Read Lashi 2 KHOKHAM 4 Bible Online

2 KHOKHAM 4 - Lashi bible

2 KHOKHAM 4

¹Lapi: phung: moo bo da" cougmoo" myhi' dayug gi Elisha jhang yhe: wigi «Nheigboo pho we"- nga" yhoem: seing: phoo shid: bye:. Nang se' ziyo' dakhyo" nyang: gi Mangsoo ri gyoug phoug" da" su: nghoid. Akhid" nya: da" jhen: seing: byu dayug gi nga" yhoem: seing: pho da" jhen: shid re" nga" yuggi zoo: eig yug ri join khyo" shu" yu pyam wa ju" re" da» ga: tid da:.

²Nyang: gi «Re" shid re" ngoo cikoid byid: ca" wa la". Nang yhoem: moo ciyo" lha". Ngoo ri tid kyoo" la» ga: myid: da:. Cougmoo" myhi' gi «Zhainloin: xu: jhuang: ngi da jhuang: mo lid gootu: ciwe' ayoo"» ga: tid da:.

³Elisha gi nyang: ri «Re" yhoem: kyoo" cang" yi jhang yhe: lho: nang yo" bue" myhoo' jhuang: akoem: ri yhe: ngho" loo we'.

⁴Hau: thang: nang yo' re" yuggi zo: tang: gi yhoem: khyoo: vang lo" lho: khoem" myhid" pyam wigi jhuang: joem moo xu: foid kaid ge'- byeung" lang" ayam moo too" ge'» ga: tid da:.

⁵Houg: yoomo myiyi: myhi' gi nya: yuggi zoo: tang: yo' dage" yhoem: khoug: khyoo: vang lo" lho: khoem" myhid" pyam wigi zhainloin: xu: jhuang: nu" zoo: ri yu lho: nya: yuggi zo: tang: yu lo da" jhuang: joem moo xu: foid kaid bye:.

⁶Nya: miyi jhuang: dangain" ri bain kaid lang" nyang: gi «Jhung: jo, shi" rhe"» ga: myid: da:. Nya: yuggi zoo: dayug gi «Hau: loem: lo" thang nghoid bye:» ga: phug tid. Houg: lang" zhainloin: xu: yau zi theing: lo" byug da:.

⁷Nyang: gi Lapi: Elisha jhang yhe: da:. Hau: Lapi: phoo gi nyang: ri «Zhainloin: xu: joem ri oung" lho: re" jhen: dangain" ri xab pyam we'. Nang yo' re" yuggi zoo: tang: shid re" kangso' dei wa shid re" gi" sho' deing jo, wa» ga: tid da:.

⁸Danyid" bidnyid" ri Elisha gi Shunem khyoo: yhe: da:. Houg moo: yoo" zoo: yoo" shug da" myiyi: myhi' dayug nyid. Nyang: gi Elisha ri voem: damyoo: khi: zho" da:. Hau: bidnyid mo nyang: Shunem khyoo: yhi: khang" moo" Elisha gi hau: myiyi: myhi' yhoem: moo voem: zo: da:.

⁹Myiyi: myhi' gi nya: yhoem: seing: phoo ri «Hid: khyoo: atheing: theing: lhung re" da" byu he: yug gi gyeung" shang: da" byu dayug nghoid ziri ngoo se'.

¹⁰Khung: dang moo yab ngi dayab koid wigi yhoeb cuang- zoobui"- zhungtang - myibung: joem ri soin' byid: shang. Nyang: ngoonu" jhang lam" ri" khang" moo" houg: moo nyang: yo" theing: nyid wa nghoid da» ga: tid da:.

¹¹Danyid" ri Elisha gi Shunem khyoo: tau" lo" wigi lo" noo: wa shid re" nya: yab khyoo: do, lo" da:.

¹²Nyang: gi nya: dei zoo: Gehazi ri hau: myiyi: myhi' ri yhe: khi: nhang: kaid. Nyang: ju" loo lang"

¹³Elisha gi Gehazi ri «Nyang: nga" eig yug ca" ziri pang" thoug byid: zi dangain" shid re" ngoo nyang: ri ciyo" koid byid: wa ein: ziri nyang: ri myid: yu" we'. Nyang: ngoo ri khokham pho jhang anghoid lang" gyizoug: pho jhang ngoo ri dang: yhe: ji byid: nhang: nau lug» ga: tid da:. Myiyi: myhi' gi «Ngoo gi hid moo: nga" byumyu" yi dangain" yo' nyid nyid wa ziri vho:» ga: tid.

¹⁴Elisha gi Gehazi ri «Houg ri ngoo nya: shid re" ciyo" koid byid: wa lha"» ga: myid: da:. Nyang: gi «Nyang: gi yuggi zoo: ayoo" nghoid da:. Nya: yhoem: seing: phoo gi mang: zoo: nghoid bye:» ga: tid da:.

