Read Lashi 2 KHOKHAM 15 Bible Online

2 KHOKHAM 15 - Lashi bible

2 KHOKHAM 15

¹Israela khokham Yeroboam II vhoeb zi eig xe: nyhed zain moo Amazia da" nya: yuggi zoo: Uzia gi Yuda khokham bue" lo da:.

²Nyang: apyaid daxe: khyug zain ri khokham bue" wigi Yerusalem moo wim: xe: eig zain vhoeb da:. Nya: myhi' gi Yerusalem mo Yekholia ga: su: nghoid da:.

³Nya: pho da" leig ri cang lho: ASEING vho: ngei da" moo" ri koid da:.

⁴Nghoid loug we' tungbau yu phara" ri no' da" joyoo joem ri aphyo' pyam wigi mung" byu yigi xo' lho: houg moo xoin" yo' nam pyo: ja: ri nghe' ngei" byid: da:.

⁵ASEING gi Uzia ri manggam bui" nhang: wigi deing da" nya: apyaid gu: moo bui" jo, nhang: da:. Nyang: gi nyang: nya: yhoem: moo nyid lho: moo" mo theing: nyid da:. Hau: ayo, moo nya: yuggi zoo: Yotham gi mungdain: ri vhoeb da:.

⁶Uzia koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo lhid" xoem" to" ago".

⁷Uzia shid: lho: David voomoo" mo khokham loeb boug moo nyang: ri myhoeb shoung: pyam ago". Houg: lho: nya: yuggi zoo: Yotham gi nya: khoo: moo khokham xo' koid da:.

⁸Yuda khokham Uzia vhoeb zi soem" xe: shed zain moo Yeroboam II nya: yuggi zoo: Zekharia gi Israela khokham bui" lo da:. Nyang: gi Samari moo lhammoo" khyug khyab vhoeb da:.

⁹Nyang: gi nya: shid vhu" mo bang: yo' dakhyo" ASEING ri thougtheung yooboo shoid da:. Nyang: gi Israela byumyu" yiri yooboo shu" shoid da" Nebad nya: yuggi zoo: khokham Yeroboam da" akhyeing" leig ri cang da:.

¹⁰Yebesha da" yuggi zoo: Shalum gi khokham Zekharia ri thougtheung wigi Ibleam moo nyang: ri gau" said pyam lho: nya: khoo: moo khokham xo' koid da:.

¹¹Zekharia koid da" gootu: lo, moo" ja: khang" moo" ri Israela khokham yi da" mhoomyid: shen" dam pug moo lhid" xoem" to" ago".

¹²Houg: yoomo ASEING wigi khokham Yehu ri «Re" amyed ashen yiri myid: xeig ju" sho' Israela khokham koid wa» ga: dangsoo" byid: to" zi joeb byeung" lo da:.

¹³Yuda khokham Uzia vhoeb zi soem" xe: goug: zain moo Yabesha da" yuggi zoo: Shalum gi Israela khokham bue" lo da:. Houg: lho: nyang: gi Samari ri lhammoo" dakhyab vhoeb da:.

¹⁴Gadi da" yuggi zoo: Menahem gi Tirza mo zi Samari khyoo: yhe: lho: Shalum ri yhe: gau" said pyam wigi nya: khoo: moo khokham xo' koid da:.

¹⁵Shalum koid da" gootu: lo, moo" ja: khang" moo" yo' nyang: gau" thougtheung khyoo: bo wigi hau: joem ri Israela khokham mhoomyid: shen" dam pug moo lhid" xoem" to" ago".

¹⁶Menahem gi Tirza khyoo: yhe: da" gyung: khyoo: mo Tapua yo' voobyu yi- houg moo lheing khoem to" da" mougmyid joem ri bain sho' phyo' shoin' pyam da:. Ciwim ga: ri voomoo" gi nyang: ri asoem" abyid: yoomo nghoid da:. Nyang: gi zoonu" gung nghoid da" myiyi: yi dangain" rilang" voem: doug: thau" phoug pyam byid: da:.

¹⁷Yuda khokham Uzia vhoeb zi soem" xe: goug: zain moo Gadi da" yuggi zoo: Menahem gi Israela khokham bue" lo lho: nyang: gi Samari voo ri daxi: zain vhoebkhang" da:.

¹⁸Nyang: gi ASEING ri thougtheung yooboo koid lho: nyang: gi shid: da" bidnyid ju" sho' Israela byumyu" yiri yooboo shu" shoid da" Nebad da" yuggi zoo: khokham Yeroboam da" akhyeing" da" leig ri cang da:.

¹⁹Asuri Khosen Tiglad Pilesa gi Israela mung" khyoo: jhen" vang re" lho: Menahem gi khokham pho wigi pang" thoug byid: ziyo' mungdain: dang moo Menahem da" yoem: so' ri yoem: boo nhang: ziri shoug" wa shid re" nyang: ri ngei joem: soem" xe: shed tain: byid: da:.

