Read Lashi 2 KHOKHAM 19 Bible Online

2 KHOKHAM 19 - Lashi bible

2 KHOKHAM 19

¹Hezekia khokham gi nyangnu" tid da" lu dang: ri shoug" gyoo: yo' koug wigi nya: byimi ri lang: ceig pyam lho: jid: moo" byimi koid: void ci: wigi ASEING da" Noku Yhoem: Moo" khyoo: yhe: da:.

²Nyang: gi khokham kho" ri yoovoin yu yu" nyid da" Eliakim- khokham kho" moo" seing: nghoid da" Shebna yo' khainjung moo" yiri Amoz da" yuggi zoo: lapi: Esaia jhang nhang: kaid da:. Nyangnu" we' jid: moo" byimi void ci: ago".

³He: zigi Esaia ri yhe: tid kyoo" wa shid re" nyangnu" ri nyang: tid kaid da" mungdang: nghoid. Hau: zigi «Akhid" nyid" gi yau: khi" kham zoo: da" bidnyid nghoid. Ngoonu" gi yooboo dam byid: ziyo' ngi: yoem" zi shoug" bidnyid nghoid. Ngoonu" gi zooshang: khu: wa jen" jen" nghoid nyid loug we' hau: zooshang: khu: wa shid re" yoem: neing: nyid da" myiyi: myhi' dayug yo' du nyid da:.

⁴Asuri khosen phoo gi dei nyid da" Mangsoo ri aphoug" akhyoid rui" wa shid re" nya: gyizoug: moo" yiri nhang: kaid abye:. Re" ASEING Mangsoo gi he: aphoug" akhyoid tid da" dang: ri shau" gyo: wigi hougsu" tid bang: ri yooboo dam byid: goo" baja". Houg: yoomo dei deung nyid da" ngoonu" mung" byu yi shid re" Mangsoo jhang akyu" mho' we'» ga: zi nghoid.

⁵Esaia gi khokham Hezekia da" mungdang: ri shoug" gyoo: lang"

⁶Nyang: gi «ASEING tid zigi ASEING wigi nanu" ri ayo" khyoid yu wa ga: tid da" nyangnu" dang: yo' Asuri byu yi wigi nanu" ri kyug ziri agyug goo".

⁷ASEING gi khokham phoo ri nyang: nya: mungdain: khyoo: doem tau" loo" nhang: wa da" lu dang: lam" ri shoug" gyoo: nhang: loo wa. Houg: lho: ASEING gi nyang: ri houg moo said pyam shau" nhang: ri" wa» ga: doem phug tid kaid da:.

⁸Asuri gyizoug: phoo gi Khosen phoo Lakhisha mo thu lo" wigi Libna voomoo" nam moo meing: zain: nyid ziri se' wigi nyang: gi khokham phoo yo' yhe: sham: goo" wa shid re" houg khyoo: yhe: lo" da:.

⁹Egutu gyidab gi Khusha khokham Tirhaka wigi shu" vhu" she: lho: nyangnu" ri gyi khaid wa shid re" shu" ri" wa ga: da" lu dang: Asuri byumyu" yi jhang ju" lo da:. Khosen phoo he: ziri shoug" gyoo: lang" Yuda khokham Hezekia ri mougsoug" lhid" foin: kaid lho:

¹⁰Nyang: ri «Nang gi nga" lo, moo agyo" soem" loo" wa ga: nang loem khau: nyid da" yu phara" gi nang ri tid da:. Nghoid loug nang ri amhoug pyam nhang:.

¹¹Asuri khosen gi phyo' pyam wa nyang: myid phyed to" da" mungdain: khang" moo" ri khasu" koid da" khyoo: ri nang shoug" gyoo: gu nghoid da:. Nang yo" loid byoin wa ein: jho: rhe".

¹²Nga" phoug" phyid" yigi Gazon- Haran- Rezeb voomoo" joem ri phyo' pyam lho: Telasa moo nyid boem da" Betheden byumyu" yiri said pyam ago". Nyangnu" da" kha: yu phara" we' nyangnu" ri ayo" khyoid yu nghoid da:.

¹³Hamad- Arpad- Sepharvim- Hena- Iva voomoo" joem da" khokham yi khamoo: nghoid ago" la"» ga: tid kaid da:.

¹⁴Khokham phoo Hezekia gi mougsoug" ri lagyoo: yi lo, mo yu lho: nghab da:. Hau: thang: nyang: gi Noku Yhoem: Moo" khyoo: yhe: lho: mougsoug" ri ASEING shidkhoin" moo yhe: to" da:.

¹⁵Houg: lho: nyang: gi «O" Israela ASEING Mangsoo dung dab dei noem atho' moo zhung: jo, da" su: we"- nang dayug za: mougmyid dangain" mo mungdain: dangain" ri vhoeb da" Mangsoo nghoid da:. Nyang: gi mougkhung: yo' myidjang ri phain" so: to" da:.

¹⁶ASEING we"- akhid" ngoonu" moo cibue" nyid ziri yu" byid: la. Dei nyid da" Mangsoo nang ri Senakherib wigi aphoug" akhyoid tid nyid zi dangain" ziri tam" gyoo: byid: la.

¹⁷ASEING we' ngoonu" dangain" se'- Asuri khosen yigi byumyu" yiri said toem" pyam lho: nyangnu" mungdain: joem ri jham" coug: youg koid pyam da:.

¹⁸Houg: lho: nyangnu" yu phara" ri we' nghe' pyam byid: bye:. Hau zigi yu phara" dangain" anghoid- byu lo, yo' koid to" da lug boem yo' seig soolhoo: joem kyeing" danghoid.

