Read Lashi 1 KHOKHAM MHOOMYID: 11 Bible Online

1 KHOKHAM MHOOMYID: 11 - Lashi bible

1 KHOKHAM MHOOMYID: 11

¹Israela byumyu" yi dangain" gi Hebron mo David jhang yhe: wigi tid boem zigi «Ngoonu" gi re" shoo" re" suid" nghoid.

²Lai lo da" ayo,- Sholu gi ngoonu" da" khokham koid nyid uri lang" nang gi Israela byu yiri gyi khaid pui" shu" vhu" she: loo bye:. Nya: byumyu" yiri nang shu" vhu" she: wigi nyangnu" ri vhoebkhang" su: bue" loo wa ga: re" ASEING Mangsoo gi nang ri dangsoo" byid: too" bye:» ga: tid ago".

³Houg: yoomo Israela vhujhung: yi dangain" gi Hebron mo khokham David jhang re" lo ago". Nyang: gi nyangnu" yo' gyeung" shang: myid veing" bidnoem koid da:. Nyangnu" gi nyang: ri xu: joid byid: wigi Samuela khyo" wigi ASEING dangsoo" byid: to" ziyo' dayhang: ti" David gi Israela khokham bue" lo da:.

⁴ Khokham David yo' Israela byu yi dangain" gi Yerusalem ri gyi yhe: zain: ago". Houg moo: Yebu ga: myeing thu da" byu yi yo' hau: moug: mo nyid xoug" Yebusi byu yigi nyid boem ashi".

⁵Yebusi byu yigi David ri voomoo" khyoo: khanham we' ayo" vang yhi: wa ga: tid nghoid loug we' David gi nyangnu" da" Ziun gyidab voomoo" ri seing: yu pyam lho: hau: zigi «David Voomoo"» ga: myeing yo" lo da:.

⁶David gi «Yebusi byu yiri xang shi" said da" su: gi gyidab moo: gyizoug: bui" wa» ga: tid da:. David da" nhammoo" Zeruia da" yuggi zoo: Yoab gi gyi khaid pui" ri shu" vhu" she: wigi gyizoug: moo" bue" lo da:.

⁷David gi hau: gyidab voomoo" moo: yhe: nyid nyid yoomo hau ziri «David Voomoo"» ga: myheing ago".

⁸Nyang: gi voomoo" ri doem zhug da:. Boug gung da" bidthu shoid moo: myidzhoo" ri pyeing wigi koid shid" da:. Yoab gi voomoo" da" deing jo, du ri koid da:.

⁹Yoem: moo" bo ASEING gi: David yo' dage" nghoid yoomo David gi je je yoem: bo re" da:.

¹⁰Hid bang: gi David da" myeing gyi: da" gyizoo: yi myeing zhayhen" nghoid da:. Deing da" Israela byumyu" yi yo' dage" nyangnu" gi ASEING wigi dangsoo" byid: to" ziyo' nyang: ri khokham bui" sho' pang" thoug byid: wigi nyangnu" gi nya: mungdain: ri yoem: bo jo, sho' pang" thoug da:.

¹¹Xang: shi" yug gi Hakmoni kung: mo Yashobeam nghoid. Nyang: gi «Soem" yug» da" vhujhung: nghoid. Nyang: gi nya: lham: yo' byu soem" shoo: yug ri gyi zain: wigi nyangnu" dangain" ri gyipui" moo: said pyam da:.

¹²Myeing gyi: da" «Soem" yug» mo thang: dayug gi Ahohi kung: mo Dodo da" yuggi zoo: Eliaza nghoid da:.

¹³Nyang: gi Pasdamim gyi khaid pui" moo: David shoid khyoo" Philisti byu yiri gyi zain: da:. Israela byumyu" yi tang" phang: lo" nyid uri nyang: gi Yoono, yoo moo: nyid nyid da:.

¹⁴Houg: yoomo nyang: yo' nya: byu yigi yoo gung moo: joyoo yu wigi Philisti byu yiri gyi zain: ago". ASEING gi nyang: ri gye" oung: doid nhang: bye:.

¹⁵Danyid" ri gyizoo: soem" xi: mo soem" yug gi Adulam lug khyung: nam mo David nyid nyid da" lug pyung: khyoo: yhe: lo" da:. Hau: uri Philisti byu daphung: Rephim lang: khung" mo: dab koid nyid ago".