¹⁵Elisha gi «Nyang: ri hid: khyoo: khe: ri" we'» ga: amyeing" byid: da:. Hau: myiyi: myhi' gi ju" vang re" lho: khoem" duang: moo: yab jo, da:.

¹⁶Houg: lang" Elisha gi nyang: ri «Sang: nheig he: yo, moo: re" lo, yo' yuggi zoo: vu, ci: wa» ga: tid da:. Nyang: gi «O" nheigboo phoo we"- jeju" mo ngoo ri amhoug. Nang gi Mangso byu nghoid da» ga: tid.

¹⁷Nghoid loug we' Elisha tid to" ziyo' dakhyo" thang: zain hau: ayo, koo: moo: nyang: gi yuggi zoo: dayug khu: da:.

¹⁸Zain nyid dajhi' myang" thang: shivoo: yham" yo, nab soin: danab ri yuggi zoo: gi shivoo: yham" bang: yo' dage" yoo moo nyid nyid da" nya: phoo jhang yhe: shoug" wa yhe: lo" da:.

¹⁹Nyang: gi nya: phoo ri nyeigdain tung" «Nga" vhuloem no- nga" vhuloem no- ga: kyi: ngau da:.» Nya: phoo gi dei zoo: ri «Hau: yuggi zoo: ri nya: myhi' jhang vu, loo" we'» ga: tid da:.

²⁰Dei zoo: gi yuggi zoo: ri nya: myhi' jhang vu, lo" da:. Nya: myhi' gi nyang: ri bid gung tu: sho' nya: shid khoin' moo vu, ci: da:. Hau: uri shid: lo" byug da:.

²¹Nyang: gi yuggi zoo: ri Elisha da" yab khyoo: vu, do, lo" lho: yhoeb cuang dang moo lo" lheing: to" wigi khoem" myhid" pyam da:.

²²Hau: thang: nyang: gi nya: yhoem: seing: phoo ri khe: yu lho: nyang: ri «Dei zoo: dayug ri hid: khyoo: loo zei: yo' nhang: kaid byid: la,. Ngoo Lapi: Elisha jhang yhi: ca" da:. Ge bui" yhi' myab wigi doem tau" loo wa» ga: tid da:.

²³Nya: yhoem: seing: phoo gi «Nang ciwim yoomo akhid" nyid" yhi: ca" wa lha". Labain nyid" we' anghoid. Lhammoo" xain" pui" we' anghoid» ga: myid: da:. Nyang: gi «Ci: aca"» ga: tu" da:.

²⁴Hau: thang: nyang: gi loo zei: dang moo do, zhung: wigi dei zoo: phoo ri «Loo zei: ri yo" myab yhi' myab sho' koin" we'. Ngoo atid tid gi ayoem" nhang:» ga: amyeing" byid: da:.

²⁵Hougsu" nyang: to' lo" wigi Elisha nyid da" Khamela boem khyoo: yhe: lo" da:. Elisha gi nyang: re" lo ziri vi: mo myang wigi nya: dei zoo: Gehazi ri «Yu" we' Shunem mo myiyi: myhi' re" lo da:.

²⁶Nya: jhang myab yhe: lho: nyang: yo' dage" nya: yhoem: seing: phoo- nya: zoo: gi yang" nyid boem la ein: ziri yhe: yu" we'» ga: tid. Nyang: gi Gehazi ri «Dangain" ge nyid» ga: lhoem: tid.

²⁷Nghoid loug we' nyang: Elisha jhang ju" vang ri" lang" nya: shidkhoin" moo goeb pid lho: Elisha khyid: moo zei: da:. Gehazi gi nyang: ri doin goin pyam wa soin' da:. Nghoid loug we' Elisha gi «Nyid nyid baja"- nyang: nheigloem: gye" nge nyid ziri nang amyang rhe". ASEING gi ngoo ri hau: ziyo' sen: zi ci: we' atid too" nghoid da» ga: tid da:.

²⁸Myiyi: myhi' gi nyang: ri «Nheigboo phoo we". Ngoo nang ri yuggi zoo: mho' yu" lha". Nga" myid byu khyoo: joem ri nang ayo" pyeing byid: wa ein: ngoo nang ri tid anghoid rhe"» ga: myid: da:.

²⁹Elisha gi Gehazi jhang khyoo: shu: wigi «Myab myab koid we' nga" lhamdung: ri yu ci: wigi yhe: loo" we'. Nang shau" go" da" byu yo' doem goo" wa atheing: nyid. Nang ri dayug yug dang: lhoem: tid ri doem phug tid wa ayo, abyid:. Yhoem: khyoo: dain: za: yhe: lho: nga" lhamdung: ri yuggi nu" adang moo yhe: ke" too" we'» ga: tid da:.

