Read Lashi 1 KHOKHAM 9 Bible Online

1 KHOKHAM 9 - Lashi bible

1 KHOKHAM 9

¹Khokham Sholumon gi Noku Yhoem: Moo" we' khokham kho" we' nyang: koid nau da" yhoem: joem dangain" ri we' bain koid thang: ri

²Gibeon moo nyang: ri thu shug yhang: ti" nyang: ri ASEING doem thu shug bye:.

³ASEING gi nyang: ri «Re" akyu" mho' dang: ri ngoo shau" gyo: bye:. Apyaid atoo: ngoo ri noku wa da" joyoo ein: da" he: nang koid bye: da" Noku Yhoem: Moo" ri ngoo younglho' nhang: bye:. Ngoo hau: ziri zung" nyid wigi ayo, dangain" moo goem loem byid: nyid wa nghoid.

⁴Nang gi re" phoo David koid yhang: ti" ngoo ri deungmain" ziyo' nheigloem: ge khyo" dei byid: wigi nga" tarha" joem yo' ngoo nang ri amyeing" byid: da" gu: dangain" ri koid pyeing nghoid rigi

⁵Ngoo re" amyed ashen yiri khanham we' Israela mung" ri vhoebkhang" nhang: wa shid re" re" phoo David ri dangsoo" byid: to" ziyo' dayhang: ti" hau: dangsoo" ri ngoo cang pyeing wa zi nghoid.

⁶Nghoid loug we' nang yo' re" amyed ashen yi nga" thang: khyoo: acang loo: za: ngoo nang ri byid: to" da" tarha" joem yo' amyeing" joem ri atam" gyoo: loo: gootu: yu phara" joem ri no' nghoid rigi

⁷Ngoo nyangnu" ri byid: too" bye: da" he: mungdain: mo nga" byumyu" Israela bang: ri pyoung" shu" pyam wa zi nghoid. Ngoo ri noku wa da" joyoo ngoo khab yu too" bye: da" he: Noku Yhoem: Moo" ri we' ngoo she: pyam pyam wa zi nghoid. Khyi' khang" moo" moo nyid da" byumyu" yigi Israela byumyu" yiri aphoug" akhyoid koid ziyo' anoug ashoo" koid goo" wa zi nghoid.

⁸He: Noku Yhoem: Moo" gi byo, yoin" boem lho: hau: anam khyo" lid loo" bang: yugkhang" moo" gi dain lho: mau" ziyo' ‹ASEING gi he: mungdain: ri we' he: Noku Yhoem: Moo" ri we' ciwim yoomo hid su" koid pyam la'› ga: nyangnu" myid: goo" wa zi nghoid.

⁹Byumyu" yi gi ‹Hid su" bue" zigi nyangnu" phoug" phyid" ri Egutu mo shu" thu lo da" nyangnu" ASEING Mangsoo ri she: pyam yoomo nghoid. Nyangnu" gi gootu: yu phara" joem thang: khyoo: cang wigi nyangnu" ri no' da:. He: zigi nyangnu" atho' moo: ASEING gi ciwim wigi he: yau: khe" kyi" khyeug ri byid: ein: da" khyoo: nghoid›» ga: doem phoug tid wa zi nghoid.

¹⁰Sholumon gi Noku Yhoem: Moo" yo' nya: khokham kho" ri eig xi: zain akhyeing: ayo, yu lho: koid too" bye:.

¹¹Turu khokham Hiram gi he: moo" zoo" moo ci: ca" da" shamu thi" yo' shithang: dangain" yo' sheing: dangain" ri nyang: vho: nhoo' byid: bye:. Hau: moo" zoo" bain thang: ri khokham Sholumon gi Hiram ri Galile moug: mo voomoo" eig xi: ri byid: bye:.

¹²Hiram gi hau: voomoo" joem ri yhe: cang yu" ri hau: joem ri ayu" vhoo: nghoid da:.

