Read Lashi 2 KHOKHAM 14 Bible Online

2 KHOKHAM 14 - Lashi bible

2 KHOKHAM 14

¹Yehoahaza da" yuggi zoo: Yehoasha gi Israela khokham koid nyid zi eig zain ein: zain moo: Yosha da" nya: yuggi zoo: Amazia gi Yuda khokham bue" lo da:.

²Nyang: apyaid eig xe: wim: zain moo khokham bue" wigi nyang: gi Yerusalem moo eig xe: gau: zain vhoeb nyid da:. Nya: myhi' gi Yerusalem mo Yehoadin ga: su: nghoid da:.

³Nyang: gi ASEING vho: ngei khyoo: ri koid da:. Nghoid loug we' nyang: gi nya: phoug" phyid" khokham David yo' adu nghoid da:. Hau: gungthid nyang: gi nya: phoo Yosha koid lo" da" moo" ri koid da:.

⁴Nyang: gi tungbau: noku joyoo joem ri aphyo' shoin' pyam nghoid da:. Houg: yoomo mung" byu yigi xo' lho: xoin" yo' nam pyo: ja: nghe' ngei" xoin" ri houg moo ngei" byid: ago".

⁵Amazia gi amyeing" akhang" geing: geing: yo" yu yo' nya: phoo khokham ri said pyam da" gyizoug: yiri said pyam da:.

⁶Nghoid loug we' nyang: gi houg bang: da" nya: zoo: yiri asaid pyam nghoid da:. Nyang: gi Moshe da" tarha" mo ASEING byid: to" da" «Nyangnu" zooshang: yi shoid vhang: da" yooboo youg: moo" shid re" myhi' phoo yiri age said pyam wa. Houg: lho: myhi' phoo yi shoid vhang: da" yooboo youg: moo" shid re" nya: zoo: yiri age said pyam wa. Nyang: nyang: shoid vhang: da" yooboo youg: moo" shid re" za: byu hau yug ri yo" ge said wa» ga: da" amyeing" dang: ri cang da:.

⁷Amazia gi xoo" janggyoin: moo Edom gyizoo: damoin ri said pyam da:. Nyang: gi gyi khaid pui" moo: Sela voomoo" ri seing: yu lho: hau: ziri Yokthela ga: myheing da:. Akhid nyid" ju" sho' myeing yo" jo, da:.

⁸Hau: thang: Amazia gi Israela khokham Yehoasha jhang lagyoo: yiri nhang: kaid lho: meing: zain: goo" shang ga: lhung: kaid da:.

⁹Nghoid loug we' khokham Yehoasha gi «Goonham' Lebanon boem moo zu: gam gi shamu gam ri ‹Re" myiyi: zoo: nga" yuggi zoo: ri byid: zhoo" la,› ga: lagyoo: nhang: kaid. Siyoo gougnyhoug dadu: re" wigi hau: zu: gam ri nang: nhe" lid lo" byug ga.

¹⁰Akhid" Amazia we"-nang gi Edom byu yiri khaid oung: pyam abye:. Houg: lho: nang gi gye" nghoid boin: da:. Re" myeing gyi: khyoo: ri nheugshid: wigi yhoem: moo nyid nyid we'. Nang yo' re" mung" byu yiri za: bue" ri" nhang: wa da" yau: khe" kyi" khyeug ziri nang ciwim yoomo lhu: pau: nyid la"» ga: doem pug tid kaid da:.

¹¹Nghoid loug we' Amazia gi atam" gyoo: ngeug pyam da:. Houg: yoomo Yehoasha gi nya: byu yi yo' dage" to' lo" wigi nyang: ri Yuda mung" mo Bed Sheme joyoo moo meing: yhe: zain: da:.

¹²Amazia da" gyidab soem" byug da:. Houg: yoomo nya: gyizoo: yi dangain" gi nyangnu" nya: yhoem: khyoo: phang: lo" ago".

¹³Yehoasha gi Amazia ri thung: byu khyo" myheig yu wigi Yerusalem khyoo: jhen" yhe: lo" da:. Houg: lho: Ephrim khoem" moo" duang: mo zi Ajhoin: khoem" moo" duang: ju" sho' mo vang ri phyo' khyo' pyam da:. Houg zigi eig shoo: gaid koo: sheing: zi nghoid.

