Read Lashi 1 KHOKHAM MHOOMYID: 22 Bible Online

1 KHOKHAM MHOOMYID: 22 - Lashi bible

1 KHOKHAM MHOOMYID: 22

¹Houg: yoomo David gi «He: joyoo gi ASEING da" Noku Yhoem: Moo" joyoo bue" loo wa. Israela byumyu" yi xoin" nghe' ngei" byid: da" phoin: gi hid: moo nghoid loo wa» ga: tid da:.

²Khokham David gi Israela mung" moo nyid boem da" tungbau byu yi dangain" ri zeing: foem: wa shid re" amyeing" byid: kaid da:. Hau: thang: nyang: gi nyangnu" ri moo" zei: nhang: da:. Dayham" bang: gi Noku Yhoem: Moo" koid wa shid re" lugzeing ri kho' boem ago".

³Nyang: gi baid jen" wa shid re" yo' seig thi" khoem" joem koid wa shid re" joto' myoo: sho' byid: da:. Houg: lho: hang" ayo" leig loo: sho' myo: da" gyid: mid" joem ri byid: da:.

⁴Nyang: gi Turu yo' Sidon byu yiri shamu doem: myoo" sho' ri she: loo nhang: da:.

⁵David gi «Nga" yuggi zo: Sholumon koid wa da" Noku Yhoem: Moo" gi mougmyid tho' moo reung: wigi myeing gyi: ca" da:. Nghoid loug we' nyang: gi apyaid ngi shi" wigi gung shau" amyoo: shi" yoomo hau: shid re" ngoo nyheing soin" too" byid: ca" da» ga: myid da:. Hougsu" yoomo David gi: nyang: ashid: shi" uri: yhoem: koid seig voo: myoo" sho' jen" jen" koid to" da:.

⁶Nyang: gi nya: yuggi zoo: Sholumon ri khe: yu lho: Israela da" ASEING Mangso shid re" Noku Yhoem: Moo" koid wa shid re" nyang: ri amyeing" byid: da:.

⁷David gi nyang: ri «Nga" zoo: we"- ngoo gi nga" ASEING Mangsoo ri ngi: shab byid: wa shid re" Noku Yhoem: Moo" koid nau da:.

⁸Nghoid loug we' ngoo gi byu myoo" sho' ri said lho: gyipui" myoo" sho' zain: lo da: ga: ASEING ngoo ri tid da:. Hougsu" ngoo koid da" suid" shoin: moo" dangain" gang mo nya: shid re" Noku Yhoem: Moo" koid wa akhang" ngoo ri abyid: nghoid da:.

⁹Nghoid loug we' nyang: gi ngoo ri dangsoo" byid: da:. Nyang: tid zigi «Nang gi ngei pyoo: yug yoo tung" vhoeb wa yuggi zoo: dayug yo" loo wa. Ciwim gari ngoo gi nya: gyivoo yi dangain" bang: mo ngei pyo: yug yo khyoo: nyang: ri byid: wa. Nya: myeing gi Sholumon nghoid wa. Ciwim gari nyang: vhoeb da" ayo, gyoo: moo Israela byu yiri ngei pyoo: yug yo ziyo' goem loem zi byid: wa.

¹⁰Nyang: gi nga" shid re" Noku Yhoem: Moo" koid wa. Nyang: gi nga" zoo: nghoid wigi ngoo gi nya: phoo nghoid loo wa. Nya: da" khokham byuxeig gi Israela moo apyaid atoo: vhoeb loo wa» ga: tid da:.

¹¹David xo' tid zigi «Akhid" nga" zoo: we"- re" ASEING Mangsoo gi nang yo' dage" nghoid baja"- nya: shid re" Noku Yhoem: Moo" koid moo" moo oung: doid wa tid to" da" nya: dangsoo" ri bui" nhang: baja".

¹²Nya: tarha" yo' dayhang: ti" Israela byumyu" yiri nang yo' vhoeb khang" wa shid re" re" ASEING Mangsoo gi nang ri lasi phajhi" yo' phajhi" ju yi byid: baja".

¹³Israela byumyu" yi shid re" ASEING mo Moshe ri byid: da" tarha" nang cang pyeing nghoid ri nang oung: doid loo wa. Myid phyed wigi voem" myid boo we'. Ce: ja: we' nang ri agyug nhang:-

¹⁴Noku Yhoem: Moo" shid re" koem' gi ngoo yoem: kaid wigi sheing: soem: khyeing tain:- ngei soem" moin tain: koo: Noku Yhoem: Moo" koid wa shid re" yung: too" bye:. Hau: tho' agoo"- gyid: mid" boo" yo' joto' ri atho' leig loo sho' yung: too" bye:. Ngoo gi seig thung" yo' lugzeing ri we' jen" jen" koid too" bye:. Nghoid loug we' nang je" koid ca" ashi".

¹⁵Nang moo" zei: bang: myoo" sho' yo" da:. Houg: moo lug baid moo" mo lug kho' bang:- zhoothung" zhang bang: yo' lo, moo" zei: bang:- houg: yo' dayhang: ti" sheing:- ngei- gyid: mid"- joto' yo' koid moo" moo jhang: da" moo" zei: bang: myoo" sho' yo" da:.

¹⁶Akhid" moo" zoo" ri koid shid" loo" re, ASEING gi nang yo' dage" nghoid baja".

¹⁷David gi Sholumon ri pang" wa shid re" Israela vhujhung: yi dangain" ri amyeing" byid: da:.

¹⁸Nyang: gi «Nanu" ASEING Mangsoo gi nanu" yo' dage" nghoid wigi ja: khang" moo" moo nanu" ri yug yo myenjham" khyoo: byid: nyid. Nyang: gi ngoo ri he: mougmyid moo lhung nyid boem da" byumyu" yi dangain" ri oung: pyam nhang: wigi akhid" houg: bang: gi nanu" yo' ASEING da" byu yi bue" nyid boem.

¹⁹Akhid" nanu" ASEING Mangsoo ri nanu" da" nheigloem: ung: khoug: yo' myid soozoo: dangain" yo' dei byid: nyid we'. Nanu" gi hau: akhoug: moo ASEING da" Dang: Theing Kuid: yo' nyang: ri noku uri ci: da" gyeung" shang: jonu" gootu: dangain" ri yo" too' wa shid re" Noku Yhoem: Moo" ri koid shid" loo" loo: ge» ga: tid.