Read Lashi 2 KHOKHAM 10 Bible Online

2 KHOKHAM 10 - Lashi bible

2 KHOKHAM 10

¹Samari voomoo" moo Ahab da" amyed ashen yi nyhed xi: yug nyid ago". Yehu gi mougsoug" dakhyab lhid" lho: hau: da" yang: je: joem ri voomoo" mo vhoebkhang" bang: ri byumyu" yi da" vhujhung: yiri Ahab da" amyed ashen yiri gung zung" bang: ri foin: kaid byid: da:. Mougsoug" moo

²«Nanu" gi khokham pho da" amyed ashen yiri vhu" she: da" bang: nghoid yoomo gyi myang: rheing"- vang khyam bo da" voomoo" joem nanu" yo" ago". Houg: yoomo nanu" he: mougsoug" yo" yu yo'

³Khokham da" amyed ashen yi mo ge thang da" su: ri nanu" khyen: yu lho: nyang: ri khokham koid nhang: ge'. Nyang: ri goem loem byid: ge'» ga: bo da:.

⁴Samari moo vhoebkhang" bang: gi gyoug boem ago". Nyangnu" gi «Khokham Yoram yo' khokham Ahazia lang" gyi ayo" koid rigi ngoonu" gi Yehu ri khasu" gyi yo" koid wa la"» ga: boem ago".

⁵Houg: yoomo khokham kho" mo vhujhung: phoo- voomoo" mo gyizoug:- byumyu" vhujhung: yi goem loem gyizoo: yigi dage" za: Yehu ri «Ngoonu" gi re" dei zoo: yi nghoid. Nang tid zi ce: ja: ri we' koid wa ngoonu" jen" jen" nghoid. Nghoid loug we' ngoonu" gi khokham hang" ri we' akoid nhang: wa. Nang je ge ga: myid da" ja: ciri nghoid nghoid koid we'» ga: da" he: mungdang: ri pyeung: kaid ago".

⁶Yehu gi mougsoug" gootu: dakhyab nyangnu" ri doem lhid" foin: kaid da:. Hau: zigi «Nanu" nga" shoid dab bang: nghoid wigi nga" amyeing" dang: ri cang wa jen" jen" nghoid boem rigi Ahab da" amyed ashen yi vhuloem joem ri nab yo nyid" he: ayo, moo Yezrela khyoo: nga" jhang ci: ri" ge'» ga: bo da:. Khokham Ahab da" amyed ashen yi nyhed xi: yug bang: gi nyangnu" ri shu" gyi: lo boem da" Samari mo byumyu" vhujhung: yi yu" coung: da" akhoug: moo nyid boem ago".

⁷Yehu da" mougsoug" ri shoug" yu boem yo' Samari mo vhujhung: yigi Ahab da" amyed ashen yi nyhed xi: yug goin" ri said pyam lho: houg bang: vhuloem joem ri gyoin joem moo kaid wigi hau: ziri Yezrela moo nyid da" Yehu jhang foin: kaid ago".

⁸Ahab da" amyed ashen yi da" vhuloem joem ci: ju" loo bye: khyoo: Yehu ri tid kyoo" lang" nyang: gi hau: joem ri voomoo" khoem" moo" duang: moo eig boem boem to" lhoo: hau: joem ri thang: nyid" nab soin: ju" sho' to" too" wa amyeing" byid: da:.

⁹Nab soin: ri nyang: gi khoem" moo" duang: khyoo: yhe: lho: houg moo nyid boem da" voobyu yiri «Khokham Yoram ri thougtheung lho: nyang: ri said pyam su: ngoo nghoid. Hau: shid re" yoovoin nanu" moo aboo. Nghoid loug we' he: bang: dangain" ri hang" said pyam la'.

¹⁰Ahab da" amyed ashen yi yo' sen: wigi ASEING tid to" zi ja: khang" moo" joeb byeung" ri" wa ga: ziri he: zigi sagse: ci: shug byid: da:. ASEING gi nya: Lapi: Elia da" nhoid khyo" nyang: dangsoo" byid: to" ziri koid zi nghoid da» ga: tid da:.