¹⁶Hau: ayo, moo: David gi bouggung mo gyidab moo: nyid da:. Philisti byu daphung: gi Bedlehem ri seing: yu pyam da:.

¹⁷David gi yhoem: khyoo: myid wigi «Bedlehem voogung khoem" nam moo: jo, da" gyid thung" mo gyid dayug yug ngoo ri kham: jhug yhoo: o"» ga: tid da:.

¹⁸Myeing gyi: da" gyizoo: soem" yug gi Philisti byu yi dab khyo" phyed vang yhe: wigi hau: gyid thung" mo gyid yhe: kham: yu lho: hau: ziri David jhang ci: loo" byid: da:. Nghoid loug we' David gi hau: ziri ashug nghoid da:. Hau: gungthid ASEING ri shugbyid: da" xoin" khyo" nyang: gi hau: ziri foid khyo' pyam lho:

¹⁹«Ngoo khasu" nyang: ayo" shug- he: zigi kangso' ri shug byid: pyam wigi koid to" da" byu yi da" suid" ri shug yhang: ti" nghoid nyid» ga: tid. Hougsu" yoomo nyang: hau: ziri ashug nghoid da:. He: joem gi myeing gyi: da" gyizoo: soem" yug agyug avoem koid da" moo" nghoid.

²⁰Yoab da nya: nhung" Abishai gi myeing gyi da" byu soem" xi: yug da" vhujhung: nghoid. Nyang: gi nya: lham: yo' byu soem" shoo: yug ri gyi zain: wigi nyangnu" ri said pyam bye:. Houg: lho: soem" xi: yug phung: moo: myeing gyi: lo da:.

²¹Nyang: gi soem" xi: yug mo myeing gyi: thang" yug nghoid wigi nyang: gi houg: bang: da" vhujhung: bue" lo da:. Nghoid loug we' nyang: gi soem" yug yhi' myeing agyi: nghoid da:.

²²Kabzela mo Yehoiada da" yuggi zoo: Benaia gi myeing gyi: da" gyizoo: nghoid da:. Nyang: gi yoem: bo da" Moba sarhi' eig yug ri said pyam zi bo bo wigi sarhi' moo" myoo" sho' ri koid su: nghoid. Dalheing: ri nyang: gi gyu: khyo' nyid da" bidnyid moo duang: daloem: khyoo: gyoo" yhe: wigi khang: khyi: dadu: ri said pyam da:.

²³Nyang: gi lham: sheing: zeing ci: su: nyhed pe: khyug lo, shi" myang: da" Egutu byu dayug ri we' said pyam da:. Benaia gi hau: su: ri thung" keing: wigi baid lho: Egutu byu da" lo, mo lham: ri lhoid yu wigi hau: su: ri said pyam da:.

²⁴Hau: joem gi soem" xi: yug mo dayug nghoid da" Benaia da" sarhi' moo" zoo" joem nghoid da:.

²⁵Nyang: gi soem" xi: yug da" phung: moo bug thu' su: nghoid da:. Nghoid loug we' soem" yu yhi' myeing agyi: shi" nghoid da:. David gi nyang: ri nya: kang: zung" vhujhung: khyo" to" to" da:.

²⁶Hid: bang: gi boug thu sheing" jhu" da" gootu: gyizoo: yi nghoid da:. Yoab da" nya: nhung" Asahela. Bedlehem mo Dodo da" nya: yuggi zoo: Elhana. Harod mo Shamod Peled mo Heleza Tekoa mo Ikesha da" yuggi zoo: Ira Anathod mo Abieza Husha mo Sibekhai Aho mo Ilai Netopha mo Maharai Netopha mo Bana da" yuggi zoo: Heled Benyamin moug: Gibea mo Ribai da" yuggi zoo: Ithai- Pirathon mo Benaia Gasha nam lang: khung" joem mo Hurai. Arba mo Abiela. Bahurum mo Azmaved Shalbon mo Eliaba Gizon mo Hashem Hara mo Shage da" yuggi zoo: Yonathan Hara mo Sakhara da" yuggi zoo: Ahiam Ura da" yuggi zoo: Eliphala Mekhera mo Hephera Pelon mo Ahiya Khamela mo Hezro Ezbai da" yuggi zoo: Naarai Nathan da" nya: nhung" Yoela Hagri da" yuggi zoo: Mibhara Amon mo Zeleg Berod mo Yoab da" gyi jonu" vu su: Naharai Yatira mo Ira yo' Gareb<(...)