyu" mho'.

¹⁴Houg moo byumyu" yi yab jo, uri khokham Sholumon gi nyangnu" shoid khyoo: myonhoo: shu: lo lho: nyangnu" atho' moo: Mangso da" mainkaid byid: wa shid re" mho' nyid da:.

¹⁵Nyang: tid zigi «Israela da" ASEING Mangso ri coung" ge'. Nga" phoo David ri nyang: byid: to" da" dangsoo" ri nyang: cang pyeing wigi nyang: David ri

¹⁶‹Nga" byumyu" yiri Egutu mung" mo shu" tho lo da" ayo, mo ngoo ri noku wa da" yhoem: koid wa joyoo ri Israela mung" dangain" jang" mo voomoo" kha" loem: ri we' ngoo akhyen. Nghoid loug we' nga" byumyu" yiri vhoebkhang" wa shid re" David nang ri ngoo khyen: yu bye:›» ga: tid.

¹⁷Xo' lho: Sholumon gi «Israela ASEING Mangsoo ri noku wa shid re" yhoem: daloem: koid wa khyo" nga" phoo David soin' nyid».

¹⁸Nghoid loug we' ASEING nyang: ri «Nga" shid re" yhoem: daloem: koid wa shid re" nang myid vho: nyid zi jo da:.

¹⁹Nghoid loug we' hau: ziri khanham we' yo" koid wa zi anghoid. Nga" da" yhoem: ri koid wa su: gi re" yuggi zoo: nyang: nghoid wa.

²⁰Akhid" koem' ASEING gi nya: dangsoo" ri pyeing byid: bye:. Israela khokham nghoid da" nga" phoo zhungtang kho" moo ngoo xo' zhung: bye: ziyo' Israela ASEING Mangsoo ri noku wa shid re" Noku Yhoem: Moo" ri ngoo koid too" bye:.

²¹Nyang: ngoonu" phoug" phyid" yiri Egutu mung" mo shu" thu re" uri ASEING gi nyangnu" yo' koid to" da" dang: theing lug yho' joem bo da" Dang: Theing Kuid: shid re" Noku Yhoem: Moo" khoug: moo: joyoo daloem: ri we' yo" soin' too" byid: bye:» ga: tid.

²²Hau: thang: Sholumon gi byumyu" yi phung: khyoo: yhe: wigi phoin: shidkhoin" moo yab jo, lho: houg moo nya: lo, ri tu: to' to"

²³ziyo' akyu" mho' zigi «Israela ASEING Mangsoo we"- mougkhung: tho' moo we' myidjang vhoo: moo we' nang yo' du da" yu phara" gootu: anyid loo: nhung. Nang gi re" byumyu" yi yo' koid to" da" dang: theing ri pyeing byid: wigi nang ri myid nheigloem: dangain" ziyo' tam" gyo: cang yhe: nyid bang: ri re" jheddab myid ri ci: shug nyid da:.

²⁴Nang gi nga" phoo David yo' koid to" da" dangsoo" ri we' pyeing byid: bye:. Tid gu: dangain" akhid" nyid" joeb byeung" loo bye:.

²⁵Akhid" Israela ASEING Mangsoo we"- nyang: jhug za: koid yhang: ti" nyangnu" re" dang: ri tam" gyo: cang yhe: lang" Israela ri vhoebkhang" wa khokham nya: amyed ashen yi mo dayug gyeing" thu loo: wa khyoo: nang nyang: ri tid lho: nga" phoo yo' gootu: dangsoo" koid to" da" ziri we' pyeing byid wa nghoid ziri ngoo mho' nyid.

²⁶Houg: yoomo akhid"- O" Israela Mangsoo we"- re" dei zoo: nga" phoo David ri nang byid: to" da" dangsoo" dangain" ziri gyeing" nyang: bui" nhang: we' o".

²⁷Nghoid loug we' O" Mangsoo we"- nang gi mougmyid tho' moo gyeing" yo" nyid wa la". Mougkhung: mungdain: dangain" zi nang nyid wa shid re" agi" ri ngoo koid to" da" he: Noku Yhoem: Moo" gi khasu" yo" tho' gi" wa la".

²⁸Nga" ASEING Mangsoo we"- ngoo gi re" dei zoo: nghoid nga" akyu" mho' dang: ri tam" gyo: wigi akhid" nyid" ngoo nang ri mho' yoid ziri myid veing" byid: we' o".

