Read Lashi 1 KHOKHAM MHOOMYID: 16 Bible Online

1 KHOKHAM MHOOMYID: 16 - Lashi bible

1 KHOKHAM MHOOMYID: 16

¹Nyangnu" gi Dang: Theing Kuid: ri David wigi hau: shid re" koid too" byid: da" Zoem" khyoo: ci: lo" wigi hau: akhau: moo: to" to" da:. Hau: thang: nyangnu" gi xoin" joem yo' Zoem" khau: xoin" joem Mangsoo ri ngei" byid: da:.

²David gi xoin" joem ri bain ngei" byid: thang: ri ASEING myeing moo: byumyu" yiri mainkaid byid: lho:

³Nyangnu" dangain" ri zoo: shug gam byid: da:. Nyang: gi Israela mung" mo yuggi myiyi: yugkhang" moo" ri zooyho' dayho' yho'- shoo" kyug dajab, jab, yo' zabyid shi" kyug dajhi' jhi' byid: da:.

⁴David gi Dang: Theing Kuid: shidkhoin" moo: jikhoin" khoin" wigi Israela ASEING Mangsoo ri coung" lho: noku wa jang" moo: vhu" she: wa shid re" Levi byu dayham" ri khyen: sain yoovoin foin: to" da:.

⁵Asab ri vhujhung: khyo" Zekharia ri gi nya: pang" thoug vhujhung: khyo" yoovoin foin: to" da:. Yeiela- Shemiramod- Yehiela- Matithia- Eliaba- Benaia- Obed- Edom yo' Yeiela bang: ri teing joem baid nhang: da:. Asab gi jhabceing baid wigi

⁶khainjhung phoo eig yug nghoid da" Benaia yo' Yahaziela tang: gi Dang: Theing Kuid: shid vhu" moo: main: main: laboo" mhoid nhang: da:.

⁷David gi hougsu" khyoo" Asab yo' gootu: Levi byu yiri ASEING ri jikhoin" yo' coung" wa shid re" xang: shi" yoovoin byid: shid" da:.

⁸ASEING da" jeju" ri coung" byid: ge'- nya: da" gyi: sheung: nghoid thang khyoo: ri tid fu" byid: nyid ge'- nyang: zei: bye: da" moo" zoo" jid: zoo" joem byumyu" yiri tid kyoo" we'.

⁹ASEING ri jikhoin" yo' coung" nghei byid: ge'- nyang: koid shug bye: da- mau pho" moo" zoo" bain sho ri tid we'.

¹⁰Ngoonu" ri nyang: seung: ci: yoomo gau yi nyid ge'- nyang: ri nau loem khoug: bang- ngei pyo: gau yi nyid goo" baja".

¹¹Pang" thug baja" ga: mho' wa shid re" ASEING jhang khyoo: yu: zeung yhi: we'. Yaku amyed ashen yi we' Mangsoo zei: shug bye: da" alho: again joem yo' nyang: byid: too" bye: da" tarha" dang: kho khyoo: ri boin: so" nyid we'.

¹²Nya dei zoo: Abraham da- amyed ashen yiri nyang: khyen: yu bye: da" Yaku amyed ashen yi we' Mangsoo zei shug bye: da" alhoo: again joem yo' nyang: byid: too" bye: da" tarha" dang: kho khyoo" ri boin: so" nyid we'.

¹⁴ASEING gi ngoonu" da" Mangsoo nghoid- nya: amyeing" tarha" gi moug gyab, goin" bang: shid re" nghoid nyid

¹⁵Apyaid ato: shid re" Mangsoo koid to" da" nya: dang: theing ri khanham we' ato" myhed.

¹⁶ Nyang: gi Abraham yo' dang: theing koid to" wigi Isag yo' dangsoo" to" to" da:.

¹⁷ ASEING gi Yaku yo' dang: theing go" to" da:. Hau: zigi apyaid atoo: nghoid wa.

¹⁸«Ngoo nang ri Khanan mung" byid: wa hau: ziri nang shau" seing: wa ga:» ga: tid

¹⁹Mangso byumyu" yigi nghab, youg khyo" gi dajhi' kyeung zi nghoid. Nyangnu" gi Khanan mung" moo being" voo khyo" danyid nyid boem.

²⁰Nyangnu" gi damung" mo zi damung" khyoo: khokham mungdain: daloem: mo zi daloem khyoo: so" leung: yen" ago".

²¹ Nghoid loug we' Mangsoo gi nyangnu" ri doin: zeig zoo: wa da" akhang hang" ri we' abyid: nyid nghoid da:. Nyangnu" ri goem loem byid: lho: khokham yiri sadi byid: to".

²²Hau: sadi byid: da" dang: joem gi «Ngoo khyen: nyheung to" da" dei zoo: yiri anoo, nhang: goo- nga" Lapi: yiri azang" thung" goo"» ga: wigi tid to".

²³Mougmyid gyab goin" ASEING ri jikhoin khoin" ge' Nyang: ngoonu" ri khyoid yu bye: khyoo: ngeibu: lu dang: ri nyid" khang" nyid" tid fu" we'.