³⁰Myiyi: myhi' gi Elisha ri «Ngoo nang mo athu loo" wa ein: da" khyoo: ri ngoo jhug zug da" kangso' ASEING yo' nang ri ngoo jham' tang: da» ga: tid da:. Houg: lang" nya: eig yug dage" za: doem tau" lo" ago".

³¹Gehazi gi shid vhu" khyoo: yhe: lho: Elisha da" lhamdung: ri zooshang: adang moo yhe: ke" too" nghoid loug we' ce: thui: we' kangso' bo lo da" avoid ci: we' aboo nghoid da:. Houg: yoomo nyang: gi Elisha jhang thu lo" wigi «yuggi nu" aso" ri" nghoid da» ga: tid da:.

³²Elisha ju" lang" yuggi nu" gi yhoeb cuang dang moo shid: leung jo, ziri myang da:.

³³Nyang: gi khoem" myhid" pyam lho: ASEING ri akyu" mho' da:.

³⁴Hau: thang: nyang: gi yuggi nu" adang moo goeb lho: nya: nhoid- myojid"- lo, ri yuggi nu" da" nhoid- myojid"- lo, adang moo to" da:. Nyang: hau: yuggi nu" dang moo goeb jo, da" uri yuggi nu" da" gung gi loem lo da:.

³⁵Elisha to' re" lho: yab khoug: moo so" lheing yen" da:. Hau: thang: doem lo" wigi yuggi nu" adang moo doem lo" goeb nghoeb kaid da:. Yuggi nu" gi nyhed lheing: jhed: lho: nya: myojid" phang re" da:.

³⁶Elisha gi Gehazi ri khe: yu lho: yuggi nu" nya: myhi' ri lo" khi: loo wa shid re" nyang: ri tid kaid da:. Myiyi: myhi' ju" vang loo lang" Elisha gi nyang: ri «Re" yuggi nu" hid: the'» ga: lhoem: tid da:.

³⁷Nyang: gi Elisha da" khyid: yang: moo nya: myonhoo: myidgung moo tain" sho' goeb khyo' da:. Hau: thang: nyang: gi nya: yuggi zoo: ri shu" yu wigi thu lo" da:.

³⁸Dalheing: ri mungdain: goin" moo phang" khoug gyo" uri Elisha gi Gilgala khyoo: tau" lo" da:. Nyang: gi Lapi: daphung: ri jhoug" shid' nyid uri nyang: gi nya: dei zoo: ri myikhyoem' dang moo oug" zeing dakhyab xug lho: houg bang: shid re" xoin" yeing jhau' byid: wa tid da:.

³⁹Nyangnu" mo dayug gi dain" pa: khyoo: nghang" pho shoo: yhe: lo" da:. Nyang: gi nei lam" dagam yhe: myang wigi nyang: yo" vu, nhoo' ashi" ri phyo' vu, da:. Nyang: houg joem ri vu, lo wigi houg joem gi ci: nghoid zi ase' ziyo' ajab jab yham" lho: zooxoin" oug" moo: kaid da:.

⁴⁰Hau: zooxoin" yeing ri byu joem zoo: wa khu" byid: da:. Nghoid loug we' nyangnu" zo: kaid yo' dage" Elisha ri «He: zi myino nghoid» ga: tid kyo" lho: azoo: goo" nghoid da:.

⁴¹Elisha gi zoo: noem dajhi' ri mho' lho: oug" khoug: khyoo: pyam zei kaid da:. Houg: lho: nyangnu" ri «Xoin" yeing doem khu" byid: ge'» ga: tid da:.

⁴²Gootu: dalheing: gi byu dayug gi Bala Shalisha mo hau: zain da" yoono, seig yo' koid da" zooyho' eig xi: loem: yo' gug seig dajhi' Elisha jhang khyoo: voin re" byid: da:. Elisha gi hau: joem ri Lapi: phung: bang: ri byid: zhoo" wa shid re" nya: dei zoo: phoo ri tid.

⁴³Nghoid loug we' nyang: gi «Byu dashoo: yug shid re" he: zi tham: wa ein: nang jho: rhe"» ga: tid da:. Elisha gi «Hau: ziri nyangnu" ri byid: zhoo" we'. Ciwim gari nyangnu" zo: lho: dayham" lang" we' deing shi" wa ga: ASEING tid da» ga: phug tid da:.

⁴⁴Houg: yoomo dei zoo: gi nyangnu" ri zoo: noem gam byid: lho: ASEING tid ziyo' dakhyo" nyangnu" dangain" bang: zo: wigi dayham" deing ashi".