Read Lashi 2 KHOKHAM 6 Bible Online

2 KHOKHAM 6 - Lashi bible

2 KHOKHAM 6

¹Danyid" gi Elisha wigi vhu" she: nyid da" Lapi: daphung: gi nyang: ri «Ngoonu" nyid da" joyoo gi sung nge da:.

²Ngoonu" nyid wa da" joyoo koid wa shid re" Yodan gyid lang khyoo: seig yhe: thug yu wa ngoonu" ri akhang" byid: la,» ga: myeing" myo: da:. Elisha gi «Ge» ga: tid da:.

³Nyangnu" mo dayug gi nyang: ri houg: bang: yo' cang yhe: wa tid wigi nyang: we' myid veing" da:.

⁴Houg: lho: nyangnu" dage" yhe: lo" ago". Nyangnu" Yodan gyid lang moo ju" lang" moo" yhe: zei: ago".

⁵Nyangnu" mo dayug gi seiggam thug lheing: kaid uri nyeigdain tung" nya: voozung: gi gyid khoug: khyoo: gyoid, gyo" vang loo" khare" da:. Nyang: gi Elisha ri «Aseing we" Ngoo khasu" koid wa lha". He: zigi ngho" ci: da" voozung: danghoid» ga: tid kyo".

⁶Elisha gi «Khamoo: gyoo" lo" la"» Hau: yug gi nyang: ri joyoo toin" shed da:. Houg: lang" Elisha gi seig dakung: ri khyau" yu wigi hau: ziri gyid khyoo: pyam zei kaid da:. Houg: lang" voozung: gi gyid dang khyoo: myu: gyam" thu re" da:.

⁷Elisha gi «Xue" yu we'» ga: amyeing" byid: da:. Hau: yug gi goeb gyoo" yhe: lho: xue: yu da:.

⁸Suri khokham gi Israela byu yi yo' gyi zain: boem ago" da:. Nya: gyizoug: yi yo' byen phyoo" sham: lho: nya: dab koid wa joyoo ri khyen: da:.

⁹Nghoid loug we' Elisha gi Israela khokham phoo ri hau: joyoo khyoo: atab yhi:. Ciwim ga ri Suri byu yi houg: moo gau" lhoem: nyid ago" ga: tid poin" da" dang: pyeung: kaid da:.

¹⁰Houg: yoomo Israela khokham gi hau: joyoo moo nyid da" bang: ri tid poin" wigi nyangnu" zid" nyid ago". Hid su" myoo" sho' lheing: bue" da:.

¹¹Suri khokham gi hid su" bue" ziri gye" nheigloem: apyoo: nghoid da:. Nyang: gi nya: zoug: yiri khe: yu lho: nyangnu" ri «Nanu" mo khayug gi Israela khokham shoid khyoo: bo la"» ga: myid: da:.

¹²Nyangnu" mo dayug gi «Aseing: khokham we"- hang" we' anghoid. Lapi: Elisha gi nanya: yab moo sam: za: khau" tid da" dang: rilang" Israela khokham ri tid kyoo" byid: da:» ga: tid da:.

¹³Khokham phoo gi «Nyang: khamoo: nyid ziri shoo: we'. Ngoo nyang: ri myheig yu wa» ga: tid da:. Elisha gi Dothan moo nyid da: ga: nyang: ri tid kyoo" lang".

¹⁴Nyang: gi gyiphung: moo" yo' myang: joem gyi myang: rheing" joem ri houg khyoo: nhang: kaid da:. Nyangnu" gi voogung khyoo: myen" ri ju" yhe: wigi yhe: vang: to" ago".

¹⁵Thang: nyid" nab soin: no' Elisha da" dei zoo: to' re" lho: yhoem: mo thu lo" ri Suri gyizoo: yigi myang: joem gyi myang: rheing" joem yo' voogung ri vang: lheing to" boem ziri yhe: myang da:. Nyang: gi Elisha jhang doem tau" lo" wigi «Yhoem: seing: we"- ngoonu" gi joem: bye:- cisu" koid wa la"» ga: myid: da:.

¹⁶Elisha gi «Agyug noo"- nyangnu" shoid moo: nyid bang: tho' ngoonu" shoid moo: nyid bang: je myo:» ga: tid da:.

¹⁷Hau: thang: nyang: gi «O" ASEING we" nya: myojid" ri phang byid: wigi nyang: ri myang nhang: we'» ga: akyu" mho' da:. ASEING gi Elisha da" akyu" mho' dang: ri tam" gyoo: byid: da:. Elisha da" dei zoo: nghang yu" kaid ri bau gung khyid: moo: myang: joem myi: gyi myang: rheing" joem byeung" jo, wigi Elisha da" lheing khoem moo nyid boem ziri myang da:.

¹⁸Suri byumyu" yi meing: zain: loo lang" Elisha gi «O" ASEING we"- hau: byu joem ri myo, jid, nhang: we'» ga: akyu" mho' da:. ASEING gi nya: akyu" mho' dang: ri tam" gyoo: byid: wigi nyangnu" ri myo, jid, nhang: da:.