²⁴Byumyu" yiri nya: da" myonhoo: phung" yoeb- byumyu" cang: joeb, bang: ri Nya: da" gyi: thang moo" zoo" ri kho" kyoo" byid: nyid we'.

²⁵ASEING gi gyi: sheung: nyid yoomo atho' tid loo: sho coung" nghei moin: su: nghoid nyid yu phara" joem dangain" tho' moo nyang: ri myonhoo: ngi shab byid: wa zigi ge nyid.

²⁶Gootu: byumyu" dangain" bang: da" yu phara" joem gi soolhoo: za: date: nghoid nyid. Nghoid loug we' ASEING gi mougkhung: mougdi ri phain" so: to" abye:.

²⁷myonhoo: ngi lang: yo' phung" yoeb bugthu sheing" jhu" khyoo: gi Nyang: ri lheung khoem to" wigi yoem: zeing so, moo" yo' younglho' da" khyoo: joem gi Nya: da" Noku Yhoem: Moo" moo: dabyeung" jo.

²⁸Mougmyid gyab, goin" jang" mo byumyu" yi bain sho bang: we"- ASEING ri coung" nghei nyid ge'- nya: da" phung" yoeb yo' amyeing" yoem: so' ri coung" byid: nyid we'.

²⁹Phung bo da" ASEING myeing ri coung" we'. Xoin" alu ri nya: Noku Yhoem: Moo" khyoo: ci: ri" we'. Nyang: thu re" uri gyeung" shang: su: nyang: dayug ri khyeing" goeb pid we'.

³⁰Mougmyid dangain" gi nya: shidkhoin" moo: nain" nyid. Mougmyid gi joyoo moo geing: geing: teing teing jo, jo, wigi hau: zigi ayo" dei loeb nghoid da:.

³¹Mougkhung: yo' myidjang we"- gau yi nyid we'. ASEING gi khokham nghoid khyoo: ri byumyu" mungdain: yiri tid kyoo" we'.

³²Panglai: yo' hau: akhoug: mo dei noem khang" moo" myeing nyid da:. Mougmyid yo' hougmoo: jo, da" ja: khang" moo" gau yi nyid we'.

³³ASEING gi mougmyid ri re" vhoeb uri siyoo khoug: mo seiggam joem pyoo: yoomo nyho: nyid boem wa.

³⁴ ASEING gi ge nyid yoomo nyang: ri jeju" boin: nyid we'. nya: da" jheddab myid gi apyaid atoo: jo, jo, da:.

³⁵Nyang: ri «O" ngoonu" khyoid yu ASEING Mangsoo we"- ngoonu" ri khyoid yu la. Ngoonu" ri byumyu" yi mo khyoid yu lho: dage" zheing" foem: too" we'. Houg: lang" ngoonu" gi nang ri jeju" yo" boin: lho: re" gyeung" shang: myeing ri yo" coung" wa zi nghoid» ein: tid we'.

³⁶Israela ASEING Mangsoo ri coung" we'. Nyang: ri akhid" yo' apyaid atoo: moo: coung" we'. Hau: thang: byumyu" dangain" bang: gi «Amen» ein: tid lho: ASEING ri coung" we'.

³⁷Khokham David gi Dang: Theing Kuid: to" da" joyoo moo: koid da" noku coung" moo" moo: Asab yo' nya: Levi mang: nhung" yiri yoo, byeung" moo" voin wa shid re" moo" foin: to" da:. Nyangnu" gi nyangnu" moo" ri nyid" khang" nyid" hougmoo: zei: boem ago".

³⁸Yeduthun da" yuggi zoo: Obed Edom yo' nya: akung: ako' mo byu khyug xe shed yug gi houg: bang: ri pang" byid: ago". Hosa yo' Obed Edom tang: gi khoem" duang: ri lhoug zung" moo" moo: yoovoin yu bang: nghoid.

³⁹Khainjung Zadog yo' nya: khainjung byencang" yigi Gibeon mung" mo noku coung" joyoo moo: ASEING ri noku coung" moo" moo: yoovoin yu boem ago".

⁴⁰Nyangnu" gi ASEING wigi Israela byumyu" yiri byid: to" da" tarha" moo: lhid" to" ziri cang wigi nyid" khang" nyid" nab soin:- myen" thang: khang" moo" xoin" joem ri phoin: dang moo gung goin" nghe' ngei" byid: boem ago".

⁴¹Hougmoo: houg: bang: yo' dage" Heman- Yeduthun yo' gootu: bang: gi ASEING da" apyaid ato: jheddab myid ri coung" nghei jikhoin" khoin" wa shid re" khyen: yu zi shau" boem ago".

⁴²Heman yo' Yeduthun eig tang: gi laboo" moid- jhabceing baid- gootu: coung" nghei zi joem ri coung" nghei jikhoin" khoin" ure baid myheing jang" moo: we' yoovoin foin: too" shau" ago"- Yeduthun da" akung: ako' yigi khoem" duang: lhoug zung" jang" moo: yoovoin yu boem ago".

⁴³ Hau: thang: yugkhang" moo" yhoem: khyoo: lo" boem ago". David we' nya: yhoem: byu yi yo' dayo, zoo: lo" nyid wa shid re" yhoem: khyoo: lo" da:.