Read Lashi 2 KHOKHAM 7 Bible Online

2 KHOKHAM 7 - Lashi bible

2 KHOKHAM 7

¹Elisha gi «ASEING tid da" dang: ri tam" gyoo: we'. Nab yo nyid" he: ayo, moo nang gi Samari voogung mo ge thang da" sungsoo: 2 joid: 30 rung nghoid nghoid Yoono, 5 joid: dakyen" ri nghoid nghoid ngei dapyi" yo' yo" qei yu ri" wa» ga: tid da:.

²Khokham pho da" lagyoo: phoo gi Elisha ri «ASEING nyang: houg jang: nyang: shivoo: ri khyo' byid: rilang" hau: zi age bui" wa» ga: tid da:. Elisha gi «Nang gi hau: zi bue" ziri shau" myang wa. Nghoid loug we' nang gi hau: zoo: noem ciri we' shoug" zoo: wa zi anghoid» ga: phug tid da:.

³Manggam dab da" byu myid: yug gi Samari voogung khoem" moo" duang: tunggung shoid moo nyid boem ago". Nyangnu" nyang: cang" «Ngoonu" shid: sho' ciwim yoomo hid: moo lang" nyid wa lha".

⁴Voomoo" khyoo: vang loo" wa ci: akyu" aboo. Ciwim ga: ri houg moo: ngoonu" zoo lo" yoid shid: zi za: nghoid da:. Ngoonu" hid: moo nyid nghoid loug we' ngoonu" shid: wa zi za: danghoid. Houg: yoomo Suri byu yi dab khyoo: yhi: shang. Xo: thang gi nyangnu" ngoonu" ri said pyam boem wa. Nghoid loug we' nyangnu" gi ngoonu" da" kangso' ri dei nhang: abe» ga: tid ago".

⁵Houg: yoomo moug: coid zoo" ri nyangnu" Suri byu yi dab khyoo: yhe: lo" ago". Nghoid loug we' nyangnu" houg: khyoo: ju" uri houg moo dayug we' anyid loo: nghoid ago".

⁶ASEING gi Suri byumyu" yiri myang: joem gyi myang: rheing" joem yo' gyidab moo" zeing ju" re" nyid da" thui: yhang: te" ziri shoug" gyoo: nhang: da:. Houg: lho: Suri byumyu" yigi nyangnu" ri zain: wa shid re" Israela khokham gi Hiti yo' Egutu' khokham yo' nyangnu" gyizoo: yiri lhoung: boem tuang ga: jho: ago".

⁷Houg: yoomo hau myen myen" thang: ri Suri byu yigi nyangnu" kangso' shid re" phang: lo" wigi nyangnu" zoem" joem myang: joem loo zei: joem yo' dab joem ri to" too" kho' ago".

⁸Hau: byu myid: yug dab yam moo ju" yhe: lang" nyangnu" gi zoem" khoug: khyoo: vang yhe: lho: houg moo jo, ziri yhe: zo: yhe: shug wigi ngei- sheing:- nyangnu" myang da" byimi ri gab vu, ci: lho: thu lo" wigi yhe: shoung: to" ago". Hau: thang: nyangnu" doem tau" lo wigi gootu: zoem" daloem khyoo: vang yhe: lho: akhang: yo' dakhyoo" ti" koid bye:.

⁹Nghoid loug we' hau: thang: ri nyang: cang" nyang: «Ngoonu" hidsu" age koid wa. Ngoonu" gi lu dang: gi yo" lho: ngoonu" za: age zau" too" nghoid da:. Ngoonu" gi he: ziri tid wa nab kyoo' ju" sho' lang" nyid ri ngoonu" gi gyeing" nyang: yooboo dam byid: zi shoug" wa nghoid. Akhid" nyang: lo" lho: khokham pho da" zoug: phoo yiri lo" tid kyo" boem shang» ga: tid ago".

