Read Lashi 2 KHOKHAM 25 Bible Online

2 KHOKHAM 25 - Lashi bible

2 KHOKHAM 25

¹Zedekia gi Babelon khokham Nebukhadneza ri thougtheung gyi koid da:. Houg: lho: Nebukhadneza gi nya: gyidab dangain" yo' re" wigi Zedekia vhoebkhang" zi gau: zain ein: zain- lhammoo" daxi: khyab- daxi: nyid" moo Yerusalem ri gyi re" zain: da:. Nyangnu" gi voomoo" tunggung shoid moo dab re" koid nyid lho: voomoo" lheing khoem moo vang: to" da" vang khyam: koid ago".

²Hau: thang: Zedekia vhoeb zi daxe: dazain ju" sho' nyang: vang: to" ago".

³Hau: zain da" lhammoo" myid: khyab gau nyid" nyid" mo phang" khoug xoo: sho' khoug re" lho: mung" byu yi zoo: wa ciwe' adeing loo: nghoid da:.

⁴Voomoo" vang joem we' phyo' pyam ago". Hau: voomoo" ri Babelon byu yi lheing khoem to" boem nghoid loug we' gyizoo: yi dangain" gi myen" ri phang: loid byug ago". Nyangnu" gi khokham kho" bain: khyam: khyo" thu lo" lho: vang eig loem: xo' da" khoem" duang: khyo" thu lo" wigi Yodan janggyoin: khyoo: pang: yhe: lo" ago".

⁵Nghoid loug we' Babelon gyizoo: yigi khokham Zedekia ri cang khaid lho: Yerikho nam mo jang: pa: moo nyang: ri shoug" myheig yu ago". Nya: gyizoo: yi dangain" nyang: ri phang: lhei" too" kho' ago".

⁶Zedekia ri Ribla voomoo" moo nyid da" khokham Nebukhadneza jhang shu" lo" ago". Nebukhadneza gi nyang: ri houg moo dang: phyed da:.

⁷Zedekia da" myonhoo: shid moo nyang: nya: yuggi zoo: yiri said pyam shug ago". Hau: thang: Nebukhadneza gi Zedekia da" myojid" ri thau" phug pyam nhang: lho: jangcoo" yo' tei" wigi nyang: ri Babelon khyoo: shu" lo" da:.

⁸Babelon khokham Nebukhadneza vhoebkhang" zi daxe: gau: zain- lhammoo" wim: khyab nyhed nyid" ein: nyid" moo khokham pho da" phajhi" byid: su:- nya: gyizoo: yi da" zoug: phoo Nebuzaradan gi Yerusalem khyoo: vang yhe: da:.

⁹Nyang: gi Noku Yhoem: Moo"- khokham kho"- Yerusalem mo yhouggyen: da" byu yi dangain" mo, da" yhoem: joem ri nghe' pyam da:.

¹⁰Houg: lho: nya: gyizoo: yigi voomoo" vang joem ri phyo' khyo' pyam ago".

¹¹Hau: thang: Nebuzaradan gi voomoo" moo nyid deing jo, da" voobyu yi deing jo, da" lo, moo" jhang: bang:- Babelon byu yi jhang phang: dab lo" byug bang: ri Babelon khyoo: pyoung" shu" lo" da:.

¹²Nghoid loug we' nyang: gi zi yoo jonu" ci: ayoo" myung thang da" bang: ri Yuda mung" moo nyhid: too" kho' lho: nyangnu" ri zabyid khyam: moo yo' yoothung" joem moo moo" zei: nhang: da:.

¹³Babelon byumyu" yigi gyid: mid" zeing bung: joem yo' rheing" joem yo' dage" gyid: mid" gyid thung" lhang" zeing ri ajab amhoin' baid khyoeb pyam ago". Nyangnu" gi gyid: mid" dangain" ziri Babelon khyoo: ci: lo" da:.

¹⁴Nyangnu" gi phoin: ri shoem" sain' pyam jang moo ci: da" yab geig joem yo' myimoeb kaid da" khu- myikug joem ri so' koid' da" zi joem xoin" du: mo suid" ri kham: da" jarung: joem Shoem: nam pyo: ja: nghe' ngei" da" jarung: joem Noku Yhoem: Moo" moo moo" koid uri ci: da" gyid: mid" jonu" gootu: dangain" ri we' yu pyam ago".

¹⁵Nyangnu" gi jarung: nu" yo' myigyu: gyeing" ri kaid ci: da" oug" phain' yo' wigi sheing: yo' ngei yo' koid to" da" ja: khang" moo" ri yu lo" ago".

¹⁶Noku Yhoem: Moo" shid re" Sholumon wigi koid to" da" gyid: mid" zi joem nghoid da" zeing bung: eig loem:- rheing" joem yo' gyid: thung" lhang" zeing gi atho' leug loo: sho' lid: da:.

