Read Lashi 1 KHOKHAM MHOOMYID: 21 Bible Online

1 KHOKHAM MHOOMYID: 21 - Lashi bible

1 KHOKHAM MHOOMYID: 21

¹Satan gi Israela byu yi dang moo yau: khe" kyi" khyeug bui" nhang: nau wigi nyang: gi byu zhayhen" koid: yu wa David ri myid phyed nhang: da:.

²David gi Yoab ri yo' gootu: zoug: yiri «Israela mung" goin" khyoo: goem: so' yhe: lho: mung" byu yiri nghab loo we'. Nyangnu" khamyhoo' nghoid ziri ngoo si' nau» ga: ti da:.

³Yoab gi «Aseing: khokham we"- aseing: gi akhid" Israela byumyu" yi nyid nyid myhoo' tho' nyangnu" ri dashoo: zhang myoo: nhang: baja" o". Houg: bang: dangain" gi re" dei zoo: yi nghoid. Nang he: ziri yo' byumyu" mungdain: goin" ri yooboo yoo" nhang: da" moo" ri ciwim koid nau la"» ga: phug tid da:.

⁴Nghoid loug we' khokham gi Yoab ri amyeing" dang: cang nhang: da:. Yoab gi thu yhe: lo" wigi Israela mung" goem: sho' gyung: so" lo" da:. Hau: thang: Yerusalem khyoo: doem tau" lo da:.

⁵Nyang: gi khokham David ri gyi moo" yo" voin bye: bang: khamyhoo' nghoid ziri lo tid kyo" da:. Houg: bang: gi Israela mung" mo byu 1,100,000 yug- Yuda mung" mo byu 470,000 yug nghoid ago".

⁶Yoab gi khokham pho da" amyeing" dang: ri myid aveing" yoomo Levi kung: yo' Benyamin kung: mo bang: ri byu zhayhen" dayug ri we' akoid: yu nghoid da:.

⁷Hougsu" koid bye: khyoo: ri Mangsoo amyid vhoo: yoomo Israela byu yiri yooboo dam byid: da:.

⁸David gi Mangsoo ri «Ngoo gi he: moo" koid wigi gyoug pho" yooboo shoid loo bye:. Jeju" mo nga" yooboo mo khyoid pyam byid: la- ngoo gi koo" moo" zei: loo bye:» ga: tid.

⁹Houg: lang" ASEING gi David da" lapi: Gad ri

¹⁰«Ngoo gi nyang: ri khyen: yu wa soem" ja: byid: to" da" khyoo: ri David ri yhe: tid kyoo" we' nyang: khyen: yu da" ja: ri ngoo koid wa» ga: tid da:.

¹¹Gad gi David jhang yhe: lho: ASEING tid da" dang: joem ri tid kyo" lho: hau: zigi «He: zigi ci bue" wa la"» ga: myid: da:.

¹²Soem" zain phang" khoug khoug wa la". Re" gyivoo yi lo, mo lhammoo" soem" khyab tang" phang: yen" wa zi rhe". Soem" nyid" agyoo: moo ASEING gi nya: shamcoin" wigi nang ri khaid zain: wigi re" mungdain: ri lang: yoem" gyoo" nhang: lho: nya: moug: lagyoo: wigi Israela damung" goin" ri shid: nhang: wa zi la". Ngoo ASEING ri khasu" ein: doem tid wa la"» ga: tid.

¹³David gi Gad ri «Ngoo gi gye" myid yau nyid bye:. Nghoid loug we'. Ngoo gi byu wigi yooboo dam byid: wa ziri avhoo:. ASEING gi nheig khyeug myid boo su: nghoid yoomo nyang: wigi nyang: ngoo ri yooboo dam byid: baja"» ga: phug tid da:.

¹⁴Houg: yoomo ASEING gi Israela byumyu" yi adang moo lang: yoem" gyoo" nhang: wigi byu nyhed moin ri shid: nhang: da:.

¹⁵Hau: thang: Yerusalem ri phyo' shoin' pyam wa shid re" moug" lagyoo: dayug ri nhang: kaid da:. Nghoid loug we' nya: nheigloem: thid pyam wigi moug: lagyoo: ri «Theing re- He: gu gi" bye:» ga: tid. Moug: lagyoo" gi Yebusi byu Arauna da" gug nang: jang: nam moo yab jo, da:.