²⁹Noku wa shid re" nang khyen: too" bye: da" he: joyoo mo Noku Yhoem: Moo" ri myen" myen" nyid" nyid" lhoug zung" byid: wa o". He: Noku Yhoem: Moo" khyoo: ngoo myonhoo: shu: wigi akyu" mho' dang: ri tam" gyoo: byid: we' o".

³⁰Nga" akyu" mho' dang: yo' re" byumyu" yi he: joyoo khyoo: shu: wigi mho' da" nyangnu" akyu" mho' dang: ri tam" gyoo: byid: we' o". Mougkhung: mungdain: mo re" yhoem: moo: ngoonu" da" akyu" mho' dang: ri tam" gyo: wigi ngoonu" yooboo ri khyoid byid: we' o".

³¹Byu dayug gi gootu: dayug ri shoid wigi he: Noku Yhoem: Moo" re" phoin: khyoo: shu" re" lho: nya: yooboo adab khyoo ri re" jham' tang: lang"

³²O" ASEING we"- mougkhung: mo tam" gyo: wigi re" dei zoo: yiri tarha" dang: phyed byid: we'. Yooboo yoo" su: ri nyang: yoo" eung: ziyo' dayhang: ti" dam byid: we'. Yooboo ayoo" su: ri koem' gi nhang: kaid byid: we' o".

³³Re" byumyu" yi nang ri thougtheung yooboo koid yoomo nyangnu" gi nyangnu" da" gyivoo lo, moo soem" byug thang: ri nyangnu" re" jang" khyoo: doem lheing: lo wigi yooboo khyoid byid: wa shid re" he: Noku Yhoem: Moo" khyoo: re" lho: khyo' nyhoem: ziyo' re" jang" moo akyu" mho' uri

³⁴Nyangnu" ri mougkhung: mo tam" gyoo: byid: we' o". Re" byumyu" yi da" yooboo ri khyoid pyam byid: lho: nang nyangnu" phoug" phyid" yiri byid: bye: da" mougmyid khyoo: nyangnu" ri doem shu" yu we' o".

³⁵Re" byumyu" yi nang ri thougtheung yooboo koid yoomo nang moug: ri avoo nhang: thang: ri nyangnu" nung myid yo" wigi he: Noku Yhoem: Moo" khyoo: myonhoo: shu: lho: khyo' nyhoem: ziyo' re" jang" moo: akyu" mho' uri

³⁶nyangnu" ri mougkhung: mo tam" gyoo: byid: we' o". Israela khokham yo' byumyu" yi da" yooboo ri khyoid pyam byid: wigi jo da" ziri yo" koid wa shid re" nyangnu" ri jhau" byid: wa o". Houg: lho: O" ASEING we"- nang re" byumyu" yiri byid: to" da" apyaid atoo: seing: mougmyid nghoid da" he: re" mougmyid moo: moug: voo nhang: we' o".

³⁷«Hau: meing: moo phang" khoug gyo" uri anghoid lang" lang: yoem" gyo" anghoid lang" lid ngi" wigi lhu: shoin' pyam da" gug shi" mei: shi" anghoid lang" jhenkhyeug phung: moo" dang: yen" anghoid lang" re" byumyu" yiri nyangnu" gyivoo wigi zain: lo uri anghoid lang" noo phyoo" shoug" uri anghoid lang" nyangnu" no nyid uri

³⁸nyangnu" da" akyu" mho' dang: ri tam" gyoo: byid: we' o". Re" Israela byumyu" hang" nghoid loug we' nyangnu" nheig koug nheig nge ziyo' he: Noku Yhoem: Moo" khyoo: lo, tu: yeing to" lho: akyu" mho' nghoid rigi

³⁹nyangnu" akyu" mho' dang: ri tam" gyoo: byid: we' o". Re" mougkhung: mungdain: yhoem: mo nyangnu" ri tam" gyoo: byid we' yooboo khyoid byid we' nyangnu" ri pang" thoug we' o". Nang dayug za: byu da" nheigloem: moo myid soin' nyid ziri yo" se' da:. Yugkhang" moo" gi nyang: nya: koid da" moo" yo' dayhang: ti" shoug" kham zoo: baja" o".

⁴⁰Houg: lang" ngoonu" da" phoug" phyid" joem ri byid: to" da" meing: moo: nyangnu" nyid nyid da" ayo, dangain" moo re" byumyu" yi nang ri tam" gyoo: nyid boem wa zi nghoid.