¹⁹Hau: thang: Elisha gi nyangnu" jhang yhe: wigi «Nanu" khyoo: vhang: vhang: nyid ago". He: voogung gi Nanu" sho: nyid da" voogung anghoid. Nga" thang: cang we'. Nanu" cang sho: nyid boem su: jhang khyoo: ngoo shu" yhi: wa» ga: tid. Houg: lho: nyang: gi nyangnu" ri Samari khyoo: shu" lo" da:.

²⁰Nyangnu" voomoo" khoug: khyoo: vang yhi: yo' Elisha gi «ASEING we"- nyangnu" da" myojid" ri phang byid: wigi myo, myang nhang: we'» ga: akyu" mho' da:. ASEING gi nya: akyu" mho' dang: ri tam" gyo: byid: da:. Nyangnu" myojid" ri doem myang nhang: wigi nyangnu" Samari voogung khoug: moo nghoid nyid boem ziri nyangnu" myang boem ago".

²¹Israela khokham phoo gi Suri byumyu" yiri myang lang" Elisha ri «Nheigboo phoo we"- houg: bang: ri ngoo said pyam zi rhe". Houg bang: ri ngoo said pyam zi rhe"» ga: myid: da:.

²²Elisha gi «asaid- gyi khaid jang" mo nang myheig yu da" gyizoo: yiri lang" nang asaid pyam nghoid da:. Nyangnu" ri zoo: noem yo' shug gyid byid: zhoo" byid: jhug ge'. Nyangnu" ri nyangnu" khokham jhang doem tau" loo" nhang: la» ga: tid da:.

²³Houg: yoomo Israela khokham phoo gi nyangnu" ri zooshug pui" zeing nyang: doo" byid: wigi nyangnu" bain zoo: bain shug lang" Suri khokham jhang nyangnu" ri doem nhang: kaid da:. Hau: bidnyid mo Suri byu yigi Israela mung" ri gyi khaid zi theing: pyam ago".

²⁴Dayo, zoo: myang" thang: ri Suri khokham Behadad gi nya: gyidab dangain" ri shu" wigi Israela ri gyi khaid thougtheung lho: Samari voomoo" ri vang: ci: boem ago".

²⁵Hougsu" vang: ci: yoomo voomoo" khoug: moo zoo: noem xoo: sho' phang" khoug gyo" da:. Loo zei: vhuloem daloem: gi ngei shid xi:- pheing" kyoug" khyid" 6 rung gi ngei wim: pyi" nghoid byug da:.

²⁶Israela khokham voomoo" vang" khyam: dang khyo" so" lid: lo" uri myiyi: myhi' dayug gi «Aseing: khokham we"- ngoo ri pang" yu la,» ga: yoid ngau da:.

²⁷Nyang: gi «ASEING za: nang ri apang" rigi ngoo gi nang ri ciyo" bo pang" thoug wa la". Ngoo gi sung soo: yo' zabyid yhid: yo" rhe".

²⁸Nang ce" noem yau: khi" shoug" nyid» ga: myid. Nyang: gi «Akhayo, nyid" he: myiyi: myhi' gi nga" zoo: ri zo: wigi thang: nyid" nya: zoo: ri zoo wa shid re" phajhi" byid: da:.

²⁹Houg: yoomo nga" eig yug gi nga" zoo: yuggi nu" ri jhau' zo: pyam bye:. Hau: thang: nyid" ngoo nyang: ri nya: zoo: yuggi nu" ri zoo: shang ein: ngoo tid nghoid loug we' nyang: gi nya: yuggi nu" ri shoung: pyam da» ga: tid da:.

³⁰He: ziri shoug" gyoo: lang" khokham phoo gi gyoug dain ziyo' nya: byimi ri lang: ceig pyam da:. Vang" khyam: nam moo tab za: nyid bang: gi nya: byimi akhoug: moo: jid: moo" byimi void ci: ziri shau" myang ago".

³¹Nyang: gi «He: bid agyoem shi" ri Elisha da" vhuloem ngoo ayo" phyed pyam byid: rigi Mangsoo ngoo ri said pyam baja"» ga: tid da:.

³²Houg: lho: nyang: gi Elisha ri myheig yu wa shid re" lagyoo: nhang: kaid da:. Hau: ayo, moo Elisha gi nya: jhang lam" re" da" ludaid yi yo' dage" yhoem: moo: nyid nyid da:. Khokham pho da" lagyoo: yi ajui" ri" shi" ri Elisha gi hau: ludaid yiri «Hau: byu said yug gi re" said wa shid re" byu nhang: kaid abye:. Akhid" nyang: hid khyoo: ju" ri" lang" khoem" myhid" pyam ge'. Nyang: ri avang re" nhang: goo". Khokham phoo nyang: we' nya: thang: moo nghoid da» ga: tid da:.

³³Nyang: he: dang: tid yau: nyid uri Khokham phoo ju" re" wigi «Nanu" ri he: yau: khi" bui" nhang: su: gi ASEING nyang: nghoid da:. Ngoo ciwim yoomo daja: ja: koid wa nyang: ri lang" nyid loo: wa la"» ga: tid da:.