Read Lashi 2 KHOKHAM 17 Bible Online

2 KHOKHAM 17 - Lashi bible

2 KHOKHAM 17

¹Yuda khokham Ahaza vhoeb zi daxe: eig zain moo Ela da" yuggi zoo: Hoshea gi Israela khokham bui" lo da:. Nyang: gi Samari moo goug: zain vhoeb da:.

²Nyang: gi ASEING ri thougtheung yooboo koid da:. Nghoid loug we' nya: shid vhu" mo Israela mung" ri vhoeb lo boem da" khokham yi yhi' axoo: nghoid da:.

³Asuri khosen Shalmanesa gi nyang: ri meing: re" zain: da:. Hoshea gi Shalmanesa ri asoem" byid: wigi zain khang" moo" khang" doug byid: da:.

⁴Nghoid loug we' dazain moo Hoshea gi Egutu khokham So jhang lagyoo: nhang: wigi nyang: ri pang" yu wa mho' nhang: kaid da:. Houg: lho: zain khang" moo" Asuri ri byid: nyid da" khang" doug ri abyid: loo theung: pyam da:. Shalmanesa gi hau: khyoo: ri si' lang" nyang: gi Hoshea ri myheig yu lho: thung: lhung to" da:.

⁵Hau: thang: Shalmanesa gi Israela mung" khyoo: jhen" vang yhe: lho: Samari voomoo" ri vang: to" da:. Vang: to" da" soem" zain ein: zain

⁶Hoshea vhoeb zi goug: zain ein: zain moo Asuri khosen gi Samari ri seing: yu lho: thung: byu yi khyo" Israela byu yiri Asuri mung" khyoo: shu" lo" ago". Dayham" ri Hala voomoo" moo dayham" ri Gozan mung" du mo Habora gyid lang nam moo dayham" rigi Media byu yi voomoo" joem moo nyhid: to" ago".

⁷Israela byumyu" yigi nyangnu" ri Egutu khokham lo, mo khyoid yu lho: nyangnu" ri Egutu mung" mo shu" thu lo yug nghoid da" nyangnu" ASEING Mangsoo ri thougtheung yooboo shoid yoomo Samari gyo" soem" lo" zi nghoid da:. Nyangnu" gi gootu: yu phara" joem ri no' ago".

⁸Nya: byu yi shid khyoo: jhen" yhe: lo" uri ASEING wigi khaid thu pyam da" byumyu" yi da" thung" ri: joem ri cang wigi Israela khokham yi wigi koid shug da" thung" ri: joem ri cang koid ago".

⁹Israela byumyu" yigi nyangnu" ASEING Mangsoo avho: da" ja: joem ri koid ago". Nyangnu" gi nge thang da" voozoo: mo zi gyi: thang da" voomoo" ju" sho' nyangnu" voo dangain" moo tungbau yu phara" ri no' da" joyoo joem ri koid ago".

¹⁰Nyangnu" gi bouggung dangain"- seiggam yoeb bid shoem: khang" moo" moo lugboem zeing bung: joem yu phara" myhi' Ashera da" soolhoo: joem ri to" wigi.

¹¹Nyangnu" gi hau: mung" mo ASEING wigi khaid thu pyam da" byumyu" yi koid da" lo, moo" ri cang wigi tungbau thung" phoin: joem dangain" dang moo shoem: nam pyo: ja: nghe' ngei" ago". Nyangnu" gi nyangnu" da" akhyeing" da" lo, moo" dangain" wigi ASEING da" nheigloem: yoin ziri bue" loo nhang: ago".

¹²Houg: lho: yu phara" soolhoo: joem ri ano' wa shid re" byid: to" da" ASEING da" amyeing" dang: ri atam" gyoo: nghoid ago".

¹³ASEING gi Israela yo' Yuda ri tid poin" byid: wa shid re" nya: lagyoo: yi yo' lapi: yiri nhang: kaid da:. «Nanu" da" akhyeing" khyoo: joem ri to' pyam lho: nanu" phoug" phyid" yiri ngoo byid: to" da" tarha" moo yo' nga" dei zoo: yi nhoid khyo" nanu" ri byid: to" da" tarha" moo bo da" nga" amyeing" dang: joem ri tam" gyo: cang yhe: nyid ge'» ga: zi nghoid.

¹⁴Nghoid loug we' nyangnu" atam" gyoo: nghoid da:. Nyangnu" ASEING Mangsoo ri aloem da" nyangnu" phoug" phyid" yi yo' dakhyo" nyangnu" nheigloem: thain: ago".

