Read Lashi 2 KHOKHAM 12 Bible Online

2 KHOKHAM 12 - Lashi bible

2 KHOKHAM 12

¹Israela khokham Yehu vhoeb zi nyhed zain ein: zain moo Yosha gi Yuda khokham bue" lo da:. Nyang: gi Yerusalem moo myid: xi: zain vhoeb da:. Nya: myhi' gi Berasheba voomoo" mo Zibia nghoid da:.

²Nyang: gi nya: pyaid goin" ASEING vho: ngei da" moo" ri koid da:. Ciwim gari nyang: gi khainjung phoo Yehoiada da" jhoug" shed yoomo nghoid da:.

³Houg loug we' tungbau yu phara" ri no' da" joyoo joem ri aphyo' shoin' pyam wigi mung" byu yigi houg moo xo' wigi xoin" yo' shoem: nam pyo: ja: ri nghe' ngei" ago".

⁴Yosha gi khainjung yiri khe: yu wigi Noku Yhoem: Moo" moo xoin" ngei" byid: ziyo' sen: wigi main: main: too" byid: da" xoin" shid re" aphau" yo' myid boo yoomo byid: da" jhungshug khyo" ngei joem ri yung: yu wa shid re" amyeing" byid: da:.

⁵Khainjung yugkhang" moo" gi nyang: shugbyid: da" ngei ri ci: ri" wa shid re" yoovoin yo" ago". Houg: lho: hau: ngei ri ci: ri" ca" khyo" Noku Yhoem: Moo" so' koid jang" moo ci: wa zi nghoid.

⁶Nghoid loug we' Yosha vhoebkhang" zi eig xe: soem" zain ju" loo nghoid loug we' khainjung yigi Noku Yhoem: Moo" ri dakhyi' moo we' aso' koid shigoo" nghoid da:.

⁷Houg: yoomo nyang: gi Yehoiada yo' khainjung yiri khe: yu lho: «Nanu" Noku Yhoem: Moo" ri ciwim yoomo aso' koid go" la". Akhid" nyid" mo thei: gu: nanu" shoug" kham: yu da" ngei ri nanu" lo, moo age zoem: ci: goo" wa. So' koid da" moo" yo" koid wa shid re" nanu" ab byid: ca" goo" wa» ga: tid da:.

⁸Khainjung yigi he: ziri myid veing" wigi Noku Yhoem: Moo" ri aso' koid wa ziri we' myid veing" ago".

⁹Hau: thang: Yehoiada gi koid: zei: daloem: ri yu lho: amyhid" moo duang: zoo: phang lho: Noku Yhoem: Moo" khyoo: vang yhe: da" lo, yo shoid phoin: nam moo hau: koid: zei: ri to" to" da:. Khoem" duang: moo moo" eung: da" khainjung yigi noku ku" bang: wigi byid: da" ngei dangain" ri koid: zei: moo kaid ago".

¹⁰Kuid: zei: moo ngei myo: ri" khang" moo" khokham da" moo" seing: yo' khainjung moo" eig yug re" lho: ngei joem ri ayeing shau' yu wigi leig ago".

¹¹Hau: ziri bain lhid" xoem" yu thang: ri nya: eig yug gi hau: ngei joem ri Noku Yhoem: Moo" moo moo" zei: da" vhujhung: ri ab byid: wigi hau: ziri lo, moo" zei: bang:- yhoem: koid bang:-

¹²lug xi' bang:- lug baid bang: ri aphoug" byid: lho: so' koid jang" moo ci: wa shid re" seig thi" yo' lug boem joem ri qei yu wigi yhung: ca" gu: dangain" ri ci: yhung: ago".

¹³Nghoid loug we' hau: ngei joem ri ngei khu joem jarung: joem laboo" joem myikug zi joem ngei yo' sheing: yo' koid da" zi gootu: daja: moo we' aci: nghoid ago".

¹⁴Hau: joem ri moo" zei: bang: ri yo' so' koid jang" moo ci: da" zi joem ri qei jang" moo ci: ago".

¹⁵Moo" zei: bang: da" vhu" jung: yigi nheigloem: gye" deingmain" bang: nghoid ago". Houg: yoomo alu ngei zhayhen" ri amho' yu ca" goo" nghoid da:.

¹⁶Doem xab byid: da" xoin" yo' yooboo khyoid xoin" joem ri koid: zei: moo akaid nghoid ago". Hau zigi khainjung yi seing: zi nghoid da:.

¹⁷Hau ayo, moo Suri khokham Hazaela gi Gad voomoo" ri meing: re" zain: lho: hau: ziri oung: pyam da:. Houg: lang" nyang: gi Yerusalem ri zain: wa shid re" myid phyed to" da:.

¹⁸Yuda khokham Yosha gi nya: shid moo khokham koid lid loo bang: nghoid da" Yehoshaphad- Yehoram- Ahazia bang: ASEING ri shugbyid: to" boem da" jang" moo nya: da" xoin" yo' Noku Yhoem: Moo" mo ziyo' khokham kho" jonu" mo sheing: ri kaid lung: wigi jhungshug khyo" khokham Hazaela ri dangain" foin: byid: kaid da:. Houg: lang" Hazaela gi nya: gyidab ri shu" lho: Yerusalem ri lid: too" kho' da:.

¹⁹Khokham Yosha koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo lhid" xoem" to" ago".

²⁰Khokham Yosha da" gyizoug: yigi nyang: ri thougtheung gyi koid boem ago". Houg bang: moo Shimead da" yuggi zoo: Yozakha yo' Shome da" yuggi zoo: Yehozabad eig yug gi Yerusalem bidthu shoid Sila khyoo: gyoo" yhe: da" khyoo: yam myidzhoo" khyi' joem byeung" jo, da" myidjang moo koid to" da" yhoem: moo nyang: ri said pyam ago". Yosha ri David da" voomoo" khokham loeb yoo moo myhoeb pyam ago". Nya: yuggi zoo: Amazia gi nya: khoo: moo: khokham xo' koid da:.