Read Lashi 1 KHOKHAM MHOOMYID: 26 Bible Online

1 KHOKHAM MHOOMYID: 26 - Lashi bible

1 KHOKHAM MHOOMYID: 26

¹He: joem gi Noku Yhoem: Moo" lhoug zung" bang: khyo" dei byid: boem da" Levi byu yi shid re" gam byid: da" moo" zoo" joem nghoid. Kora akung: ako' mo Asab da" yhoemkhung: mo Kore da" yuggi zoo: Meshelemia ga: da" byu dayug nyid.

²Nyang: gi yuggi zoo: nyid yug yo" wigi houg: bang: gi apyaid khyo" cang lho: Zekharia- Yediaela- Zebadia- Yathniela

³Elam- Yehohanan yo' Eliehoenai bang: nghoid.

⁴Houg: moo Obed Edam ga: su: we' nyid. Nyang: ri Mangsoo mainkaid byid: lho: yuggi zoo: shid yug yo" wigi nyangnu" apyaid khyo" cang lho: Shemaia- Yehozabad- Yoa- Sakha- Nethanela

⁵Amiela- Ishakha yo' Peullethai bang: nghoid.

⁶Obed Edom da" nya: yuggi zoo: mang: moo" yug Shemia gi Othni- Rephaela- Obed- Elzabad- Elihu yo' Semakhia ga: da" yuggi zoo: khyug yug yo" da:. Nyangnu" gi doid bue" da" bang: nghoid boem yoomo gye" yhouggyen: da" byu yi nghoid ago". Hau: thang: mo eig yug gi goo" ki" lid bue" doid bang: nghoid.

⁸Obed Edom da" yhoemkhung: gi he: moo" zoo" shid re" gye" bue" da" byu dangain" khyug xe: yug shugbyid: to" da:.

⁹Meshelemia da" yhoemkhung: gi bue" da" byu daxe: shed yug shugbyid: to" da:.

¹⁰Merari akung: ako' mo Hosa gi yuggi zoo: myid: yug yo" da:. Houg: bang: gi Shimri (Nyang: gi zooshid" anghoid loug we' nya: pho wigi vhujhung: koid nhang: da)

¹¹Hilkia- Tebalia yo' Zekharia bang: nghoid. Hosa yhoem: byu yi mo daxe: soem" yug gu: dangain" bang: gi Noku Yhoem: Moo" lhoug zung" bang: nghoid ago".

¹²Noku Yhoem: Moo" lhoug zung" bang: we' yhoemkhung: joem ri cang wigi phung: joem kho' to" ago". Nyangnu" gi gootu: Levi byu yi yhang: ti" Noku Yhoem: Moo" mo moo" zoo" moo moo" voin vu, nyid ago".

¹³Yhoemkhung: byu yoem: ri ayu" loo: za: yhoemkhung: khang" moo" gi khoem" moo" kha: loem: ri yoovoin yu wa ein: ziri me" lab boem ago".

¹⁴Shelemia gi bidthu shoid khoem" moo" moo me" eung: da:. Khanham we' ge da" phajhi" ri byid: su: nya: yuggi zoo: Zakharia gi mougzhung: khoem" moo" moo me" eung: da:.

¹⁵Obed Edom gi mougpyi: shoid khoem" moo" moo me" eung: wigi nya: zooshang: yigi zi too" yab joem lhoug zung" wa me" eung: da:.

¹⁶Shupim yo' Hosa tang: gi bidvang shoid khoem" moo" yo' khyoo: adang khaid moo jo, da" khoem" moo" moo me" eung: da:. Zung" lhoug moo" ri ayo, kho' to" wigi daphung: thang: daphung: kho' too" byid: da:.

¹⁷Nyid" khang" nyid" bidthu shoid moo khyug yug- mougzhung: shoid moo myid: yug- mougpyi: shoid moo myid: yug lhoug zung" boem ago". Zi too" yab dayab moo lhoug zung" byu eig yug yug khyo" wigi nyid" khang" nyid" byu myid: yug zung" ago".

¹⁸Bidvang shoid anam moo jo, da" maindaid moo khyoo: moo yo' maindaid moo nyang: eig yug yug wigi lhoug zung" bang: myid: yug nyid da:.