¹³Houg: yoomo nyang: gi Sholumon ri «Nga" mang: we"- nang ngoo ri he: voomoo" joem she' dabyid: nhung: lha"» ga: tid. Hau: khyoo: yoomo joyoo hau: ziri Khabula ga myheing too" shi" da:.

¹⁴Hiram gi Sholumon jang" khyoo: sheing: wim tain: koo: foin: byid: da:.

¹⁵Khokham Sholumon gi Noku Yhoem: Moo" koid moo" zoo" khokham kho" koid moo" zoo" voomoo" bidthu shoid moo myidzhoo" du: pyeing moo" zoo" yo' voomoo" vang khyam: kyam' moo" zoo" moo vhookung: yoem: yo' koid loo bye:. Nyang: gi Hazora- Megido- yo' Gezera voogung joem ri we' doem so' koid bye:.

¹⁶(Egutu khokham gi Gezera voomoo" ri zain: wigi voobyu yiri said- voomoo" ri myi: nghe' ziyo' seing: yu bye:. Hau: thang: nya: myiyi: zoo: Sholumon yo' lo, xo' uri lo, xo' jhungshug khyo" hau: ziri byid: wigi

¹⁷Sholumon hau: ziri doem so' koid zi nghoid.) Sholumon gi nya: vhookung: yoem: yo' Yuda mung" kyoem: khoug: mo Bed Horon vho: du- Balad yo' Tama ri we'

¹⁹Nya: da" pang" thoug jonu" to" to" da" voomoo" joem nya: myang: yo' gyi myang: rheing" ri to" to" da" voomoo" joem Yerusalem yo' Lebanon moo nyang: koid nau gu: dangain" yo' nya: mung" mo joyoo khang" mo" moo: doem koid bye:.

²⁰Sholumon gi Khanan byumyu" amyed ashen yiri nya: vhookung: yi khyo" ci: da:. Houg bang: gi Israela byumyu" yi Khanan mung" ri lo seing: yu uri asaid pyam lho: teing too" bang: nghoid. Houg moo: boo bang: gi Amori- Hiti- Perizi- Hivi yo' Yebusi bang: nghoid wigi hau: byumyu" amyed ashen yiri akhid" nyid" ju" sho' join koid nhang: nyid boem ago".

²²Sholumon gi Israela byumyu" yiri join akoid nhang: nghoid da:. Nyangnu" rigi nya: da" gyizoo: yi moo" voin bang:- zoug: yi myang: rheing" koin" bang: yo' myang: jui: bang: khyo" dei zoo: yi koid nhang: da:.

²³Sholumon da" yhoem: koid voo tam moo" aja: ja: moo moo" zei: vhookung: yiri gung" wa da" moo" voin bang: 550 yug nghoid da:.

²⁴Sholumon gi nya: yhoem: seing: myhi' nghoid da" Egutu khokham myiyi: zoo: ri David voomoo" mo zi nya: shid re" koid too" byid: bye: da" khokham kho" khyoo: thoid lo" thang: ri voomoo" bidthu shoid moo myidzhoo" du: boem" bye:.

²⁵Sholumon gi ASEING shid re" nyang: koid to" da" phoin: tho' moo: nghe' ngei" xoin" yo' zoem" khau: xoin" joem ri dazain ri soem" lheing: lheing: koid da:. Nyang: gi ASEING ri nam pyo: ja: ri we' nghe' ngei" byid: bye:. Hougsu" khyo" nyang: gi Noku Yhoem: Moo" ri bain koid bye:.

²⁶Khokham Sholumon gi Edom mung" Thoem" Ni gyid yam Elad voomoo" nam mo Eziongebera moo: gyid sangphoo myoo" sho' we' zhug to" da:.

²⁷Khokham Hiram gi nya: sangphoo phung: mo panglai: moo thung" shoug" khyoo: myoo bye: da" byu dayham" ri Sholumon da" byu yi yo' moo" dage" zei: wa shid re" nhang: kaid bye:.

²⁸Nyangnu" gi Ophira mung" khyoo: sangphoo zhung: yhe: wigi Sholumon jang" khyoo: sheing: daxe: khyug tain: koo: tho' loo byid: ago".