Read Lashi 1 KHOKHAM MHOOMYID: 29 Bible Online

1 KHOKHAM MHOOMYID: 29 - Lashi bible

1 KHOKHAM MHOOMYID: 29

¹Khokham David gi phung: shava dangain" ziri tid fu zigi «Nga" zoo: Sholumon gi Mangso wigi khyen: yu too" su: nghoid. Nghoid loug we' nyang: gi akhid" apyaid ngi shi" ziyo' thung" shau" khyoo: amyoo: shi" nghoid da:. Zei: loo" wa moo" gi gye" azhang myang: da:. Ciwim gari: he: zigi byu yi shid re" khokham kho" anghoid ASEING Mangso da" Noku Yhoem: Moo" nghoid da:.

²Ngoo gi Noku Yhoem: Moo" shid re" seig voo: zi joem ri yoem: kaid wigi soin' nyheing too" bye:. Hau: joem gi sheing:- ngei- gyid: mid"- joto'- seigthi"- phoug" dab da" lug joem lug nyoug joem shoung: yhoung wa shid re" lug joem lug phyu: leung" joem nghoid da:.

³He atho' mo gu: ri ngoo byid: too" bye:. Ngoo gi Mangso Noku Yhoem: Moo" ri jheddab da" gang mo ngoo nya: jonu" mo ngei yo' sheing: ri byid: bye:.

⁴Ngoo gi Noku Yhoem: Moo" pyi yam joem ri shoung: yhoung wa shid re" sheing: gyeing" 100 tain: jain"- ngei gyeing" 240 tain: jain" byid: bye:.

⁵Houg: lho: lo, moo" dab bang: moo" zei: wa zi dangain" ziri ngoo byid: bye:. Akhid" ASEING ri myid boo tung" byid: nau byu hang" nyid la"» ga: myid:.

⁶Hau: thang: akung: ako' vhujhung: yi byumyu" yi mo zoug: yi gyizoug: yi khokham kho" mo jonu" ri vhoeb da" vhu" shi: bang: gi Noku Yhoem: Moo" koid da" moo" zoo" shid re" vhoo: bo ziyo' dakhyo" byid: bye:.

⁷Hau: joem gi sheing: 170 tain: jain"- ngei 340 tain: jain"- gyid: mid" 620 tain: koo: yo' joto' 3400 tain: jain" nghoid da:.

⁸Phoug" dab da" lug ri yoo" bang: we' Gershon akung: ako' mo Levi byu Yehiela yoovoin yu zei nyid da" Noku Yhoem: Moo" jonu" zoem: su: jhang re" kaid boem ago".

⁹Byumyu" yi we' ASEING ri kang: lung bu tung" byid: boem wigi nyangnu" myoo" sho' shau" byid: wigi pyo: boem ago". Khokham David we' atho' tid loo: sho' pyo: da:.

¹⁰Shava phung moo" shidkhoin" moo: khokham David gi ASEING ri coung" da:. Nyang: «Ngoonu" da" phoug" phyid" Yaku da" ASEING Mangsoo we"- Nang gi apyaid atoo: moo: coung" nghei zi shau" baja" o".

¹¹Nang gi gyi: sheung: su:- yoem so' boo su:- phung" yoeb gyi: su:- khid su:- phung gyi: su: nghoid da:. Mougkhung: yo' myidjang tho' moo: jo, moo jo, gi nang seing: zi nghoid da:. Nang gi dangain" ziri vhoebkhang" nyid da" myhang: thang khokham nghoid da:.

¹²Ziyoo jonu" yoo" zoo: yoo" shug khyoo: dangain" gi nang mo ju" re" zi nghoid. Nang gi ja: khang" moo" ri yoem: yo' yoem: so' wigi vhoebkhang" da:. Nang gi yugkhang" moo" ri yo" gyi: nhang: su: nghoid.

¹³Akhid" ngoonu" Mangsoo we"- ngoonu" nang ri jeju" boin: so" wigi re" phung" yoeb gyi: da" myeing ri coung" o".

¹⁴Nghoid loug we' nga" byumyu" yi yo' ngoo gi nang ri gyeing" nyang: ci: ase' byid:- ciwim gari: ja: khang" moo" gi nang mo ju" re" da" jhungshug nghoid da:. Nang moo: jo, gu ri za: ngoonu" date: shugbyid:-

¹⁵O" ASEING we"- ngoonu" gi ngoonu" phoug" phyid" yi yhang: ti" pyoung" she: loo" shau" wigi being" voo yi su" ngoonu" nyid lai lo ziri: nang se' da:. Ngoonu" apyaid gi lid lo" byug da" bid yoeb yo' du wigi ngoonu" gi shid: jang" mo ayo" phang: loid nghoid da:.