¹⁹He: zigi Kora akung: ako' bang: yo' Merari akung: ako' bang: ri gam byid: to" da" lhoug zung" moo" nghoid da:.

²⁰Nyangnu" da" Levi mang: nhung" gootu: bang: gi Noku Yhoem: Moo" ngei jhi: yo' Mangsoo ri shugbyid: da" jhungshug joem to" to" da" yab joem ri yu" zung" da" moo" ri yoo voin yu bang: nghoid.

²¹Gershon da" yuggi zoo: yi mo dayug nghoid da" Ladan gi nya: yuggi zoo: Yehiela bo bo wigi yhoemkhung: myoo" sho' da" phoug" phyid" nghoid da:.

²²Ladan da" yuggi zoo: gootu: eig yug nghoid da" Zetham yo' Yoela tang: gi Noku Yhoem: Moo" ngei jhi: yo' zi too" yab joem ri yoovoin yu boem ago".

²³Moo" zoo" ri Amram- Izhara- Hebron yo' Uziela bang: da" amyed ashen yiri we' kho' gam byid: ago".

²⁴Moshe da" yuggi zoo: Gershon da" kung: mo Shebuela gi Noku Yhoem: Moo" ngei jhi: ri yoovoin yu da" zoug: moo" nghoid.

²⁵Gershon da" nya: nhung" Elieza khyo" nyang: gi Shelomid yo' bidnoem xo' da:. Elieza gi Rehabia da" nya: phoo- Rehabia gi Yeshia da" nya: phoo- Yeshia gi Yoram da" nya: phoo- Yoram gi Zikhri da" nya: phoo- Zikhri gi Shelomid da" nya: phoo nghoid da:.

²⁶Shelomid yo' nya: yhoemkhung: byu yigi khokham David- yhoemkhung: vhujhung: yi byumyu" kung: vhujhung: yi yo' gyi zoug: yi wigi Mangsoo ri shugbyid: da" jhungshug dangain" ziri yu" coung: wa moo" ri yoovoin yu bang: nghoid.

²⁷Nyangnu" gi gyipui" moo shau" shoem" yu da" lanyhoeb joem mo dayham" ri yu wigi Noku Yhoem: Moo" moo ci: wa shid re" shugbyid: ago".

²⁸Shelomid yo' nya: yhoem: byu yigi lapi: Samuela- khokham Sholu- Nera da" yuggi zoo: Abna- yo' Zeruia da" yuggi zoo: Yoab bang: yu ri" byid: da" jhungshug joem bo bo wigi Noku Yhoem: Moo" moo ci: wa shid re" shugbyid: bye: da" jonu" ja: khang" moo" ri yu" coung: wa yoovoin yoo" bang: nghoid.

²⁹Izhara da" amyed ashen yi mo Khenania yo' nya: yuggi zoo: yigi vhoebkhang" moo" zoo" nghoid boem da" lhid" xoem" moo"- Israela byu yi da" moo" zoo" ri tid sho' byid: da" moo" kho' gam byid: to" zi shau" ago".

³⁰Hebron da" amyed ashen yi mo Hashabia yo' dangain" bang: myeing gyi: da" nya: bidnoem dakhyeing" nyhed shoo: yug gi Israela mung" Yodan gyung: bidvang shoid mo laloem lakhoug: moo" dangain" yo' mung" vhoeb moo" dangain" voin vu, wa yoo voin byid: to" boem ago".

³¹Yeria gi Hebron da" amyed ashen yi mo vhujhung: nghoid da:. David khokham koid zi myid: xi: zain ein: zain moo Hebron da" amyed ashen yi da" yhoemkhung: yiri myid: sho: yu" wigi he: yhoemkhung: yo' sen: da" myeing gyi: gyizoo: yigi Gilead moug: Yazera mo nyid nyid boem ziri shau" myang boem ago".

³²Khokham David gi Yeria da" bidnoem yi mo myeing gyi: da" yhoemkhung: vhujhung: eig khyeing" nyhed shoo: yug ri khyen: yu lho: Ruben- Gad- Bid thu shoid Manashe yi da" mougmyid nghoid da" Israela mung" Yodan gyung: bidthu shoid laloem lakhoug: moo" dangain" yo' mung" vhoeb moo" dangain" ri voin vu, wa yoovoin byid: to" boem ago".