²⁰Menahem gi hau: ngei ri Israela yoo" zoo: yoo" shug bang: jang" mo dayug wim: xi: xi: kaid wa khyo" doin: zeig mho' da:. Houg: lho: Tiglad Pilesa gi nya: moug: khyo: doem tau" lo" da:.

²¹Menahem koid da" gootu: lo, moo" ja: khang" moo" ri Israela khokham yi da" mhoomyid: shen" dam pug moo lhid" xoem" to" da:.

²²Nyang: shid: byug wigi myhoeb pyam da:. Houg: lho: nya: yuggi zoo: Pekahia gi nya: khoo: moo khokham xo' koid da:.

²³Yuda khokham Uzia vhoeb zi wim: xi: zain moo Menahem da" yuggi zoo: Pekahia gi Israela khokham bue" lo da:. Nyang: gi Samari moo eig zain vhoeb da:.

²⁴Nyang: gi ASEING ri thougtheung yooboo koid lho: nyang: gi Israela byumyu" yiri yooboo shu" shoid da" Nebad da" yuggi zoo: khokham Yeroboam da" akhyeing" leig ri cang da:.

²⁵Pekahia da" gyizoug: Peka ga: da" Remalia da" nya: yuggi zoo: gi Gilead mo byu wim: xi: yug yo' dage" thougtheung gyi koid lho: Samari voomoo" mo khokham kho" da" akhoug: mo gyidab moo Pekahia ri gau" said pyam da:. Houg: lho: nya: khoo: moo khokham xo' koid da:.

²⁶Pekahia koid da" gootu: lo, moo" ja: khang" moo" ri Israela khokham yi da" mhoomyid: shen" dam pug moo lhid" xoem" to" ago".

²⁷Yuda khokham Uzia vhoeb zi wim: xe: eig zain moo Remalia da" nya: yuggi zoo: Peka gi Israela khokham bue" lo da:. Nyang: gi Samari ri eig xi: zain vhoeb da:.

²⁸Nyang: gi ASEING ri thougtheung yooboo koid lho: nyang: gi Israela byumyu" yiri yooboo shu" shoid da" Nebad da" yuggi zoo: khokham Yeroboam da" akhyeing" leig ri cang da:.

²⁹Peka khokham koid nyid ayo, moo Asuri Khosen Tiglad Pilesa gi Iyon- Abela Bed Makha- Yanoa- Kedesha- Hazora voomoo" joem yo' Gilead- Galile- Nabthali mougmyid joem ri seing: yu pyam wigi voobyu yiri thung: byu khyo" Asuri mung" khyoo: shu" lo" ago".

³⁰Uzia da" yuggi zoo: Yotham Yuda khokham khyo" vhoeb zi eig xi: zain ri Ela da" yuggi zoo: Hoshea gi Peka ri thougtheung gyi koid lho: nyang: ri gau" said pyam da:. Houg: lho: nya: khoo: moo khokham xo' koid da:.

³¹Peka koid da" gootu: lo, moo" ja: khang" moo" ri Israela khokham yi da" mhoomyid: shen" dam pug moo lhid" xoem" to" ago".

³²Remalia da" yuggi zoo: Peka Israela khokham khyo" vhoeb zi eig zain moo Uzia da" nya: yuggi zoo: Yotham gi Yuda khokham bue" lo da:.

³³Nyang: gi nya: apyaid eig xe: wim: zain ri khokham bue" wigi Yerusalem moo daxe: khyug zain vhoeb da:. Nya: myhi' gi Zadog da" myiyi: zoo: Yerusha ga: yug nghoid da:.

³⁴Yotham gi nya: phoo Uzia da" leig ri cang lho: ASEING ri vho: ngei nhang: da" khyoo: ri koid da:.

³⁵Nghoid loug we' tungbau yu phara" ri no' da" joyoo joem ri aphyo' shoin' pyam nghoid da:. Houg: yoomo mung" byu yigi xoin" joem ri yo' nam pyo: ja: ri houg moo xo' lho: nghe' ngei" ago". Yotham gi Noku Yhoem: Moo" mougzhung: shoid khoem" ri koid yug nghoid da:.

³⁶Yotham koid da" gootu: lo, moo" ja: khang" moo" ri Yuda khokham yi da" mhoomyid: pug moo lhid" xoem" to" ago".

³⁷Nyang: khokham koid nyid uri ASEING gi Yuda ri meing: zain: wa shid re" Suri khokham Rezin yo' Israela khokham Peka ri xang: shi" nhang: kaid da:.

³⁸Yotham shid: wigi David voomoo" khokham loeb boug moo: myhoeb shoung: pyam ago". Houg: lho: nya: yuggi zoo: Ahaza gi nya: khoo: moo: khokham xo' koid da:.