¹¹Hau: thang: Yehu gi Yezrela moo nyid deing shi" da" Ahab da" bidnoem yi gootu: dangain" nya: gyizoug: dangain"- jhang da" bidnoem byencang" yi yo' khainjung yi dangain" ri we' said pyam da:. Houg bang: mo dayug ri we' ateing too" nghoid da:.

¹²Yehu gi Yezrela mo thu yhe: lo" wigi Samari khyoo: yhe: da:. Khyoo: laid moo «Yang zung" bang: da" dab» ga: myheing da" joyoo moo

¹³nyang: gi Yuda khokham Ahazia da" bidnoem dayham" yo' shoug" lho: nyangnu" ri «Nanu" hang" bang: nghoid go" lha"» ga: myid: da:. Nyangnu" gi «Ahazia da" bidnoem yi nghoid. Ngoonu" gi khokham myhi' Yezebela da" zooshang: yiri yo' deing da" khokham yhoem: byu yiri ngoonu" yhe: phau" myang: byid: wa shid re" Yezrela khyoo: yhe: lo" nyid boem zi nghoid» ga: phug tid ago".

¹⁴Yehu gi nya: byu yiri «Houg bang: ri adei myheig yu ge'» ga: amyeing" byid: da:. Nyangnu" gi houg bang: ri myheig yu ago". Nyang: gi hau: anam moo jo, da" duang: khuang" daloem: moo houg bang: dangain" ri said zei pyam da:. Dangain" myid: xe: eig yug nghoid lho: nyangnu" mo dayug riwe' ateing too" nghoid da:.

¹⁵Yehu gi doem xo' yhe: lo" lho: khyoo: laid moo Rekhab da" yuggi zoo: Yonadab wigi re" tau yu da:. Yehu gi nyang: ri u" lho: «Nang yo' ngoo myid zi du da:. Nang ngoo ri pang" thoug wa rhe"» ga: tid. Yonadab gi «Ngoo pang" thoug wa» ga: tid da:. Yehu gi «Houg: lang" ngoo ri re" lo, yhoin" kaid we'» ga: tid da:. Nya: eig yug gi lo, zei: zei: wigi Yehu gi gyi myang: rheing" khyoo: bo pang" she: to' yu da:.

¹⁶«Ngoo yo' dage" re" wigi ngoo ASEING ri khayhi' noku coung" su: nghoid ziri nang nyang: re" yu" we'» ga: tid da:. Houg: lho: nya: eig yug dage" Samari khyoo: yhe: lo" ago".

¹⁷Nya: eig yug houg khyoo: ju" yhi: lang" Yehu gi Ahab da" bidnoem dangain" ri dayug ri we' ateing too" loo: said pyam da:. He: zigi ASEING wigi Elia ri tid to" da" khyoo: joem bue" lo zi nghoid da:.

¹⁸Yehu gi Samari byu yiri khe: zheing" yu lho: «Khokham Ahab gi Bala ri dajhi' za: dadei byid: da:. Nghoid loug we' ngoo gi nyang: ri je wigi dei byid: wa.

¹⁹Bala Lapi: yi dangain"- nyang: ri no' bang: dangain" yo' nya: khainjung yi dangain" ri khe: zheing" ge' dayug we' age theing: nyid. Ngoo gi Bala ri xoin" gye" gyi: zi ngei" byid: wa. Houg: lho: aju" re" yug ri said pyam wa» ga: tid da:. (Yehu gi Bala ri no' bang: dangain" ri said pyam nau yoomo nyang: phajhi" khyau" zi nghoid da:.)

²⁰Houg: lho: Yehu gi «Bala ri no' da" bidnyid ein: tid fu" ge'» ga: amyeing" byid: da:. Hau: tid fu" wa dang: ri lhid" lho:

²¹Yehu gi Israela mung" goin" khyoo: goem sho' tid fu" nhang: kaid da:. Bala no' bang: dangain" ju" re" ago". Nyangnu" moo dayug we' adeing loo sho' ju" re" ago". Nyangnu" dangain" bang: Bala noku yhoem: khyoo: vang yhe: lho: houg moo byeung" sho' yhe: nyid boem ago".

²²Hau: thang: ri Yehu gi gyeung" shang: byisheing: yo' sen: da" vhujhung: pho khainjung ri byisheing: joem ri ci: thu loo nhang: wigi hau: ziri noku ku" bang: ri byid: da:.

