Read Lashi 1 KHOKHAM MHOOMYID: 20 Bible Online

1 KHOKHAM MHOOMYID: 20 - Lashi bible

1 KHOKHAM MHOOMYID: 20

¹ Hau: zain- zain vang khoem" ayo, moo: khokham yi gyipui" khyoo: lhung yhe: boem uri Yoab gi gyidab ri shu" vhu" she: wigi Amon mung" khyoo: jhen" vang yhe: da:. Nghoid loug we' khokham David gi Yerusalem moo: nyid nyid da:. Nyangnu" gi Raba voomoo" ri yhe: vang: wigi hau: ziri khaid zain: da:. Houg: lho: hau: ziri phyo' shoin' pyam da:.

²Amon byumyu" yi da" yu phara" soolhoo: Moleg moo: eig xi: joid: lid: da" sheing: bidmug dab da:. Hougmoo: bo da" phoug" dab lug dacab ri we' David yu wigi nya: bidmug moo: tab da:. Nyang: gi voomoo" mo lanyhoeb myoo" sho' ri we' shoem" yu da:.

³Nyang: gi voobyu yiri shoem" yu wigi seig sheig sheig moo"- joto' lakya:- voozung: ci: wigi moo" zei: nhang: da:. Nyang: gi Amon voogung gootu: dangain" mo voobyu yiri we' houg yo' dayhang: ti" koid da:. Hau: thang: nyang: gi nya: byu yi yo' Yerusalem khyoo: tau" lo" boem bye:.

⁴Hau: thang: Gezera moo: Philisti byu yi yo' gyi doem zain: boem ago". Hau: gyipui" gi Husha mo Sibekhai gi Sipai ga: myheing da" byu zeing dayug ri said pyam uri Philisti byu yi gyi soem" byug ago".

⁵ Philisti byu yi yo' zain: go" da" gyipui" dapui" moo gi Yaira da" yuggi zoo: Elhanan gi Gad mo Goliad da" nya: nhung" Lami ri said pyam da:. Nya: da" lham: gi yo, moo" cam" yhi' thu: da" lham: fu' dab da:.

⁶Gootu: gyipui" daloem: Gad moo: doem bue" wigi hougmoo: lo, nyhoug" khyoug nyhoug" khyid: nyhoug" khyoug nyhoug" dab da" byu zeing dayug yug nyid da:. Nyang: gi goonham' mo byu zeing yi da" amyed ashen dayug nghoid.

⁷Nyang: gi Israela byu yiri aphoug" akhyoid koid lho: David da" nya: mang: Shama da" yuggi zoo: Yonathan gi nyang: ri said pyam da:.

⁸David yo' nya: byu yi wigi said pyam shau" boem da" he: byu soem" yug gi Gad mo byu zeing yi da" amyed ashen yi nghoid.