Read Lashi 2 KHOKHAM MHOOMYID: 17 Bible Online

2 KHOKHAM MHOOMYID: 17 - Lashi bible

2 KHOKHAM MHOOMYID: 17

¹Yehoshaphad gi nya: phoo Asa da" khoo: moo khokham xo' koid wigi Israela ri nya: gyi koid thougtheung jang" moo yoem: bo sho' koid da:.

²Nyang: gi gyidab joem ri Yuda gyidab voomoo" joem moo Yuda siyoo voogung joem mo Asa wigi seing: yu to" da" Ephrim mo voogung joem moo nyhid: to" da:.

³Yehoshaphad gi nya: phoo da" apyaid xang: shi" du mo khooshid: ri cang ziyo' Bala ri ano' yoomo ASEING gi nyang: ri mainkaid byid: da:.

⁴Nyang: gi nya: pho da" Mangsoo ri dei byid: da:. Mangso da" amyeing" dang: joem ri tam" gyo: cang yhe: da:. Houg: lho: Israela khokham yi koid da" khyoo: ri acang koid nghoid da:.

⁵ASEING gi: Yehoshaphad ri Yuda mungdain: ri teing za: zoem: ci: wa yoem: byid: da:. Mung" byu yi dangain" bang: nyang: ri jhungshug joem re" byid: ago". Houg: lho: nyang: gi jonu" yo" ziyo' gye" ngi: shab zi shau" da:.

⁶Nyang: gi ASEING ri dei byid: jang" moo phau: khuang lho: tungbau yu phara" joem ri no' da" joyoo joem dangain" ri yo' Yuda mung" moo jo, da" yu phara" myhi' Ashera da" soolhoo: joem dangain" ri phyo' sain' pyam da:.

⁷Nyang: vhoebkhang" zi soem" zain ein: zain moo nyang: gi Yuda mung" mo voomoo" joem ri yhe: jhau" shed wa shid re" vhoo: mo gyizoug: yiri nhang: kaid da:. Houg: bang: gi Benhaila- Obadia- Zekharia- Nethanela- Mikha bang: nghoid ago".

⁸Nyangnu" ri Levi byu goug: yug yo' khainjung eig yug wigi shu" yhe: ago". Levi byu yigi Shemaia- Nethania- Zebadia- Asahela- Shemiramod- Yonathan- Adoniya- Tobiya- Tobadonia nghoid wigi khainjung gi Elishama yo' Yehoram bang: nghoid ago".

⁹Nyangnu" gi ASEING da" tarha" mougsoug" pug ri yu voin lho: hau: ziri Yuda mung" byu yiri jhau" shid zoo" re Yuda mung" mo voomoo" joem dangain" khyoo: jang: sho' yhe: lo" ago".

¹⁰ASEING gi: loem: lheing khab' mo mungdain: joem dangain" ri khokham Yehoshaphad yo' gyi zain: wa shid re" gyoug nhang: da:.

¹¹Philisti byumyu" dayham" gi Yehoshaphad ri ngei yo' sheing: myoo" sho' yo' gootu: jhungshug joem myoo" sho' ci: ri" byid: wigi Arab byu yigi nyang: ri yang 7,700 du:- coidbaid 7,700 du: re" byid: ago".

¹²Houg: yoomo Yehoshaphad gi xo' lho: je gyi: sheung: lo lho: yoem: so' je bo re" da:. Nyang: gi Yuda mung" goin" moo gyidab yo' voomoo" joem ri zhug lho:

¹³Hau: voomoo" joem moo zookhoo: myoo" sho' young: to" da:. Nyang: gi Yerusalem moo nyangnu" akung: ako' ri cang wigi myeing gyi: da" gyizoug: yiri nyhid: to" da:.

¹⁴Adna gi Yuda akung: ako' mo gyi: phung: joem da" gyizoug: nghoid da:. Nya: akhoug: moo gyizoo: 300,000 yug nyid da:.

¹⁵Azhang eig loem: ein: da" gyizoug: gi Yehohanan nghoid wigi gyizoo: 280,000 yug yo" da:.

¹⁶Azhang soem" loem: ein: da" gyizoug: gi Zikhri da" yug gi zoo: Amasia nghoid lho: gyizoo: 200,000 yug yo" da:. (Amasia gi ASEING ri dei byid: wa nyang: nya: myid yo' shugbyid: da:.)

¹⁷Benyamin akung: ako'' mo gyiphung: joem da" gyizoug: gi Eliada nghoid wigi myeing gyi: da" gyizoo: dayug nghoid da:. Goo yo' lid: ci: da" gyizoo 200,000 yug ri vhoeb da" gyizoo: nghoid da:.

¹⁸Nya: vhoo: mo azhang eig loem: ein: da" gyizoug: gi Yehozabad nghoid lho: gyikhaid pui" shid re" gyikhen ci: da" byu 180,000 yug nyang: yo" da:.

¹⁹He: gyizoo: yigi Yerusalem mo khokham ri dei byid: da:. Hau: tho' agoo" gyizoo: gootu: yiri gi Yuda mung" mo gyidab voomoo" joem gootu: moo we' nyhid: to" da:.