²³Hau: thang: ri Yehu nyang: Rekhab da" yug gi zoo: Yonadab yo' dage" noku yhoem: khyoo: vang yhe: lho: houg moo nyid boem da" byu yiri «Bala ri no' bang: za: re" nyid boem wigi ASEING ri noku bang: hang" we' are" ziri si' ge'» ga: tid da:.

²⁴Hau: thang: nyang: yo' Yonadab gi Bala ri xoin" yo' nghe' ngei" xoin" to' byid: wa vang yhe: lo" da:. Nyang: gi noku yhoem: tunggung moo byu shid xi: yug nyhid: to" wigi «He: byu yi dangain" ri nanu" said pyam ge' houg bang: mo dayug yug ri loid loo" nhang: da" yug hang" nghoid loug we' hau: shid re" nya: kangso' byid: pyam ca" wa» ga: tid to" da:.

²⁵Yehu gi xoin" ri bain ngei" yo' dage" nyang: gi zung" bang: ri yo' gyizoug: yiri «Vang yhe: wigi dangain" ri said pyam ge' dayug ri we' aloid byoin nhang:» ga: tid da:. Nyangnu" gi shamcoin" ci: vang lo" wigi houg bang: dangain" ri said pyam ago". Houg: lho: manggung ri tunggung shoid khyoo: she: thu to" ago". Hau: thang: nyangnu" gi noku yhoem: akhoug: shoid mo gyeung" shang: joyoo khyoo: vang yhe: wigi

²⁶Houg moo jo, da" young" gyeing" zeing bung: ri dang thu re" wigi houg moo nghe' pyam ago".

²⁷Houg: yoomo nyangnu" gi yung" gyeing" zeing bung: yo' noku yhoem: ri phyo' shoin' pyam lho: hau: noku yhoem: gi nghi: yhe: joyoo bue" byug da:. Hau: zigi akhid" nyid" ju" sho' jo, jo, da:.

²⁸Hau: zigi Israela mung" mo Bala no' ziri Yehu wigi khasu" shoem" pyam ein: da" khyoo: nghoid da:.

²⁹Nghoid loug we' nyang: gi Bethela yo' Dan moo Yeroboam zhug to" da" sheing: nu: nu" lhoo: joem ri no' byid: da" khyo" Israela byu yiri yooboo shu" koid da" khokham Yeroboam da" yooboo ri leig yu" yu da:.

³⁰ASEING gi Yehu ri «Ahab da" amyed ashen yiri ngoo nang ri koid nhang: nau gu: ja: khang" moo" ri nang koid abye:. Houg: yoomo re" byuxeig myid: xeig ju" sho' Israela khokham koid loo goo" wa ein: nang ri ngoo dangsoo" byid: da» ga: tid da:.

³¹Nghoid loug we' Yehu gi Israela ASEING Mangso da" tarha" ri nya: oungkhoug: nheigloem: dangain" yo' acang atam" gyoo: nghoid da:. Hau: gungthid- nyang: gi Israela byu yiri yooboo shu" shoid su: Yeroboam da" leig ri cang da:.

³²Hau: ayo, moo ASEING gi Israela mougmyid ri nge loo" nhang: da:. Suri khokham Hazaela gi Yodan gyid lang bidthu shoid mo Israela mougmyid dangain"- Mougpyi: shoid Arnon gyid lang nam moo jo, da" Aroera voogung ju" sho' he: zigi Gilead yo' Bashan mougmyid dangain" bo nyid da:. Houg moo: Gad- Ruben- bid thug shoid Manashe byumyu" kung: yi nyid da" mougmyid joem ri oung: yu pyam ago".

³⁴Nya: da" Sarhi' moo" joem bo nyid wigi Yehu koid da" gootu: ja: khang" moo" ri Israela khokham yi mhoomyid: shen" dam pug moo: lhid" xoem" to" ago".

³⁵Nyang: gi shid: lo" wigi Samari moo myhoeb pyam ago". Nya: yuggi zoo: Yehoahaza gi nya: khoo: moo: khokham xo' koid da:.

³⁶Yehu gi Israela khokham khyo" Samari moo eig xe: shed zain vhoebkhang" da:.