¹⁵Nyangnu" gi nya: jhau" shed dang: ri atam" gyoo: ngeug pyam bye:. Nyangnu" phoug" phyid" yi yo' koid to" da" dang: theing ri nyangnu" acang. Nya: da" tid poin" dang: ri ci asoin: byid: nghoid da:. Nyangnu" gi ce: phoug" adab da" yu phara" soolhoo: joem ri no' wigi nyangnu" nya: gung ri ce: aphoug" adab bang: bue" nhang: ago". Houg: lho: nyangnu" gi ayam aqei: mo byumyu" yi da" thung" joem ri cang ago". Houg bang: da" leig ayu" wa shid re" tid da" ASEING amyeing" dang: ri atam" gyoo: nghoid ago".

¹⁶Nyangnu" gi nyangnu" ASEING Mangso da" tarha" joem dangain" ziri phyo' pyam lho: no' wa shid re" to' nu: nu" soolhoo: eig loem: ri koid ago". Nyangnu" gi yu phara" myhi' Ashera da" soolhoo: ri we' koid lho: kyi: joem ri no' ago". Bala yu phara" ri we' dei byid: ago".

¹⁷Nyangnu" gi nyangnu" da" yuggi zoo: yi myiyi: zoo: yiri nghe' ngei" byid: da" xoin" khyo" tungbau yu phara" ri nghe' ngei" byid: ago". Nyangnu" gi join: zei: bang: yo' boid phyed bang: ri dang: myid: ago". Nyangnu" gi ASEING shidkhoin" moo shoid da" lo, moo" koid wa shid re" nyangnu" gung ri nyangnu" bain: sho' shugbyid: to" ago". Hougsu" yoomo nya: nheigloem: ri zhu: nhang: da:.

¹⁸ASEING gi Israela byumyu" yiri nheig yo: wigi houg bang: ri nya: shidkhoin" mo khaid thu pyam da:. Yuda mungdain: ri za: teing to" da:.

¹⁹Nghoid loug Yuda byu yi we' nyangnu" ASEING Mangso da" tarha" joem ri acang boem nghoid ago". Nyangnu" gi Israela byumyu" koid da" thung" joem ri leig yu" ago".

²⁰ASEING gi Israela byu yi dangain" ri ngeug pyam lho: nyangnu" ri yooboo dam byid: wigi nyangnu" ri nya: shidkhoin" mo bain sho' khaid thu pyam sho' anoug akhyoid koid da" gyivoo yi lo, khyoo: nyangnu" ri byid: pyam da:.

²¹ASEING gi Israela ri Yuda mo bain kho' yu thang: ri Israela byu yigi Nebad nya: yuggi zoo: Yeroboam ri khokham koid nhang: ago". Yeroboam gi ASEING ri she pyam wa shid re" nyangnu" ri koid wigi nyangnu" ri gyoug pho" yooboo khoug: khyoo: vhu" she: da:.

²²ASEING gi nya: dei zoo: lapi: yi da" nhoid khyo" nyang: koid wa ga: tid to" ziyo' dakhyoo" ti" nyangnu" ri nya: shidkhoin" mo khaid thu pyam sho' nyangnu" gi Yeroboam thang: cang wigi nyang: shoid da" yooboo dangain" ri xo' lho: cang koid ago". Houg: yoomo Israela byumyu" yigi akhid" nyangnu" nyid boem shigo' da" Asuri mung" khyoo: pyoung" she: loo" shoug" ago".

²³

²⁴Asuri khosen gi Babelon- Khutha- Ava- Hamad- Sepharvim voomoo" joem mo byu yiri pyoung" yu lho: nyangnu" gi pyoung" she: loo" shau" da" Israela byumyu" yi joyoo nghoid da" Samari voomoo" joem moo houg bang: ri nyid: nhang: to" ago". Nyangnu" gi hau: voomoo" joem ri seing: yu lho: houg moo nyid boem ago".

²⁵Nyangnu" houg moo xang: shi" yhe: de: nyid boem uri nyangnu" gi ASEING ri anoku nghoid ago". Houg: yoomo nyang: gi khang: khyi joem ri nhang: kaid wigi nyangnu" dayham" ri ngaid said pyam da:.

²⁶Asuri khosen wigi Samari voomoo" joem moo yhe: de: nyhid: to" da" byumyu" yigi hau: mungdain: da" yu phara" tarha" ri asi' yoomo hau: yu phara" gi khang: khyi joem ri nhang: kaid lho: nyangnu" ri ngaid said pyam da: ga: Asuri khosen ri lo tid kyo" ago".

