Read Lashi 1 KHOKHAM MHOOMYID: 14 Bible Online

1 KHOKHAM MHOOMYID: 14 - Lashi bible

1 KHOKHAM MHOOMYID: 14

¹Turu khokham Hiram gi Phaga: phung: daphung: David jhang nhang: kaid da:. Nyang: gi David ri khokham kho" koid wa shid re" shamu seig thung"- lug baid bang:- lo, moo" zei: bang: ri byid: kaid da:.

²Houg: lho: David gi nyang: ri ASEING wigi khokham khyo" koid nhang: lho: nya: byumyu" yi gang mo nya: mungdain: ri nyid gi yab gi nhang: lho: nyang: ri khyen: sain' to" ziri myid boin: lo da:.

³David gi Yerusalem moo: yhoem: seing: myhi' myoo" sho' yu wigi yuggi zoo: myiyi: zoo: myoo" sho' yo" da:.

⁴Vhoo: moo: lhid" too" bang: gi Yerusalem moo: khu: bang: nghoid. Houg: bang: gi Shamua- Shoba- Nathan- Sholumon-

⁵Ibhara- Elishua- Elpeled-

⁶Noga- Nepheg- Yaphia-

⁷Elishama- Beliade yo' Elipheled bang: nghoid ago".

⁸Akhid" David gi Israela mung" goin" ri vhoeb da" khokham bue" nyid bye: ga: ziri Philisti byumyu" yi shau" gyoo: lang" nyangnu" gyidab gi David ri myheig yu wa shid re" to' yhe: lo" da:. Hougsu" yoomo David gi: nyangnu" yo' shau" goo" wa shid re" to' yhe: lo" da:.

⁹Philisti byumyu" yi Rephim lang: khung" moo: ju" yhe: lho: lhoid zo: nyid boem ago".

¹⁰David gi Mangsoo ri «Philisti byumyu" yiri ngoo gyi yhe: zain: wa la". Nang ngoo ri ung: doid nhang: wa la".» ga: myid: da:. ASEING gi «Yhe: zain: we' Ngoo nang ri ung: doid nhang: wa» ga: phoug tid da:.

¹¹Hougsu" yoomo David gi nyangnu" ri Bala- Perazim joyoo moo: gyi zain: lho: ung: yu pyam da:. Nyang: gi «Mangsoo gi gyid khyoid su" gyivoo yi gyidab ri lid phyed yhe: wa shid re" ngoo ri ci: da» ga: tid da:. Houg: yoomo hau joyoo ri Bala- Perazim ga: myheing ago".

¹²Philisti byumyu" yi tang" phang: lo" boem ri nyangnu" da" yu phara" soolhoo: ri too" kho' boem ago". David gi hau: joem ri nghe' pyam wa shid re" amyeing" byid: bye:.

¹³Dayo, zoo: ri Philisti byumyu" yigi langkhung" khyoo: doem re" lho: doem re" lhoid zoo: nyid boem.

¹⁴David gi Mangsoo ri dalheing doem myid: sham: yu" ri Mangsoo gi «Hid: mo gyi ayhe: zain- goo" shoid khyo" lheing yhe: wigi seig xu: gam joem anam khyo" nyangnu" ri gyi zain: wa shid re" soin jen" to" we'.

¹⁵Seiggam phyoo moo: gyi khaid ri" thui: ri nang shau" gyoo: lang" gyi zain: we'. Ciwim gari: Philisti gyidab ri ung: pyam wa shid re" ngoo gi re" shid khyoo: yhe: loo" wa» ga: tid.

¹⁶David gi Mangsoo amyeing" byid: to" ziyo' dayhang: ti" koid wigi nyang: gi Philisti byu yiri Gibeon mo zi Gezera khyoo: thang sho' khaid tau" pyam da:.

¹⁷David da" myeing gi khyi khang" moo" khyoo: fu" lo" lho: ASEING gi byumyu" khang" moo" David ri gyoug nhang: da:.