¹⁶Ngoonu" ASEING Mangsoo we"- ngoonu" gi re" gyeung" shang: myeing ri ngi: shab byid: wa Noku Yhoem: Moo" koid wa shid re" he: jonu" dangain" ri ci: zheing" re" zi nghoid. Nghoid loug we' hau: gu: dangain" gi re" jang" mo ju" re" wigi dangain" gi nang seing: zi nghoid.

¹⁷Nang gi yugkhang" moo" da" nheigloem: ri jham" yu" wigi nheigloem: phyu: bang ri nang vho: ngei ziri ngoo se'. Ngoo gi deingmain" da" myid- nheigloem: phyu: myid yo' he: gu: dangain" ri oung: lung bu tung" nang ri byid: too" bye:. Hid moo: zeing: foem: nyid boem da" re" byumyu" yigi nang ri shugbyid: wa khayhi' ngei bu: oung: loug boem ziri ngoo myang bye:.

¹⁸Ngoonu" da" phoug" phyid" Abraham- Isag- Yaku bang: da" ASEING Mangsoo we"- re" byumyu" yi da" nheigloem: khoug: moo: hid: su" dang: zung" da" myid ri khanham we' zoem: ci: byid: la. Nang ri khanham we' jhug zug da" myid ri kaid byid: la.

¹⁹Re" amyeing" dang: ja: khang" moo" ri tam" gyo: cang yhe: myid yo' he: ngoo soin' nyheing to" da" Noku Yhoem: Moo" koid moo" ri oung: khoug: nheigloem: dangain" yo' koid wa myid nga" zoo: Sholumon ri byid: we'» ga: coung" bye:.

²⁰Hau: thang: David gi byumyu" yiri "Nanu" ASEING Mangsoo ri coung" ge' ” ga: amyeing" byid: da:. Houg: lho: Shava phung: dangain" gi nyangnu" phoug" phyid" yi da" ASEING Mangsoo ri coung" boem ago". Nyangnu" gi goeb pid lho: ASEING ri ngi: shab byid: da:. Khokham phoo ri we' ngi: shab byid: da:.

²¹Thang: nyid" ri nyangnu" gi xoin" khyo" gougnyhoug ri said wigi hau: joem ASEING ri shugbyid: lho: byumyu" yiri byid: zho" da:. Hau: tho' ago"- nyangnu" gi nuloo: dakhyeing" du:- yang loo: dakhyeing" du:- yang nu" dakhyeing" du: ri phoin: tho' moo: du: goin" nghe' ngei" xoin" khyo" shugbyid: da:. Nyangnu" gi zabyid yhid: ri we' shugbyid: da:.

²²Hougsu" yoomo nyangnu" gi hau: bidnyid moo: ASEING shidkhoin" moo zoo: gi shug gi gye" ngei pyo: boem ago". Nyangnu" gi eig lheing: ein: lheing: Sholumon khokham ga: tid fu" ago". Nyangnu" gi ASEING myeing khyo" nyang: ri nyangnu" da" vhoebkhang" su: khyo" xu: joid byid: lho: Zadog ri we' khainjung khyo" xu: joid byid: boem.

²³Hougsu" yoomo Sholumon gi ASEING wigi zhug to" da" khokham zhungtang moo: nya: pho David khoo: moo: khokham xo' koid da:. Nyang: gi oung: doid da" khokham nghoid wigi Israela damyu" goin" nya: dang: ri tam" gyo: boem ago".

²⁴Zoug: yi gyizoo: yi yo' David da" yuggi zoo: yi gootu: bang: dangain" lang" Sholumon ri khokham khyo" jhug zug wa dangsoo" byid: ago".

²⁵ASEING gi shava byu phung: goin" ziri Sholumon shidkhoin" moo gyoug phoug" wigi yab jo, nhang: lho: Israela mung" ri vhoebkhang" yu" da" khokham yi gootu: dangain" tho' nyang: ri je phung" yoeb byid: da:.

²⁶Yese da" yuggi zoo: David gi Israela mung" ri vhoebkhang" zi

²⁷myid: xi: zain nghoid da:. Nyang: gi Hebron moo: nyhed zain- Yerusalem mo: soem" xe: soem" zain vhoeb da:.

²⁸Nyang: gi apyaid gyi:- yoo" zoo: yoo" shug wigi phau" myang: shau" kham thang: ri shid: lo" da:. Hau: thang: nya: zoo: Sholumon gi nya: khoo: moo: khokham xo' koid da:.

²⁹Khokham David da" mhoomyid: xang: shi" mo bain sho' ri Lapi: soem" yug nghoid da" Samuela- Nathan yo' Gad bang: da" lhid" xoem" pug moo: lhid" xoem" to" da:.

³⁰Hau: lhid" xoem" joem moo: nyang: khasu" vhoebkhang" khyoo:- nyang: khayhi' yoem: so' bo khyoo:- nyang: moo: we' Israela mung" moo: we' lheing khoem moo: jo, da" mungdain: joem moo we' bue" lo da" khyoo: joem bo da:.