⁴¹Re" myeing gyi: khyoo: yo' re" byumyu" yi shid re" nang koid bye: da" gyi: sheung: moo" zoo" joem ri moug: vi: moo nyid da" tungbau byu shau" gyo: wigi re" jang" khyoo: re" lho: he: Noku Yhoem: Moo" moo akyu" re" mho' uri

⁴²

⁴³nya: akyu" mho' dang: ri tam" gyoo: byid: we' o". Mougkhung: mungdain: mo nang nyid joyoo mo nyang: ri tam" gyoo: byid: wigi koid wa shid re" nang ri mho' yoid lo da" ziri koid byid: we'. Houg: lang" mougmyid tho' mo byumyu" yi dangain" gi re" Israela byumyu" yi koid ziyo' dayhang: ti" nang ri se' lo wigi nang ri tam" gyo: loo goo" wa nghoid. Hau: thang: nyangnu" gi he: joyoo moo nang ri noku wa shid re" he: Noku Yhoem: Moo" ri ngoo koid too" bye: ziri si' go" wa zi nghoid.

⁴⁴Nang gi re" byumyu" yiri nyangnu" gyivoo ri yhe: thougtheung zain: wa shid re" amyeing" byid: lho: nang khyen: byid: wigi re" shid re" ngoo koid too" byid: bye: da" he: Noku Yhoem: Moo" jo, da" voomoo" khyoo: myonhoo: shu: lho: nyangnu" nyid joyoo mo nang ri akyu" mho' uri

⁴⁵nyangnu" mho' da" akyu" mho' dang: ri tam" gyoo: byid: we' o". Nyangnu" ri mougkhung: mo tam" gyoo: byid: wigi nyangnu" ri oung: doid khyoo: byid: we' o".

⁴⁶Re" byumyu" yi nang ri yooboo koid wa nghoid. Hid moo dayug we' yooboo akoid zi anyid wigi nang nheig yo: ziyo' nyangnu" ri nyangnu" da" gyivoo yi oung: pyam nhang: wigi nyangnu" ri gootu: mung" khyoo: join joem khyo" shu" lo" lho: hau: mung" gi gye ve: zi nghoid loug we'

⁴⁷Re" byumyu" yi da" akyu" mho' dang: ri tam" gyoo: byid: la o". Nyangnu" khayhi' yooboo koid wigi akhyeing" ashoeb bue" nyid nghoid loug we' hau: mung" moo nyangnu" nung myid yo" wigi re" jang" moo akyu" mho' uri o" ASEING we" nyangnu" da" akyu" mho' dang: ri tam" gyoo: byid: we' o".

⁴⁸Hau: mung" moo nyangnu" gyeing" nyang: nheigloem: phyu: ziyo' nung myid yo" wigi ngoonu" da" phoug" phyid" ri byid: too" bye: da" he: mung" khyoo: myonhoo: shu: lho: nang khyen: too" bye: da" he: voomoo" yo' re" shid re" ngoo koid too" bye: da" he: Noku Yhoem: Moo" khyoo: nang ri akyu" mho' uri

⁴⁹nyangnu" da" akyu" mho' dang: ri tam" gyoo: byid: we' o". Mougkhung: mungdain: re" yhoem: mo nyangnu" ri tam" gyoo: byid: wigi nyangnu" ri nheig khyeug shoo" myen: shi" we' o".

⁵⁰Nyangnu" yooboo dangain" yo' nang ri gyi koid thougtheung khyoo: dangain" ri yooboo khyoid byid: wigi nyangnu" da" gyivoo yi nyangnu" ri nheig khyeug shoomyen: loo nhang: we' o".

⁵¹Nyangnu" gi Egutu mung moo dab nyid da" myithoem" mo nang shu" thu lo da" nanya: byumyu" nghoid da:.

⁵²Myhang: thang ASEING we" re" byumyu" Israela yo' nyangnu" da" khokham phoo ri nheig dab ziyo' khanham we' yu" nyid wigi bo pang" wa shid re" nyangnu" nang ri mho' yoid lo da" uri khanham we' nyangnu" akyu" mho' dang: ri tam" gyoo: byid: we' o".

⁵³Ngoonu" da" phoug" phyid" yiri Egutu mung" mo nang shu" lo uri re" dei zoo: Moshe khyo" wigi nang nyangnu" ri tid bye: ziyo' dayhang: ti" re" byumyu" bui" wa shid re" byumyu" dangain" jang" mo nang nyangnu" ri khyen: yu bye:.