²⁷Houg: yoomo khosen phoo gi «Thung: byu yi khyo" ngoonu" shu" lo da" khainjung yi mo dayug ri doem tau" de" kaid ge'. Hau: mungdain: mo yu phara" da" tarha" ri mung" byu yiri jhau" byid: wa shid re" nyang: ri houg moo lo" nyid nhang: ge'» ga: amyeing" byid: da:.

²⁸Houg: yoomo Samari mo pyoung" she: lo" shau" da" Israela byu khainjung dayug gi Bethela moo lo" nyid lho: mung" byu yi ASEING ri khasu" noku wa khyoo: ri lo" jhau" byid: bye:.

²⁹Nghoid loug we' Samari moo lo" de: nyid boem da" mung" byu yigi xo' lho: nyangnu" nya: da" yu phara" soolhoo: joem ri koid wigi hau: joem ri Israela byumyu" yi koid to" da" noku joyoo moo: to" to" da:. Nyang: phung: nyang: nyangnu" nyid da" voomoo" joem moo yu phara" soolhoo: joem ri koid ago".

³⁰Babelon byu yigi Sukho Benod yu phara" soolhoo: joem Khutha byu yigi Nergala yu phara" soolhoo: joem Hamad byu yigi Ashima yu phara" soolhoo: joem.

³¹Ava byu yigi Nibhaza yo' Tartag yu phara" soolhoo: joem ri koid wigi Sepharvim byu yigi nyangnu" yu phara" Adrameleg yo' Anameleg ri nghe' ngei" xoin" khyo" nyangnu" zooshang: yiri nghe' ngei" byid: boem ago".

³²Hau: byu yigi ASEING ri we' noku wigi tungbau yu phara" ri no' da" joyoo joem moo nyangnu" shid re" houg moo xoin" ngei" byid: wa da" khainjung yi khyo" dei byid: da" byu aja: ja: ri we' nyangnu" phung: mo khyen: yu ago".

³³Houg: yoomo nyangnu" gi ASEING ri noku coung" nghoid loug we' nyangnu" gi nyangnu" re" da" mung" mo thung" ri: joem ri cang lho: nyangnu" nya: yu phara" joem ri we' no' ago".

³⁴Nyangnu" gi akhid" nyid" ju" sho' nyangnu" da" thung" ri: xoug" joem ri ci: ashi". Nyangnu" gi ASEING ri we' a noku. Nyang: wigi Israela ga: myheing byid: da" Yaku da" amyed ashen yiri byid: to" da" tarha" yo' amyeing" dang: joem ri we' acang boem nghoid ago".

³⁵ASEING gi nyangnu" yo' dang: theing koid to" wigi nyangnu" ri «Gootu: yu phara" ri ano' goo"- hau: joem ri agoeb pid goo"- adei byid: goo"- xoin" we' angei" byid: goo".

³⁶Nanu" gi gyi: sheung: da" yoem: so' yo' yoem: wigi Egutu mung" mo nanu" ri shu" thu lo da" ASEING ngoo ri tam" gyoo: cang wa zi nghoid. Nanu" gi ngoo ri goeb pid wigi ngoo ri xoin" ngei" byid: wa zi nghoid.

³⁷Nanu" gi ngo wigi nanu" shid re" lhid" byid: to" da" tarha" yo' amyeing" dang: ri khanham we' cang boem wa zi nghoid. Gootu: yu phara" ri nanu" ayo" tam" gyo: cang yhi: wa.

³⁸Houg: lho: nanu" yo' ngoo koid to" da" dang: theing ri nanu" age to" myhed goo" wa.

³⁹Nanu" gi nanu" ASEING Mangsoo- ngoo ri tid dang: tam" gyoo: lho: nanu" da" gyivoo yi lo, mo ngoo nanu" ri khyoid yu wa» ga: amyeing" byid: to" da:.

⁴⁰Nghoid loug we' hau: byu yigi anau tam" gyoo: nghoid ago". Nyangnu" gi nyangnu" thung" ri: xoug" joem ri xo' wigi cang ago".

⁴¹Houg: yoomo hau: byumyu" yigi ASEING ri noku boem nghoid loug we' nyangnu" gi nyangnu" yu phara" soolhoo: joem ri no ago". Akhid" nyid" ju" sho' nyangnu" amyed ashen yigi houg yo' dayhang: ti" za: xo' koid nyid ago".