Read Lashi 2 KHOKHAM 8 Bible Online

2 KHOKHAM 8 - Lashi bible

2 KHOKHAM 8

¹Akhid" Elisha gi nyang: wigi yuggi zoo: ri kangso' doem dei byid: da" Shunem mo myiyi myhi' ri ASEING gi hau: mungdain: ri phang" khoug nyhed zain khoug nhang: wa houg: yoomo nya: yhoem: byu yi yo' dage" to' yhe: lo" wigi gootu: joyoo moo yhe: nyid goo" wa shid re" tid da:.

²Hau: myiyi myhi' gi Elisha dang: ri cang lho: nyang: yo' nya: yhoem: byu yigi Philisti mung" moo nyhed zain yhe: nyid wa shid re" to' yhe: lo" byug da:.

³Nyhed zain thang lo" da" ayo, moo: nyang: gi Israela mung" khyoo: tau" lo" wigi nya: yhoem:- nya: mougmyid ri mho' yu wa shid re" khokham pho jhang yhe: da:.

⁴Elisha da" dei zoo: Gehazi gi khokham phoo yo' dang: tid go" nyid ziri yhe: myang da:. Khokham phoo gi Elisha koid da" mau" pho" alhoo: again joem ri si' nau da:.

⁵Shid: da" yug ri Elisha khasu" kangso' doem dei ri" nhang: da" khyoo: ri Gehazi wigi khokham phoo ri tid kyo" nyid uri myiyi: myhi' gi khokham phoo ri mho' yoid khyoo: koid da:. Gehazi gi nyang: ri «ASEING khokham we"- Elisha wigi doem dei ri" nhang: da" myiyi: myhi' da" yuggi zoo: yo' myiyi myhi' gi hid: moo: nyid da» ga: tid da:.

⁶Khokham pho da" dang: myid: ri phuid: byid: wigi Gehazi tid da" khyoo: gyeing" nghoid khyoo: ri bo tid da:. Houg: yoomo khokham phoo gi gyizoug: dayug ri khe: yu lho: nyang: yhe: nyid byug da" nyhed zain gyoo: mo nya: yoo mo thu da" shivoo: shiloem dangain" da" aphoug" bo lho: nyang: seing: da" gu: ja: khang" moo" nyang: ri doem tau" byid: wa shid re" tid kaid da:.

⁷Suri khokham Benhadad no nyid da" ayo, moo Elisha gi Damasku khyoo: yhe: da:. Elisha houg moo: nyid khyoo: ri khokham phoo ri tid kyo" boem ago".

⁸Houg: lang" nyang: gi nya: da" gyizoug: yi mo Hazaela ri «Lapi: phoo ri jhungshug yhe: byid: lho: ngoo gi wa la'- agi wa la' ein: ziri si' wa shid re" ASEING ri myid: byid: wa shid re" nyang: ri yhe: mho' yoid we'» ga: tid da:.

⁹Houg: yoomo Hazaela gi Damasku moo koid da" ge thang da" zi aja: ja: ri Gola-ug myid: xi: du: dang moo: yoovoin byeung" sho' soin' voin, lho: Elisha jhang yhe: lo" da:. Hazaela gi Elisha ri yhe: shoug" lang" «Re" dei zoo: khokham Benhadad gi nya: noo mo ge loo wa la'- age loo wa la' ga: ziri nang ri myid: wa ngoo ri nhang: kaid da» ga: nyang: ri tid da:.

¹⁰Elisha gi «Nyang: shid: wa zi nghoid ga: ziri ASEING ngoo ri si' nhang: bye:. Nghoid loug we' nya: jhang lo" wigi nyang: noo gi wa ga: ein: lo" tid kyoo" we'» ga: nyang: ri tid da:.

¹¹Hau: thang: Elisha gi Hazaela myonhoo: mo nyang: ase' nyid loo sho' yu" gyoug sho' zhug yu" to" da:. Nyeigdain tung" Elisha gi ngoug byid thu re" da:.

¹²Hazaela gi «Ludaid phoo we"- nang ciwim yoomo ngau nyid la"» ga: myid: da:. Houg: lang" Elisha gi «Israela byumyu" yi adang moo nang yu" gyoug sho' da" gyi koid ri" wa ziri ngoo si' yoomo nghoid. Nang gi nyangnu" gyidab joem ri myi: nghe'- bue" thang da" nyangnu" zooyam yiri said- nyangnu" da" zoonu" yiri du" said- zoonu" gung lid: da" myiyi: yiri voem: dau: thau" khyam" pyam ri" wa» ga: tid.