⁵⁴Sholumon gi ASEING jang" moo akyu" bain mho' lang" phoin: shidkhoin" moo poid thug thug lho: lo, tu: yeing to" jang" mo to' yab bye: da:.

⁵⁵Houg moo: zoeb foem: nyid da" byumyu" yi dangain" mo, shid re" thui: zeing yo' Mangso da" mainkaid jeju" ri mho' bye:. Nyang: mho' zigi

⁵⁶«Nyang: dangsoo" to" to" ziyo' dayhang: ti" nya: byumyu" yiri myenjham" khyoo: byid da" ASEING ri coung" ge' o". Nya: dei zoo: Moshe khyo" wigi jang deung too" byid: da" ge da" dangsoo" dangain" ziri nyang: pyeing byid: bye:.

⁵⁷Ngoonu" da" phoug" phyid" yi yo' dage" nyang: nyid nyid ziyo' dayhang: ti" ngoonu" ASEING Mangsoo gi ngoonu" yo' dage" nyid nyid baja" o". Nyang: ngoonu" ri khanham we' atoo" khoo' ashe: pyam baja" o".

⁵⁸Nyang: ngoonu" da" phoug" phyid" ri byid: to" da" tarha" yo' amyeing" dang: dangain" ri cang nyid wigi nya: dang: ri tam" gyoo: wa khyo" nyhang" ri nyang: koid baja". Houg: lang" nyang: ngoonu" ri kangso' dei nhang: nau: khyo" ngoonu" kangso' yo" dei nyid wa zi nghoid.

⁵⁹He akyu" mho' dang: yo' ngoo nyang: ri mho' yoid da" dang: joem ri ngoonu" da" ASEING Mangsoo gi ayo, dangain" moo myid boin: nyid baja" o". Nyang: gi Israela byumyu" yi yo' nyangnu" khokham phoo ri nyid" khang" nyid" nyangnu" ca" nyid ziyo' dakhyoo" ti" khanham we' nheig myen: shoo" gyoo: baja" o".

⁶⁰Houg: yoomo mougmyid mo mungdain: dangain" gi ASEING dayug kyeing" Mangsoo nghoid khyoo: gootu: anyid khyoo: ri si' wa zi nghoid.

⁶¹Nya: byumyu" yi nghoid da" nanu" we' akhid" nyid" koid yhang: ti" nya: tarha" yo' amyeing" joem ri tam" gyo: cang yhe: wigi ngoonu" ASEING Mangsoo ri khanham we' dang: zung" nyid baja" o".

⁶²Hau: thang: khokham Sholumon yo' byumyu" yi dangain" gi ASEING ri xoin" ngei" byid: boem ago".

⁶³Nyang: gi zoem" khau: xoin" khyo" nuloo: 22,000 yo' yang 120,000 du: ri ngei" byid: da:. Houg: lho: khokham phoo yo' byumyu" yi dangain" bang: gi Noku Yhoem: Moo" ri shug byid: yhoem: vang pui koid boem bye:.

⁶⁴Hau: nyid" ri nyang: Noku Yhoem: Moo" shidkhoin" vang" khyam: agung joyoo ri ab byid: wigi hau: thang: nyang: gi hau: joyoo moo: du: goin" nghe' ngei" xoin"- shivoo: xoin"- zoem" khau: xoin" shid re" gougnyhoug xu: ri ngei" byid: bye:. Nyang: hidsu" koid zigi gyid: mid" phoin: gi he: xoin" dangain" shid re" sung ngi yoomo nghoid.

⁶⁵Noku yhoem: moo Sholumon yo' Israela byumyu" yi dangain" bang: gi nyhed nyid" nyang: zoem" pui" koid ago". Houg moo: mougzhung: shoid Hemad mougkyoo" mo zi mougpyi: shoid Egutu mung" mougkyoo" ju" sho' mo da" byumyu" phung: moo" zeing re" ju" zeing: foem: boem ago".

⁶⁶Shed nyid" nyid" ri Sholumon gi byumyu" yiri yhoem: khyoo: nhang: kaid bye:. Nyangnu" dangain" we' nya: deizoo: David yo' nya: byumyu" Israela ri ASEING mainkaid byid: yoomo nyang: ri coung" lho: yhoem: khyoo: ngei pyo: tung" lo" boem bye:.