Read Lashi 1 KHOKHAM MHOOMYID: 28 Bible Online

1 KHOKHAM MHOOMYID: 28 - Lashi bible

1 KHOKHAM MHOOMYID: 28

¹Khokham David gi Israela zoug: yi dangain" ri Yerusalem khyoo: zeing: foem: ri" wa shid re" amyeing" byid: kaid da:. Hougsu" yoomo byumyu" kung: mo zoug: yi Mungdain: moo yoovoin yu vhoebkhang" nyid da" zoug: yi akung: ako' vhujhung: yi khokham yo' nya: zoo: yi seing: da" jonu" yo' gougnyhoug ri yu" zung" nyid bang:- khokham kho" mo zoug: yi dangain"- gyizoug: yi yhouggyen: da" byu yi Yerusalem moo zeing: foem: re" ago".

²David gi nyangnu" shidkhoin" moo yab jo, lho: mungdang: tid da:. Nyang: tid zigi «Nga" mung" byu yi we"- nga" dang: ri: tam" gyo: yu" ge'. Ngoo gi Mangsoo ASEING da" khyid: nang: jang: nghoid da" Dang: Theing Kuid: shid re" yhoem: daloem: koid nau da:. Ngoo gi nyang: ri ngi: shab wa da" Noku Yhoem: Moo" shid re" soin' nyheing too" bye:.

³Nghoid loug we' Aseing gi ngoo hau: ziri koid wa jang" mo toem' pyam da:. Ciwim gari ngoo gi gyizoo: nghoid lho: suid" myoo: sho' shoin: nhang: pyam yoomo nghoid da:.

⁴Israela da" ASEING Mangsoo gi Israela byumyu" yiri apyaid atoo: vhoeb wa shid re" ngoo ri we' nga" amyed ashen yiri we' khyen: yu bye:. Nyang: gi vhujhung: koid nhang: wa shid re" Yuda byumyu" kung: ri khyen: yu lho: Yuda byumyu" mo nga" phoo yhoemkhung: ri nyang: khyen: yu da:. Hau: yhoemkhung: byu dangain" mo ngoo ri khyen: yu wa vho: lho: Israela dangain" ri vhoeb da" khokham ngoo ri koid nhang: da:.

⁵Nyang: gi ngoo ri yuggi zoo: myoo: sho' byid: wigi houg: bang: dangain" mo nyang: gi ASEING da" mungdain: Israela ri vhoeb wa shid re" Sholumon ri khyen: yu da:.

⁶ASEING gi ngoo ri «Re" yuggi zoo: Sholumon gi nga" Noku Yhoem: Moo" koid wa su: nghoid da:. Nga" zoobui" wa shid re" nyang: ri ngoo khyen: yu lho: ngoo gi nya: phoo bui" wa zi nghoid.

⁷Nyang: gi akhid" yhang: ti" nga" tarha" joem yo' amyeing" dang: joem ri goolho' za: xo' wigi cang nyid nghoid rigi ngoo gi nya: mungdain: ri apyaid atoo: moo geing: teing jo, nhang: wa» ga: tid da:.

⁸«Houg: yoomo akhid" nga" byumyu" yi we"- ngoonu" Mangso shidkhoin" moo yo' he: zeing: foem: nyid da" ASEING byumyu" Israela byumyu" yi shidkhoin" moo ngoonu" ASEING Mangsoo ngoonu" ri amyeing" byid: to" da" gu: ja: khang" moo" ri goolho' za: cang yhe: nyid wa shid re" tid nau. Houg: lang" he: ge da" mung" ri nanu" xo' lho: yo" seing: yu lho: hau: ziri daxeig thang: daxeig apyaid atoo: yo" thid vhoeb yhe: loo" wa zi nghoid.

