Read Lashi 1 KHOKHAM MHOOMYID: 23 Bible Online

1 KHOKHAM MHOOMYID: 23 - Lashi bible

1 KHOKHAM MHOOMYID: 23

¹David gi gye" mang: loo" lang" nyang: gi nya: zoo: Sholumon ri Israela khokham koid nhang: da:.

²Khokham David gi Israela vhujhung: yi khainjung yi Levi byu yi dangain" ri khe: zheing" yu da:.

³Nyang: gi soem" xi: zain yo' hau: tho' gyi: da" Levi byu yug gi yi dangain" ri byu zhayhen" koid: yu da:. Dangain" gi soem" moin shid khyeing" nghoid da:.

⁴Khokham phoo gi eig moin myid: khyeing" yug ri Noku Yhoem: Moo" koid moo" moo yu" gung" bang: khyo" koid nhang: lho: khyug khyeing" yug rigi lhid" xoem" o' tarha" agyi yi

⁵Myid: khyeing" yug gi goem loem moo" moo yoo voin yu wa yo' myid: khyeing" yug rigi khokham phoo hidsu" myidyung wigi byid: to" da" music jonu" joem ri ci: wigi ASEING ri coung" nghei wa moo" byid: to" ago".

⁶David gi Levi byu yiri nyangnu" kung: ri cang wigi Gershon- Kohad- Merari ga: soem" phung: kho' to" da:.

⁷Gershon gi Ladan yo' Shimi ga: da" yuggi zoo: eig yug yo" da:.

⁸Ladan gi Yehiela- Zetham- Yoela ga: da" yuggi zoo: soem" yug yo" wigi

⁹Houg: bang: gi Ladan da" amyed ashen yi kung: mo vhujhung: yi nghoid da:. (Shimi gi Shelomod- Haziela- Haran ga: da" yuggi zoo: soem" yug yo" da:.)

¹⁰Shimi gi zain nyid ri cang lho: Yahad- Zina- Yeusha- Beria ga: da" yuggi zoo: myid: yug yo" da:. Yeusha yo' Beria tang: gi amyed ashen myoo: sho' ayo" boem yoomo hau: tang: ri dakung: khyo" nghab boem ago".

¹²Kohad gi Amram- Izhara- Hebron- Uziela ga: da" yuggi zoo: myid: yug yo" da:.

¹³Nya: da" zooshid" yuggi zoo: Amram gi Arun yo' Moshe tang: nya: phoo nghoid da:. (Arun yo' nya: amyed ashen yigi gyeung" shang: jonu" joem ri apyaid atoo: moo zoem: ci: wa. ASEING ri noku jang" moo shoem: nam pyo: ja: nghe' ngei" wa. Nyang: ri dei byid: wa nya: myeing mo byumyu" yiri mainkaid byid: wa shid re" gootu: khyen: sain' to" zi shau" da:.

¹⁴Nghoid loug we' Mangso byu Moshe nya: yuggi zoo: yigi Levi byu yi moo bo nyid ago")

¹⁵Moshe gi Gershon yo' Eliaza ga: da" yuggi zoo: eig yug yo" da:.

¹⁶Gershon da" yuggi zoo: yi mo vhujhung: gi Shebuela nghoid da:.

¹⁷Eliaza gi Rehabia ga: da" yuggi zoo: dayug yo" da:. Nghoid loug we' Rehabia gi amyed ashen myoo" sho' yo" da:.

¹⁸Kohad da" zoolaid Izhara gi Shelomid ga: da" yuggi zoo: dayug yo" wigi akung: ako' yi da" vhujhung: nghoid da:.

¹⁹Kohad da" soem" yug ein: da" yuggi zoo: Hebron moo Yeria- Amaria- Yahaziela- Yekameam ga: da" yuggi zoo: myid: yug yo" da:.

²⁰Kohad da" myid: yug ein: da" yuggi zoo: Uziela moo Mikha yo' Ishia ga: da" yuggi zoo: eig yug yo" da:.