¹⁷Zeing bung: eig loem: gi dayi" yi" za: nghoid da:. Zeing khang" moo" gi 27 pe myhang: wigi hau: aphyoo" moo 4 pe dakhyam" myhang: da" gyid: mid" dung" zeing dab da:. Hau: gyid: mid" dung" zeing khang" moo" moo gyid: mid" yo' koid to" da" lamei shi" shicab soolhoo: yo' koid to" da:.

¹⁸Hau: tho' agoo" gyizoug: moo" Nebuzaradan gi khainjung moo" Seraia yo' nya: vhoo: mo khainjung Zephania- Noku Yhoem: Moo" mo yhouggyen: da" vhujhung: gootu: soem" yug ri thung: byu yi khyo" pyoung" shu" lo" ago".

¹⁹Nyang: gi gyidab joem ri vhoebkhang" lo da" gyizoug: phoo- voomoo" moo nyid nyid boem shi" da" khokham pho da" phajhi" byid: bang: wim: yug- gyi moo" lhid" xoem" moo" ri voin da" gyizoug: da" vhoo: mo gyizoug: phoo- yhouggyen: da" byu khyug xi: ri we' shu" yu da:.

²⁰Nebuzaradan gi houg bang: ri Hamad moug: mo Ribla voomoo" moo nyid da" Babelon khokham pho jang" khyoo: shu" loo byid: da:.

²¹Khokham phoo gi houg moo nyangnu" ri baid wigi said pyam da:. Houg: yoomo Yuda byumyu" yigi nyangnu" mungdain: mo pyoung" she: loo" shau" boem bye:.

²²Babelon khokham Nebukhadneza gi Shaphan da" nya: myid:- Ahikam da" yuggi zoo: Gedalia ri Yuda mung" mo mung" zoug: koid nhang: wigi Babelon khyoo: ashu" lo" da" bang: dangain" ri yu" da" yoovoin byid: to" da:.

²³Asoem" azheing: byid: da" gyizoug: yi yo' gyizoo: yigi hau: khyoo: ri shoug" gyoo: lang" nyangnu" gi Mizpa moo Gedalia yo' yhe: shoin" ago". Hau: zoug: yigi Nethania da" yuggi zoo: Ishmaela- Karea da" yuggi zoo: Yohanan- Netopha voomoo" mo Tanhumet da" yuggi zoo: Seraia yo' Moakha mo Yezania bang: nghoid ago".

²⁴Gedalia gi nyangnu" ri «Nanu" gi Babelon gyizoug: yiri agyug ca" ein: ziri ngoo nanu" ri dang: byid: wa. He: mung" moo nyid ge'. Babelon khokham ri dei byid: nyid ge'. Nanu" shid re" dangain" zi yug yoo wa» ga: tid da:.

²⁵Nghoid loug we' hau: zain lhammoo" nyhed khyab ein: khyab moo Elishama da" myid: zoo:- Nethania da" yuggi zoo: dayug nghoid wigi khokham yhoemkhung: byu dayug nghoid da" Ishamaela gi byu daxi: yug yo' dage" Mizpa khyoo: yhe: lho: Gedalia ri gyi yhe: zain: wigi nyang: ri said pyam da:. Nyang: gi Gedalia yo' dage" nyid boem da" Israela byu yi yo' Babelon byu yiri we' said pyam da:.

²⁶Hau: thang: Israela byu dangain" yoo" zoo: yoo" shug bang:- myung shoo" bang: dangain" yo' dage" gyizoug: yigi to' lo" lho: Egutu mung" khyoo: yhe: lo" ago". Ciwim ga: ri nyangnu" gi Babelon byu yiri gyoug ago".

²⁷Evilmerodag gi Babelon khokham bue" lo da" zain nyid moo nyang: gi Yuda khokham Yehoiakhin ri thung: mo nhang: kaid byid: da" khyo" nheig khyeug myid ci: shug byid: da:. He: zigi Yehoiakhin ri thung: byu khyo" myheig lo" thang: soem" xe: nyhed zain ein: zain lhammoo" daxe: eig khyab- eig xe: nyhed nyid" nyid" moo bue" zi nghoid da:.

²⁸Evilmerodag gi nyang: ri goo" lhoo' za: koid wigi Babelon mung" moo pyoung" shu" nyhid: too" shau" boem da" khokham gootu: yi tho' moo ngi: shab da" joyoo ri nyang: byid: to" da:.

²⁹Houg: yoomo Yehoiakhin gi thung: byimi ri thid pyam wigi deing da" nya: pyaid goin" moo khokham pho da" zoobui" moo zoo: wa akhang" yo" da:.

³⁰Nyang: dei nyid da" myhang nyang: ca" da" gu: shid re" zookhoo: nyid" khang" nyid" main: main: shoug" yu da:.