Read Lashi 2 KHOKHAM 11 Bible Online

2 KHOKHAM 11 - Lashi bible

2 KHOKHAM 11

¹Khokham Ahazia da" nya: myhi' Athalia gi nya: yuggi zoo: ri said pyam ziri si' yo' dage" nyang: gi khokham ikoin deungkhu: byu dangain" bang: ri said pyam wa shid re" amyeing" byid: da:.

²Ahazia da" yuggi zoo: Yosha dayug kyeing" phang: loid lo" byug da:. Nyang: ri goo" bang: yo' dage" alug said pyam zi shau" da:. Nghoid loug we' khokham Yehoram da" myiyi: zoo:- Ahazia da" nya: nhung" nghoid da" nya: nid Yehosheba wigi khyoid yu to" da:. Nyang: ri said pyam ashau" wa shid re" nyang: ri shu" yu wigi Noku Yhoem: Moo" mo yhoeb yab khyoo: shu" vang yhe: lho: Athalia amyang sho' yhe: shoung: to" da:.

³Yehosheba gi yuggi nu" ri khyug zain yu" coung: lho: Athalia khokham myhi' khyo" vhoebkhang" da" ayo, gyoo: moo Noku Yhoem: Moo" moo nyang: ri nyhid: to" da:.

⁴Nghoid loug we' nyhed zain ein: zain ri khainjung Yehoada gi khokham kho" kang: zung" da" gyizoug: yi yo' khokham kho" zung" bang: ri Noku Yhoem: Moo" khyoo: ri" wa shid re" nyangnu" ri tid nhang: kaid da:. Houg moo nyang: gi nyang: koid wa soin' to" da" moo" ri jham' tang: wigi nyangnu" yo' myid veing" khyoo: koid da:. Nyang: gi khokham Ahazia da" nya: yuggi zoo: Yosha ri nyangnu" jhang toin" shid byid: da:.

⁵Houg: lho: vhoo: mo amyeing" dang: joem nyangnu" ri byid: da:. Hau: zigi «Dougno: Bidnyid moo moo" khyo" nanu" ju" ri" lang" nanu" soem" boem mo daboem gi khokham kho" ri zung" ge'.

⁶Gootu: daboem gi Sura khoem" moo" duang: moo zung" ge'. Gootu: daboem bang: gi khoem" moo" duang: nungthang- gootu: daboem phung: bang: da" thang: moo zung" ge'

⁷Dougno: Bidnyid moo moo" eung: da" eig phung: gi Noku Yhoem: Moo" mo khokham ri goem loem byid: ge'

⁸Nanu" gi shamcoin" ri she: ci: wigi khokham Yosha ri zung" lho: nyang: khayoo: loo" khayoo: nyang: yo' dage" nyid ge'. Nanu" jhang tab re" da" hang" ri we' said pyam ge'» ga: zi nghoid da:.

⁹Gyizoug: yigi Yehoiada tid da" dang: ri tam" gyo: ago". Houg: lho: Dougno: Bidnyid moo moo" aeung: bang: yo' moo" eung: bang: nghoid boem da" nyangnu" byu yiri nya: jhang shu" re" lo ago".

¹⁰Nyang: gi gyizoug: yiri khokham David seing: yu" da" lham: yo' goo joem ri byid: wigi Noku Yhoem: Moo" moo nyhid: to" da:.

¹¹Khokham ri goem loem wa shid re" nyang: gi shamcoin" ci: da" bang: ri Noku Yhoem: Moo" shidkhoin" lheing khoem moo nyhid: to" da:.

¹²Hau: thang: Yehoiada gi Yosha ri shu" thu lo lho: nya: vhuloem moo bidmug zhung" byid: da:. Houg: lho: khokham yi cang wa da" tarha" mougsoug" dapug nyang: ri byid: to" da:. Hau: thang: Yosha ri khokham mainkaid xu: joid byid: lho: khokham khyo" tid fu" kaid da:. Byu phung: yigi lo, pyug pyug wigi «Khokham phoo kang: sheing: baja" o"» ga: nyho: boem ago".

¹³Khokham myhi' Athalia gi goem loem bang: yo' byu phung: yi lu: fu: go" nyid thui: ri shoug" gyoo: yoomo nyang: gi byu phung: yi zeing: foem: nyid da" Noku Yhoem: Moo" khyoo: hain: hain: yhe: lo" da:.

¹⁴Nyang: gi thung" khyo" khokham seig gi Noku Yhoem: Moo" yhoem: pain' zeing bung: nam moo yab jo, ziri yhe: myang da:. Nyang: ri gyizoug: yi yo' laboo" moid bang: lheing khoem to" wigi byumyu" yi dangain" bang: gi ngei pyoo: tung" nyho: wigi laboo" joem moid nyid boem. Athalia gi nheigloem: thang ziyo' nya: byimi ri lang: ceig pyam wigi «Gyi voo o"- Gyi voo o"» ga: nyho: da:.

¹⁵Yehoiada gi Athalia ri Noku Yhoem: Moo" joyoo moo anau said pyam yoomo nyang: gi gyidab mo gyizoug: yiri «Nyang: ri zung" bang: agyoo: moo shu" thu loo" we'. Nyang: ri khyoid yu wa soin' su: hang" ri we' said pyam ge'» ga: amyeing" byid: da:.

¹⁶Nyangnu" gi nyang: ri myheig yu lho: khokham kho" khyoo: shu' yhe: wigi myang: khoem" moo" duang: moo nyangnu" gi nyang: ri said pyam ago".

¹⁷Khainjung Yehoiada gi khokham Yosha yo' mung" byu yiri nyangnu" ASEING da" byumyu" yo" bue" wa shid re" ASEING yo' dang: theing koid to" da:. Nyang: gi mung" byu yi yo' khokham agyoo: moo we' dang: theing to" da:.

¹⁸Hau: thang: mung" byu yigi Bala noku yhoem: khyoo: yhe: wigi hau: ziri phyo' khyo' pyam ago". Nyangnu" gi phoin: joem yo' yu phara" soolhoo: joem ri we' baid kho' pyam da:. Phoin: joem shidkhoin" moo Bala khainjung Mattan ri said pyam ago". Yehoiada gi Noku Yhoem: Moo" moo goem loem bang: nyhid: to" da:.

¹⁹Hau: thang: nyang: we' gyizoug: yi khokham kang: zung" su:- khokham kho" zung" bang: we' khokham phoo ri Noku Yhoem: Moo" mo zi khokham kho" khyoo: zung" lho: shu" lo" da:. Mung" byu dangain" bang: we' cang lo da:. Yosha gi lhoug zung" khoem" moo" duang: khyo" vang lo" wigi khokham zhungtang moo joyoo lo" yu da:.

²⁰Mung" byu yi dangain" bang: ngei pyo: nheugdeug ago". Voomoo" gi meing: dam jo. Ciwim gari: akhid" Athalia gi khokham kho" moo said pyam shau" da:.

²¹Yosha gi apyaid nyhed zain moo Yuda khokham bue" lo da:.