¹⁹Ngoonu" ASEING Mangsoo we"- akhid" ngoonu" ri Asuri byu yi lo, mo khyoid yu la o"- houg: lang" ASEING we"- nang za: Mangsoo nghoid khyoo: ri mougmyid dang mo byumyu" mungdain: dangain" se' ri" goo" wa» ga: akyu" mho' da:.

²⁰Hau: thang: Esaia gi khokham Hezekia jhang khyoo: mungdang: foin: kaid. Hau: zigi khokham pho akyu" mho' dang: ri tam" gyoo: byid: wigi

²¹ASEING gi «Senakherib we"- Yerusalem voomoo" gi nang ri yi juang" pyam lho: aphoug" akhyoid koid abye:.

²²Nang wigi aphoug" akhyoid juang" pyam yug hang" nghoid ein: nang jho: la". Nang gi gyeung" shang: da" Israela Mangsoo nghoid da" ngoo ri aphoug" akhyoid koid zi nghoid abye:.

²³Re" da" gyi myang: rheing" joem dangain" wigi myhang: thang da" Lebanon boem joem ri oung: pyam da" khyo" ngoo ri phau: kyoo" wa re" lagyoo: joem ri nang nhang: kaid da:. Houg moo nang gi sheing: thang da" shamu gam joem yo' ge thang da" gyoin: gam joem ri thoug pyam lho: no, thang da" seig moo" yoo khoug: khyoo: ju" yhi: bye: da" khyoo: nang phau: tid da:.

²⁴Nang gi tungbau meing: joem moo gyid thung" joem du: lho: gyid nang shug ziyo' re" gyizoo: yi khyid: yo' Nila lang ri nang: nhe" kain" pyam bye: ga: nang phau: lo da:.

²⁵He: gu: dangain" ri ngoo goonham' mo soin: too" bye: ziri nang khanham we' ashau" gyo: yu" rhe". Hau: zi akhid" ngoo yo" koid bye:. Ngoo gi geung: teung voomoo" joem ri zhoothung" jab, boem bue" loo nhang: wa yoem so' ngoo nang ri byid: bye:.

²⁶Houg moo: nyid bang: gi yoem so' aboo goo" nghoid da:. Nyangnu" gyoug dain wigi mo, byug ago". Nyangnu" gi bidthu shoid mo lid lung wigi lo hau' nyid uri da" pa: dain" mo myo, gam anghoid lang" yhoemkhung: mo myo, gam yo' du da:.

²⁷Nghoid loug we' ngoo gi nang cikoid zi kha khyoo: yhe: zi re" khyoo: ja: khang" moo" ri ngoo se'. Nang ngoo ri khasu" nheig yo: thougtheung ziri we' ngoo se'.

²⁸Ngoo gi nang nheig yo: khyoo:- re" da" nghoid boin: khyoo: lu dang: ri ngoo shoug" gyoo: bye:. Houg: yoomo re" nhoo: ri nhooshu' kaid- nhoid moo nhoid kho' kaid wigi nang nyang: re" da" khyoo: khyo" doem tau" shu: loo" wa zi nghoid» ga: zi nghoid

²⁹Hau: thang: Esaia gi khokham Hezekia ri «He: zigi bue" ri" wa da" asoo" nghoid. Akhizain yo' sang: nheig gi nang shivoo: lam" shoug" zoo: wa. Nghoid loug we' thang: zain gu: moo gi re" shivoo: ri sho" wigi yo" yham" yu wa. Zabyid nei joem ri sho" lho: zabyid shi" joem shau" zoo: loo wa.

³⁰Yuda mung" moo nyid deing da" mo, gi myid khoug: khyoo: no, sho' agyi: cen' da" agam joem yhang: ti" ge lho: ashi" zei: loo goo" wa.

³¹Yerusalem yo' Ziun boem moo nyid bang: gi nyid deing jo, boem wa. Ciwim gari he: ziri koid wa shid re" ASEING myid phyed too" yoomo nghoid.

³²Houg: lho: he: zigi Asuri khosen yo' sen: wigi ASEING tid zi nghoid. Nyang: gi he: voomoo" khyoo: avang wa. Myoo: dakhaid we' abeig fang wa. Goo ci: da" gyizoo: yi voomoo" nam khyoo: dayug we' atab loo wa. Houg moo myid boem" we' akoid goo" wa.

³³Nyang: gi he: voomoo" khyoo: avang loo: nyang: re" da" khyoo: khyo" nyang: doem tau" loo" wa. Ngoo ASEING tid.

³⁴Ngoo nya: gung ri ngi: shab da" shid mo we' nga" dei zoo: David ri ngoo byid: to" da" dangsoo" yoomo we' ngoo gi he: voomoo" ri" lhoug zung" lho: goem loem byid: wa» ga: tid da:.

³⁵Hau: myen moo ASEING da" moug: lagyoo: dayug Asuri dab khyoo: gyoo" re" wigi gyizoo: 185,000 yug ri said pyam da:. Hau: thang: nyid" moug: boo" zoo" ri houg moo dangain" bang: shid: jo, ago".

³⁶Hau: thang: Asuri khosen Senakherib gi zheig phang: wigi Nineve khyoo: tau" lo" da:.

³⁷Danyid" ri noku yhoem: khoug: mo nya: yu phara" Nisrog ri nyang: no' nyid uri. Nya: yuggi zoo: eig tang: nghoid boem da" Adrameleg yo' Sharezera tang: gi nya: tang: da" shamcoin" yo' nyang: ri said pyam ago". Hau: thang: Ararad mung" khyoo: phang: loid lo" ago". Nya: yuggi zoo: gootu: dayug nghoid da" Esahadon gi nya: khoo: moo: khokham xo' koid da:.