¹⁰Houg: yoomo nyangnu" gi Suri dab mo to' yhe: lo" wigi Samari voomoo" khyoo: tau" lo" ago". Houg: lho: vang khyam: khoem" moo" duang: zung" su: ri khe: yu lho: «Ngoonu" gi Suri byu yi dab khyoo: yhe: wigi byu dayug we' amyang- ce: thui: we' ashau" gyoo:- myang: joem yo' loo zei: joem ri we' tei" aphid:- zoem" joem ri we' Suri byu yi too" kho' zi ce: ashai" nghoid da» ga: tid.

¹¹Zung" bang: gi hau: lu dang: ri fu" kaid yo' hau: zigi khokham khoo" kyoo: lo" tid kyo" ago".

¹²Myen" nghoid ashi". Nghoid loug we' khokham phoo gi yhoeb cuang mo to' lho: nya: zoug: yiri «Suri byu yi cisoin' nyid ziri ngoo tid kyoo" ba. Hid: moo phang" khoug gyo" nyid bye: ziri nyangnu" si' yoomo nyangnu" boem moug: cang yhe: gau" nyid zi nghoid wa. Nyangnu" gi ngoonu" ri hid: bangzoo: noem shoo: wa shid re" voomoo" ri too" kho' boem abe ga: jho: lho: hau: thang: ngoonu" ri adei re" myheig yu wigi voomoo" ri seing: yu pyam wa myid nyid ago"» ga: tid da:.

¹³Nya: da" zoug: yi mo dayug gi «Cisu" nghoid nghoid shid: byug bye: bang: yo' dakhyoo" hid: moo: nyid boem da" voobyu yigi joem: zi bye:. Houg: lho: cibue" bye: ziri ngoonu" si' wa shid re" deing da" myang: wim: du: yo' byu dayham" ri nhang: kaid shang» ga: tid da:.

¹⁴Nyangnu" byu dayham" ri khyen: yu lho: khokham phoo gi Suri gyidab cibue" bye: khyoo: ri yhe: yu" wa pyeing: dang: yo' dage" gyi myang: rheing" eig loem: moo houg bang: ri nhang: kaid da:.

¹⁵Houg bang: gi Yodan gyid lang ju" sho' yhe: ago". Suri byu yi phang: lo" zoo" ri nyangnu" she: pyam too" kho' da" byimi yo' gyizi gyikhoo: joem ri khyoo: thang sho' moo: shau" myang boem ago". Hau: thang: nyangnu" doem tau" lo" lho: khokham phoo ri lu dang: lo" kyo" ago".

¹⁶Samari voobyu yi tang" thu yhe: lho: Suri byu yi dab moo lanyhoeb yhe: koid: yu ago". Hau: thang: ASEING tid to" ziyo' dakhyoo" ti" ge thang da" sungsoo: 2 joid: 30 rung yo' Yoono, 5 joid: dakyen" ri ngei dakyab' yo' oung" ago".

¹⁷Israela khokham phoo gi nya: lagyoo: phoo ri khoem" moo" duang: ri zung" da" zoug: koid nhang: to" da:. Hau: zoug: phoo gi khokham phoo Elisha ri ye: shau" da" uri Lapi: pe: to" ziyo' dakhyoo" ti" voobyu yi wigi nang: said pyam zi shau" da:.

¹⁸Thang: nyid" hau: ayo, moo Samari moo ge thang da" sungsoo: 2 joid: 30 rung yo' Yoono, 5 joid: dakyen" ri ngei dapyi" yo' oung" ri" goo" wa ga: Elisha wigi khokham phoo ri tid da" dang: ri

¹⁹hau: zoug: phoo gi «ASEING nyang: houg jang: nyang: shivoo: ri khyoo' byid: rilang" hau: zi age bui" ga: tid da:. Houg: yoomo Elisha gi ‹Nang gi hougsu" bue" ziri shau" myang wa nghoid loug we nang gi hau: zoo: noem ciri we' ashau" zoo: wa» ga: phug tid bye:.

²⁰Houg yo' dakhyo" nyang: moo bue" da:. Voomoo" khoem" moo" duang: moo: voobyu yi wigi nang: nhe" said pyam yoomo shid: lo" byug da:.