¹⁶Moug: lagyoo: gi Yerusalem ri phyo' shoin' pyam wa jen" jen" koid lho: nya: lo moo shamcoin" ci: wigi moug: laid phyoo" moo yab jo, ziri David myang da:. Hau: thang: David yo' byumyu" yi da" vhujhung: yi dangain" bang: gi jid: moo" byimi void lho: myidjang khyoo: nyangnu" myonhoo: tain" sho' goeb pid da:.

¹⁷David gi «O" Mangsoo we"- yooboo koid su: gi ngoo danghoid. Byu zhayhen" koid: yu wa amyeing" byid: su: gi ngoo danghoid. He: nheig yu" khyeug tung" da" byumyu" yi cikoid bye: la". Nga" ASEING Mangsoo we"- ngoo yo' nga" yhoem: byu yiri yooboo dam byid: we'. He: re" byumyu" yiri teing too" we'» ga: akyu" mho' da:.

¹⁸ASEING da" moug: lagyoo: gi Gad ri Arauna da" gug nang: jang: moo ASEING shid re" phoin: daloem: yhe: koid wa shid re" amyeing" byid: wa tid da:.

¹⁹Gad wigi nyang: ri tid ziyo' dayhang: ti" David gi ASEING da" amyeing" dang: ri tam" gyo: wigi thu lo" da:.

²⁰Hau: yug nang: jang: moo Arauna yo' nya: yuggi zoo: myid yug gi sungsoo: nang: nyid ago". Nyangnu" moug: lagyoo: ri shau" myang boem lang" yuggi zoo: yigi tang" phang lo" wigi goug" jo, da:.

²¹Khokham David tab re" nyid ziri Arauna shau" myang yo' nyang: gi gug nang: jang: mo thu lo wigi nya: myonhoo: myidjang moo tain" sho' goeb pid da:.

²²David gi nyang: ri «Lang: yoem" ri thoem" pyam wa shid re" ngoo ASEING shid re" phoin: daloem: koid wa shid re" re" gug nang: jang: ngoo ri oung" byid: la. Ngoo nang ri gu byeung" sho' byid: wa» ga: tid da:.

²³Arauna gi «Aseing: khokham we"- yu" we' nang vho: khyo" koid we'. Phoin: tho' moo xoin" khyo" nghe' ngei" wa shid re" nuloo: joem hid: moo nyid da:. Thang" koid wa shid re" gug nang jang: mo seig thi" hid: moo jo. Houg: lho: xoin" khyo" ci: wa shid re" sungsoo: hid: moo jo. Hau: gu: dangain" ngoo nang ri byid: wa» ga: tid da:.

²⁴Nghoid loug we' khokham phoo gi «Hougsu" anghoid wa. Ngoo nang ri gu byeung" sho' byid: wa. Ngoo gi ngoo nyang: ci: athu loo: nang seing: da" jonu" ri xoin" khyo" koid wigi ASEING ri xoin" angei" byid: wa» ga: tid da:.

²⁵Houg: lho: nyang: gi Arauna ri gug nang: jang: shid re" sheing: khyug xi: pyi" aphau" byid: da:.

²⁶Nyang: gi hau: joyoo moo ASEING shid re" phoin: daloem: koid lho: nghe' ngei" xoin" yo' zoem" khau: xoin" ri ngei" byid: da:. Nyang: gi akyu" mho' wigi phoin: dang mo xoin" joem ri ngi" pyam wa shid re" mougkhung: mo myi: ri khyo kaid da" khyo" ASEING gi nyang: ri tu" byid: da:.

²⁷ASEING gi moug: lagyoo: ri nya: shamcoin" ri: shambyang mo: kaid pyam wa shid re" tid lang" moug: lagyoo: we' nya: dang: ri tam" gyo: da:.

²⁸Hid khyoo" wigi ASEING gi David da" akyu" mho' dang: ri tam" gyoo: byid: bye: ziri nyang: si' lang" Arauna da" gug nang: jang: mo phoin: tho' moo ASEING ri xoin" ngei" byid: da:.

²⁹Hau: ayo, moo dain" pyoid yoo moo Moshe wigi koid to" da" ASEING da" shidkhoin" mo zoem" yo' xoin" joem ri nghe' ngei" byid: da" phoin: gi Gibeon mo noku joyoo moo jo, jo, ashi".

³⁰Nghoid loug we' David gi Mangsoo ri noku wa hau: joyoo khyoo: ayo" yhi: nghoid da:. Ciwim ga: ri nyang: gi ASEING da" moug: lagyoo: da" shamcoin" ri gyoug yoomo nghoid da:.