²¹Merari gi Mali yo' Mushi ga: da" yuggi zoo: eig yug yo" da:. Mali we' Eleaza yo' Kisha ga: da" yuggi zoo: eig yug yo" da:.

²²Nghoid loug we' Eleaza gi yuggi zoo: dayug we' ayoo"- myiyi: yi za: yo" wigi shid: lo" byug da:. Nya: myiyi: zoo: yigi nyangnu" da" yhoem: vhoo: yhoem: tho' mung" yi nghoid boem da" Kisha da" yuggi zoo: yi yo' lo, xo' boem ago".

²³Merari da" zoolaid Mushi gi Mali- Edera- Yeremod ga: da" yuggi zoo: soem" yug yo" da:.

²⁴Hid: bang: gi Levi kung: mo amyed ashen yi nghoid wigi akung: ako' khyo" yhoemkhung: khyo" nyangnu" yugkhang" moo" ri myeing zhayhen" lhid" to" ago". Nya: amyed ashen yi mo yugkhang" moo" eig xi: zain yo' hau: tho' gyi: bang: gi ASEING da" Noku Yhoem: Moo" mo moo" zoo" moo moo" voin wa gamboem yo" da:.

²⁵David gi «Israela da" ASEING Mangsoo gi nya: byumyu" yiri ngei pyo: yug yo khyoo: ri byid: too" bye:. Houg: lho: nyang: nyang: we' Yerusalem moo apyaid atoo: moo nyid nyid wa.

²⁶Houg: lang" Levi byumyu" yi shid re" ASEING shidkhoin" zoem" ri yo' noku jang" moo ci: da" jonu" dangain" ri vu ca" loo: wa zi anghoid» ga: tid da:.

²⁷David gi lo" thang pyeing: dang: ri ayang: zhug wigi Levi byumyu" yi dangain" gi nyangnu" apyaid eig xi: zain byeung" lang" hau: moo" koid wa shid re" myeing zhayhen" kaid ago".

²⁸Houg: lho: vhoo: mo moo" joem ri yoovoin byid: boem ago". Hau: moo" joem gi Arun da" amyed ashen khainjung yiri Noku Yhoem: Moo" mo noku coung" mo" moo pang" byid: wa hau: shava jang: yo' yab joem ri yu" coung: wa gyeung" shang: da" ja: dangain" ri ayounglho' abui" sho' zoem: wa.

²⁹Mangsoo ri shugbyid: da" zooyho'- xoin" khyo" ci: da" cen: moin"- doocid" abo da" zooyho'- bung: to" da" xoin" to' zooyho'- cen: moin" yo' zhainloin: xu: ri lheug wa yo' Noku Yhoem: Moo" mo xoin" joem ri leug da" moo" joem ri yoovoin yu da:.

³⁰ASEING ri nab soin: khang" moo" myen" thang: khang" moo" coung" byid: wigi phung" yoeb tu: shab byid: wa.

³¹Dougno: Bidnyid lhoo' xain" pui"- gootu: pui" bidnyid moo ASEING xoin" ngei" byid: ziri nghe' ngei" byid: wa moo" moo yoovoin foin: too" shoug" ago". Lheing: khang" moo" he: moo" ri zei: wa Levi byu khamyhoo' yug ga: da" tarha" ri jhug za: koid to" wigi yoovoin foin: too" shoug" ago". Levi byu yigi ayo, dangain" moo ASEING ri dei byid: da" moo" ri voin vu, wa yoovoin foin: too" shau" boem ago".

³²Nyangnu" gi ASEING shidkhoin" zoem" yo' Noku Yhoem: Moo" ri yu" coung: wa yo' Noku Yhoem: Moo" mo noku jang" moo Arun da" amyed ashen khainjung yiri yo' nyangnu" da" bidnoem yiri pang" thoug byid: wa yoovoin foin: too" shoug" ago".