¹³Hazaela gi «Ngoo gi khasu" houg yhi' yoem: so' yo" ri" wa lha". Ngoo gi cibui" yug anghoid» ga: tid da:. Elisha gi «Nang Suri khokham bue" ri" wa khyoo: ASEING ngoo ri ci: shug bye:» ga: phug tid da:.

¹⁴Hazaela gi Benhadad jhang tau" lo" da:. Benhadad gi nyang: ri «Elisha khasu" tid la"» ga: lhoem: myid: da:. Hazaela gi «Nang gi gyeing" nyang: ge ri" wa ga: nyang: ngoo ri tid da» ga: tu" da:.

¹⁵Nghoid loug we' thang: nyid" ri Hazaela gi mi dakhyab ri yu lho: hau: ziri gyid teig wigi khokham phoo ri zeung" said pyam da:. Houg: lho: Hazaela gi Benhadad da" khoo: moo: Suri khokham xo' koid da:.

¹⁶Ahab da" yuggi zoo: Yoram gi Israela khokham khyo" vhoeb zi wim: zain nghoid uri Yehoshaphad da" yuggi zoo: Yehoram gi Yuda khokham bue" lo da:.

¹⁷Nyang: gi nya: apyaid soem" xe: eig zain moo khokham bue" wigi Yerusalem moo shed zain vhoeb da:.

¹⁸Nya: yhoem: seing: myhi' gi Ahab' da" myiyi: zoo: nghoid wigi nyang: gi Ahab' yhoemkhung: yhang: ti" Israela khokham yi da" akhyeing" da" khyoo: moo cang da:. Nyang: gi ASEING ri yooboo koid thougtheung da:.

¹⁹Nghoid loug we' ASEING gi Yuda mung" ri anau phyo' shoin' pyam nghoid da:. Ciwim ga: ri nyang: gi nya: dei zoo: David ri nya: amyed ashen yi xo' lho: khanham we' vhoeb wa dangsoo" byid: to" yoomo nghoid da:.

²⁰Yehoram vhoeb nyid da" ayo, moo Edom gi Yuda ri thougtheung gyi koid lho: loid byoin da" mungdain: bue" lo da:.

²¹Houg: yoomo Yehoram gi Edom gyidab vang: to" da" Zaira khyoo: nya: gyi myang: rheing" dangain" yo' to' yhe: lo" da:. Nyang: yo' nya: gyi myang: rheing" joem mo zoug: yigi myen" ri houg mo baid kho' thu loo" wa koid lho: phang: loid lo" ago". Nya: gyizoo: yigi nyangnu" yhoem: khyoo: byo lo" boem ago".

²²Hau: ayo, mo shid" lho: Edom gi Yuda da" lo, mo loid byoin da" mungdain: nghoid da:. Hau: ayo, moo nyang: Libna voomoo" ri we' gyi koid bye: da:.

²³Yehoram koid da" gootu: ja: khang" moo" gi Yuda khokham yi da" mhoomyid: shen" dam pug moo lhid" xoem" to" ago".

²⁴Yehoram shid: lo" wigi David da" voomoo" khokham loeb moo myhoeb pyam ago". Houg: lho: nya: yuggi zoo: Ahazia gi nya: khoo: moo: khokham xo' koid da:.

²⁵Ahab da" yuggi zoo: Yoram gi Israela khokham khyo" vhoeb zi daxe: eig zain moo Yehoram da" nya: yuggi zoo: Ahazia gi Yuda khokham bue" lo da:.

²⁶Nyang: gi nya: apyaid eig xe: eig zain moo khokham bue" wigi Yerusalem moo dazain vhoeb da:. Nya: myhi' gi Athalia nghoid da:. Athalia gi Ahab da" nya: zoo:- Israela khokham Omri da" nya: myid: zoo: nghoid da:.

²⁷Ahazia gi myiyu yoobyen khyoo" khokham Ahab yo' xo' tei" wigi nyang: gi Ahab da" yhoemkhung: bang: koid ziyo' dayhang: ti" ASEING ri thougtheung yooboo shoid da:.

²⁸Khokham Ahazia gi Suri khokham Hazaela yo' gyi zain: jang" moo Israela khokham Yoram yo' shoin" go" da:. Gyi dab joem gi Gilead mung" mo Ramod voomoo" moo gyi zain: wigi Yoram gi meing: zain: jang: moo: dam dab da:.

²⁹Nyang: gi nya: dam ri ze: gi wa shid re" Yezrela voomoo" khyoo: tau" phang: lo" da:. Ahazia we' houg khyoo: nya: jhang lam" yhe: da:.