¹⁴Nyang: gi nyang: myang gu: ngei yo' sheing: dangain"- Noku Yhoem: Moo" mo zi joem dangain"- khokham kho" mo zi joem dangain" ri yu lho: Samari khyoo: ci: lo" da:. Nyang: gi zoonhoo" byu yi yo' dage" nyang: ri we' shu" lo" da:.

¹⁵Yehoasha koid da" gootu: lo, moo" ja: khang" moo" yo' Yuda khokham Amazia yo' meing: zain: go" jang" moo nya: da" sarhi' moo" joem bo bo wigi Israela khokham yi da" mhoomyid: shen" dam pug moo lhid" xoem" to" ago".

¹⁶Yehoasha gi shid: wigi Samari mo khokham loeb boug moo nyang: ri myhoeb pyam ago". Houg: lho: nya: yuggi zoo: Yeroboam II gi nya: khoo: moo: khokham xo' koid da:.

¹⁷Yuda khokham Amazia gi Israela khokham Yehoasha shid: thang: daxe: wim: zain nyid nyid ashi".

¹⁸Amazia koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo lhid" xoem" to" ago".

¹⁹Yerusalem moo Amazia ri gau" said wa gye" thougtheung ago". Houg: yoomo Lakhisha voomoo" khyoo: phang: yhe: da:. Nghoid loug we' nya: gyivoo joem gi nya: thang: cang re" wigi houg moo nyang: ri said pyam ago".

²⁰Nya: manggung rigi myang: too: mo Yerusalem khyoo: doem tau" tho' lo lho: David voomoo" mo khokham loeb boug moo myhoeb shoung: pyam ago".

²¹Hau: thang: Yuda mung" byu yigi daxe: khyug zain za: danghoid shid" da" nya: yuggi zoo: Uzia ri khokham khyo" bidmug zhung" byid: ago".

²²Uzia gi nya: phoo" shid: thang: ri Elad voomoo" ri doem oung: yu lho: doem tam: to" da:.

²³Yosha da" yuggi zoo: Amazia Yuda khokham khyo" vhoeb zi daxe: wim: zain moo Yehoasha da" yuggi zoo: Yeroboam gi Israela khokham bue" lo da:. Nyang: gi Samari moo myid: xe: dazain vhoeb da:.

²⁴Nyang: gi ASEING ri thougtheung yooboo shoid lho: nya: shid vhu" mo Israela byu yiri yooboo shu" koid yug nghoid da" Nebad da" nya: yuggi zoo: khokham Yeroboam da" akhyeing" leig ri cang da:.

²⁵Nyang: gi Israela seing: da" mougmyid dangain" mougzhung: shoid Hamad koo' lhang mo zi mougpyi: thoem" shid: ju" sho' ri doem oung: pyam da:. He: zigi Israela da" ASEING Mangso wigi Gad Hephera mo nya: dei zoo: Amitai da" yuggi zoo: Lapi: Yona da" nhoid khyo" dangsoo" byid: to" zi nghoid da:.

²⁶ASEING gi Israela byumyu" yi gyoug pho" yau: khi" kham zo: nyid ziri myang da:. Nyangnu" ri pang" thoug wa dayug we' anyid nghoid da:.

²⁷Nghoid loug we' Israela byu yiri bain sho' apyaid atoo: moo phyo' shoin' pyam wa ASEING myid soin' khyoo: anghoid yoomo nyang: gi nyangnu" ri khokham Yeroboam II da" lo, khyo" khyoid yu da:.

²⁸Yeroboam II koid da" gootu: lo, moo" ja khang" moo" yo' gyi khaid jang: mo nya: sarhi' moo"- Damasku yo' Hamad ri Israela khyoo: khasu" doem yo" yu da" khyoo: dangain" ziri Israela khokham yi da" mhoomyid: shen" dam pug moo lhid" xoem" to" da:.

²⁹Yeroboam shid: lo" lho: khokham loeb boug moo nyang: ri myhoeb pyam ago". Houg: lho: nya: yuggi zoo: Zekharia gi nya: khoo: moo khokham doem xo' koid da:.