⁹Houg: lho: nyang: Sholumon ri «Nga" zoo: we"- re" phoo Mangsoo ri yhen: yu lho: nheigloem: dakhaid za: yo' oung: lung bu myid yo' nyang: ri dei byid: wa shid re" ngoo tid jhoin" da:. Nyang: gi ngoonu" da" myid soin: khyoo: yo' myid vho: khyoo: dangain" ziri se' da:. Nang nya: jhang yhe: nghoid rigi nyang: nang ri khab yu zi nghoid. Nghoid loug we' nang nyang: mo gang: lo" byug nghoid rigi nyang: gi nang ri apyaid atoo: she: pyam loo wa.

¹⁰ASEING gi nang ri nya: gyeung" shang: da" Noku Yhoem: Moo" ri koid wa khyen: to" khyoo: ri nang myid boin: ca" da:. Akhid" hau: ziri koid we' myid phyed wigi koid we"» ga: tid da:.

¹¹David gi Noku Yhoem: Moo" mo yhoem: joem dangain"- jonu" too" yab joem gootu: yab joem yo' yooboo khyoid pyam byid: da" gyeung" shang: thang joyoo shid re" soin: yung to" khyoo: dangain" Sholumon ri byid: da:.

¹²Nyang: gi nya: myid khoug: moo bo da" shava jang: joem hau: ziri lheing khoem to" da" yab joem Noku Yhoem: Moo" mo jonu" joem yo' ASEING ri shugbyid: da" jhungshug joem too" wa jonu" too" yab joem shid re" soin' yung to" da" khyoo: joem ri we' byid: da:.

¹³David gi khainjung yi yo' Levi byumyu" yiri nyangnu" moo" zoo" yo' sen: khyoo:- Noku Yhoem: Moo" mo moo" zoo" yo' sen: khyoo:- Noku Yhoem: Moo" mo oug" khu lang: bain dangain" yo' sen: khyoo: mo soin: yung: da" moo" ri we' nyang: ri byid: da:.

¹⁴Nyang: gi oug" khu lang: bain joem myi kug loem: khang" moo" yo' myikug tang joem ngei zoobui" joem yo' Mangsoo ri ngei" byid: da" zooyho' joem to" da" sheing: zoobui" khang" moo koid jang" moo ngei yo' sheing: khamyhoo' khasu" ci: wa khyoo: ri tid shed kyo" da:.

¹⁷Nyang: gi langhui"- khu yo' jhuang: joem koid jang" moo sheing: gyeing" khamyhoo' ci: wa khyoo:- bain joem koid jang" moo sheing: yo' ngei khamyhoo' ci: wa khyoo:-

¹⁸Shoem: nam pyo: ja: nghe' ngei" da" phoin:- ASEING da" Dang: Theing Kuid: atho' moo pyo: nghoeb to" da" dung dab dei noem shid re" rheing" koid jang" moo sheing: gyeing" khamyhoo' ci: wa khyoo: ri tid shid kyo" da:.

¹⁹Khokham David gi" «He: gu: yo" koid bui" wa shid re" ASEING wigi nyang: ngoo ri byid: to" da" jhau" shid khyoo: ri cang wigi lhid" to" da" soin' yung to" jang" moo he: gu: dangain" bo da» ga: tid da:.

²⁰Khokham David gi nya: yuggi zoo: Sholumon ri «Voem" myid yo' myid phyed we'. Moo" zei: shid we' ce: ja: wigi we' nang ri atoem' pyam nhang:- ngoo dei byid: da" ASEING Mangsoo gi nang yo' dage" nghoid loo wa. Nyang: gi nang ri ashe: pyam too" wa. Nyang: gi nya: Noku Yhoem: Moo" koid da" moo" bain da" ayo, ju" sho' nang yo' dage" nyid nyid wa.

²¹Khainjung yi yo' Levi byu yigi Noku Yhoem: Moo" mo moo" zei: wa shid re" moo" foin: too" gu: nghoid ago". Ja: khang" moo" ri se' jhang: boem da" moo" zei: byu yigi nang ri pang" thoug wa myid vho: boem ago". Byumyu" yi dangain" yo' nyangnu" da" vhujhung: yi dangain" gi re" amyeing" dang: akhoug: moo nyid nyid boem ago"» ga: tid da:.